07-02-2012 06:41 PM


شمارات حرم مساعد الحلة

ود التاي
[email protected]

مساعد الحَلّة يدخل البيت مهموماً مغموماً وهو يطَنْطِن: انعل أبو دي بلد دي...هسّة خلاس بقت علي أنا ... يعني لما يعفوني حيحلّو مشكلة المحروقات... بعدين الجماعة الماسكين في الشطر كم وعشرين سنة يرضعو ديل ما كان يشيلوهم هم!! قصة عجيبة خلاس... هسّة نَقَبِّل وين؟ مَصِر زاتا كَتَمِت وتاني مافي لينا طريقة فيها.. واريتريا بِقت ما جايبة حقّها؟ الله يسامحك يا مولانا غايتو سَوّيتا فينا.

حرم المساعد: اجّججي يا خليفة؟ ماااالك بِتَتكلّم مع روحك؟ بقيت من شُذّاذ الآفاق ولّلا شنو؟

المساعد:الشِنِّينة ام قِرينات..ما حَضَرْتي النّشرة؟

حرم المساعد: لا والله... انت عارفة بتجي مع مواعيد روبي والأولاد ما بيدوني فرقة في التلفزيون... الحصل شِنُو؟

المساعد: قالو والله في الظروف الصَعَبة دِي بَعَد رَفْع الدَّعْم عن المحروقات دايرين يخففو الحيمولة عشان اللوري يمشي.. وطلّعو المساعدين كووولّهم فائض عمالة.. يعني كرَشونا بِجَرّة قلم.

المدام: سَجَم خَشْمِي يا خليفة ... ومولانا رِضَا ليهم؟ موش هو لمّا دَخَّلوهو شريك في اللوري دة قال ليك ابقى مُساعد انت ومعاك اب جضيمات.

المساعد يطنطن بطنطنة غير مفهومة.

المدام: ياخوي هوووي البِكا على الأطلال ما بيفيد..كدي نقعد في الواطة نشوف القُرُوش الأدّوك ليها نهاية خِدْمة دي نَعمَل بيها شنو... نحسبها بي روااااقة كدة..اولا بالتبادي نمشي دُبَي نـ...

المساعد مقاطعا: يا مرة الدبيب الـ... دُبي شِنو وقِروش شنو؟ هو القال ليك منو ادّونا قروش؟

المدام: اجججججي.... سجمي، كمان مِيتة وخراب ديار؟ وليه ما أدّوك ؟ حقارة ولا حقارة؟ هووووووي يا مساعد الحلة، بِشّة سوّاق اللوري دة داير العين الحمرا.. وانا بعرف ليهو.. خليهو لي.

المساعد: اففففو ... يا وَلِيّة إنتي جَنّيتي ولّلا شنو؟ دايرة تمشي لي بِشّة تقولي ليهو ادِّي راجلي قروشو؟ دايراه الجَعَلي دَة يَضْحَك فِيني يقول السّنْجَك الخايب دة رسّل مَرَتو؟ والله كلام!!

المدام ضاحكة: لا لا يا مْساعْد السِّرور... ما بَمْشي ليهو.. بكلم ليهو السم القدرو... السّيْدة الأولى..إنت قايلني بَصَاحِب فيها لي شْنو؟... ما لليوم الأسود الزي دة؟

المساعد: ياخ السّيْدة الأولى دي أم فُقَرا ساكت.. دي زولة طَيبانة لا بِتْهِش لا بِتْنِش.

المدام: أم فُقَرَة شنو ياخوي.. أنا لِسّة ما لاقيتا زاتو.. دي مستوى دي؟ .. نَشكُر اللخَوَات الكريمات على المجهود القامنبو؟ هههههه... دِي رَبَّنا يكون في عونا.. أنا بَتكلّم عَن الطّيش البِقَت أولى.. وِدَّة.

المساعد: آ آ آآآآآآ.. بالّلااااااهي؟ بالّلاي إنتي بِتَعرِفيها؟.. ما حَصَل صادفتها معاك هنا.. ليه ما شفتها؟ هي كانت...

المدام مقاطعة: تَشوفا؟ داير تشوفا لي شنو يا خوي؟

- لا لا ما حاجة بسسس .. أها قُلتي لَي هي يَعني عِنْدَها نُفوذ علي بِشّة؟

- داب نُفُوذ هو.. إنت ماسِمِعت بي قِصَّتا مَع قشقوش؟

- قشقوش زاااتو؟ لا دي شكلها قوية... قولي.

- إنت قايل ود العَطا دة نطّ في جهاز الشمارات دَه كيف؟

- اها؟

- اصلو هي مَرَة ودّ العَطا صاحْبَة وِدَّة الرُّوح بالرُّوح.. ومُديرة مَكْتَبَا كمان.. وماسْكة ليها شُغُلَا كُلُو ...يَعني زَي ما تقول كِدَة باقية ليها (سَنَد)، اها قامت يوم إشْتَكَت ليها مِن عَمَايل قَشْقُوش مَعَ وَدّ العَطَا قالت ليها والله قَشْقُوش دَه كَرَّهنا عِيشَتنا وبِيَتْصَنَّت علي تَلَفون ودّ العَطَا وتلفوني أنا زاااتي مراقب... وِدّة قالت ليها إذا كان بِيَتْصَنّت علي تَلَفونِك معناتا أنا زاتي شماراتي كوووولّها عِندو.. انا الموضوع ده بحسمو ليك الليلة دي... اها قامت حرَّشَت عَليهو بِشّة وقالَت ليهو يشيلو مِن جِهاز الشّمَارات.. بِشّة حَكّ صَلْعَتو وقال ليها والله أنا زاتي شايفو اليومين دِي عَامِل ليهو رِويشات.. و جاني كلام تِحِت تِحِت قالو مَرّة قشقوش في لحظة صفا قال لو داير يَقلِب اللّوري دَة ما بياخُد معاهو خَمْسَة دقايق.. وِدّة قالت ليهو هو ودّ العَطَا دَة زاااتو خاتِّيهو طُرشُمية سَنَة نائِب قشقوشي ليه؟ ما تخلِيهو يمْسِك بَدَلو.... غايتو يا بِشّة يا أنا يا قَشْقوش دَه.. إنِّي خَيَّرتُكَ فاختار.. وباقي القِصّة انت عارفا يا خليفة.

- لا حولااااااااااااا .. والله اتاريها ما هينة!! بعدين انتي زاتك آآالمسخوتة جِبْتي الكلام دة من وين؟

- هههههه البلد كوووولّها عارفة إلا انت يا الغبيان... نَعَمِنَّك ما فاضي.. الليل والنهار تِتْجارى التقول ساكّي ليك كِيس... بَعَدين النسعلك هنا... انت مرّات كنت بِتَجي قريب الصباح ..كُنْت بتسو في شنو؟ انت يا اخوي الجماعة ديل عاملين ليك سكرتيرة؟ موش انت قلت لي ناس مكتبك كلهم من الخلفا الضكور؟ بتساهر وين لي وش الفجر؟

- يا مرة انا موش مية مرة قلت ليك بمشي لي مولانا بعد نهاية الاجتماعات اخر الليل بنقرا المولد؟ الله.. دة شنو دة؟ بقيتي شكاكة كمان؟

- بري يا خوي ناس لوريكم ديل بيخوّفو..جِنَّهُم حَرَكات..أنا خُفتَك تكون بِتقيم اللّيل زي شيخ صفصوفي.... ههههههه... موباااالغة لكن صفصوفي دة!!

- مالو شيخ صفصوفي عمل شنو؟

- اوع تقول لي ما سمعت قصتو؟

- غير مشروعو الخستك داك بتاع مزارع الورود والتفاح؟

- قر قر قر ..غايتو لاكيييين يتجازى ويرقد نجازة شيخ صفصوفي دة..غايتو زي ما بقولو السترة والفضيحة متباريات.

- يا ولية ما تحكي.. بقيتي تتفنني في الشمارات من صاحبتي النسوان الدستوريات ديل.. قولي.

- قالو ليك مرة كدة ناس البوليس لقو ليهم شافع سغيروني رايح.. قالو ليهو اسمك منو وانت ود منو؟ قال ليهم انا فلان وابوي شيخ صفصوفي.. قالو ليهو خلاس وصلت تب.. بيت ابوك دة في زول بيغباهو.. ساقوهو على البيت عدل..دقو الباب الحاجة مدام شيخ صفصوفي فتحت الباب ..قالو ليها يا هو دة ولدكم كان رايح لقيناهو ..وبلغي الشيخ تحياتنا ونحن عين ساهرة و.. الولية انهجمت وقالت ليهم الشافع دة ما تبعنا.. قالو ليهو يا ولد دي موش امك؟ ..قال ليهم لا ما امي.. وابوك منو؟ .. قال ليهم بابا شيخ صفصوفي.. اها قووومي يا المرة قولي ليهم كدي استنو بي شافعكم دة صفصوفي جايي هسة..الجنا دة زاتو فيهو شبهو ابجلحات.. شيخ صفصوفي اول دخل البيت لاقتو بالشافع انهجم.. قالت ليهو ياهو دة قيام الليل البتقول لي ماشي ليهو؟

- لااااااااااااااااااا.. الشيخ زااتو بالدس؟ والله شفت لكن.

- شنو؟

- لا لا ما حاجة.. قلت ليك ياخ الموضوع دة ممكن نمشي للمحاسب ابو علوة يحلو ويصرف لينا قريشاتنا ديل ...الموضوع ما بيستاهل نوصلو بشة زاتو ... بعدين يا ام عيالي بيني وبينك كدة خايفك تمشي لصاحبتك دي يقوم بشة يشوفك يدبر لي ميتة من مافي ههههههه.

- هههههههه ..دة بيعملا دة اب عينا طايرة...ابوعلوة شنو يا راجل.. دة لا بيحل لا بيربط..ياحليل ابو الجاز..المشكلة يحلها وكتي .. وفي البيت.. غايتو لكن ابوالجاز دة خلّا ليك ادروب لاهسة مخلوع.

- ادروب شنو يا ولية..؟ والله انتي الله يكفينا شرك.. شكلها دي قصة جديدة.

- والله انت كان كدي قاعد ساكت.. ليهم حق يبقوك مساعد حلة ..ما عارف قصة ادروب لامن عينوهو مساعد وبشة كتب ليهو تصديق بمليار واربعمية (بالقديم) يوفق بيها اوضاعو؟

- لا والله يطرشني... الحصل شنو؟

- ادروب يساسق كم يوم على الخزنة و وكيل الخزنة يتجرجر عليهو.. مرة الصرف ما اجيز..مرة الشبكة طاشة.. مرة تعال بكرة، اها ادروب لمن زهج الجماعة وفكّر يرجع الغابة الجماعة قالو ليهو امشي لابوالجاز في بيتو بي تلفون بيهرش الصرافين ديل بيدوك.. اها ادروب مشى لابوالجاز في البيت قام ابو الجاز دخل جوة اوضتو وجا مارق شايل ليهو كيس فيهو القروش كلها... كااااش داون صرة وبي خيت.. وكتي كدة.. لامن ادروب انهجم.

- لاااااااااا ما بصدق... مليار واربعمية من البيت؟ شئ عجيب.

- ياخوي لوريهم دة كلو عجايب بركة زاتو ربنا فكاك منهم.

تعليقات 8 | إهداء 0 | زيارات 4509

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#417149 [abubakr]
0.00/5 (0 صوت)

07-04-2012 03:43 PM
واله يت ود التاي ممكن تكون منافس خطير لأخونا جبرا وبعدين الإختفى داك الإسمو أبوالجعافر في كتابة المقالات الساخرة. ياربي مشى مين؟ من زمان ما سمعنى منو.


#415508 [قرفان جدا جدا]
0.00/5 (0 صوت)

07-03-2012 10:07 AM
اللوري حلا بي دلاني في الودي ... ودي شمارتك العجيبة المدنكلة ..تسلم على الخبارات الثورية . اي نكتو لينا العفن المجكن من سنين


#415092 [ود السنجك]
5.00/5 (1 صوت)

07-02-2012 10:00 PM
قالو اللورى دا عندوا تامين شامل وكامل من قطر
لكين انا متاكد انو بوحل فى امطار الثورة


#415086 [yasso]
5.00/5 (1 صوت)

07-02-2012 09:47 PM
ود التاي انت ود فنان


#415002 [فضل ابراهيم التيجاني]
0.00/5 (0 صوت)

07-02-2012 07:46 PM
هههههههه اللوري ههه اللوري
انشاءالله يتقلب الليله قبل باكر ويموت كل من كان علي ظهره


#414990 [أبصلعة الحالق دقنو]
5.00/5 (1 صوت)

07-02-2012 07:39 PM
دي شمارات مريحة جداً.. كتر لينا منها يا ود آلتاي لكن لقيتك خطير..
..
..
..
.. وماشين في السكة نمد..


#414962 [كردفاني]
5.00/5 (1 صوت)

07-02-2012 07:07 PM
ياعمك فعلا ده البيحصل في البلد دي
جمهورية النسابة وعلاقات ال.............
التصوير الدرامي جميل
ولكنه يعبر عن ماساتنا
شكرا ود التاي ولكن الالم اكبر من ان يتحمله شعبي


ود التاي
مساحة اعلانية
تقييم
8.00/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة