المقالات
مكتبة كتاب المقالات والأعمدة
الطاهر ساتي
بدر الدين .. (ياخ استغفروا معانا شوية)
بدر الدين .. (ياخ استغفروا معانا شوية)
06-28-2012 01:35 PM

إليكم

الطاهر ساتي

بدر الدين .. (ياخ استغفروا معانا شوية)


** أحدهم بالبرلمان - قبل أسبوع ونيف - ناشد الناس بالإكثار من الاستغفار لتجاوز الأزمة الاقتصادية، ثم جلس .. وتلك مناشدة مقبولة ودعوة كريمة، فالاستغفار - في السراء والضراء - من الفضائل، وزاوية اليوم أيضاً بمثابة دعوة للاستغفار، ولكن ليس على نسق أدروب الذي قابل تلك المناشدة بتساؤل من شاكلة (في الاستغفار تناشدونا وفي الاستثمار تمنعونا؟)..لا، فالدعوة إلى الاستغفار - ثم ربط الأحزمة على البطون- يجب أن تشمل الجميع، بلا استثناء..وليس من العدل أن يناشد البرلمان البعض بأن يستغفر ثم يدعو البعض الآخر ليستثمر في عرق الناس والبلد، وهكذا واقع الحال تقريباً، ولو لم يكن كذلك لما تساءل أدروب بذاك السؤال.. يلا، نمشي للمهم ..!!

** وصلاً لزاوية البارحة، نائب مدير جامعة الخرطوم أيضاً يستحق الزكاة، كما مدير الجامعة .. إذ يتقاضى سيادته راتباً شهريا لايتجاوز قدره (2.789.08 جنيهات)..ودعماً كهربائياً قدره (400 جنيه).. ودعماً لفاتورة الهاتف قدره (300 جنيه).. ودعماً بقيمة (45 جنيهاً)، لفاتورة المياه.. أما نظير الأعباء الإدارية، لايتجاوز (800 جنيه)..حاصل جمع تلك الأرقام، مضروباً في أشهر العام، يساوى (43.208 جنيه) .. أي الدخل السنوي لنائب مدير جامعة الخرطوم (تلاتة وأربعين مليوناً وشوية)، وهذا يساوي تقريباً الدخل السنوي لمدير الجامعة، ذكرته البارحة، ( 43.408.96 جنيه)..وهذه يعني بأن حاصل جمع الدخلين، المدير والنائب، لا يتجاوز (كم وتمنين مليون جنيه)، بالقديم طبعاً، وقلنا (الجديد ذاتو ما نافع).. وعليه : إذا رأى ديوان الزكاة بأن مدير الجامعة يستحق الزكاة، فعليه ألا ينسى نائبه، حتى ولو من مصرف (ابن السبيل)، وذلك ليعيش مستور الحال وليس مترفها.. يلا، ماذا عن بدر الدين محمود عباس، نائب محافظ بنك السودان..؟؟

** راتب نائب محافظ بنك السودان هزيل جداً، لايتجاوز ( 15.160.82 جنيها).. مبلغ بسيط، موش كده ؟..نعم، وله بدل سكن قيمته (راتب سبعة أشهر)، فقط لاغير، لازم يلبس كويس .. وله إجازة سنوية، ومعاها راتب ( ستة شهور)، فقط لاغير، لازم يرطب كويس..وله ولأسرته تذاكر سفر بالدرجة الأولى كحد أقصى،أو قيمة التذاكر (عداً نقداً)..في زول فيكم قاعد يجمع وراي؟..ممتاز، وله بدل عيدين، وهذا قيمته (راتب ستة أشهر)، فقط لا غير، وكما تعلمون لقد زادت أسعار الحلوى والخبائز والخراف، ولذلك تلك القيمة ليست بكبيرة إلا على الزاهدين والمتقشفين.. نمشي قدام، له حافز سنوي حسب تقدير مجلس الإدارة (لرئيس المجلس حافز قدره 3.500 شهرياً، ولكل عضو بالمجلس حافز قدره 3.500 شهرياً)..وتمنح لنائب المحافظ عربتان بسائقين وبجميع مصروفاتهما، ليستخدمهما استخداماً رسمياً وشخصياً، علماً بأن السياسات الأخيرة تجرد حتى الوزراء من (عربية المدام)، أو كما سماها وزير المالية.. وله عند نهاية كل عام خدمة (راتب أربعة أشهر ونصف)، وأنا ماعارف سر النص دا شنو..وعلاج بالكامل، له ولأسرته داخل وخارج السودان.. بالمناسبة: حنك توطين العلاج بالداخل انتهى على شنو؟..!!

** ما علينا، نواصل .. ويدفع له البنك فواتير كهرباء وتلفون ومياه وحراسة و صيانة حديقة المنزل.. أهم شيء أشجار وزهور البيت تكون مشذبة ومهذبة، كنوع من التقشف كده.. والأدهى والأمر: يتحمل البنك الضرائب نيابة عنه على الراتب وتلك البدلات.. بالبلدي كده: أنا وإنت بندفع ضرائب الزول دا.. وعليه، بغض النظر عن قيمة الضرائب وتلك الفواتير المنزلية والتذاكر والعلاج، فإن الدخل السنوي لنائب محافظ بنك السودان يساوي (538.209.11 جنيها)، يعني بالبلدي القديم (نص مليار وتلتمية مليون وشوية)، وينقص قليلاً عن الدخل السنوي للمحافظ، ذكرته البارحة، ( 600.795.61 جنيها)..وعليه، حاصل جمع الدخل السنوي للمحافظ والنائب ربما لاينقص كثيراً عن ميزانية جامعة الخرطوم، بيد أن حاصل جمع الدخل السنوي لمدير الجامعة ونائبه أقل من (مية مليون جنيه).. وعليه، فالدعوة إلى الاستغفار يجب أن تشمل بجانب العاملين بجامعة الخرطوم، محافظ البنك المركزي ونائبه أيضاً..هذا محض نموذج فقط لاغير - وما أكثر النماذج - مراد به : المساواة في الاستغفار والتقشف حتى نتجاوز الأزمة..!!





تعليقات 13 | إهداء 0 | زيارات 5926

خدمات المحتوى


التعليقات
#410584 [ههههههههههههههههه]
4.07/5 (5 صوت)

06-29-2012 11:00 AM
بدر الدين شنو وسجم شنو

اتلم عن المظاهرات وشارك في الاحداث

اي موضوع عن الفساد غير مهم طالما الناس طلعت عشان التغيير

بطل انتظار وبعدين تجي تعمل فيها بطل شعب


#410222 [Abu \hadi]
4.07/5 (5 صوت)

06-28-2012 11:10 PM
اللهم الا يستغفروا الله في كل ثانية ومن القلب الى يوم القيامة وبعد داك ينتظروا رحمة الله ..


#410101 [لواي سلسلن]
4.07/5 (5 صوت)

06-28-2012 08:26 PM
كلها بدلات .. الزول ده طيب قاعد يصرفها في شنو قروشوا ده لا إله إلا الله .. ياخي ده فساد مقنن أعوذ بالله .. بالله الزول ده قاعد يسوي شنو للبلد وخزينتوا التكتح ما فيها !! قال محافظ بنك قال!! الزول محافظ على شنو في البنك إذا كان هو ونائبه سافينو كلو.. ومعدمنوا نفاخ النار ..الله لاجاب باقيكم ...والبشير يقول ما في فساد .. البشير ده قاعد وين يا ناس لا بسمع لا بشوف ولا بسأل ولا بقرأ ولا بحل ولا بربط .. اللهم إني لا سأللك رد القضاء ولكن أسألك اللطف فيه ..استغفر الله من ده ملة ومن ده حكومة رافعة شعار هي لله ..الله بريء مما تفعلون ..


#410070 [صفوت الحارث]
4.07/5 (5 صوت)

06-28-2012 07:32 PM
يا الطاهر ساتي نستغفر الله ونستعين به مما نسمع والله المبلغ ده ده كان ممكن يكون برنامج لمشروع زراعة الطماطم وكليو الطماطم في الخرطوم كان ممكن يصل جنيه واحد استغفر الله واتوب إليه يا كيزان منكم لله


#410042 [صلاح فضل السيد حامد]
4.07/5 (5 صوت)

06-28-2012 06:43 PM
يا ساتي إنت بتلف وتودور ليه ما في مواضيع كثيرة يمكنك التحدث فيها والأيام دي المواضيع على قفى من يشيل ويأخي هذه إمتيازات معمول بيها في كل الدول بس كان تضرب مثل ببعض البلدان المجاورةعلشان تتأكد ثم ثانياً هذا النائب شهاداته بتأهله لذلك وبلاش حسد أتكلم لينا عن الجمع السودانية دي شويه.


ردود على صلاح فضل السيد حامد
United States [shiekhedrees] 06-29-2012 08:26 AM
ياخى حرام عليك انت بتدافع عن زول هو زاتو ما حيقدر يدافع عن نفسو.
ياتو بلد مجاور خزينتو ما فيها التكتح وبيدو الناس مليارات.
واذا أصلا المسأله مسألة شهادات فى شهادات أكبرمن شهادات مدير لجامعة الخرطوم.
ثم ثانيا المشكله مش فى المليارات والحوافز ولكن السؤال أنتجو شنو وشنو الحاجه الخارقه العملوها عشان يستحقو المليارات دى.
وثم ثانيا الحسد فى شنو دى ما قروشى وقروشك بدل ما يدعمو بيها تعليم ولا صحه ...يتقاسموها بيناتم والشعب السودانى يصيع.

United States [Welli] 06-29-2012 05:28 AM
يا صلاح كدي أنا داير أسألك سؤالين:
1- قلت لي شهاداتو؟ ياخ الطاهر ده بقول ليك مدير جامعة الخرطوم ! في حاجة اسمها برفسور ممتاز, ده زول كمل الشهادات يعني, ده في جامعة الخرطوم مرتبو 3 مليون بس, تخيل !!!
2- لو أخدنا متوسط الدخل العادي للموظف الحكومي, قول حوالي 500 ألف, يعني 6 مليون في السنة. يعني المحافظ و النائب في بنك السودان بياخدوا مرتب 200 موظف (بدون حساب الفواتير و الضرايب و الحوافز), قول 250 موظف ! ليه؟ بعملوا شنو بالزبط؟ بمنطق الاسلام, الرسول (صلي الله عليه وسلم) ربط حجرين لما الناس ربطوا حجر, دي معناها الناس دي مفروض مرتباتا تكون نص مرتبات الناس العاديه !!
بالنسبة للجمع, انسي, مافي زول بقدر يجيب سيرة في جريدة لأنها حا تتصادر مباشرة, ما تعصر الراجل, ده كل البقدر عليهو و كتر خيرو.


#410003 [الحقيقة]
4.07/5 (5 صوت)

06-28-2012 06:01 PM
هل يقلب السودان الطاولة على الاسلاميين في العالم كما قلبها على الكتاتوريات العسكرية منذ ااكثر من ثلاثين عاما............؟؟؟؟؟؟؟؟؟


#409977 [المرفعين]
4.07/5 (5 صوت)

06-28-2012 05:32 PM
الاخ الفاضل الطاهر ساتي
ولو انه تحصيل حاصل بعد دا
لانه لعبتهم انتهت ان شاء الله
الا انني اقول لك انهم لا يعرفون الاستغفار ولا الدين ولا الاخلاق ولا الانسانية
الله غفور رحيم ولكنهم سلكوا طريق الشيطان وجعلوه اماما
وغدا لحس الكوع سيفر شيطانهم ويقول لهم
اني برئ منكم اني اخاف الله رب العالمين


#409961 [زعلان]
4.07/5 (5 صوت)

06-28-2012 05:18 PM
يا و ساتي نحن بنستغفر ربنا ولا بنستغفر للكيزان
بالله عليك محافظ بنك السودان السابق صابر محمد الحسن
لم خرج من للتقاعد كم اخذ مليارات المليارات تخيل
قالوا استغفر ربكم ربنا يخرب بيوتكم يا الكيزان
ربنا ينتقم منكم يا الكيزان


#409933 [راجى الفرج]
4.07/5 (5 صوت)

06-28-2012 04:49 PM
اللهم عليلك بهم انهم لايعجزونك


#409893 [صديق]
4.07/5 (6 صوت)

06-28-2012 04:05 PM
استغفرتك يا مالك روحي.... والله لما كملت قراية المقال قلبي وجعني ، ياخ للدرجة دي نحن مظلومين؟


#409859 [كاتم]
4.16/5 (6 صوت)

06-28-2012 03:28 PM
يا الطاهر ساتى والله انا طبيب عمومى ولحد ما خرجت من السودان قبل سنتين راتبى كان 528 ( خمسمائة ثمان وعشرين الف) وبالحوافز بحصل الستمائة ( 600) علما بانى كنت شغال فى مستششفى حكومى مرجعى..... ليصبح الدخل السنوى يعادل 13 مليون تقريبا.
يعنى بالمختصر المفيد راتب بتاع البنك دا بعادل راتب 40 دكتور .......... لهم نفس الاحتياجات وقد يكون عندهم اسر بحجم اكبر


#409817 [شهاب ثاقب]
4.13/5 (6 صوت)

06-28-2012 02:46 PM
ياودساتي : إبراهيم أحمد عمر يملك جامعة والست وداد تملك مليارات وأبوريالة يملك شركات
ونافع يملك ماليزيا ودبي عصابة المؤتمر الوطمني تجار الدين البعيدين عن كل خلق ودين
هم وأزواجهم على الفنادق في دبي والقاهرة وماليزيا يرتحلون
مال الغلابة ومال الجبايات والزكوات والنفايات ربنا قادر على أن يصبحوا مابين غمضة عين يعودوا كما جاءوا في 30يونيو من قاع المجتمع اللهم عليك بهم فإنهم لايعجزونك إنك قادر


#409805 [مغبون]
4.07/5 (5 صوت)

06-28-2012 02:34 PM
استغفرشه الله العظيم واتوب اليه .......... سبحان الله ناس عايشه وناس دآيشه


ردود على مغبون
United States [عابر] 06-29-2012 08:58 PM
محافظ بنك السودان عبارة عن مواطن عندو دكتوراة في الاقتصاد وفي جامعة الخرطوم يوجد من درسه الاقتصاد اكثر من 10 من حملة الدكتوراة في الاقتصادة وبعضهم يحمل درجة الاستاذية وفي النيلين والاسلامية وكل جامعات السودان يوجد اساتذة يحملون نفس الدرجة العلمية لمحافظ بنك السودان واكثر ، كم هي رواتبهم اذا كان راتب مديرهم لا يتجاوز الثلاثة مليون ؟؟ 600 مليون يعني راتب 20 من حملة الدكتوراة في الاقتصاد ؟
قاتلكم الله اينما حللتم وحيث ما ذهبتم ..


الطاهر ساتي
 الطاهر ساتي

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة