06-30-2012 03:10 PM

الدكتورة مريم الصادق عكس ..اخوها الضابط الناقص عقل ودين ووطنية!!

بكري الصائغ
[email protected]


1-
طالعت بقرف شديد ذلك الخبر الذي بث صباح اليوم السبت 30 يونيو الحالي، والذي جاء تحت عنوان: (عبدالرحمن المهدي: نرفض اي تظاهرات طابعها التخريب)!!، وجاء في سياق الخبر ان عبدالرحمن المهدي راح ويندد باي تظاهرات يكون طبعها التخريب...ونادي بجلوس جميع المكونات السودانية للتوافق خلال المرحلة الدقيقة التي يمر بها السودان!!.

***- وجاء تصريحه هذا للصحيفة...في الوقت الذي كانت (ومازالت) فيه الدكتورة مريم الصادق المهدي محاصرة ومعها مجموعة من النساء في صحن المسجد في المكان المخصص للنساء...وتقوم وبكل بسالة وشجاعة بالتنديد الشديد لممارسات رجال الشرطة والأمن الذين استعملوا القوة واسلوب الضرب واطلاق القنابل المسيلة للدموع (والبمبان) الحارق في صحن المسجد دون وان تراعي حرمته،

***- بل ووصل الحال المزري بالمصابيين بالداخل الي انهم - وكما قالت الدكتورة مريم:( أن المصابات وسطهن لا يمكن نقلهن إلى المستشفى لإسعافهن بسبب الحصار المحكم الذي تضربه الشرطة على المكان...الآن هم يلاحقون العزل ويتم ضرب النساء بالرصاص المطاطي ولا نستطيع إسعافهن ونقلهن إلى المستشفى».)!!!.

2-
***- وجاء في سياق خبر الجريدة ايضآ، ان عبدالرحمن المهدي مساعد رئيس الجمهورية قد قام بالأمس الجمعة 29يونيو الحالي بافتتاح استاد المصارعة بضاحية الحاج يوسف شرقي الخرطوم!!

3-
***- ونفهم من ماجاء اعلاه، انه في الوقت الذي كانت فيه الدكتورة مريم الصادق محاصرة داخل المسجد ومعها زميلاتها من المعتصمات ويواجهن الموت اختناقآ بسبب القنابل المسيلة للدموع و الحصارالأمني الشديد المضروب عليهن من الخارج،وعدم سماح ضباط الشرطة للمصابيين والجرجي من الخروج والبقاء داخل المسـجد.....كان اخوها عبدالرحمن يقوم بافتتاح استاد للمصارعة!!.. غير عابئ ولامهتم بحال اخته وكيف هي الأن بداخل المسجد?!!، علمآ بانه يعلم جيدآ بان رجال الشرطة قد طوقوا المسجد الذي بداخله شقيقته وزميلاتها...ويقومون باعتداءات وحشية وضرب بالقنابل الحارقة!!

***- بالله يااخونا ده راجل ده?!!..

***- هل هذا العبدالرحمن هو فعلآ حفيد الأمام محمد احمد المهدي الذي قهر الجنرال غردون وقتله داخل القصر ( الذي به حفيده الأن?!!)...

***- معقولة بس في الدنيا، في زول يخلي اخته محاصرة من قبل اغراب وتتعرض للاختناق وربما للموت ضربآ، ويذهب لافتتاح استاد?!!

***- باي وجه سيقابل اخته?..وكيف سيعلل لها سر تخاذله وتخليه عنها وقت الضرورة?!!

***- ياحليل زمن الرجال الكانوا بقولوا: ( انا اخوكي يافاطمة )!!

4-
***- اختي الحبيبة الدكتورة مريـم، القومة لك والتحية والانحناة، ومابيدي شئ اقدمه لك الا التقدير الكامل لموقفك البطولي....

***- وعليكي الله ادي اخوكي الخايب....شـوية رجالة!!!

5-
رابـط مـهم له علاقة بالمـوضوع:
-------------------------------
د.مريم الصادق : حملة السلاح لديهم
الحق في مناهضة النظام بوسيلتهم،
لأنه يبدو أنه لا يفهم سوى هذا السلاح...
http://www.alrakoba.net/news-action-show-id-62915.htm


تعليقات 42 | إهداء 0 | زيارات 4728

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#413958 [الكشاف]
0.00/5 (0 صوت)

07-02-2012 06:14 AM
يا جماعة زولنا الكاتب دا الملاريا طلعت ليهو قى راسه وشوفوا ليهو دواء والا مكمدات


#413876 [بكري الصائغ]
0.00/5 (0 صوت)

07-02-2012 01:03 AM
أخـوي الـحـبـوب،
محمد احمد دافع الضرايب،

1-
----
تحية الود، والاعزاز بقدومك الميـمون، وألف شكر علي تعليقك المقدر، وكلماتك الجميلة وثناءك لشخصي الضعيف، وجزاك الله عني كل خير وسؤدد وتوفيق،

***- شوف ياأخوي محمد، الموضوع الكتبته اعلاه اصلآ ماسياسي ولا له دخل بالسياسة لا من قريب ولا من بعيد!!، الموضوع يتعلق بالنبل والشهامة والذود عن العرض،

*** اخونا سعادتو بتاع الجيش عبدالرحمن الصادق المهدي، ساب اخته وزميلاتها محاصرات بالمسجد من قبل قوات الشرطة والأمن ومن بينهن جرحي من جراء الأعتدات ورائحة البمبان الحارق والقنابل المسيلة للدموع!!

***- اخونا بتاع ( جيشنا جيش الهناء...الحارس مالنا ودمنا) ماسأل ولااهتم باخته وزميلاتها!!

***- ولا كلف نفسه مشقة الاتصال تلفونيآ برئيس القوة العسكرية التي تحاصر وان يبتعد عن المسجد ويراعي حرمته وقدسيته، وان الموجودات من النسوة والفتيات بداخل هن في حمي الله تعالي!!

***- ولا ركب عربية من عربات القصر (المجانية) وكلف السواق وحرسه الخاص بالتوجه للمسجد، ونجدة من به!!

***- اخونا، وبكل برود، ذهب لافتتاح استاد للمصارعة!!، ومتي?!!...وتمامآ في الوقت الذي كان المسجد ومن فيه يتعرضان للاعتداءات بالضرب والبمبان!!

2-
----
***- يامحمد، ده الموضوع بلا رتوش ولا الوان!!..واستنكرت فيه بشدة سلوك وتصرفات جنابو عبدالرحمن الصادق....تمامآ كما استنكره القراء الكرام وعلقوا علي الموضوع ولعنوا ( سنسفيل ) هذا الضابط الذي لم يتعلم بالكلية الحربية مامعني حماية العرض وبنات بلده!!


#413759 [محمد احمد دافع الضرايب]
0.00/5 (0 صوت)

07-01-2012 09:38 PM
التحية لك يااستاذ بكري..يعلم الله انني من المعجبين بكتاباتك لمافيها من حس وطني حقيقي وتهذيب في مخاطبة القاريء. لكني استميحك عذرا بأننا الان في هذه المرحلة لانريد أي تشويش بتتبع اخطاء قادة المعارضة الرسمية، لاأقول لك اننا فترنا من نقد اداءهم لكن أكثر مايسعد النظام المتهالك الان ان نتفرغ لمحاسبة بعضنا. نحن لانطالبهم بأي شيء يااستاذ غير ان يتركوا كوادرهم أن تلتحم بالشعب وتخرج معه.
أنني والله يااستاذ سعيد للغاية من كيفية خروج الناس بدون تنسيق مع المعارضة من أجل سلطة زمنية، بل من أجل رغبتها في حياة كريمة واستقرار وتقدم لهم ولاسرهم ولوطنهم..هذا فعلا مااخاف اهل الانقاذ الان وهم يعلمون مثلنا تماما أن هذه بشائر الثورة التي ستنتصر في النهاية.. هكذا حدثنا التاريخ استاذ بكري.


#413441 [بكري الصائغ]
0.00/5 (0 صوت)

07-01-2012 02:47 PM
أخــوي الـحـبوب،
المشتهي الكمونية،

تحياتي وسلامي العطر، وسعـدت بزيارتك ياأمير، وبتعليقك المقدر، واحي تعليقك مرة اخري الذي قلت فيه:

( النظام ميت سريريا وقادة الانقاذ يعرفون هذا ، ويعلمون كذلك بأن التصريحات في هذا الوقت سوف تزيد عليهم غضب الشارع ولذلك دفعوا هذا المغفل الغبي الى الواجهة ليتلقى نيابة عنهم اللعنات)!!

***- ومن هنا اوجه سؤالآ لسعادتو عبدالرحمن:
( مش انتو بتقولو في نشيدكم الوطني: نحن جند الله جند الوطن?...يبقي كيف ياجندي ياوطني تخلي اختك مزنوقة ومحاصرة وسط البمبان والقنابل المسيلة للدموع والضرب المبرح بالعصي الهراوات، وتروح تتفسح وتفتتح استاد للمصارعة ولا هاميك بكتير او بقريب باحوال اختك والمعتصمات بجامعكم في امدرمان?...وين الشهامة ودق الصدر و"انا اخوكي يافاطمة"?...

***- اتلومت شديد ياسعادتو مع الله سبحانه وتعالي الاوصانا بالدفاع عن العرض والكرامة!!...واتلومت مع اختك وناس بيتكم...اتلومت مع الشعب السوداني الغاضب من تصرفك الأرعن...

***- ولكنك ماتلومت مع البشير وحيديك ترقية ونيشان!!


#413418 [بكري الصائغ]
0.00/5 (0 صوت)

07-01-2012 02:27 PM
الصادق المهدي : حزب الأمة لا يسعى لإسقاط النظام
*********************************************
المصــدر:
موقع:( النيلين .. بوابة شاملة)-
بتاريـخ:
الأحد 1 يوليو 2012 -
------------------------------
***- أعلن رئيس حزب الأمة القومي ، إمام الأنصار " الصادق المهدي " عدم سعي الحزب لإسقاط نظام الحكم القائم بالبلاد ، وقال خلال حديثه للمصلين بمسجد الإمام عبد الرحمن بود نوباوي ، في حديث عقب صلاة الجمعة ( عندما تكتمل الصورة ونتفق على تحقيق التحول الديمقراطي الكامل والسلام العادل الشامل بوضوح سوف نعبر حركيا عن دعم هذا الموقف الى ان تتحقق المقاصد ).

2-
----
***- يادكتور مـريـم، الله يعينك علي ابوكي واخوكي..ونسيبكم!!


#413404 [بكري الصائغ]
0.00/5 (0 صوت)

07-01-2012 02:17 PM
«الأمة» يتبرأ من عبد الرحمن الصادق ويكشف
عن أسباب رفضه التوقيع على الإعلان الدستوري!!
*******************************************
الـمصـدر:
موقع:
(النيلين .. بوابة شاملة)-
بتاريـخ:
الأحد 1 يوليو 2012-
------------------
***-استبعد المؤتمر الوطني وجود خلاف أو قضية بداخله حول حزمة الإجراءات التي اتخذها بسبب الإصلاحات الاقتصادية أخيراً، مشيراً إلى أن الإجراءات خلاصة رأي الجهاز التنفيذي والحزب الحاكم وأخيراً البرلمان الذي أجازها بشكل رسمي.

***- وقال أمين العلاقات الخارجية بالوطني في صالون الراحل سيد أحمد خليفة أمس «ما دام قيلت ستتم»، مشيراً إلى أنها بدأت بإعفاء تسعة مستشارين وإنهاء خدمة «52» خبيراً ومتعاقداً، كاشفاً عن جملة من اللقاءات مع الأحزاب على رأسها لقاء القيادة مع الميرغني.

***- وتوقع غندور انعقاد المكتب القيادي لإجازة الإجراءات في أي وقت، كاشفاً عن خلاف بينه وبين القيادة حول هذه الإجراءات، وأضاف: «كنت أتمنى أن تأتي المعارضة لتقديم أي بديل آخر».

***- وقال غندور إن الفساد موجود ولكن «جلابيته» حاول البعض تلبيسها للمؤتمر الوطني، وتمنى أن يأتي يوم يحاسب فيه على ثروته، وكشف غندور عن أن 80% من الموازنة قبل 30 يونيو كانت تذهب للمنح والقروض والهبات، وعلق على الحديث بأن رئيس الجمهورية تقدم بطلب منحة أو قرض، مؤكداً أن ذلك ليس سبةً.

***- وطالب غندور بترقية اللغة السياسية، وكذب غندور من يقول إن زيادة المحروقات «ملعوبة»، معتبراً مثل هذا الحديث افتراءً، موضحاً أن إنتاج النفط قبل انفصال الجنوب كان «465» ألف برميل يومياً واستهلاكه «140» ألف برميل يومياً و «165» ألف برميل يومياً بعد الانفصال.

***- ومن جهته كشف الأمين العام لحزب الأمة القومي إبراهيم الأمين عن وجود أزمة حقيقية تواجه البلاد، مشيراً إلى أنها تزيد كل يوم تعقيداً، فضلاً عن أنها تمس بطريقة مباشرة المواطن، قائلاً إن أخطر ما يواجه المواطن حرمانه من حقوقه المشروعة، مبدياً استعداده التام للتنحي على أن يقود الشباب البلد.

***- ونفى بشدة علاقة عبد الرحمن الصادق المهدي بحزب الأمة، كاشفاً عن أن كل الحوارات واللقاءات التي قادها المؤتمر الوطني مع حزبه نتيجتها كانت صفراً.

***- وأكد حزب الأمة القومي أن أسباب عدم توقيعه على الإعلان الدستوري لقوى الإجماع الوطني تعود إلى مطالبته بإجراء مزيد من التعديلات الجوهرية في مقدمتها التوجُّه الإسلامي.

***- وقال رئيس لجنة الإعلام بالمكتب السياسي للحزب عبد الحميد الفضل لـ«إس إم سي» إن حزبه شكّل لجنة برئاسة الإمام الحلو للنظر في ورقة الإعلان الدستوري والبديل الديمقراطي التي أقرتها قوى الإجماع الوطني مبيناً أن اللجنة ستدفع مقترحات وتعديلات حول الإعلان الدستوري مطلع الأسبوع القادم فور الانتهاء منها.

***- وأكد أن من ضمن اقتراحات الحزب تضمين التوجّه الإسلامي في الإعلان الدستوري كأحد المرتكزات الدستورية في الحكومة المدنية، مضيفاً أن هناك تباينات وصفها بالطفيفة بين حزب الأمة والتحالف مؤكداً أن ما حدث أخيراً بدار حزب الأمة بين الشرطة والمواطنين كان بسبب عدم سيطرة الحزب على المواطنين.


#412993 [المشتهي الكمونية]
0.00/5 (0 صوت)

07-01-2012 09:38 AM
يا استاذ بكري النظام ميت سريريا وقادة الانقاذ يعرفون هذا ، ويعلمون كذلك بأن التصريحات في هذا الوقت سوف تزيد عليهم غضب الشارع ولذلك دفعوا هذا المغفل الغبي الى الواجهة ليتلقى نيابة عنهم اللعنات


#412920 [سودانى حقانى]
0.00/5 (0 صوت)

07-01-2012 08:47 AM
يا بكرى ياخوى

عيب عليك / الناس ديل اصحاب تاريخ و الرجالة موروث عندهم - كان رجال كان حريم - والفيهم مشهودة
والحصل من مريم كان اعتصام ضد النظام و لايمت للرجالة بصلة و دا موقفها و الاستاذة كانت مبيتة النية لاستفزاز النظام نحن نعرف حريم السودان البمشوا صلاة الجمعة او اى صلاة اخرى بكونن لابسات تياب بيضاء و معاهم سبحة و بدون مكياج - لكن خالتى مريم كانت اخر قيافة نظارات و توب ملون و اخر مكياج لزوم الظهور فى الفضائية و هى نفسها لم تدعى الرجالة .
لكن نسوى شنو ربنا يكون فى عونك و ترجع لينا السودان الرباك و العلمك و خلال تكتب فى الصحف و تصنف الناس دا راجل و دا ما راجل .
و اكان الحال ما عجبك اقلع العمة و الجلابية اللابسهم فى الصورة بتاعتك .وحوم عريان
ذى كتاباتك العارية عن المصداقية و الرجولة و الوطنية


#412786 [بكري الصائغ]
0.00/5 (0 صوت)

07-01-2012 01:42 AM
1-
----

أخـتـي الـحبيـبة،
ام ميار،

تحياتي الطيـبة وسلامي العطر لشخصك الكريم، وسعدت بزيارتك المقدرة.

***- لكن والله ياأم ميار مافهمت تعليقك:
( كان جدي وكان ابي مابتنفع معانا شباب هذا الجيل )!!

----------------------------------

2-
----
أخـوي الـحـبوب،
كوز وألف كوز،

سلامي وتحياتي الطيبة، وقدومك المقدر، ولكن تعليقك الفاهم شديد يجعلني اؤمن تمامآ بانك لا ( كوز وألف كوز) ولاحاجة!!...مافي كوز بقول زي كلامك ده:

(هذا العبد الرحمن المهدي:
-(إما) أنه مغفل فعلاً إستغفله النظام ليقوم بإفتتاح ذلك الإستاد ليشغله عن ضرب الأنصار داخل المسجد من قبل رباطة النظام....

-و(إما) أن حب السلطة تجعل الإنسان يتجرد من أي نخوه ومروءة وبالتالي يدوس علي أخته وأخيه في سبيل إرضاء النظام و لأجل وظيفته ومن أجل عيون البشير ونافع ... رجل مثل هذا النوع لا رجاء ولا نفع منه....

-- خيركم خيركم لأهله - لكن هذا العبد الرحمن أثبت أنه خيره لأهل النظام ,,, فهو منهم وإليهم ومن يعمل مع هذا النظام لن يجني إلا قساوة القلب وكراهية الطرف الآخر....

- - عفواً مازالت هنالك ( إما ) وإما أنه أراد أن يثبت للنظام جدارته وإن كانت علي جثث أخواته وأنصار والده والشعب السوداني كافة....)!!

***- اخـوي الما كوز، بعد تعليقك القوي ده، ماعندي اي تعقيب و( قطعت جهيزة قول كل خطيب).


ردود على بكري الصائغ
United States [ام ميار] 07-01-2012 04:25 PM
استاذي بكري
لقد قصدت ان العميد عبد الرحمن لايمتلك اي ثقل سياسي ووطني (عدا كونه حفيدالمهدي) حتى يكون رايه ذا قيمه بالنسبه لنا.
وبالعكس موقف الدكتوره مريم يجب ان يحسب لها شخصيا وليس لكامل اسره المهدي.
وفي الختام اتمنى ان نصل لسودان جديد لمكان فيه الا للوطنيه الصادقه


#412781 [سوداني اصيل]
0.00/5 (0 صوت)

07-01-2012 01:32 AM
انت يا خوي البتكتب دا اظنك من مواليد الجيل الجديد ما حضرت زمن الشاي بالبلح ولااظنو عضاك كلب وانت ماشي تحجز في صف الطابونة وقاعد تشكر لينا في ستك مريم الشجاعة ولا ساهرت الليل كلو في دورية في الحلة من كترة الحرامية ولا شلت ليك جالون وحرستا ليك في طرمبة يومين علشان تملاو هسي حا يجوا ناطين لي ناسك البعلقوا ديل ويقولوا لي امنجي ورباطاتي ومنفعجي بالله عليك انت ما بتخجل لمن تشكر لينا من مصوا في دم السودان من الاستقلال ونهبوا اراضي وخيرات الناس مستغلين الجهل والبساطة ونصبوا انفسهم اوليا واسياد واولادهم امراء وبنتاهم شريفات سؤالي ليك زمن كان حاصل كلامي القلتو دا ليه ما مشت جامع ودنوباوي ونادت باسقاط النظام يعني يا نحكم البلد نحنا ولا تخرب وفي النهاية انا اصبت بقرف مضاعف من كتابتك الفارغة ومن ال المهدي المقرفين وال الميرغني الاكثر قرفا وال الترابي الاكثر اقرافاوناسك العاملين لينا ثورة في النت


#412770 [بكري الصائغ]
0.00/5 (0 صوت)

07-01-2012 01:12 AM
10-
أخـوي الـحـبوب،
ابراهيم1£2-

تحياتي ومودتي الصادقة، وسعدت بزيارتك الكريمة بتعليقك الملئ بالنصح الذي لم يسمع به عبدالرحمن الصادق:

***- (ولو كان هذا العبد رحمن ، متحصنا بالدين ، قارئا لراتب الامام المهدى، الذي فيه التحاصين الكافية ، سورة الفاتحة ، سبعا ، والمعوذتين ، سبعا ، و الإخلاص ، سبعا ، وأية الكرسى ، سبعا ، والصلاة الإبراهيمية سبعا ، لما نفد اليه سحر الإنقاذ ، و أصابه بعمى البصر ، و البصيرة ، وان لم يتدارك نفسه ، فان الجبل لن يعصمه من الطوفان ، فالثورة منتصرة بإذن الله ، ومن لم يركب سفينتها ، فهو غارق لا محالة، وحينها لا تشفع له إخوته مع د. مريم ، لله درها ، لانه عاق لأخته ، عاق لوالده،. عاق لشعبه)!!

-------------------------------

11-
أخــوي الحــبوب،
واحد،

تحية الود، والأعزاز بقدومك المنير وألف شكر علي تعليقك المقدر،

***- وبالفعل، الأخ خالد عويس شخصية جديرة بالاحترام، وكل من يعرفه يقول عنه انه (زول فاهم)...

وكما قلت انت:
***- خالد يا رائع ولد ما متلك ولد سلمت البطن الولدتك , كالسيف باتر كالبرق باهر خاتي الشق فصيح النطق غير متقعر ولا عيي , راجح الرأي حكيم التدبير لا هياب ولا وجل...تستحق رئاسة الوزاره = مش وراثة وغمط لحقوق الاخريين كما فعل الصادق في المحجوب = شاب يرشحه الشباب وليس مثل وليدات ناس المهدي ود الصادق وود الهادي...
------------------------------------

12-
أخـوي الـحـبـوب،
الكناني،

تحياتي لك ولأسـمك الجميل الرنان، وسـعدت والله بطلتك الميمونة، وبتعليقك الغاضب شديد، ولك الحق تزعل!!...بالله دي حالة دي?!!...احمد الله واشكره انني عشت في سنوات طفولتي وشبابي في زمن عرفنا فيه يعرف مامعني الرجولة والتضحية ونكران الذات، ويقدس الاسر ويحترم التقاليد والعادات والدين، كنا شباب جيل نضع اخواتنا وبنات الحي والفريق في حدقات عيوننا، والويل وكل الويل لمن يتجرأ يرفع عينيه ولو بالغلط نحوهن....

***- ولكن مع الأسف، قلب الدهر المجن وبقيت عايش في زمن الأنقاذ، وكيف اللخو يهرب من نجدة اخته، وتنشر الصحف خيابةاللخو!!!...

***- ملعون ابو دين زمنكم ياكناتـي!!

---------------------------------------------

13-
أخــوي الـحبـوب،

حسن غبد الكريم،

تحياتي وسلامي العطر، وألف شكر علي زيارتك الكريمة...ولكن تعليقك المقدر الذي قلت فيه:
( اكيد حتمدح مريم حتى لو كانت فى مكان اخيها )!! الجملة دي عاوز شوية توضيح!!...

***- يعني تقصد لو كان عبدالرحمن مزنوق بالمسجد المحاصر بناس الأمن والبوليس، والدكتورة مريم مساعدة رئيس الجمهورية راحت تفتح استاد للمصارعة في نفس الوقت الفيه اخوها محاصر بالبوليس....واني امتدحها?!!..ولا بتقصد شنو?!!

----------------------------------

14-
أخــوي الـحـبـوب،
omer ali- عـمر علي،

تحياتي الحارة ياأبو عميـر، وألف شكر علي قدومك الميمون، وتعليقك الكريم في شخصي الضعيف، وجزاك الله عني كل خير وسؤدد،

***- اما بخصوص فكرة تاسيس (موقع للوثائق THE ARCHIVE CENTRE )
،فوالله دي امنيتي من زمان، وسبق ان طرحت الفكرة عدة مرات بعدة مواقع سودانية تهتم بالتوثيق، ولكن لاحظت ان كل موقع يهتم فقط بنفسه ولايحبذ العمل الجماعي، فكرتي لم تجد التشجيع، واكتفيت بموقع (الراكوبة)الموقر.

------------------------------

15-
أخــوي الـحـبـوب،
خلف الله عديل،

تحياتي الطيبات وسلامي العطر، وسررت بالقدوم الميمون، وسعدت بتعليقك وتحاياك لاخواتنا بنات الامام...والتحية لبنات السودان مفجرات ثورة العزة والكرامة..

***- بالمناسبة، انتفاضة يوم السبت 16 يونيو 2012 من صنع طالبات جامعة الخرطوم، وهي اول انتفاضة في تاريخ السودان ويقمن بها بنات وشابات!!...

***- ( بكرة حتسمع ناس الترابي والصادق والميرغني سرقوا الانتفاضة وقالوا بتاعتهم...وانكروا دور الطالبات وقيامهن بالانتفاضة وانهن ناقصات عقل ولايستطعن التفكير في تجهيز انتفاضة)!!!


#412743 [بكري الصائغ]
0.00/5 (0 صوت)

07-01-2012 12:15 AM
9-
أخـــوي ألـحـبوب،
زكريا باسي،

السلام والتحايا الطيبة، وسعدت بزيارتك وبتعليقك الكريم،

***- تعرف ياأخي زكريا، وصلتني 11 مكالمة ورسالة من اخوة اعزاء يقيمون بالسودان وبدول الشتات يعلقون فيها علي المقال، فلهم مني كل الشكر والأمتنان علي مشاركاتهم المقدرة، وابدآ في بثها ولكن بصور مختصرة.

1-
الرسالة الأولي من ميونيـخ:
------------------------
***- بالله عشان عبدالرحمن تفتح له موضوع وتعمل له اهمية?!!..ياأخي الزول ده في نظر الناس ميت...وشبع موت من يوم مادخل قصر الفساد!!

2-
الرسالة الثانية من برليـن:
--------------------------
***- زول زي عبدالرحمن عشان حياة الأبهة والقصور باع حزبه وابوه واهله، عاوزه يحن علي اخته?!!..والله لو ماتت مايمشي الدفن الا باذن من النافع، عبدالرحمن انتهت صلاحيته وفسد!!

3-
المكالمة الأولي من موسكو:
---------------------
***- ياعمي الصايغ، وفر وقتك واكتب في حاجة تنفع الناس!!، عبدالرحمن الهادي شنو التكتب عنه?...الزول كرت ميت حزبيآ وعسكريآ وسياسيآ.. واخلاقيآ كمان،

4-
الرسالة الثالثة من القاهرة:
---------------------------
***- عبدالرحمن الصادق يفتتح استاد للمصارعة?!!..هو الشعب السوداني لاقي البياكلو عشان يقدر يصارع?..الا تكون مصارعة ثيران او ديوك!!

5-
المكالمة الثانية من برلين:
-------------------------
***- والله العظيم موضوع محزن للغاية!!، بالله وصلت بنا الحالة انو الواحد يخلي اخته في وضع حرج ويمكن تموت فيه يروح يرفه عن نفسه بحفل افتتاح استاد مصارعة، وهناك يتناول الشاي والمرطبات?!!

***- ..والله والله وقسمآ بالله لو كنت هناك بالاستاد كنت ضربتو بالجزمة، عديم الضمير والأخلاق!!

6-
الرسالة الرابعة من سويسرا:
--------------------------
***- الغلط كله من ابوه الصادق ما رباه تربية رجال?!!..كان طول عمره مدلل ومدلع وكل طلباته مستجابة، وعندهم بالقصر الخدم وعشرات العمال والشغالة كلهم في خدمة (سيدي الصغير)!...ولما كبر قرر يدخل الجيش عشان صغار العسكر والمجنديين يكونوا في خدمته!!..وبكده عمره كله ماضاق الشدة ولا تعب الخدمة...وبواسطة ابوه دخل القصر عشان يكمل الناقصة من حياة الرفاهية والنغنغة و...هي لله هي لله!!

7-
الرسالة الخامسة من سويسرا:
-------------------------
***- زمان الامام الراحل عبدالرحمن كان بغش مريديه ويوعد من يموت فيهم شهيدآ يعطيه متر في الجنة!!، ومع تغيير الزمن وتغير الاوضاع، وافلاس الفكر عند آل المهدي وابتعاد المريدين عن (القبة)، بقي كل انصاري يفكر في نفسه، واختار عبدالرحمن القصر!!

8-
الرسالة السادسة من قطر:
-------------------------
***- مازال السؤال مطروحآ بشدة:
( اشمعني الضابط عبدالرحمن الصادق المهدي...ومن دون الضباط الاخرين من زملاءه الضباط بالرتب المختلفة بالقوات المسلحة ويتم اختياره هو بالذات مساعدآ لرئيس الجمهورية????)!!!

9-
الرسالة السابعة من برلين:
-------------------------
***- افتتاح استاد للمصارعة من مهام وزير الشباب والرياضة، ايه دخل مساعد رئيس الجمهورية في الموضوع?!!

10-
الرسالة الثامنة من هولندا:
--------------------------
***- والله ياعمي الصايغ موضوع محزن بالحيل!!...
ولاحول ولاقوة الا بالله العلي العظيم!!

11-
الرسالة التاسعة من نيويورك:
-------------------------------
***- اذكروا محاسـن موتاكم!!


ردود على بكري الصائغ
United States [زكريا باسي] 07-01-2012 01:16 AM
عزيزي بكري انا لست كاتبا ولكني ثائر على تلك الاوضاع المزرية التي يمر بها بلدي الحبيب وكتاباتك يا اخي دائما ما تثلج صدري وتذهب كثير من ضيق نفسي وحنقها وألمها وهزيمتها المريرة فلك مني التحية .أما مريم فتستحق منا ما كتبت انت واكثر من ذلك .


#412711 [مغبون]
0.00/5 (0 صوت)

06-30-2012 11:11 PM
رائعنا الاستاذ بكري ..... تحياتي ..... لقد كنت رحيما به ووصفته بالخائب وناقص العقل بالله يا بكري شباب وشيوخ ونساء في مسجد جده ووالده يؤم المصلين ويخطب في الجموع ان حق التظاهر مسموح بالدستور والشرطه تقذفهم بالبمبان وتضربهم بالرصاص المطاطي والسياط وقائد عملية تهتدون في مهمة رسميه لافتتاح صالة مصارعه !!!
وليته اكتفي بهذا !!!! لا يسعني الا ان اقول لا حول ولا قوة الا بالله العظيم
يقولون الولد خال ورغم كراهيتي لخاله فأنه لم يسمح لابنه عصام بأن يتلوث مع هؤلاء !!!
لا زلت محتارا كيف يسمح رئيسا اكبر حزبين بالبلاد بالسماح لابنائهم بمساعدة من استلم السلطه منهم بالقوة واذلهم وأساء اليهم ؟
اللهم لا اعتراض في حكمك
ولا زلت مستغربا عن اي معارضه يتمشدقون ؟
بحق لنا قنابير وريالطتنا منقطه


#412657 [SESE]
0.00/5 (0 صوت)

06-30-2012 09:22 PM
سيأتي يوم نسأل فيه السيد عبدالرحمن عن سبب مشاركته لهؤلاء السفلة في هذا الوقت بالذات ويحاسب على ذلك محاسبة عسيرة من اناس هو يعرفهم عندما يسألون ويحكمون ويصنفون الشخص من بيت آل المهدي فحكمهم يصدر مرة واحدة ولا يعيدونه ولا يتراجعون عنه وقد شهدت لهم بحكم صدر على السيد احمد المهدي عندما توفي السيد الصديق والد السيد الصادق فقدموا السيد الهادي للإمامة وتخلوا عن السيد احمد ولم يكن له شأن حتى الآن بين جموع الانصار والمرة الاخرى التي صدر في الحكم كان على السيد الصادق نفسه عندما انشق عن الامام الهادي وكون حزب الامة جناح الصادق فسحبت منه الثقة من عدد كبير جداً من جموع الانصار الذين كانوا تحت حزب الامة جناح الامام الهادي وظلت الثقة مسحوبة عنه حتى انقرض ذلك الجيل ومنهم من يظل ينادي في صلاته ( يا منادي نادي ويا الله تجيب السيد الهادي) حتى توفي ولم يعر السيد الصادق اي اهتمام رقم انه موجود وعلى امامة الانصار إلا انهم اعتبروها شاغرة حتى عودة الامام الهادي وقد شهدت ذلك بنفسي وطالما هذا هو الديدن في جموع الانصار فحتماً سيأتي اليوم الذي يصدر فيه الحكم على السيد عبد الرحمن الصادق ما لم يقدم مبررات مقنعة لمشاركته النظام وسيتم تصنيفه وبناءاً على ذلك التصنيف يتم التعامل معه في وسط الانصار وسيكون ذلك مرة واحدة فقط لن يعاد فيها النظر واتمنى ان يقرأ كلامي هذا ويضعه في الحسبان


#412651 [بكري الصائغ]
0.00/5 (0 صوت)

06-30-2012 09:13 PM
8-
أخـوي الـحبـوب،
اسماعيل صلاح،
تحيـة طيبة، وألف شكر علي الزيارة والطلة البهية والتعليق المقدر،

***- والله عجبني شديد كلامك القلت فيه:
( عبد الرحمن دا قايل الشغلة انه زول الدولة محتاجاهو شديد وانه العقل المفكر للنظام وو وانه بديل البشير القادم ولا يدرى الجاهل انه مجرد سيجارة مصيرها تتشرب وتتداس بالجزمة)!!...

***- زول مسكين ساكت ماعارف مكائد القصر، وحيل الاعيب علي عثمان وخباثات النافع،...

***- وياعبدالرحمن اهديك اغنية:
( ياما بكرة تندم وانا حالك بشوفو)!!...

------------------------------

9-
أخـوي الـحـبوب،
لاعصار،

تحياتي ومـودتي الطيبة، وسعدت بزيارتك الكريمة، وتعليقك الواضح في آل الصادق المهدي وقلت:
( والله لا اري فرق بين مريم و اخيهاالفاشل ده , الدكتوره لقت نفسها محاصره داخل المسجد وكما احرج الانصار والدها احرجوها هي لم تخرج ولا والدها وقد وجدوا نفسهم وسط المعمعه, الدكتوره اختفت من يوم التحق اخيها بقصر العصابه)!!...

***- وقبل تلقيت مكالمة من أخ عزيز يقيم في موسكو يقول فيها:

( لقد ابتلينا بالصادق المهدي " ابو الكلام والتنظيرات"...وولده المدلل... وابن عمهم المستشار السابق للبشير...وبالنسـيب الضلالي الكذاب بتاع "انا اذهب للسجن حبيسآ..وانت للقصر رئيسآ)!!!

***- لو كان اصلآ الصادق المهدي غير مولودآ، لنعمنا بالاستقرار وماكان هناك انقلاب للبشير ضد نظام الصادق...ومن مهازل القدر ان النسيب هو من قام بالأنقلاب!!!...واصبح الصادق مهمشآ...وابنه بالقصر...والترابي بقدرة قادر اصبح معارضآ للنظام الذي اوجده!!

***- فيلم هندي ياعمي الصايغ...مش كده?!!


#412634 [كوز وألف كوز]
0.00/5 (0 صوت)

06-30-2012 08:50 PM
مساء الخير أخي الصائغ:
=====================
هذا العبد الرحمن المهدي:

-(إما) أنه مغفل فعلاً إستغفله النظام ليقوم بإفتتاح ذلك الإستاد ليشغله عن ضرب الأنصار داخل المسجد

من قبل رباطة النظام.

- و(إما) أن حب السلطة تجعل الإنسان يتجرد من أي نخوه ومروءة وبالتالي يدوس علي أخته وأخيه في سبيل

إرضاء النظام و لأجل وظيفته ومن أجل عيون البشير ونافع ... رجل مثل هذا النوع لا رجاء ولا نفع منه

- خيركم خيركم لأهله - لكن هذا العبد الرحمن أثبت أنه خيره لأهل النظام ,,, فهو منهم وإليهم ومن

يعمل مع هذا النظام لن يجني إلا قساوة القلب وكراهية الطرف الآخر.

- عفواً مازالت هنالك ( إما ) وإما أنه أراد أن يثبت للنظام جدارته وإن كانت علي جثث

أخواته وأنصار والده والشعب السوداني كافة.


#412609 [ام ميار]
0.00/5 (0 صوت)

06-30-2012 08:06 PM
كان جدي وكان ابي مابتنفع معانا شباب هذا الجيل


#412601 [بكري الصائغ]
0.00/5 (0 صوت)

06-30-2012 07:57 PM
5-
----
أخـوي ألـحـبـوب،
خالد،
تحياتي ومودتي، وألف شكر علي زيارتك الكريمة، وتعقيك المقدر علي المقالة، ووصلتني عدة مكالمات كل اصحابها يوافقونني علي ان تصرف الضابط عبدالرحمن غير كريم علي الاطلاق، وكان الواجب ان يسارع وبلا ابطاء لنجدة واسعاف اخته، ولكنه فضل المنصب الزائل والأبهة علي حساب الأخوة وصلة الدم!!

***- هؤلاء?..من هم?...ومن اين جاءوا?!!

------------------------

6-
----
اخــوي الحـبـوب،

Shah - شـاه،

تحياتي ومودتي وسلامي العطر، وسعدت بالطلة والقدوم الميمون، والتعليق المقدر،

(أ)
-------
***- وبمناسبة (خيـابة) الضابط عبدالرحمن الذي ترك اخته بين نيران العسكر ورجال الأمن و(البومان) الحارق والقنابل المسلية للدموع، اعيد مرة اخري قصـة
( وا معتصماه )...عسي بل لعل توقظ ضمير من ماتت ضمائرهم-..

(ب)-
------
وا معتصماه
*************
المصـدر:
من ويكيبيديا، الموسوعة الحرة-

***- قول إحدى الروايات أن رجلا قدم للمعتصم ناقلا له حادثة شاهدها قائلا: يا أمير المؤمنين، كنت بعمورية فرأيت بسوقها امرأة عربية مهيبة جليلة تساوم روميا في سلعة وحاول أن يتغفلها ففوتت عليه غرضه، فأغلظ لها، فردت عدوانه بمثله، فلطمها على وجهها لطمة فصاحت في لهفة: وامعتصماه فقال الرومي : وماذا يقدر عليه المعتصم وأنى له بي ؟ فأمر المعتصم بأن يستعد الجيش لمحاصرة عمورية فمضى إليها فلما استعصت عليه قال : اجعلو النار في المجانيق وارموا الحصون رميا متتابعا ففعلوا فاستسلمت ودخل المعتصم عمورية فبحث عن المرأة فلما حضرت قال لها : هل أجابك المعتصم قالت نعم. فلما استقدم الرجل قالت له: هذا هو المعتصم قد جاء وأخزاك قال : قولي فيه قولك. قالت : أعز الله ملك أمير المؤمنين بحسبي من المجد أنك ثأرت لي. بحسبي من الفخر أنك انتصرت فهل يأذن لي أمير المؤمنين في أن أعفو عنه وأدع مالي له. فأعجب المعتصم بمقالها وقال لها : لأنت جديرة حقا بأن حاربت الروم ثأر لك. ولتعلم الروم أننا نعفو حينما نقدر.

***- ويذكر بعض الرواة أن امرأة ممن وقعت في أسر الروم قالت: وامعتصماه، فنُقل إليه ذلك الحديث، وفي يده قَدَح يريد أن يشرب ما فيه، فوضعه، ونادى بالاستعداد للحرب.

***- يقولون كانت المراه في أحد الاسواق وفيه رجل من الروم مار بالسوق فراء المراه وحاول أن يتحرش بها وامسك بطرف جلبابها فصرخت وامعتصماه فسمع صوتها رجال المعتصم فبلغوه فأمر بتجهيز جيش كبير والاستعداد للحرب.

***- وتذهب رواية رابعة أن الروم استغلوا انشغال الخليفة المعتصم في القضاء على فتنة بابك الخرمي، وجهزوا جيشا ضخماً قاده ملك الروم، بلغ أكثر من مائة ألف جندي، هاجم شمال الشام والجزيرة، ودخل مدينة زِبَطْرة التي تقع على الثغور، وكانت تخرج منها الغزوات ضد الروم، وقتل جيش الروم من بداخل حصون المدينة من الرجال، وانتقل إلى "ملطية" المجاورة فأغار عليها، وعلى كثير من الحصون، ومثّل بمن صار في يده من المسلمين، وسَمَلَ أعينهم، وقطع آذانهم وأنوفهم، وسبى من المسلمات فيما قيل أكثر من ألف امرأة.

***- وصلت هذه الأنباء المروعة إلى أسماع الخليفة، وحكى الهاربون الفظائع التي ارتكبها الروم فتحرك على الفور، وأمر بعمامة الغزاة فاعتم بها ونادى لساعته بالنفير والاستعداد للحرب.

***- وخرج المعتصم على رأس جيش كبير، وجهّزه بما لم يعدّه أحد من قبله من السلاح والمؤن وآلات الحرب والحصار، حتى وصل إلى منطقة الثغور، ودمّرت جيوشه مدينة أنقرة ثم اتجهت إلى عمورية في جمادى الأولى 223 هـ == أبريل 838م وضرب حصارا على المدينة المنيعة دام نصف عام تقريباً، ذاقت خلاله الأهوال حتى استسلمت المدينة، ودخلها المسلمون في 17 رمضان سنة 223 هـ == 13 أغسطس 838م بعد أن قُتل من أهلها ثلاثون ألفا، وغنم المسلمون غنائم عظيمة، وأمر الخليفة المعتصم بهدم أسوار المدينة المنيعة وأبوابها وكان لهذا الانتصار الكبير صداه في بلاد المسلمين، وخصّه كبار الشعراء بقصائد المدح.

(جـ)-
-------
القصة في الشعر العربي:
وهذا مانظمه أبو تمام في بائيته الخالدة مادحاً للخليفة بعدما حقق نصرا:

السيف أصدق أنباء من الكتب في حده الحد بين الجد واللعب
بيض الصفائح لا سود الصحائف في متونهن جلاء الشك والريب
والعلم في شهب الأرماح لامعة بين الخميسين، لا في السبعة الشهب
أين الرواية؟ بل أين النجوم وما صاغوه من زخرف فيها ومن كذب
يا يوم وقعة عمورية انصرفت عنكالمنى حفلا معسولة الحلب
لقد تركت أمير المؤمنين بها للنار يوما ذليل الصخر والخشب
غادرت بها بهيم الليل وهو ضحى يشله وسطها صبح من اللهب
حتى كأن جلابيب الدجى رغبت عن لونها, أو كأن الشمس لم تغب
ضوء من النار والظلماء عاكفة وظلمة من دخان في ضحى شحب
فتح الفتوح تعالى أن يحيط به نظم من الشعر أو نثر من الخطبِ
فتْحٌ تفتّح أبواب السماء له وتبرز الأرض في أثوابها القُشُب
أبقيت جد بني الإسلام في صَعَد والمشركين ودار الشرك في صَبَب
تدبير معتصم بالله منتقم لله مرتقب في الله مرتغب
لبيّت صوتًا زِبَطريًا هَرَقْتَ لَهُ كَأْسَ الْكَرَى وَرُضَابَ الْخُرّدِ الْعُرُب


#412568 [خلف الله عديل]
2.00/5 (2 صوت)

06-30-2012 06:57 PM
استاذ الصائغ


الامام الصادق ورث بناته الذكاء , والانفه والكبرياء


اما ابنائه ,ورثوا منه قوة البدن ,وقلة العقل ,وحب النفس , والانا.


لذلك تراهم فى حالة سقوط , وضعف تجاه المال والسلطة .


بعد سقوط الانقاذ , سوف يكون مبررهم , انهم كانوا يدبروا فى انقلاب داخل القصر ,


ووقتها سوف لن يجدوا اذان صاغية لتلك المبررات التى لاتقنع من لانصيب له من الادراك !!

التحية لاخواتنا بنات الامام , والتحية لبنات السودان مفجرات ثورة العزة والكرامة

لهذا الشعب .


#412508 [omer ali]
0.00/5 (0 صوت)

06-30-2012 05:43 PM
مجهود رائع ومقدر يا استاذ بكري
مشكلتنا الكبري في السودان هي التوثيق ,,
كثير من الاحداث في بلادنا لااحد يدري شئ عن تفاصيلها
وكل الذين اجرموا في حق بلادنا من سياسين وعسكريين لم يجدوا العقاب الرادع لكي يكون درسا لغيرهم حتي الذين كانوا شهود عيان لتلك الاحداث لم يكترثوا كثيرا لتوثيق تلك الاحداث واصبح شعارنا عفا الله عما سلف
وبفضلك يا بكري لن نترك اي حدث دون توثيقه وارجو ان نكون معا مركز او موقع للوثائق
THE ARCHIVE CENTRE وتكون انت يا استاذنا بكري المشرف علي ذلك المركز

لك منا الف تحيه وتقدير


#412495 [حسن غبد الكريم]
0.00/5 (0 صوت)

06-30-2012 05:30 PM
اكيد حتمدح مريم حتى لو كانت فى مكان اخيها


#412492 [وطنى غيور]
1.00/5 (2 صوت)

06-30-2012 05:28 PM
والله راجل عاقل واكثر عقلا من الذين ينبحون...زول ما عايز تخريب لانه وطنى وانت عايزالفوضى لان البلد لا يهمك ابدا لان لديك جنسية دولة اخرى والفرق كبير بينك وبينه كالفرق ما بين الثرى والثريا


ردود على وطنى غيور
United States [سوداني متقاعد] 07-01-2012 09:50 PM
افتكرك فطيت كلمة "مؤتمر" في بداية اسمك المستعار ياالاخو. اها نحن ماعندنا اي جنسية تاني وبالمناسبة موضوع الجنسيات ده اخير تقفل عليه لانو في من اسيادك عندهم مثل قطبي المهدي ومصطفى عثمان طبعا ده غير الولدوا اولادهم في بلاد "الفرنجة".
نصيحة: شوف ليك أي طريقة اتخارج من ناسك لانهم فلسوا البلد وامتيازاتك دي عاجلا -مش اجلا- حتقيف.


#412487 [الكناني]
5.00/5 (1 صوت)

06-30-2012 05:23 PM
هل هذا من يتشرف به القصر والعسكر ان يكون منهم انه مثال لكل دنئ وخسيس ولك حق تتسأل عن هل هو من احفاد الامام المهدي كلا( انه عمل غير صالح ) خارت رجولتهم في لحظة طمع وانصاعواإلى من يدعي نافع من اخرج الناس للحس الكوع الظالم


#412484 [واحد]
3.00/5 (2 صوت)

06-30-2012 05:21 PM
الرائع خالد عويس هو الدينمو الذي منع انبطاح = الصادق ظاااااااتو = مثل خالد تغني له بنات السودان وتقول فيه الامهات = اريتو ولدي واعقر عليه = خالد يا رائع ولد ما متلك ولد سلمت البطن الولدتك , كالسيف باتر كالبرق باهر خاتي الشق فصيح النطق غير متقعر ولا عيي , راجح الرأي حكيم التدبير لا هياب ولا وجل تستحق رئاسة الوزاره = مش وراثة وغمط لحقوق الاخريين كما فعل الصادق في المحجوب = شاب يرشحه الشباب وليس مثل وليدات ناس المهدي ود الصادق وود الهادي =


#412472 [بكري الصائغ]
0.00/5 (0 صوت)

06-30-2012 05:11 PM
الأهـداء لجنابـو....عسي بل لعل ويـفهم.....

تقول لِى شنو !
****************

( سيد أحمد الحردلو ) -
-
-1-
تقول لِى شنو
وتقولى لِى منو ،
-2-
أنحنَا السَّاسْ
ونَحنا الرَّاسْ
ونحن الدّنيا جبناهَا
وبَنيناها..
بِويت ..فى بِويتْ
وأسْعل جدى ترهاقَا
وخلى الفَاقة .. والقَاقا
-3-
تقول لِى شنو
وتقول لِى منو ،
-4-
تَالا أبوى .. بعنخى لَزَمْ
وتَالا اللُمْ..أَبوىْ أوْلبَابْ
وأمى مهيرة بتْ عبودْ
وأخويا المهدى ..سيد السيفْ
والخلى النصارى تقيفْ
هناك ..فى القيفْ ،
-5-
تقول لِى شنو
وتقول لِى منو ،
-6-
ونحن الشينْ
ونحن الزينْ
ونحن العقبه والعتمور
ونحن القِبله .. والقرعانْ
ونحن الشانْ
ونحن النانْ
أتينا عشانْ
نسوى الدّنيا للإنسانْ
تقول لِى شنو
وتقول لِى منو ،
-8-
ونحن الصّافى
والوَافى ،
ونحن الشّافى
والكافِى ،
ونحن الزادْ
ونحن العِينه
والزِيّنه ،
ونحن – يمين – أهالينا
أهلى سرورْ
ووكَتين ينزل المستورْ
تَرَانَه النور
-9-
تقول لِى شنو
وتقول لِى منو ،
-10-
ونحن الجبنه واللبريقْ
ونحن قداحنا سَاوات ضيقْ
ونحن بيوتنا مفتوحاتْ
مَسَاىْ .. وَصباحْ
ونحن وشُوشنا
مطروحاتْ
مَسَاىْ وصباحْ
ونحن السَمحه
والقَمحه
ونحن الطله .. واللمحه ،
ونحن الصِيدْ
ونحن العيدْ ،
-11-
تقولى لِى شنو
وتقولى لِى منو ،
-12-
ونحن عُزَازْ
ونحن حَرَازْ
ونحن هَشَابْ
ونحن قُمُوحْ
ونحن تُمُورْ
ونحن عُيُوشْ
ونحن النيلْ
وَكضَاب – يا زويل – منْ قالْ
إنّك .. تانى لينا متيلْ ،
تقولى لِى شنو
وتقولى لِى منو ،
-13-
ونحن الحَجه والتوبه ،
ونحن الهِجره .. والأوبه ،
ونحن كُتَارْ
ونحن كُبَارْ ،
ونحن – يمين – جُمَال الشيلْ
ونحن – يمين –نَضِمنا قليلْ ،
-14-
تقول لِى شنو
وتقول لِى منو ،
-15-
ونحن مِحايه
نحن طِرايه
نحن فِدايه
نحن سِمايه
نحن حجاب
ونحن اللوحْ
ونحن شَرَافه فى الدنيا
ونحن كِتاب عِلمْ مفتوحْ
على كل البُلودات ..نُورْ ،
ونحن – يمين – مَداين نورْ ،
ووشنا نورْ ،
-16-
تقول لِى شنو
وتقول لِى منو ،
-17-
ونحن الحِنه والجرتقْ
ونحن الزفه والسيره ،
ونحن ..أبشرى والشبال ،
ونحن السَىْ
ونحن الوَىْ
ونحن الرقبه .. والتُمْ تُمْ
ونحن اللَمْ ..
يكون فى الدنيا ..متلنا ..لمْ
-18-
تقولى لِى شنو
وتقول لِى منو ،
-19-
ونحن العَاجْ
ونحن الصَاجْ
ونحن البوشْ
ونحن الحوشْ
ونحن الناسْ
وكتين الديارا ..يباس
وإن درت العديل والزين
تعال يا زول ،
وإن كست الكعب والشين
أرح .. يا زول
-20-
تقولى لى شنو
وتقول لى منو ،
-21-
ونحن السورْ
ونحن الحُورْ ،
ونحن بناتنا محروساتْ
ونحن وِلادنا ضُلالاتْ
ونحن أُماتنا ياهِنْ ..ديلْ ،
وجِيب ورينى زيىِّ منو ،
وتقول لِى شنو
وتقول لِى منو ،
-22-
ونحن فَزَعْ
ونحن وجَعْ
ونحن اليُمه ..واليَابَا
ونحن أريتو بالتَابَه ،
ونحن – يمين – إذا حَرّتْ ،
نخلى الواطه ..رُقَابه ،
-23-
تقولى لِى شنو
وتقولى لِى منو ،
-24-
ونحن زَغَاوه والعطرونْ
ونحن الدُونَا ..مافيشُ دونُ
ونحن وِلاد مَلك خِرتيتْ
وسَابَ الجرْ
وحجَر السِكه ،
والتاكا ،
وسيّدنا الفى الجبل ..دَاكَا
ونحن – يمين – نضِمنا كُتُرْ
وشيَتنا كُتُرْ
وأسعَل ناس كَرن والطُورْ ،
وأسعَل كَررى .. والعَتْمُورْ
وأسعل – يا جنَاَ – الخرتُومْ ،
وشوف كيفن زعلنا كُتُرْ ،
وشوف كيفن فرحنا كُتُرْ ،
أنحنا الـ للرجال خُوسَه ،
ونحن –يمين – جِنَات موسى ،
-25-
تقولى لِى شنو
وتقول لِى منو ،
-26-
ونحن الدوكه
والضُلاله ، والدونكه ،
ونحن الدانقه ،
والراكوبه ، والواطه ،
ونحن الفَكَه
والشِبكَه
ونحن الحجزه .. والعكَه ،
ونحن الجُودْ ،
ونحن أسودْ ،
ونحن النَانْ ،
حديثنا إذا أرِدتو رُطَانْ
وحين دايرين ..نسوى بَيَانْ ،
-27-
تقول لِى شنو
وتقول لِى منو ،
-28-
ونحن الخَلوهَ والدايره ،
ونحن تَكيه العايره ،
ونحن الضُّلْ ،
ونحن الكُلْ ،
ونحن سبيل غريب الليلْ ،
ونحن صباح مسافر الليلْ ،
ونحن فَنَاجرةَ الدّنيا ،
ونحن حَبَابْ
حديثنا حَبَابْ
تعال شَرِف .. وشوفنى منو ،
وتقولِى شنو ،
وتقولِى منو ،
-29-
أقيف لِسَعْ
وأقيف وأسمعْ ،
ونحن صديرى منضوم ويلْ
ونحن القَرمصيص ..بلحيلْ ،
ونحن التوبْ
ونحن الووبْ
وناس حبوبْ
وناس حَرّمْ
ونحن إذا رأينا كبيرْ
نقيف طولنا ..ونقولْ لُه ..حَبَابْ
ونديه البُكَان ..ترحابْ
ونحن. اليَانَا ديل .. يا زولْ
وتسعلنى .. وتقول لِى منو
وتقولِى شنو ،
-30-
أقيف لسعْ
وأقيف .. وأسمعْ
ونحن التَايَهْ
والاندايَهْ
والزِريعهْ
والعيزومهْ
واتفضلْ ،
ونحن الرايَه مرفُوعه
ونحن الكُلفَه مرفُوعه
ونحن حلفتَ ... مدفوعه
-31-
تقول لِى شنو
وتقول لِى منو ،
-32-
وأما عجيبْ
وأما غريبْ ،
وأقيف لسعْ
وأقيف .. وأسمعْ ،
-33-
أنا الكَعَب البسوى الويلْ
وأنا الزول السَمِحْ ..بلحيل ،
وداير ..منَِّهُمْ .. يَاتُو ..،
تقولى لِى شنو
وتقول لِى منو.


#412466 [بكري الصائغ]
0.00/5 (0 صوت)

06-30-2012 05:04 PM
2-
أخـوي الـحـبـوب،
ود فضل،

تحياتي الطيبة، وألف ألف مبروك اندلاع الأنتفاضة وان شاءالله عما قريب نتنسم عبير الحرية، ويتعافي سودانا ويصبح حديـد،

***- والله حكاية عبدالرحمن الصادق مزعلاني شديد!!...ياأخي كان علي الأقل يلزم قصره او بيته طالما لايود التعليق علي ضرب ناس الأمن ورجال الشرطة لاخته وبقية المعتصمات بالمسجد، ولكن يسيب الاوضاع متازمة شديد بالقبة والجامع ويمشي لاحتفال (هايف) ماعنده اي معني ويفتتح استاد بتاع مصارعة في الوقت البتعاني فيه اخته من حصار وضرب ومعانأة....والله دي ماقادرين نفهمها ليه عمل كده?!!

***- الكلبة عند تلد، لاتسمح لااحدآ ويقرب من صغارها، وتدافع عن (الجروات) بشدة حتي تتفتح عيونهم ويستطيعون المشي والجرو، فهل نفهم ان الكلاب اشد حـنية من سعادتو...ولاكيف?!!!


3-
أخـوي الـحـبـوب،
abumohanad- أبو مـهند،

تحياتي الطيبة، سررت بزيارتك الكريمة، اما بخصوص سؤالك والذي قلت فيه.
(دى السودان بلد العجايب الله نحن احترنا في البحصل ده يا هوي ورونا البحصل ده شنو بالله العارف ينورنا)?).

***- ومنتظر معاك من يردنا علينا!!...ولاحول ولاقوة الا بالله العلي العظيم!!


4-
أخـوي الـحـبوب،

خالد،

تحياتي، وشكرآ علي الطلة المفرحة، والتعليق المقدر،

***- تعرف ياأخ خالد، الدكتور النافع ده افتكر نفسه ظل الله في الأرض يعطي من يشاء ويعز من يشاء، ويمنح بركاته علي زملاءه بالقصر وجهاز ا لأمن، وراح وبكل غرور وقلة ادب ويقول للضابط الاهبل:( وقف المظاهرات اديك رئاسة الجمهورية)!!،

***- النافع ده افتكر السودان بتاع ابوه وهو الوارث له!!، وهو البعين المستشاريين المساعدين...وكمان بعين الرئيس القادم!...

***- اما عن الشعب السوداني فهم رجرجة ودهماء، وعليهم قبول اوامره والا فان جهاز الأمن، والشرطة، والجنجويد، والدبابيين، والدفاع الشعبي، والمليشيات الاسلامية، وناس الجهاد الالكتروني كفيل بتاديبه!!

***- وتكمن قمة الماسأة ان سعادتو ود الصادق مصدق حكاية انو حيكون رئيس جمهورية!!


#412458 [ابراهيم1£2]
0.00/5 (0 صوت)

06-30-2012 04:58 PM
هذة الإنقاذ الافاكة، لا تفرق بين المرء وزوجه ، كما فعلت بإبراهيم شمس الدين و وداد بابكر، وحسب ، بل بمقدور سحرها ان يفرق بين الابن وأبيه ، كما فعلت بعبد الرحمن والصادق، ولو كان هذا العبد رحمن ، متحصنا بالدين ، قارئا لراتب الامام المهدى، الذي فيه التحاصين الكافية ، سورة الفاتحة ، سبعا ، والمعوذتين ، سبعا ، و الإخلاص ، سبعا ، وأية الكرسى ، سبعا ، والصلاة الإبراهيمية سبعا ، لما نفد اليه سحر الإنقاذ ، و أصابه بعمى البصر ، و البصيرة ، وان لم يتدارك نفسه ، فان الجبل لن يعصمه من الطوفان ، فالثورة منتصرة بإذن الله ، ومن لم يركب سفينتها ، فهو غارق لا محالة، وحينها لا تشفع له إخوته مع د. مريم ، لله درها ، لانه عاق لأخته ، عاق لوالده،. عاق لشعبه ، ولله درك يا سودان ، كم عاق انجبت غير الإنقاذ ؟؟ ام من اين أتى هؤلاء؟؟ ، رحمة الله عليك يا الطيب صالح !! رحمة الله عليك!!


#412456 [زكريا باسي]
0.00/5 (0 صوت)

06-30-2012 04:58 PM
التحية والتجلة وانحناءة طويلة لسيدة سيدات السودان أجمع مريم المهدي الشجاعة الباسلة التي قاومت النظام بشراسة وقف دونها الرجال حتى كسرت يدها الطاهرة بغيا وعدوانا .فقد تجاوزت صفات الامام المهدي أبناءه لتتجلى تلك الصفات بأبهى صورة في مريم .أنت قلادة في وطن اسمه السودان وما أجملك من قلادة .انت تاج في رؤوسنا جميعا نساءا ورجالا .


#412454 [الاعصار]
1.00/5 (1 صوت)

06-30-2012 04:57 PM
والله لا اري فرق بين مريم و اخيهاالفاشل ده , الدكتوره لقت نفسها محاصره داخل المسجد
وكما احرج الانصار والدها احرجوها هي لم تخرج ولا والدها وقد وجدوا نفسهم وسط المعمعه, الدكتوره اختفت من يوم التحق اخيها بقصر العصابه.


#412432 [اسماعيل صلاح]
0.00/5 (0 صوت)

06-30-2012 04:32 PM
التحية لك اخ بكرى وكل الشرفاء اما هذا اللاهة هو وود الميرغنى غايته غلبنا الوصف البنوصفهم بيهو ديل ارزقية برضه وعبد الرحمن دا قايل الشغلة انه زول الدولة محتاجاهو شديد وانه العقل المفكر للنظام وو وانه بديل البشير القادم ولا يدرى الجاهل انه مجرد سيجارة مصيرها تتشرب وتتداس بالجزمة

هذ زمانك يامهازل فاقدلى


#412427 [بكري الصائغ]
0.00/5 (0 صوت)

06-30-2012 04:28 PM
1-
أخـوي الـحـبـوب،
مشتهى السودان،

تحياتي ومودتي الصادقة، وألف شكر علي قدومك الجميل وتعليقك الواعي،

***- تعرف ياأخ مشهي السودان، والله انا مشتهيه اكتر منك!!..لي 27 سنة في الغربة ومازرت السودان خلال هذه المدة ولامرة..ولاعتبت بوابة مطار الخرطوم ولاميناء بورتسودان ولو بالغلط والله يجازي الكان السبب...وقوائم المطلوبيين حيآ او ميتآ!!

***- نرجع لموضوعنا واقول، قاعد اسمع كلام عن انو اخلاقيات السودانيين اتغيرت كتير بعد انقلاب الجبهة الاسلامية، وان التغييرات مشت كتير للاسؤا!!...لكن رغم ماسمعت ماكنت مصدق انو توصل الحالة في السودان وواحد يخلي اخته محاصرة من قبل رجال الشرطة والأمن ووسط دخان القنابل (والبمبان) الحارق ويمشي لحفل افتتاح استاد مصارعة!!

***- يخيل لي ان الراحل سيداحمد حردلو الذي كتب قصيدة ( تقولى شنو وتقولى منو)..قد مات كمدآ وهو يري كيف تحولت الاوضاع وماعدوا الناس و...

تقولى لى شنو
وتقول لى منو ،
-
ونحن السورْ
ونحن الحُورْ ،
ونحن بناتنا محروساتْ
ونحن وِلادنا ضُلالاتْ
ونحن أُماتنا ياهِنْ ..ديلْ ،
وجِيب ورينى زيىِّ منو ،
وتقول لِى شنو
وتقول لِى منو،
تَالا أبوى .. بعنخى لَزَمْ
وتَالا اللُمْ..أَبوىْ أوْلبَابْ
وأمى مهيرة بتْ عبودْ
وأخويا المهدى ..سيد السيفْ
والخلى النصارى تقيفْ
هناك ..فى القيفْ.


#412418 [Shah]
0.00/5 (0 صوت)

06-30-2012 04:16 PM
أخى الكريم أستاذ بكرىـ تحية و مودة:
هذا الرجل مثل إبن سيدنا نوح.
من غفلته أن يستغفله نافع وينزل به إلى هذا المستنقع الأخلاقى العميق.
والنار قالوا "بتتبرز الرماد".


#412403 [بكري الصائغ]
0.00/5 (0 صوت)

06-30-2012 04:04 PM
***- كنت اتوقع وان اطالع اليوم ب بالصحف المحلية او باحدي المواقع التي تهتم بالشأن السوداني خبرآ يفيد بان عبدالرحمن الصادق قد قام بزيارة للمسجد الذي تعتصم فيه اخته الدكتورة مريـم ( ام قلبآ حار ) ويطمئن علي صحتها واحوال باقي المعتصمات مع الدكتورة مريـم منذ الأمس الجمعة 29 يونيو الحالي،

***- ولكني فوجئت بانه مشغول بالوعد الذي قطعه عليه الدكتور النافع، بانه (عبدالرحمن) اذا استطاع تهدئة المتظاهريين وافشال جمعة (لحس الكوع)...فانه (النافع) سيقوم بتهيئة الاجواء لكي يكون عبدالرحمن رئيسآ للجمهورية في المستقبل!!

***- وقام الضابط بمحاولات لافشال المظاهرات ونادي في جماهير المتظاهرين بالكف عن التظاهرات....والغريب ان مناشدته كانت ب(الرموت كنترول) اي انه لم ينزل بنفسه ويخاطبهم!!

***- وهنا نطرح سؤالآ يقول:
( ونقول فرضآ، معقولة .عبدالرحمن حيحن ويشفق علي حال مواطنيه ورعاياه لو بقي رئيس جمهورية...وهو الما حن ولا شفق علي اخته?)!!

***- امشي ياعبدالرحمن وراء النافع لحد مايغطس حجرك، وتلحق غوش والطيب (سيخة)...وود عمك الفاضل الكان مستشار للبشير، وبعدها لاتلم في القصر لاالقبة!!...ويبقي حالك زي حال اطفال (المايقوما).. لا اهل ولا اصل لافصـل ومقطوع من شجرة!!

***- اللهم بلغت فاشـهد...


ردود على بكري الصائغ
United States [خالد] 06-30-2012 04:39 PM
الظاهر الدكتورة مريم شايلة الشريط الوراثي بتاع الكنداكات ومهيرة بت عبود ورابحة الكنانية وفاطمة احمد ابراهيم واخينا ضخم الجثة عريض المنكبين ابودماغ خالي من اي معالم مخيخ شايل الشريط الوراثي بتاع الراجل القال ليهو عثمان دقنة (علك ما بعتني بالرخيص ياود علي) هههههههههههههههههههههه
ايماننا كبير بنجاح الثورة ولانامت اعين الجبناء وراقصي السيرك


#412399 [خالد]
0.00/5 (0 صوت)

06-30-2012 03:59 PM
الحكاية دي محيراني جداً يابكري الناس ديل قايلننا ساكيين كيس ههههههههههههههه ما بصدق انو الزول ده خرج عن النص وعن طوع الامام واغلب الظن انهم عايزين يركبوا سفينتين في نفس الوقت والبتغرق فيهم يكونوا في التانية ...قاتل الله الراقصين علي السلالم
لا نريد ال المهدي ولا ال الميرغني بعد نجاح الثورة بإذن الله خلاص الفيهم اتعرفت ههههههههههههه بلدنا فيها كوادر ممكن تبحر بسفينة الوطن وما محتاجين للديناصورات دي تاني


#412375 [abumohanad]
0.00/5 (0 صوت)

06-30-2012 03:41 PM
دى السودان بلد العجايب الله نحن احترنا في البحصل ده يا هوي ورونا البحصل ده شنو بالله العارف ينورنا الشغلة دي فيها انه


#412371 [ود فضل]
0.00/5 (0 صوت)

06-30-2012 03:37 PM
بكري الصايغ أولاً لك التحية والتبريكات بالثورة التي اشتعلت جذوتها ولن تخمد إلا وكل واحد من هؤلاء اللصوص الأفاكين في مكانه الطبيعي : سلة زبالة ، سجن لاهاي ، قبر يخمو ، جحر ضب ، ماسورة مجاري ، صحراء العتمور ، حفرة دخان . . في مكان تاني يا بكري يشبه هؤلاء ؟
هب أن الدكتورة مريم المهدي أعتقلت وحكم عليها ذلك (الأبكر ) الخسيس بالجلد ماذا كان سيفعل أخو البنات ، المهم يا باشا الثورة قامت ولن نرجع الا ونحن منتصرين ونشوفك في السودان .


#412362 [مشتهى السودان]
0.00/5 (0 صوت)

06-30-2012 03:32 PM
عبد الرحمن اصبح لاعلاقة له بحزب الامة عندما خالف والدة والانصار بمشاركتة فى الحكومة الخايبة ، وهذا الموقف لايستبعد عنة ، لانو الببارى الجداد بوديهو ........
استغفر الله العظيم ، ولا حول ولاقوة الا بالله العلى العظيم


بكري الصائغ
مساحة اعلانية
تقييم
10.00/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة