المقالات
السياسة
ارشيف مقالات سياسية
حوار بين فاسد وثني منافق ومتظاهر ضد الجوع !!
حوار بين فاسد وثني منافق ومتظاهر ضد الجوع !!
07-02-2012 01:39 PM

يوسف برجاوي
[email protected]

السارقون الفرن بأكمله يحاكمون الباحثين عن الرغيفة جوعاً !!!!!
حوار بين فاسد وثني منافق ومتظاهر ضد الجوع والفساد
المتظاهر: نظامكم الفاسد يحاكم المتظاهرين ضد سياسات الافقار والظلم والتجويع والفساد بالجلد والغرامات والتعهد بعدم التظاهر مرة اخرى) هل يعني هذا أن من سرقوا الفرن كاملاً يحق لهم محاكمة الباحثين عن الرغيفة جوعاً ؟ !!!!!
الفاسد الوثني :هذا غير صحيح ولن يحدث في عهد المشروع الحضاري والانقاذ وهو كلام ناس شذاذ آفاق ومحرشين ومدفوعين بأجندة خارجية حاقدة على المواطن وسعادتو الفيها وحاسداهو على النعيم والترف الذي يعيش فيه هذه الايام والناس البتظاهر دي ناس تغيانة وبطرانة من الشبع والترف وعاوزة تغير جو شوية ديل بطالبو بحاجات كمالية وليست ضرورية ودة يعتبر نوع من الفساد في الارض ولابد يحسم بالمجاهدين.
المتظاهر: (البشير قال انه طاف شوارع الخرطوم بعربة مكشوفة وأي زول شافو رفع ايدو وهلل وكبر ....) ما مدى صحة هذا القول ؟
الفاسد الوثني :من الطبيعي جدا أن يهلل الشعب السوداني ويكبر عند رؤية الفاروق عمر البشير الذي اوصله للنعيم والترف الذي يعيش فيه الآن وارسى له مباديء العدالة والمساواة وطبق شرع الله القويم بالبلاد !!!!!
المتظاهر: سمعت احدى المسنات في المظاهرات الأخيرة قالت بناكل سخينة ما لاقين طماطمة وعندنا ايتام .......) ما تعليقك ؟
الفاسد الوثني : هذه ليست سودانية وهي صورة ركبها اصحاب الاجندات المستهدفة للمواطن والحاقدة عليه وعلى البحبوحة التي يعيش فيها والسودان زاتو ما فيهو حاجّات السودان بفضل الانقاذ كلو بقي شباب وإذا صح كلامك فأكيد تكون الحاجّة دي حاجّة شاذة آفاق ومحرشة لاستهداف المشروع الحضاري في ظل دولة الرسالة والشريعة.
المتظاهر: (محاكمكم الزمت المحكوم عليهم من المتظاهرين بالتعهد الخطي بعدم التظاهر مرة اخرى اضافة للغرامات والجلد .. هل هذه الاحكام صحيحة وعادلة) !!
الفاسد الوثني : التظاهر حق دستوري اصيل للمواطن بشرط ان يكون في سرو أو داخل بيتو فقط لكن البتظاهر خارج بيتو بخلاف ناسنا بكون مخرب وشاذ آفاق وأجنبي ومخالف للدستور والمشروع الحضاري وهنا يجب معاقبته بالجلد عشان تاني ما يطلع والغرامة لدعم خزينة الدولة ومشاريع التنمية والتعهد بعدم مخالفة الدستور الاسلامي العادل.
المتظاهر: التعبير عن الرأي بالمظاهرات السلمية مرفوض من حيث المبدأ من قبلكم لا من حيث جنوحه للتخريب كما تدعون وكل المظاهرات السلمية التي خرجت قمعت بالهراوات والبمبان الايراني والرصاص المطاطي بمجرد خروجها للشارع وقبل ان يبدر منها أي تخريب !!!
الفاسد الوثني : لو قريت الفقرة 23 من المادة 1989 من دستور جماعتنا تلقى فيهو انو المواطن ممكن يعبر عن رايو في سرو أو في بيتو أو في العمل او خارج السودان اما المظاهرات السلمية والمسيرات بتكون من جماعتنا ومجاهدينا لدعم النظام والرئيس وتأكيد محبة المواطن له وإظهار قوة المجاهدين برضو ممكن ناس الكورة يحتفلو بانتصار المنتخب الوطني او أي فريق بشرط ان يكون الفريق المهزوم اجنبي وان يكون الاحتفال داخل الاستاد وليس خارجه .
بعدين البنبان الايراني دة ما بنبان عادي ولا اجنبي ولا كافر دة بمبان اسلامي مصنوع في دولة اسلامية صديقة وما بأثر الا على الكفرة والخارجين على المشروع الحضاري من شذاذ الافاق والمحرشين والأجانب لكن ناسنا والمواطنين الصالحين اصحاب البيعة ما بضرهم وما بعمل ليهم أي حاجة .
المتظاهر: دة كلام جميل ورائع ... طيب ورد في الاخبار ان النظام يستعد لمسيرة مليونية يوم الجمعة القادمة تأييدا للنظام والرئيس هل هذا صحيح ؟)
الفاسد الوثني : ليس النظام من طلب ذلك بل الشعب هو طالب بالخروج في هذه المسيرة المليونية منذ اول يوم في مظاهرات شذاذ الافاق والأجانب التخريبية وذلك لتأكيد حبه ومساندته للرئيس البشير وتقديم واجب الشكر والتقدير له بعد ان وفر له كل ما تشتهي نفسه في هذه الدنيا كما ان المظاهرات والمسيرات مثلها ومثل العمل والوظائف والسلطة والاستفادة من المال العام والعيش في حياة كريمة كلها حق للمجاهدين وأهل الحق والمشروع الحضاري دون اهل الباطل والملحدين وشذاذ الآفاق والمحرشين والخفافيش والمرجفون في المدينة والأجانب كما قال نافع النافع للنظام وكما صدق في وصفهم الاخ المجاهد الرئيس والمجاهدون دكتور مصطفى عثمان ومساعده علي عثمان ووالي الخرطوم عبد الرحمن الخضر !!!!
المتظاهر: الوضع في السودان اصبح هكذا (الداير يقرأ ما قادر والبتخرج ما لاقي شغل والشغال ما قادر يأكل والبياكل مو شبعان والمريض مالاقي علاج والبتكلم بسدو خشمو والبحتج بضربو بالرصاص والبمبان الايراني والبطلع بدخلوه والبدخل بمرقوه الحكومة كلها في خدمة ناسها ناس المؤتمر الوطني) ما تعليقك ؟.
الفاسد الوثني : هذا غير صحيح بل العكس هو الصحيح تماما ولو الشعب ما شبعان وتغيان ما كان طلع يظاهر والمثل بقول(السمكة لما تشبع بتطلع من الموية ) صاح ولا ما صاح .. المظاهرات دي دايرة قوة ومروة والما شبعان شديد بما بقدر يظاهر .. انت كلامك دة كلام ناس شذاذ افاق ومحرشين وجايين من برة ما سودانيين المحرش ما بكاتل زي ما قال البشير. اتق الله فيما تقول يا شاذ يا آفاقي !!!
المتظاهر: والي الخرطوم عبد الرحيم الخضر قال ان المظاهرات ورائها اجانب ... هل كل الناس الطلعو من ولاية الخرطوم بتاعت الخدر اجانب ؟.. هل كل الجامعات الطلعت وكل الناس الطلعت من مدن السودان المختلفة بسبب الغلاء والجوع ديل اجانب ... او حركوهم أجانب ؟!!!!
الفاسد الوثني : انت براك شفتهم هل فيهم مواطن واحد هل فيهم سوداني واحد هل فيهم واحد بشبه المشروع الحضاري ... مافي مواطن سوداني بطلع عشان يخرب بلدو وممتلكاتو ويضيع الخير العايش فيهو ويهتف ضد امام المسلمين العادل البطبق ليهم في الشريعة الاسلامية السمحة الجات بالعدالة والمساواة ورفاهية المواطن ديل عملاء اجانب واضحين ما دايرين مصلحة المواطن .. ديل اجانب يا خي اتق الله يا اخي .. ديل اجانب اجانب يا اخي اريتك بالجنابة يا شاذ آفاقي يا محرش انت وهم المجاهدين والبنبان الايراني الاسلامي قادرين عليكم بس اصبروا شوية !!
المتظاهر: ماذا يقصد الرئيس البشير بشذاذ الآفاق والمحرشين والأجانب في المظاهرات ؟!!
الفاسد الوثني : حسب تفسير جماعتنا والمجاهدين بتاعننا هم جماعات شاذة اخرجها الشبع والبطر والترف - الناتج عن المشروع الحضاري - للتظاهر بالشارع بدعم من الاجانب والخونة والعملاء والملحدين والمحرشين بقصد استهداف المواطن السوداني فقط. وزي ما قلت ليك ما بطلع الشارع الا زول شبعأأأأأأأأأأأأأأأان وشاذ آفاقي الزول الجعان بقعد في بيتو وما بقدر بطلع برة وان طلع يشحد بطلع بأدب واحترام ونحن مستعدين ندي أي زول وطني يجينا ويشحدنا بأدب واحترام وفقا للدستور والمشروع الاحتضاري الخزينة اساسا مفتوحة للمواطن الوطني بتاعنا ما المواطن الشاذ أفاقي او المحرش او المواطن الاجنبي!!
المتظاهر: الناس بقولوا في جوع شديد وغلاء وفساد عشان كدي بظاهرو هل هذا صحيح ؟
الفاسد الوثني : انت زول متعلم وفاهم هسه عليك الله انت جعان ولّ فقران ولّ عندك قريبك جعان ولا فقران ما تراك شديد وبتتكلم معاي وبتناقشني وشغال كويس الزول الجعان بموت طوالي .. المواطنين الشرفاء ما شاء الله حيين وعايشين في خير ونعيم بفضل المشروع الحضاري والدليل على انهم مبسوطين وما جعانيين انهم طلعوا وظاهروا محرشين استجابة لأجندة الاجانب والخونة والعملاء ... في زول جعان بظاهر بعدين الحياة ياخي هي الحياة المعنوية حياة الآخرة حياة القيم والمبادئ التي جاءت بها الانقاذ والمشروع الحضاري وليست الحياة المادية حياة الاكل والشراب والزواج وحب المال والذهب والفضة والبترول وغيرها من الملذات والكماليات التي يطالب به شذاذ الافاق والمحرشين والأجانب .
المتظاهر: شكرا سعادتك على سعة صدرك و(سعة جيبك)وعلى الاجابات الشافية !!!
الفاسد الوثني : لا شكر على واجب وأتمنى ان تكون اجاباتي قد كشفت لكم ولشذاذ الافاق والمحرشين والأجانب خاصة حقيقة النعيم الذي يعيش فيه الشعب السوداني والكلام الكاذب عن المظاهرات والغلاء والجوع والفساد وحقيقة الاجندة الاجنبية التي تستهدف المواطن من شذاذا الآفاق والأجانب والمحرشين وأرجو ان تعكسوا للعالم الخارجي في كل وسائل الاعلام حقيقة استهداف المواطن من اصحاب الاجندة الخارجية وحقيقة الصورة الحقيقية لحياة الرخاء والرفاهية والنعيم التي يعيشها المواطن السوداني في ظل الانقاذ والمشروع الحضاري .
المتظاهر: العالم الخارجي زينا وزيكم عارف كل حاجة والجمعات الجايات اخطر من الجمعات الرايحات يا فاسدين!!!!

تعليقات 3 | إهداء 0 | زيارات 1865

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#416199 [الصارم]
0.00/5 (0 صوت)

07-03-2012 07:23 PM
شاطر وعندك مستقبل ولو شديت حيلك شوية حتلحق العملاقان... ابو الجعافر والفاتح جبرا


#414745 [مودي]
0.00/5 (0 صوت)

07-02-2012 03:27 PM
ههههههههههههههههههههههههههههههاااااااااااي


#414700 [حسين]
5.00/5 (2 صوت)

07-02-2012 02:46 PM
فى هذه الظروف الاقتصادية الصعبة السيد الوالى يفتتح واحة الخرطوم للفاسد الوثنى وربعه . تفضلوا عندهم أسواق عالمية والسنتر بوينت!!!!!!! دا وقتو


يوسف برجاوي
مساحة اعلانية
تقييم
10.00/10 (1 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة