06-22-2012 08:32 PM


سيد نافع نلحس كوعنا ولا تلحس كوعك .. نحن مرقنا

عمر الفاروق عبد الله
[email protected]

يا سيد نافع نحن مرقنا من كل فج وصوب من المنتديات من المرخيات .. من الثورة ,, من الكلاكلات ؟؟ من بري الشريف والجريف .. من امبدة وابو عنجة .. من بورتسودان من مدني وحنتمدد لنملآ كل السودان شايلين كي بوردات وماوسات وقبضات تلوح لفجر قادم .. يا نافع نحن مرقنا نلحس كوعنا ولا تلحس كوعك ؟ نحن محروقين من زمان .. والقصة ما قصة بنزين ولا جازولين ولا سكر ولا عجالي! القصة انكم اتحديتونا وقلتوا علينا مناضلين برندات ومنتديات وما شبه النزول للشارع .. نزلنا الشارع زارع وعامل وطالب وصانع .. ولن نرجع ولن نتراجع .. زادنا اكتوبر ومارس ماسك كتف ابريل .. مرقنا نشيله حقوقنا حمرة عين يا ابو العفين! .. حقوقنا الضايعة ليها سنين اكتر من عشرين .. شردتونا في بلاد الله وعاوزين نرجع .. جوعتونا وعايزين نشبع .. قسمتوا بلا دنا وخليتوها زي زول السكري المقطوع الرجلين ,, همشتوا الغبش في الجبال وكردفان والنيل الازرق .. وبعتوا الارض للحبشة الفشقة .. ولمصر حلايب وشلاتين ومعاها من الفدادين مليون وللسعودية مليونين ولقطر جزء من بحري .. حتي شارع النيل بعتوه.. وعشان بلادنا ما تصبح جتة بلا راس وخوفاً من ان تبيعونا نحن كمان نحن مرقنا تلحس كوعك ولا نلحس كوعنا .. هدفنا سيد نافع اكبر من محروقات وسكر هدفنا رحيلكم لمدافن التاريخ بعد حسابكم العسير معانا بعد ده باركوها مافي .. مرقنا نرجع مالنا المنهوب .. ومشروع الجزيرة العملاق والسكة حديد والنقل النهري ونتقاسم مع اهلنا في الجنوب البترول ونتسخرج خيرات دارفور مع اهلها الطيبين ونقرا تاريخ السلطنة الزرقا ونغني مع ود سالم مكتول هواك يا كردفان .. مرقنا وعصينا وشلنا عصينا والما عاوزنا ما يبارينا .. شعاراتنا سودانية مية المية .. للمطاطي ما حنطاطي والرصاص لن يفنينا ومليون شهيد لسودان جديد .. وطير طير يا بشير .. سقطت سقطت يا كيزان .. فشلت فشلت علي عثمان .. والكايسين للبديل .. البديل انت وانا هي وهو .. لا إقصاء ولا استحواذ .. السودان يسع الكل .. إلا من نهبوه وقسموه وكادوا يضيعوه.
مرقنا سيد نافع نلحس كوعنا و لا تلحس كوعك؟ برامجنا جاهزة:
إسقاط نظام فاشل .. محاسبة ومحاكمات عادلة .. حل مشاكل الهامش في كل انحاء السودان .. العمل مع دولة الجنوب نحو سودان كونفدرالي .. علاقات خارجية معافاة تصب في مصلحة السودان .. مشاركة الكفاءات من مختلف التخصصات في وضع الخطط لتنمية وبناء السودان مع معالجة مشاكله المزمنة في الصحة والتعليم والسكن والمعيشة وغيرها من البرامج التي نصبو من خلالها ليستعيد السودان عافيته بعد إصابته بمرض عضال طيلة 23 عام وكاد ان يموت بالسكتة الكيزانية وعلينا منحه قبلة الحياة .

تعليقات 13 | إهداء 1 | زيارات 4479

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#402370 [abusabeeb]
0.00/5 (0 صوت)

06-23-2012 04:35 PM
ابوالعفين كل ثائر مجهز ليك عود الظاهر نحنا لمانجي مابنلحق حاجة لدي طلب واحد منك ارجوك ان تركز وماتجرس

زي القذافي..


#402368 [المهاجري]
0.00/5 (0 صوت)

06-23-2012 04:32 PM
ون تو ابو العفين دقو ،،،،، ون تو ابو العفين اكسرو .... ما أروعها من لوحة تلك التى تحتوي صورة نافع وهو مجنزرا ،،،، مصفد الايادي فى قفص الاتهام ،،، دا طبعا لو الثوار أدوهو فرصة لحدى ما يصل القفص


#401926 [ابو حامد]
3.00/5 (1 صوت)

06-23-2012 11:31 AM
مقالة مكتملة ولامه كل الوجعه


#401893 [محسي حر]
0.00/5 (0 صوت)

06-23-2012 11:13 AM
نحن مرقنا .. مرقنا مرقنا..

نحن مرقنا مرقنا مرقنا .. ضد الناس السرقو عرقنا..

ما للسكر و البنزين .. مرقنا عشان تجار الدين..

يا الماهيتك كم مليون .. نحن الشعب البات مديون..

مرقنا عشان الوطن الراح .. و ما برجعنا الليلة سلاح..

ضد العسكر و البنبان.. مرقنا عشانك يا السودان..

حتمشي مننا وين يا ابو العفين


#401437 [احمدكامل]
0.00/5 (0 صوت)

06-23-2012 02:24 AM
(حمره عين ياابو العفين) .... مقطع جميل بعد الانتصار


#401279 [ابوايهم]
0.00/5 (0 صوت)

06-23-2012 12:07 AM
لا تراجع ياابو العفين يتحسلك اضانك بتلحسا


#401244 [عكرمة]
5.00/5 (1 صوت)

06-22-2012 11:35 PM
تسلم البطن الجابتك .. و ليذهب نافع وزمرته الغاشمة الى الجحيم ..

و النار ولعت و بعد لاهاى بنطفيها ..


#401237 [الزول الكان سَمِحْ]
1.00/5 (1 صوت)

06-22-2012 11:29 PM
يا أخوان...وين المشتهى الكمونية

من أمبارح ماظهر..شايل عل نفسو نذر إنو يقطع لسان نافع من لقاليقو..وأنا لى عندو رجا :

أنا الزول الكان سمح..رأيت فى المنام رؤيا إنو مابرجع سمح إلا كان خليت نافع يلحس حتة فى جسمو مافى زول غيرو لحسها قبل ده.. وثق تماماً بالمشتهى الكمونية ..بعد ماأنهى مهمتىأسلمك ليهلتبر به قسمك ..والله على ما أقول شهيد...ويا يوم بكرة ماتسرع..

المجد...للآلاف تهدر فى الشوارع كالسيول


ردود على الزول الكان سَمِحْ
United States [المشتهي الكمونية] 06-27-2012 12:25 PM
سلام يا الزول السمح
أنا بعد الكمونية بقيت مشتهي لسانه ومستنيك تتم شغلك وتسلمني ليه


#401233 [الناجي]
0.00/5 (0 صوت)

06-22-2012 11:24 PM
الله اكبر عليه شاااااااااااااااااااايف نفسو يعاين لينا من تحت النظاره


#401201 [sakhar]
0.00/5 (0 صوت)

06-22-2012 10:47 PM
اخى عمر الفاروق - ابوالعفين ده اصلة جيفة حيلحس كوعه ما تخافاو علينا طلعنا افتكر مافى زول يقدر يرجعنا الا بعد سحق المتأسلمين مهما بقوا من الكيزان وناس الباطنية ناس ود الميرغنى المابيشبع من الفته وهلم جرى
بس عايز اقول ليك اسقاط النظام؟ ايون محاسبة ومحكمات؟ ايوه، لكن مش حتكون عادلة ، متين كانوا عادلين لما قتلوا الناس بالشبهات من دون محاكمات ولا لما فسدوا وافسدوا ونهبوا البلد وقسموه ولاما باعوا البلد لليسوى والمابيسوى ولكن كله انشاء الله حيرجع بعد كنس ومسح الكيزان وفلولهم وسدنتهم ومافيش تانى عفا الله عما سلف- ربنا مخير اذا كان داير يعفيهم من العملوا باسم الدين ( ولكن ما بظن يعفيهم لانهم مشركين ) انحنا ما حنعفى ليهم تشريدنا ودماء شهدائنا وضرب نسائنا بالسيطان فى العلن او فى السر فى بيوت الاشباح وزنازين الامن وحاربو كل الملل واستحوذوا كل المال ومكنوا محاسبيهم فى مفاصل الدولة علشان كده مافى عفا الله عما سلف ولا باركوها... لان البيقولوا كده هم من استفادوا من النظام وعاير يغطوا جرائمهم وجرائم النظام الفاسد - ويجب محاسبة كال الاشتركوا معاهم خلال حكم الانقاذ يجب ان ينالوا عقابهم وخصوصا ما يسمى بالاحزاب التى اشتركت معاعم - ناس الميرغنى اولهم لانهم يستغفلون جماهير الحزب الوطنى القاد للآستقلال الناس يرموا ليهم صحن فته ويلهفوا ما لذا وطاب - ما بتصور واحد ابوه جاء مع كتشنر علشان يحاب ثورة ود المهدى يكون فيه فايدة هى خربانة من كبارها ولكن رجال الحزب الوطنى حبابهم عشرة بس يفورو ود الميرغنى ويرموه فى مزبلة التارخ مع اوباش الكيزان


#401161 [عبدالفتاح]
3.00/5 (2 صوت)

06-22-2012 10:13 PM
ناس جنوب كردفان والنيل الازرق ديل حرقوا بيوتهم تطهير عرقى قتلوهم وجوعوهم دة نظام غاشم وظالم الله الله على النساء الله الله على الاطفال تخرص الجزيرة القناة العميلة للمؤتملار الوطنى و ثورة الانخاس والتنكيل للشعب


#401078 [فضل المولي ودعامر]
2.00/5 (1 صوت)

06-22-2012 09:10 PM
لومك بي اليومين ديل ماعارف كوعه من بوعه عارف بوله بس ولس طه القرشي في الطريق..


عمر الفاروق عبد الله
مساحة اعلانية
تقييم
9.88/10 (4 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة