هواء ساكت (لم ينشر)
07-11-2012 08:37 AM

هواء ساكت (لم ينشر)

الفاتح جبرا
elfatih.gabra@gmail.com


(هذه الصحيفة تحتوى على تصريحات للمسئولين قد تسبب الشلل الرباعي) .. لقد طالب العبدلله مرات عديدة بوضع هذا التحذير على صدر كل صحيفة إذ أن هنالك تصريحات من بعض المسئولين لا تملك إلا أن تتحسس (مرارتك) بعد قراءتها ..
بالأمس القريب طالعت على عدد مقدر من الصحف تصريحاً للسيد نائب رئيس الجمهورية (الدكتور) الحاج آدم يصلح (مثالاً) للتصريحات التي تصيب الإنسان بالشلل السباعي وإلتهاب فقرات القلب (ده لو ما لحقتو أمات طه) .. يقول التصريح (كشف نائب رئيس الجمهورية د. الحاج آدم يوسف أن الحكومة أجرت إحصاء للإحتجاجات الأخيرة فوجدت أن 85% من المتظاهرين أجانب من خارج السودان ) وأضاف سيادته (كل الحكاية هواء ساكت) !!
وطالما إنو القصة فيها إحصاءات وكده فدعونا نتعرف علي كيفية عمل الإحصاء (علمياً) والتي تبدأ بمصادر جمع البيانات والتي حددها العلماء بمصدرين إثنين لا ثالث لهما المصدر الأول هو مصدر تأريخي وهو ما يؤخذ من السجلات كسجلات المواليد الوفيات وفي هذه الحالة (المتظاهرين) ! أو كالبيانات الواردة في رسائل الماجستير والدكتوراة (يعني زول يكون عمل ليهو دكتوراة في (نسبة الأجانب الذين يقودون مظاهرات غير بلادهم بالخارج) !
أما المصدر الثاني فهو ميداني وفيه يتم جمع البيانات مباشرة عن طريق بعض الوسائل أولها (المقابلة الشخصية) وفي هذه الحالة يكون (سعادة النائب) قد أرسل فريق عمل (يحوم) وسط المظاهرات وهو يسأل كل متظاهر (إنتا يا زول جنسك شنو؟) !
أما ثاني المصادر الميدانية فهو (الإستمارة الإحصائية) questionnaire ويتم تصميمها بحيث تشمل عدداً من الأسئلة تخص الموضوع الذي من أجله يقوم الإحصاء وهو في هذه الحالة (نسبة الأجانب في المظاهرات الأخيرة) ويراعي في هذه الإستمارة (كما يقول العلماء) الآتي :
1- أن تكون الأسئلة واضحة وسهلة .. يعني إنتا جنسك شنو؟ وكت إنتا أجنبي المدخلك في المظاهرات دي شنو؟ وحاجات بالشكل ده !
2- يجب أن تكون الإستمارة غير طويلة حتي لا يصاب الشخص محل الدراسة بالممل والضيق ، (وفي الدراسة دي بالذات حقو ما تكون طويلة لأنو الجو جو معافرة وبنبان و سيطان وكر وفر !)
3- يجب التأكد من سرية البيانات محل الدراسة حتى لا تكون إجابته بعيدة عن الواقع (يعني تقول ليهو إنتا بس أكتب جنسيتك ونحنا لا ح نرحلك بلدك لا بنعمل ليك حاجة دى بس إحصائية ساااكت عشان نوريها للشعب الوهم ده )
4- يجب على من يجري البحث أن يقوم بعد إعداد الإستمارة بإختبارها عن طريق أخذ عينة أخري للتحقق من جميع الشروط السابقة (يعنى إذا كان شال البيانات دي من مظاهرة في الكلاكلة يقوم تاني يوم يمشي يشوف ليهو مظاهرة تانية في شمبات ويوزع نفس الإستمارة للمتظاهرين)

أها طيب بعد ما جمعنا البيانات نعمل شنوووو؟ (العلماء بيقولو) بعد جمع البيانات من المصادر التاريخية أو من المصادر الميدانية نقوم نعمل ليها (تلخيص) لأنها (لحدت هسه) بيانات خام وغير منظمة عددياً ويصعب دراستها أو إستنتاج (حاجة منها) عشان كده لازم نعمل جدول (نخت فيهو) الحبش بى جيهة والأرتريين بي جيهة والمصريين بي جيهة و(البنغال) بي جيهة وكل جنسية نختها براها ونكتب قدام كل زول (بياناتو) العمر و الموقع الجغرافي للمظاهرة الإشترك فيها وكان شايل شنو؟ وسبب إشتراكو في المظاهرة؟ وهل يتبع لأي حزب سياسي (عندنا) .
بعد جمع الإستمارات دي من (المتظاهرين) القاعدين يملو فيها بي (رواااقه) وكل البيانات التى تم رصدها (يقول العلماء) يجب أن نقوم بعمل تلخيص لها وهذا التلخيص يتم خلال جدول تسهل دراسته يسمى (جدول التوزيع التكراري) يعني بعد عمل هذا الجدول يمكن وبسهولة معرفة (الأرتري) حزب أمة من الأرتري الختمي و(البنغالي) البعثي من البنغالي (الشيوعي) والحبشي (جناح الصادق) من الحبشي (جناح أم جكو) !

كسرة :
حتي الوصول للنتائج النهائية والـ 85% القالا (السيد النائب الدكتور) لازالت هنالك الكثير من الجداول والعمليات الرياضية والشنو ما بعرف التي يفترض القيام بها فهل تمت كل هذه الإجراءآت الإحصائية العلمية حتى تم التوصل لهذه النسبة العجيبة وللا (كل الحكاية هواء ساكت) !!

كسرة ثابتة :
أخبار ملف خط هيثرو العند النائب العام شنو(ووو و ووو)؟







تعليقات 49 | إهداء 0 | زيارات 8474

خدمات المحتوى


التعليقات
#425068 [ماما دوسو]
0.00/5 (0 صوت)

07-12-2012 11:11 AM
اكتر الردود عند جبره ------ لكن ياعمك السودانيين اول ماظهرت عندهم شوية النعمة الما دامت غير تلات سنين بس جابو اجانب من شرق اسيا عادي لما يجيبو اجانب يطلعوفي مظاهرات لزوم الكسل وكده


#425050 [طارق يوسف محمد]
0.00/5 (0 صوت)

07-12-2012 10:59 AM
الحاج ادم والذي منو ديل غنم ساكت ماشة مع القطيع يمن شمال شمال يمن ...
وهو اصلا لو فيهو عمااااااار ماكان جابهوا في منصبة ترضية وضحك علي ناس دارفور
لازم تسقط ياكيزان
لازم تسقط للسودان
خافوا الله البلد حلا يحننن ..
تخريمة وكت دخل الفرد 1800 دولار نحنا المغتربين ليها شنو ؟؟


#424963 [مسلم غيور]
0.00/5 (0 صوت)

07-12-2012 09:56 AM
أن تكون الأسئلة واضحة وسهلة .. يعني إنتا جنسك شنو؟ الاجابة :مصري... السائل: طيب وكت إنتا مصري المقعدك مع الطير ديل شنو....والله يا جبرا خليت خيالنا بقى واسع بشكل ....عموما مقال روعة الله يديك العافية...


#424917 [zoool]
0.00/5 (0 صوت)

07-12-2012 09:27 AM
يا جبرة يا زووول انت ما بتفهم
الزووول دا بيقصد باجانب دي
انهم ما من المؤتمر الوطني
وانو الـ 15% الهم سودانيين ديل ناس المؤتمر الوطني

فهمت ولا اجيب ليك فهامة


#424837 [ود عويضة]
5.00/5 (1 صوت)

07-12-2012 08:37 AM
فعلا (85%) من المتظاهرين أجانب والدليل (قالت) ... والدليل (قالت) ... والدليل قالت القيادية بالمؤتمر الوطني نائب رئيس البرلمان د. سامية أحمد محمد في تصريح لـ(smc) إن عدداً من الأحزاب والكيانات السياسية المعارضة من بينها حزبي المؤتمر الشعبي والشيوعي اللذين لعبا دوراً في خلق فوضى بين المواطنين باتباع أساليب التحريض والتظاهر الغير سلمي بجانب تخريب الممتلكات الخاصة والعامة مبينة أن حزبي الشعبي والشيوعي رفعا شعار إسقاط النظام الحاكم عبر وضع عدد كبير من الخلايا التخريبية النائمة بين المواطنين لمحاولة إحداث خلل أمني واجتماعي في البلاد.
وشددت سامية على أن السلطات والأجهزة الحكومية المختلفة قادرة على حسم التفلتات الأمنية التي يقف وراءها حزبي الشعبي والشيوعي بجانب اتخاذ خطوات قانونية وسياسية حاسمة تجاههما.

كسرة :
حيرتونا يا الكيزان وحيرتو ابليس معاكم نصدق (نائب الرئيس) ام (نائب رئيس البرلمان) والله
نصدق (الجك ) ودعبد العاطي القال دخل الفرد في السودان (1800) دولار ام بت الفاتح القالت وسط البرلمان (بطول حسها) اصحوا الناس ما قادرة تأكل غير وجبة (سخينة) في اليوم

كسرة تانية
اللهم لا تسلط علينا من لا يخافك ولا يرحمنا اللهم لا تؤاخذنا بما فعل السفهاء منا


#424628 [Salem]
5.00/5 (1 صوت)

07-12-2012 01:39 AM
انا مما سمعت دخل الفرد 1800 دولار بقيت افكر ارجع السودان ، وانتعشت امالي واحلامي
لكن انتو يا ناس الراكوبة طيرتو احلامنا الله ياخدكم


ردود على Salem
United States [السماحة] 07-12-2012 08:05 AM
انت مستهبل ومستهبل كبير كمان ناس الراكوبة زنبهم شنو ...؟؟؟ أرجع وأبقى جعلي حر , وأمسك فى رقبة المصرح ( ربيع عبدالعاطي ) أنشاءالله يدفع ليك من قروشنا ....!!! وبعدين أنت متلقى حجج ..


#424561 [fax]
0.00/5 (0 صوت)

07-11-2012 11:33 PM
لنفترض أنهم أجانب كيف دخل البلاد مثل هذا العدد من الأجانب للدرجة التي يشاركون السودانيون ثورتهم ؟ هذا النائب الخائب لا يعرف أن بهذا التصريح قد أدخل الأجهزة الأمنية والشرطية ووالي الخرطوم السارق المنافق في حرج , بحسب أن هذه الأجهزة لم تقم بواجبها في وقف تدفق الأجانب إلي السودان.
لنسأل من الذي أوجد الأجانب في السودان وبهذا العدد الكبير ؟ هل هو الشعب أم الحكومة ؟
تصريح هذا القبيح يماثل تصريح الواطي من أن دخل المواطن السوداني هو 1800 دولار الإثنين يحرجان نظامهما الهالك بإذن الله تعالي وهذا دليل علي تخبطهما وأن النظام يتأرجح و باتوا لا يعرفون كيف يتصرفون ويصرحون ؟
سيخربون نظامهم بأيديهم وهذه مشيئة الله لأنه سبحانه وتعالي يعرفهم كاذبون ومنافقون وظالمون وقتلوا الأنفس البريئة . سيعذبهم الله بحرمانهم من النوم ومن التركيز وبالخوف من غد , هذه هي حياتهم الآن التي يعيشونها وأشك أن هناك منهم من ينام ملء جفنه أو يأكل وجباته الثلاثة , ليس لهم حيلة غير أن يفكروا في الهروب وفي مصير عوائلهم وأقربائهم ,, الكل بدأ يتحسس جيوبه وجواز سفره ويحصي نقوده طلبا للهروب الكبير.


#424478 [د.سيد عبد القادر قنات]
0.00/5 (0 صوت)

07-11-2012 09:40 PM
سلام يا الفاتح


إت الحاج آدم دا ما ياهو ظاتو المتهم الهارب ولا زولا خلافو؟؟؟


زولا كان هارب ومتهم!!!


بس جا راجع السودان عبر صارة كبار الزوار ،


ولا مش كده؟؟؟


كان رشحوه لمنصب مدير مشروع الجزيرة زمان


لكن رفضوه،،،



اتللليلة كمان بقي نائب رئيس الجمهورية،

شفتو كيف؟؟؟



يديكم دوام الصحة وتمام العافية والشكر علي العافية


#424401 [abu modi joda]
0.00/5 (0 صوت)

07-11-2012 08:07 PM
يا جبرا كان في فهم قدر دا كان دا حال البلد .


#424383 [غلطة سراي]
0.00/5 (0 صوت)

07-11-2012 07:47 PM
تتذكروا وزير المالية المعولق بتاع عواسة الكسرة قبل شهرين قال شنو؟ قال جاييهم تمويل ضخم جدا من جهة لايريد ان يكشفها ح تخلي الدولار يساوي 3 جنيه في اسبوع
قال شنو اسرار دولة،،، البوق الانقاذي احمد البلال مفروض يجيبوا لينا تاني في برنامجو يسالوا لينا الجنيه لييه بقى بي سبعة؟؟؟؟؟


#424360 [نادر]
5.00/5 (1 صوت)

07-11-2012 07:22 PM
كافوري ليباا ليناي افرردن افرردن
كافوري ليباا ليناي افرردن افرردن
(لن يحكمنا لص كافوري بالتقرنا )
هتاف متظاهر حبشي في الكلاكة
سمع و شوف عين عديل كدة بعد داك البنبان بح صوته ما فهمت شي


#424332 [hazem]
0.00/5 (0 صوت)

07-11-2012 07:06 PM
أجانب من ياتو جنسية يا عم الفاتح، ده مهم جدا


#424182 [aaa]
0.00/5 (0 صوت)

07-11-2012 04:08 PM
نحن شعب مرفه متوسط دخل الفرد 1800 دولار مافى داعى نعمل مظاهرات فى الشمس الحاره دى نحن نقعد فى المكيفات وناجر الاجانب ولمن نسمع عمك دخل النفق بعد داك جرى نفتش الانفاق طبعاً كل واحد معاهو عوده والبيلقى عمك يخت ليهو العود فى المكان طبعاً انتو عارفين المكان .(ممنوع خروج النساء فى ذلك اليوم لبشاعة المنظر ).


#424169 [الخازوق]
0.00/5 (0 صوت)

07-11-2012 04:00 PM
يا جماععه واحد اورينا هو الزول دا دكتور بتاع شنو والله انا كنت قايلو حانوتي بعدين دي افشل حكومة في العالم رغم انو ناس الموتمر الوثني كلهم دكاترة التقول وزعوها ليهم في عيد الانقاز ياخي قال ليك جمال الوالي بقى ديك تور


#424168 [MUSTAF]
0.00/5 (0 صوت)

07-11-2012 04:00 PM
يا اخوانا جنتونا ..............
تاس المظاهرات ديل :
شذاذ افاق ام شماسة ام اجانب ؟؟؟؟؟؟؟؟؟؟؟؟؟؟


ردود على MUSTAF
United States [الكترابل] 07-11-2012 09:24 PM
كدي بالله يا جماعة خلونا من لولوة عمكم جبراالخيالي ده، الشعب يريد أن يعرف:
تاس المظاهرات ديل :
شذاذ افاق ام شماسة ام اجانب ؟؟؟؟؟؟؟؟؟؟؟؟؟


#424137 [الوافر ضراعو]
5.00/5 (1 صوت)

07-11-2012 03:21 PM
أول مره أعرف إنو المظاهرات بقى فيها محترفين،يلا ياشباب سجلوا لينا توانسة عشان ناخد الكاس


#424125 [ابوهاشم]
0.00/5 (0 صوت)

07-11-2012 03:04 PM
الاجنبي يا استاذ قاصدين بيهو اي واحد ما منتمي للحزب الوطني ...


ردود على ابوهاشم
United States [Omar Tomsah] 07-11-2012 05:09 PM
بس دا التفسير الوحيد


#424119 [wafi]
0.00/5 (0 صوت)

07-11-2012 02:59 PM
تحياتي يا جبرا

والله انت شاطر شديد في الرياضيات ، لكن شكلك كده عندك عقده منها.

دة الموضوع الثاني الخاص بالحساب و الاحصاء ، المره السابقة اقترحت عليك تدرس خصوصي الرياضيات في وقت فراغك ، والفتره الاخيره بقت كتاباتك قليله والعام الدراسي علي الابواب ، وناس الحكومه منعوكم من النشر.[ الفترة الجاية دي صدقني لو عملت استاذ خصوصي ح ترتاح ماديا في الازمة الحاصله دي ]


#424029 [ده الكلام]
0.00/5 (0 صوت)

07-11-2012 01:18 PM
البلد بلدهم والباقي أجانب تفسير بسيط


#424010 [ابو ابراهيم]
0.00/5 (0 صوت)

07-11-2012 12:53 PM
يا استاذ جبرا ديل شميتهم الكذب ثم الكذب والاستخفاف بعقول الناس


#424001 [ابوامين]
0.00/5 (0 صوت)

07-11-2012 12:42 PM
يا استاذنا هو النائب نسى انو قبل كده هرب من البلد وكان مطلوب بسبب انو الوضع ما كان عاجبو ولا وقتها كان معاهو اجانب وحالوا يقلبوا النظام ذى ماقال المثل (دابى فى خشمو جرادايه ولا بعضى ) مثل من اهل دارفور اهل النائب


ردود على ابوامين
United States [خالد فارس] 07-12-2012 09:25 AM
الاخ ابو امين مثل جميل والله (دابي في خشمو جراداية ولا بعضي ) في مثل تاني بيقول (ابوالقدح بيعرف كيف يعضي رفيقو)0


#424000 [د.عبد العليم]
0.00/5 (0 صوت)

07-11-2012 12:41 PM
المسألة يا أستاذ ما صعبة للدرجة دي، فإنت أدقس سوداني عرفتو في حياتي( طبعا أدقس دي من داقس)، المسألة ليست إحصائية كم ذهبت؛ المسألة مفاهيمية، فيبدو إنت غايبة عليك بداهة الأسئلة، أول شي تطلب من السيد النائب أن يضبط مصطلح الأجنبي دا ذاتو منو وتعريفو شنو، حتما ستجد أن تعليقك دا ( هوا ساكت)، وإنت واحد بتحب تفق مرارتك ساكت زي الهوا داك


#423996 [Musab Tonga]
0.00/5 (0 صوت)

07-11-2012 12:31 PM
ربنا سلط علينا حكام فاسدين وكذابين بعد تصريح المغفل نائب التيس امس البليد اللاوطني قال دخل الفرد 1800دولار افتونا ي جماعة قاعدين انحنا قاعدين في البلد وما جايبن خبر..


#423984 [الطير المهاجر]
0.00/5 (0 صوت)

07-11-2012 12:20 PM
ياجبرا الناس ديل برضهم بقو ذي ملف خط هيثرو انا بقبل عليكم بعد ده


#423977 [الطير المهاجر]
0.00/5 (0 صوت)

07-11-2012 12:10 PM
يعني بقت علي نسبة(؟؟؟؟؟؟؟؟؟؟؟؟؟؟؟)ده ما كل ؟..مير الإنقاذ دي شغالة نجر ياخي خليهو يطلع لينا نسبة النواب والمستشارين والمساعدين لرئيس الجمهورية من النسبة الكلية للشعب السوداني ..معليش يا شعب يا سوداني مع الإعتذار.


#423975 [أقداوي]
0.00/5 (0 صوت)

07-11-2012 12:08 PM
يا أخي ما قال أجانب...
قال: قاعدين برة السودان...
أها أعمل لينا موضوع في الحتة دي...
وشرطا يكون غير قابل للنشر...


#423959 [بت المك]
0.00/5 (0 صوت)

07-11-2012 11:55 AM
مساعد الياي عمره ما يكون ياي

خلوه يقعد كده لحدي ما الكتاحة تاخده معاهم المسيكين


#423940 [ود الحاجة]
0.00/5 (0 صوت)

07-11-2012 11:38 AM
الجمعة الجاية حيقول أن 95% من المتظاهرين هم من الاثرياء و أعضاء السلك الدبلوماسي الذين تضرروا كثيرا من زيادة أسعار البنزين و أصبحوا يتناولون كميات أقل من الحلويات و الايسكريم بسبب غلاء السكر


#423908 [كرجو]
3.25/5 (3 صوت)

07-11-2012 11:19 AM
وانا اقول مالو الدولار الايام دي ارتفع كده ، اتاري نحنا استوردنا اجانب عشان المظاهرات. و الله يا جماعه نحن منذ الان نريد ان نوطن التظاهر ذاتو. اقترح للمظاهرات التاليه عمل لجنه مشتركه ما بين المتظاهرين و الحكومه. عند المدخل لازم كل متظاهر يكون:
1- سوداني بالميلاد
2- احضار صورتين شمسيه ( ان تعذر فالقمريه تكفي)
3- ان يكون قد بلغ من العمر 18 عاما في ذات يوم التظاهر
4- ان يكون من ساكني المنطقه ( احضار شهاده سكن من اللجنه الشعبيه)
5- احضار رسوم التظاهر ( عشره جنيه)
7- يجب ابراز شهادة الذمه الماليه موثقه من وزارة العدل ( عشان ما نتهم دول ساكت بالتمويل)
8- احضار شنطه صغيره بها ملابس خفيفه لزوم السجن في حال مخالفة لوائح المظاهرات اعلاه
9- على موظفي الحكومه تقديم طلباتهم بواسطة رؤسائهم

10 - حق التظاهر مكفول للجنسين ( ذكر و انثى) ( عشان نا الجندر ما يطيرو لينا في راسنا ساي)
11- الالتزام بالزي المحتشم
12 - على المتظاهرين الدخول للمظاهره عن طريق الباب المخصص ( رجال و نساء) يعني مافي اختلاط بالواضح.
13 - للجنه الحق في رفض اى طلب دون ابداء الاسباب


ردود على كرجو
United States [muslim.ana] 07-11-2012 01:16 PM
والله يا (كرجو) اقتراح جميل.
بس لانو احنا شعب مرفه ومتعود انو يجيب الاجانب في المظاهرات انا اقترح ان يتم تنفيذ هذا البرنامج على مراحل بتحديد نسبة المتظاهرين الاجانب للمحليين ويمكن الاستعانة بتجربة اتحاد الكورة مع اللاعبين الاجانب والمحليين، واقترح البدء بنسبة 5 الى 1، يعني كل 5 شباب يتلموا مع بعض في مظاهرة من حفهم يجيبو معاهم اجنبي واحد (بس) للمظاهرة دي ويتم عمل لجنة خاصة للاستثناءات. وبكده نكون عملنا سودنة للمظاهرات ونحقق مشروع (الحملة القومية لتوطين التظاهر) !!!!

لا اعرف السر وراء اصابة كل من يدخل الى هذه الحكومة بالخطل الفكري؟ ولا هم بيجو كده من بيوتهم ما عارف (قال متوسط دخل الفرد السوداني 1800 دولار قال: عالم ..... ! )


#423892 [Skyline]
5.00/5 (1 صوت)

07-11-2012 11:12 AM
أضحكتني يا استاذنا، أضحك الله سنك يمكن الصداع الماسكني بسبب مشاهدة حلقة الاتجاه المعاكس يروح


#423868 [رمضان كريم]
5.00/5 (1 صوت)

07-11-2012 10:56 AM
الزول ده دقس اوع يكون قاصد الناس الكان فاعد عنهم سنوات وبيتجسس عليهم عليكم الله شوفوليه حلل
ري التمساح


#423862 [ابيرة]
5.00/5 (1 صوت)

07-11-2012 10:53 AM
يعتقد شذاذ الآفق انهم هم السودانيين والباقون أجانب ..هم قادة الأنقاذ ارباب اللحا...هم الكل هم

اسباب المصائب والبلاوي لكنهم ينظرون بمرآة واحده ولا امل فيهم ولا رجاء هم هكذا ...أكذب اكذب


حتي يصدقك الناس الهم اجعل كيدهم في نحرهم يارب العالمين


#423835 [abumohanad]
3.50/5 (2 صوت)

07-11-2012 10:31 AM
دا متخلف فاقد وعيه ولا يعرف ما يقول


#423831 [الحاج آدم يكذب ويصرح بغباء وجهل]
5.00/5 (1 صوت)

07-11-2012 10:29 AM
والله مافي كذب معلن وفاضح لملايين البشير بالطريقه دي من مسئول رفيع المستوى وعلى رأس الدولة ومعاونيها وذراع الرئيس الذي علمهم الكذب ..

قال ايضا على احدى الفضائيات عندما سألوه عن كيلو الطمام حصل كذا وسعرها المرتفع قال بكل برود وغباء وجهل مركب وعنجهية انه الزيادة من حظ المواطن السوداني المبرر انه معظم السودانين مزارعين وبيع الطمام بسعر عالي ده زيادة دخل ليهم وليس عبء عليه ... يعني المواطن السوداني بعد مشروع الجزيرة الفاشل وحلفا الجديده وبقية المشاريع برضو سعادته مصر انه معظم السودانين مزارعين وليسو ( مزارعية عطالى ) بعد خروج أكبر المشاريع ... وكمان كسبانين لانهم ببيعو لي نفسهم المزارع محمد يبيع للمزارع حاج احمد حسب غباء وكذب السيد الحاج آدم سيد نفسه فقط .

فعلا مسعولين يفقعو المرارة لكن برضو نعتبرها فرفرة ميت وهضربة وفقد ميزان وبوصلة المنطق والحجة وارتفاع هرمونات الغباء والكذب عند ناس الحكومة بدون إستثناء فقدنا الثقة في كبيرهم وصغيرهم .. غسيل كامل عايزين ما يفضل منهم احد

وثوري يا الخرطوم


#423820 [مراقب]
5.00/5 (1 صوت)

07-11-2012 10:22 AM
ياجماعة الراجل ما مصدق أنو بعد ماحوكم غيابيا أنو يجى ويمسك ليهو منصب عشان كده لازم يركب الموجة ويقول ليك أجانب وهواء ساكت وده علشان التفيضات ماتشملوا وكده .
أهو زى عبدالعاطى ( بالمناسبة لازم يعطينا القروش القال عليها ) . لك الله ياسودانا....


#423819 [TIGERSHARK]
5.00/5 (1 صوت)

07-11-2012 10:22 AM
The regime is in state of denial , the regime members have no idea what they talking about, each one of them try hard to show his strong loyalty to the gang master "Albashir", they runs out of lies and deception, no wonder to hear these kinds of rubbish comes out from their dirty mouths, no wonder


#423785 [الحقيقة]
5.00/5 (1 صوت)

07-11-2012 09:56 AM
الما داير احصاء هم ذاتهم ( من اين اتى هؤلاء )


#423770 [داقس]
5.00/5 (1 صوت)

07-11-2012 09:44 AM
يا الفاتح يا تفتيحة، هو مش قاصد 85% أجانب (أديل كدا) بيكون قاصد أنو (هواهم) أجنبي (ساكت)


#423769 [اخت الشامتة]
5.00/5 (1 صوت)

07-11-2012 09:43 AM
اخبار البلد المنهوب ذاتو يا الفاتح شنو
سيبك من هذا النائب المتخلف


#423759 [جنوبي]
4.25/5 (4 صوت)

07-11-2012 09:37 AM
يا جبرا النسبة دي صحيحة لأنو السؤال للمتظاهرين كان :
هل انت مؤتمر وطني ام اجنبي ؟
و100 % اختاروا اجابة اجنبي وقام النظام بتعديل النسبة حفظا لماء الوجه ..
الحاج ادم ده مش عليه حكم جنائي ؟ بقي نائب رئيس كيف ؟
واحد يطلعنا شذاذ آفاق والتاني يطلعنا اجانب وواحد يطلعنا شماشة ديل شنو العواليق الربنا ابتلانا بيهم ديل !!


#423757 [salah]
4.25/5 (3 صوت)

07-11-2012 09:35 AM
امس الدكتور ال دكتوراتو ملطوشة الخبير الوطنى قال كلهم لايتجاوزون اصابع اليد الواحدة
.. ركبوهم الدفار واخدوا الاستبيان فى مكتب الامن وطلعوا بالنتيجة.. بالله مش ساهلة


#423746 [ابو سامي]
5.00/5 (1 صوت)

07-11-2012 09:24 AM
ال 85% الاجانب
منهم 15% بنغالي
16 % باكستاني
14% تشادي
30% ارتري
10 % سنغالي
وهناك اعداد مقدرة من السودانيين الجنوبين نم العامل معهم بانهم بين بين لا هم اجانب ولا سودانيين لانهم في انتظار الترحيل عبر الجسر الجوي وهؤلاء تظاهروا ضد المنظمات المكلفة برحيلهم


#423742 [ود الشريف]
5.00/5 (1 صوت)

07-11-2012 09:21 AM
تحية وتقدير الاستاذ الفاتح
دى يا اخوى فرفرة المذبوح الناس دى فقدت العقل والمنطق وعرفو انه اللعبة انتهت والنظام الى زووووال قال 85% اجانب ده مريض دخلو المستشفي سيادة النائب اسي بالله ده كلام انسان مسؤل عليكم الله


#423733 [اوطان]
5.00/5 (3 صوت)

07-11-2012 09:16 AM
هههههه ياجبرا احتمال الناس ديل زاتم غيرو خريطة السودان وموقعه من الخريطه كدى برضو شوفو لينا ناس الجغرافيا ديل وين لانو خايفين بعد شويه الزول يركب ليهو طياره جاى الخرطوم يلقى نفسو فى جزر القمر ويقولو ليك نحن وقعنا اتفاقية اندماج بين الدولتين يعنى بقينا اتنين فى واحد


#423731 [جنوبي]
5.00/5 (1 صوت)

07-11-2012 09:14 AM
برنجيه يا طارق عبيد تعال شيل دي كمان


#423728 [الكناني]
5.00/5 (2 صوت)

07-11-2012 09:09 AM
مرحب بعودتك يا بروف ( جناح ام جكو ) فكاهة الموضوع هو النائب علي شونة دا دكتور !!! يعني عمل تحليل احصائي قبل كدا لي رسالته ولا ...د. فخريه..؟ عشان يجي يتكلم بصورة علمية نفهم بس


#423725 [مؤمل خير بعد الثورة]
5.00/5 (4 صوت)

07-11-2012 09:07 AM
البشرية دي لو كان بتعرف الحاجات العلمية دي ،، ده ما كان بقة حالنا ولا كنا طلعنا عليهم


#423716 [saad]
5.00/5 (1 صوت)

07-11-2012 08:58 AM
سيم سيم صديق


#423708 [البعير]
4.00/5 (4 صوت)

07-11-2012 08:54 AM
الاستاذ جبره لك التحية

هذا مساعد الحله ده مفتكر انو الشعب دى لسع نائم عشان كده بقول في كلامه الفارغ والهواء ساكت

ولكن الشعب صحي وانتفض وعرفوا الهواء الصاح من جمعة الكتاحة ولحس الكوع وشذاذ الافاق والجمعة

الجاية جمعة الصمود والتحدى لهذه العصابة الفاسدة وانه ثورة حتي النصر 0


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة