ده المجننا ذاااتو
07-14-2012 10:26 AM

ده المجننا ذاااتو

الفاتح جبرا
[email protected]


ما أن دخل الأسطي (عباس الحلاق) إلى منزله في مساء ذلك اليوم عائداً من المحل حتي بادرته زوجته (عواطف) وعلى وجهها تبدو علامات الجدية :
- كاتل ليا حيلك كده ونائم بالدولارات دي براااكا !
- دولارات شنو يا وليه إنتي جنيتي؟ أنحنا الدولار ده بي عينا ما بنشوفو ! إنتي قايلانا بنحلق لي خواجات
- بتشوفو ما بتشوفو (الحكومة) ما بتكضب
- والحكومة دي بتعرفني من وين كمان؟
- هي من ناحية بتعرفك بتعرفك بس كدي بطل الحركات بتاعتك دي وأطلع لينا بي كم ألف دولار كده من القاعد تحوش فيهم !
للوهلة الأولي ظن (الأسطى عباس) أن الولية قد أصابتها ملاريا بعد المطرتين (البوظو الدنيا) وجابو الناموس .. وإنو (الكلام الما ياهو) ده لابد أن يكون (هترشة ملاريا) وكده لكنها سارعت بالجلوس على أقرب كرسي لتشرح له الموضوع :
- إنتا قايلني بتبلا عليك؟ هسع قبل شوية دى ناس (الجزيرة) ديل جابو ليهم زول من ناس الحكومة إسمو منو كده عبدالعاطي قال متوسط دخل الفرد ألف وتمنمية دولار في الشهر ! أها بس وريني القروش دي بتوديها وين؟
- يا حاجه ناس الحكومة ديل مزرورين وقاعدين يهضربوا ساااكت ما سمعتي الزول القال قبل كم يوم إنو 85% من المتظاهرين ديل أجانب !
- يهضربو ما يهضربو أجانب ما أجانب ورينا الدولارات الحوشتهم لي هسه كم؟
- يا حاجة دولارات شنو؟ أنا هسه كان حلقتا (للأمم المتحدة) كوووولها بعمل ليا مليون جنيه في الشهر؟
- ما دي لعبتا .. ما لازم تدس الثروة دي يعني مع الدولارات دي عاوز تتعامل معايا بى شفافية ؟ .
هنا دخلت إلى المنزل جارتهم نعيمة زوجة (حسن سواق الركشة) وبعد السلام خاطبت (عواطف) قائلة :
- عليكي الله ما بلاقي ليا عندكم طماطماية طماطميتين ؟ كيلو الطماطم الليلة بقى بي خمسطاشر جنية !
- ويعني شنو كان بقى ما يبقى .. هسه لو بقى بي مية جنيه يعني شنو؟ راجلك ده ما بقبض ليهو في الشهر عشرة مليون بنات حفرة !
- (في إندهاش) : عشرة شنو؟ إنتي جنيتي ؟ وحات الله البيت عدمان نفاخ النار
- والله كان جنيت ما عارفة .. يعني عاوزاني أكضب الحكومة وأصدقك إنتي ؟
- والحكومة قالت شنو؟
- الحكومة قالت أي مواطن سوداني متوسط دخلو في الشهر 1800 دولار يعني عشرة مليون ! أها حسن راجلك ده ما سوداني وللا كمان من ال85% الأجانب !
- (هنا تدخل حسن) : يا عواطف ياخي ما قلنا ليك الجماعة ديل فقدو البوصلة وبقو يهترشو ساكت !
- (نعيمة) : هسه لو دي ما هترشة هسه (حسن) ده أيرادو بتاع (الركشه) في اليوم يعني بالكلام ده يكون تلتمية وتلتين جنيه هو أصلو سائق ركشة وللا أيرباص !
- شوفي يا نعيمة .. ركشة أيرباص أيركوولر غايتو الشئ الأنا عارفاهو الرجال ديل بطنم غررررريقة والحكومة دي ما بتكضب نصيحتي ليكي قبل ما تقطعي ليهو (السلطة دي) وتعشيهو أسأليهو بيودى القروش دي وين !
- (الأسطى حسن) : إنتي شنو شابكانا الحكومة ما بتكضب .. الحكومة ما بتكضب القال ليكي كده منو؟ هسه سمعتي ليكي بي زول نزل المعاش بيدوهو عشرة مليون ؟ سمعتي ليكي بي دكتور بيدوهو عشرة مليون ؟ سمعتي ليكي بي عسكري بيدوهو عشرة مليون؟ سمعتي ليكي بى ست شاي بتطاع عشرة مليون ؟ سمعتي ليكي بي مكنيكي بيطلع في الشهر عشرة مليون ؟
- أجي يا أخواني .. ناس الحكومة ديل مش مسلمين؟ كمان شفتو ليكم (مسلم) بيكضب؟
- (حسن ونعيمة بصوت واااحد) : ما هو دة المجننا ذاااااتو

كسرة :
قال رسول الله صلى الله عليه وسلم (أيكون المؤمن جبانا؟ قال نعم ! قيل له: أيكون المؤمن بخيلا ؟ قال نعم ! قيل له: أيكون المؤمن كذابا ! قال لا ) .. رواه مالك .. ده كلام سيد الخلق يعني ما كلام (الفاتح جبرا) وبقية الأجانب !

كسرة ثابتة :
أخبار ملف خط هيثرو العند النائب العام شنو(ووو و ووو)؟

تعليقات 36 | إهداء 1 | زيارات 8983

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#428657 [بت أمدرمان]
0.00/5 (0 صوت)

07-16-2012 09:22 AM
يا عمو جبرة نحن النائب العام دة من زمااااان مسمينو النائب ( النام) إنت ما عارف الحكاية دى و لا شنو ووو و ووو؟


#428515 [عاشق الحرية]
0.00/5 (0 صوت)

07-16-2012 06:03 AM
يعرف البنك الدولي الفقير بأنه الشخص الذي يعيش على أقل من دولار في اليوم يعني أقل من 365 دولار في السنة...وتشير الدراسات إلى أن هذا الرقم ينطبق على أكثر من 80% من الشعب السوداني الفضل.


#428213 [علاء]
0.00/5 (0 صوت)

07-15-2012 05:15 PM
والله ياود جبرا المجننا كثيرررررررروالله يصلح الحال


#427800 [كرجو]
0.00/5 (0 صوت)

07-15-2012 09:34 AM
و الله يا جبرا مما اقرا اسمك كده بيجيني احساس انك ساكن جنب المدينه الرياضيه (شمال خط السكه حديد).
ما علينا الكلام ده البتتكلم عنو حصل انا شخصيا. غايتو عندي مره اخير منها المره.

كسره :
اخبار مكتب النائب العام الفي مكاتب الثراء الحرام شنو؟
آل الكلاكله آل!!!!!!!!!!!!!!!!!!


#427700 [غلطة سراي]
0.00/5 (0 صوت)

07-15-2012 08:01 AM
تمام يا فاتح
تتذكر قبل فترة انا انتقدتك وقلت ليك البلد فيها ثورة وانت بتلف وتدور بعيد منها
لكن الان الكلام في التنك وفي خط الثورة

كمان اذكرك في نفس البرنامج نفس الربيع ده قال السودان ما عندو اي ديون دي كذبة اكبر من كذبة الدخل السنوي


#427547 [شر البلية ما يضحك]
0.00/5 (0 صوت)

07-14-2012 11:31 PM
يا جماعة الخير صحيح أنو الدخل يقاس سنويا ولكل أفراد الشعب يعنى بالحساب لو أسرة فيها خمسة أشخاص ( يعني أطفال أورجال أو نساء ) سواء كانوا يعملون أو لا يجب أن لا يقل متوسطهم جميعا 1800 بالحساب كدا يعني الاسرة هذه مفترض أن يكون دخلها السنوي يساوي 1800*5 =9000 تسعة ألف دولار في السنة أي مايعادل750 دولار في الشهر وبما أن في السودان لا لايوجد سوى شخص واحد يعمل من كل 5 أعتقد دخل الشخص يكون750*6000 = 45000 يعني أربعة مليون وخمسمائة ألف جنيه في الشهر


#427423 [حمدي]
5.00/5 (2 صوت)

07-14-2012 07:40 PM
البنقالة و الهنود كان سمعوا بالكلام دا ( متوسط دخل الفرد في السودان1800 دولار ) بكرة بيستفو البلد


#427415 [خالد]
0.00/5 (0 صوت)

07-14-2012 07:31 PM
الأخ الفاضل / الفاتح جبرا
السلام عليكم ورحمه الله تعالى وبركاته،،
حضرت تلك الحلقة مابين ربيع عبد العاطي وعمر قراي (الاتجاه المعاكس)
وللامانة ذكر ربيع عبد العاطي عن أن متوسط دخل الفرد (1800 دولار)
وبما أنه يقاس عالمياً (دخل الفرد) سنوياً عليه تكون الحسبة كالاتي
متوسط دخل الفرد 150 دولار شهرياً اى ما يعادل 800 جنيه 800.000 جنيه بالقديم وذلك منطقي
وأسال الله أن أكون قد أصبت
(رأي خطأ ويحتمل الصواب ورأى غيري صواب ويحتمل الخطأ)


#427413 [حاتم علي]
0.00/5 (0 صوت)

07-14-2012 07:27 PM
انت من زمن خط هيثرو الطيارات زاتن اتلحسن


#427387 [كرتوب]
0.00/5 (0 صوت)

07-14-2012 06:49 PM
يا سيد جبرة انت كمان داير تبقي زيهم ؟ الحلقة دي كل الناس شاهدوها وبتاع الحكومة ده ما قال الدخل الشهري ابدا وكان واضح من مجري الحديث انو بيقصد السنوي والدليل المبلغ القال انو دخل الفرد قبل الحكومة دي ما تجي. يعني كان داك دخلنا الشهري. عمرنا ما ح نتقدم لاننا بنتبع طرق غير نظيفة في كل امورنا واستسهلنا الغش حكاما ومحكومين وكتاب


ردود على كرتوب
United States [كرتوب] 07-15-2012 11:31 AM
انا ما ضربت حاجة ولا قلت كم انت محوص ياخينا ولا شنو؟

United States [كلام يا عوض دكام] 07-14-2012 10:21 PM
قول يا كرتوب الزول ده كام قاصد متوسط دخل الفرد في السنة والإنتا ضربتو ولقيتو 800 ألف في الشهر بالقديم عليك الله هسه ده متوسط دخل الفرد؟ ياخ طبيب الإمتياز مرتبو ما بحصل 600 ألف بالقديم ... الظاهر ياخوي إنتا كوز كبييييييييييييييييير


#427378 [النيل الفاير]
0.00/5 (0 صوت)

07-14-2012 06:29 PM
امتعتنا بالرواية اللزيزة دي .........:)


#427361 [خضرعابدين]
5.00/5 (1 صوت)

07-14-2012 06:04 PM
استاز جبراء المشكلة ان الجماعة اصبحو مثل الفائر الاكول لقد انتفخت بطونم وزاقت اعينهم لمن فقدو البوصل وتشابه عليهم البقر وم الان محشورين في جحرضب عديل يجب قطع الراس قبل ان يتخارج الجسم وقفت البلعه في الحلقوم


#427355 [عبد القادر]
5.00/5 (1 صوت)

07-14-2012 06:03 PM
بصراحة و بكل حياد
مستوى د/ ربيع دا تعباااان
يا خى زول بتكلم بأسم حكومة السودان , دا لازم اكون زول رزين و راسى و واثق من نفسو و جاضم الموضوع
مش اقعد اطلع برة الموضوع . هو زمن البرنامج كلو كم؟ لمن تعملا لى دا جمهورى دا ما بعرفو منكر دا داك و داك.
خليك قوى فى حجتك لو عندك حجة ولا ما تجى تمرض الناس ساكت


#427281 [عطبراوي آخر]
5.00/5 (2 صوت)

07-14-2012 04:49 PM
ياجماعـــــــة الكضب خشم بيوت
هناك كضب مباح وأصلا الحكاية كووولها قائمـــة على كضبـــــه كبيرة ( أذهب للقصر رئيسا وسأذهب للسجن حبسا ) يعني الموضوع قاعدته كذبة يونيو .... ودا كضب مبرر من علماء السلطان مبرر بفقــه الضرورة فهناك ضرورات تبيح المحذورات .... فالجماعــة ديل جاؤا ( لأنخاس ) البلد فه ضرورة أكثر من كده ؟؟؟؟ يعني شنو لو الرئيس قال السودان حانسلم بلد موحـد زي ما أستلمناه ؟؟؟ ويعني شنو لو قال بعــد هجليج أنو لاتفاوض مع الحشرات ، ولايمكن نجلس مع قطاع الشمال ؟؟؟ وبعدين الوفود تمشي تتفاوض وقطاع الشمال حاضر في المفاوضات .. وحاتكون هناك مفاوضات مع قطاع الشمال ... يا أخواننا لازم تعرفوا أنو الكضب في السياسة مباح وخاصة لي ناس بيتاجروا بالدين ... انتو متوقعين منهم شنو غير الكضب واللف واللغف والسفسفه والسفسطة والرقيص والردحـــي ، والكواريك وأدعاء البطولات وتهديد الناس بلحس الكوع ، ووصفهم بشــذا الآفاق ، فعلا الشعب السوداني كله شذاذ آفاق لأنهم صبروا على هــذه العصابة 23 سنة ... 23 سنة من الكضب والشعب السوداني المؤمن الصديق ، يصدق وينتظر الى أن تمخض الجمل فولــد انفصالا وحروبا ودمارا وخرابا وفقر وجوع وتشريدا ومذلة وأنكسار لشعب أبي صامــد جبار ،،،، ولكن أذا الشعب يوما أراد الحياة فلن يهاب كلاب الأمــن ولا الرباطـــة .. فلابد لليل أن ينجلي ولابد للقيد أن ينكسر ...


#427186 [hakeem]
5.00/5 (1 صوت)

07-14-2012 03:28 PM
استاذ جبرا انت مالك ماسك فى خط هيثرو كدة؟ الناس ديل باعوا كل البواخر وكل الحكومة وكل اراضى الحوض النوبى وحلايب والفشقة وباعونا نحن ذاتنا


#427147 [wafi]
5.00/5 (1 صوت)

07-14-2012 03:06 PM
تحياتي جبرا

والله انتم بقيتوا ما بتخافوا ، كلكم بقيتوا تتكلموا في السياسه ، كلام عديل لا لف ولا دوران.

نحنا بره ما بحصلونا ، والله يا جبرا الله يكون في عونكم

وصدقني ، النصر إنشاء الله في رمضان عشان الكيزان يعرفوا انهم بعيدين خالص من الاسلام


والنحيه للثوار الشباب


#427139 [كوع ما عندي موضوع]
5.00/5 (2 صوت)

07-14-2012 03:01 PM
يا بروف عندي سؤال صغيروني دحين البنبان ده مارتينزا جايه من مايرنو لانه اول مايفكوه والناس بكماماتهم الفيها الخل المظاهرات بتقيف وما بتتحرك تاني السودانيين ديل كان البنبان ما بوقف المظاهرات لكن باين البنبان ده ما بنبان دي بخرات كااااااااااااااااااربه وشغل حنقل منقل لازم نشوف لينا مضادات لهذه الرتينزا عشان نستمر في مظاهرات الجمع دي . يخوانا تتذكروا الغاز الكان انفجر في امدرمان قبل شهر وشي كان رائحته زي البنان ده حتي تاثر به بعض الاشخاص ودخلوا المستشفي الظاهر كانوا بجربوا فيه الوقت داك تحسبا


#427134 [خوجلي الشيخ]
5.00/5 (1 صوت)

07-14-2012 02:57 PM
ابداع


#427110 [zahi]
5.00/5 (2 صوت)

07-14-2012 02:41 PM
(( دعا مكتب الخطوط الجوية السودانية - بجدة - المملكة العربية السعودية اصحاب الحجوزات الحضور لاستلام مبالغ حجوزاتهم وذلك لعدم وجود طائرة تقل الركاب ، وكانت اخبار نشرت قبل اسبوعين تفيد بتعطل الرحلات الخارجية للخطوط الجوية السودانية بعد خروج طائرتي ايرباص 300 و320 المملوكتين لسودانير من الخدمة بسبب اعطال واستحقاقات مالية تخص شركات الصيانة العالمية.
واحتجزت طائرة ايرباص 300 التي تتبع للخطوط الجوية السودانية بالقاهرة بعد ان عجزت سودانير عن سداد تكلفة الصيانة، بينما تعطلت طائرة ايرباص 320 بمطار جدة .
وسحبت شركة البتراء الاردنية طائرتها التي تستأجرها الخطوط الجوية السودانية لتراكم المديونيات وعجزها عن دفع الاموال. )) تاني تقول لي خط هيثرو ؟؟؟ التقيل ورا .....


#427048 [HAMARTAGI]
5.00/5 (1 صوت)

07-14-2012 01:46 PM
انتو ناس ها بتفهموا ودمكم تقيل وياجبره كدي النفهمك براحه براحه

1-define sudanese ماتعريف السوداني
هو كل مخلوق ينتمي لعضوية المؤتمر الوطني
عليه
2- كل المخاليق الطلعوا مظاهرات مامؤتمرجيه وبالتالى ماسودانيين
3-كل المؤتمرجيه بالضرورة(بالميت كده) متوسط دخل الواحد 1800 الخرابه ده ىعني يافالح متوسط دخل السودانيين 1800 بتاع

اها بعد ده ورونا عرض اكتافكم ( تاشيرة خروج نهائي) لانو الاجانب زيكم ماطلعوا فى مظاهرات ليبيا ولاتونس ولامصر ولاسوريا والناس ديل جزاهم الله خير اتحملوكم كتير ( كمان جابت ليها قلة ادب)


#427039 [سودانى طلعتو دينو]
0.00/5 (0 صوت)

07-14-2012 01:32 PM
والله كلام يا استاذ
فحو فينا النسوان الله يفتح راسم ده غير الكذب ما عندهم شغلة والحكمة انو بتكلمو باسم الدين ولسان الصحابة
انا واعوذ بالله من كلمة انا : الدقون الفى وشهم ده شكلها وسخ ساكت من عدم الحلاقة
ولا رايكم شنو؟؟؟؟؟؟؟؟؟؟؟؟


#427001 [طارق يوسف محمد]
5.00/5 (2 صوت)

07-14-2012 12:53 PM
معناها يا شيخ جبرا الشعب السوداني جاحد ،،، اقوليك كيف ؟؟؟ واحد متوسط دخلوا 1800 دولار وطالع مظاهرات ؟؟؟ قلة ادب فااارغة يستاهلو الضرب بالجزمة ,,,
والله اااااا هم الطلعو مظاهرات ذاتم ما سودانيون ديل شوية اجانب لايتجاوزو اصابع اليد ...
طيب الربيع العربي اقصد الربيع الما عاطي كلامو صاح ::: متوسط دخل الفرد 1800 دولار
وهو اصلاً في حدي بيعرف اكتر من الحيكومة .... ؟؟ !!!!!
صدق المشكلة انا صدقتا وبديت حياتي على هذا المنوال والمشكلة الاكبر المنوال وقع في الرأس


#426977 [سوداني]
4.00/5 (4 صوت)

07-14-2012 12:31 PM
يا جماعة نحن محتاجين لعمل كبير يحدث خللة في النظام ذلك العمل يتمثل في الاضراب والعصيان المدني ولكي نصل إلى هذه المرحلة يجب على المعارضة (لامتلاكها وسائل الاتصال والنقل) تكوين لجان لوضع الخطط الاستراتيجية لتنفيذ ذلك الاضراب بعد وضع الخطط تأتي مرحلة حشد الدعم المالي لتنفيذ الخطة بدون دعم مالي لا يمكن تنفيذ أي برامج خاصة ان هذه الاحزاب معدمة ، فإذا أردنا تنفيذ اضراب ينفذه أصحاب المركبات مثلا هذا العمل يحتاج تكوين اللجان التي تقوم بحصر أصحاب المركبات ثم الاتصال بهم والذهاب إليهم مباشرة في منازلهم وهذا بالطبع يحتاج إلى أموال ، بعد الوصول إليهم نحتاج إلى أن نضمن لهم (راتب شهر) لأنه لا يمكن أن نطلب منهم اضرابا وهو يعتمد على رزقه من عمل عربته. هذا بالنسبة لأصحاب المركبات أما قطاعات المجتمع المدني الأخرى فعليها ايضا التزامات مثل الأطباء الذين بدأوا بالفعل في التحرك ، نأمل أن يتحرك أساتذة الجامعات لماذا لا يتحركون وهم يرون أبناءهم الطلاب يضربون ومعتقلين الوضع في السودان وصل مرحلة في غاية السوء لا يمكن السكوت عليها يجب مخاطبة أساتذة الجامعات وبقية النقابات لتكوين نقاباتهم.
نقطة أخرى أناشد الجميع بعدم دفع أي ضرائب ورسوم وعوائد للجهات الحكومية ، هذه الايرادات تجمعها الحكومة لشراء آليات القمع والتنكيل وتذهب لمرتبات هؤلاء الفاسدين ، امتنعوا عن تسديد أي رسوم للحكومة ، المغتربون حاصروا الحكومة بعدم التحويل عبر البنوك الرسمية الناس في الداخل يجب أن تمتنع عن تسديد الرسوم للحكومة.


#426971 [الممغوس]
3.50/5 (3 صوت)

07-14-2012 12:28 PM
أستاذنا الكبير الفاتح جبرا... دايما بتعبر عن الأفكار الما بنقدر ننزلها كتابةً ... عشت موفوراً على الدوام ... أها هسي ما بلقى عندك 200 دولار سلف كده لأنه الماهية عندنا متأخرة شوية لكن مضمونة ... ورونا لكن


#426959 [شمتان محمد شمتان]
5.00/5 (1 صوت)

07-14-2012 12:16 PM
والله يا جبرا الراجل دا بيكون صادق !!!
الجماعه ديل اى واحد عندو جن ( سفلى ) شغال معاهو ...
بس يمكن جن عبدالعاطى دا ماعندو ذمة وقاعد يجيب ليه تقارير فالصو.


#426955 [ابره]
5.00/5 (3 صوت)

07-14-2012 12:14 PM
لك التحيه يا استاذ جبرا ، خليهم يكضب ساي بدون (استحياء) ،انا شخصا من الان فصاعدا اي كلام قالوا الجماعه ديل بشوف العكس هو الصحيح لانهم طلعوا كلهم كضابين ،مثلا اذا قالو لينا تحرير كادوا يوم الجمعه الجاي اتاكد تماما مافي تحرير نهائيا واذا قالو لينا الاقتصاد يكون في حالةانتعاش خلال اسبوع سيكون في حالة افلاس خلال اسبوع،اذا قالو لينا شذاذ افاق هم شذاذ افاق وهكذ ،وكلامي دا عن تجربه شخصيه عيشتها ،الرئيس قال لينا في مشروع الجزيره المعيشه تتصلح وترجع المشروع لسيرتها الاولي
والمزارع يبقي اغني زول فقط المطلوب مننا نشتري خزن كبيره ومتينه ،من اليوم داك قام العبد الله اشتري خزنه بعد رحله طويله و سلفيات من الزملاء وديون وكدا في النهايه الحواشه وانا اصبحنافي خبر كان والكلام القالو لينا كله طلع كضب في كضب


#426950 [ود الحاجة]
5.00/5 (4 صوت)

07-14-2012 12:08 PM
صدق النائب الثاني جزئيا عندما قال 85% من المتظاهرين أجانب و الصواب أن 85% من الشعب السوداني يعامل معاملة الاجانب و الدليل :
1. تأخذ الحكومة ضرائب و جبايات لمن غلط و بعد كل هذا الصحة من جيبك و تعليم أولادك حتي في المدارس الحكومية لابد تساهم بحاجة من جيبك النفايات من جيبك و غصبا عنك و قس على ذلك
2. يكفل القانون حق التظاهر للمواطنين و لكن عند التقدم بطلب سيرفض هذا الطلب إن لم يكن المتظاهرون من ال15% من بين كوز و انسباءهم
3.لو عاوز تخرج بره البلد لا بد تمشي و تعمل تأشيرة خروج زيك وزي أي شخص غير سوداني و يريد العودة للسودان .المشكلة حتى لو ناوي ما ترجع السودان ده ما بيعفيك من تأشيرة الخروج
4. تقرأ الجامعة و تؤدي الخدمة الوطنية و ما تسمى " بعزة السودان" ثم ماذا ؟ حق العمل فقط
لل15% و الباقي يسوقوا ركشات اذا استطاعوا


#426936 [الزُول الكَان سَمِحْ]
5.00/5 (2 صوت)

07-14-2012 11:53 AM
يا استاذ جبرا

سايق ركشة..وللا إيرباص دى قلبتا فيها هوبة عدييييل..ودى طبعاً هضربتك بى خط هيثرو وكدا


#426902 [بت المك]
4.50/5 (3 صوت)

07-14-2012 11:24 AM
ههههههههههههههههههههههههههههههههههههههههه مين ربيع عبد العاطي ده خبير والله سجمنا على الخبورية كان كانت كده


#426901 [khalid m ali]
5.00/5 (2 صوت)

07-14-2012 11:23 AM
ده كبرت فى راسه شديد هو الترابى صاحبها قال الشغلانيه دى تانى ما بتمشى على الشعب بعد الفضاءيات وكده يااخونا شوف ليك جحر تانى تاكل منو عيش .


#426889 [كايلتود]
5.00/5 (1 صوت)

07-14-2012 11:14 AM
الإمام الشافعي
يقول:
نعيب زماننا و العيب فينا

و ما لزماننا عيب سوانا

و نهجو ذا الزمان بغير ذنب

و لو نطق الزمان لنا هجانا

فدنيانا التصنع و الترائي

و نحن به نخادع من يرانا

و ليس الذئب يأكل لحم ذئب

و يأكل بعضنا بعضاً عيانا


ردود على كايلتود
United States [هجم النمر] 07-14-2012 10:24 PM
إحتمال .. كل شئ في عهد الإنقاص دي ممكن


#426863 [aaa]
5.00/5 (3 صوت)

07-14-2012 10:48 AM
أيكون المؤمن رقاصاً؟؟؟


ردود على aaa
United States [طارق يوسف محمد] 07-14-2012 12:56 PM
لا والف لا إلا ذلك المنافق الذي ينعق بما لايفهم ويعي انه ........ من شوه صورة بن جعل الراقص الاممي ...
المشكلة عبدالرحيم ابو ريالة بقى اكعب منو في الرقيص الناس دي الحصل ليها شنو اي مسئول شايل عصايتو وشغال كشف ،،، الله يكشف حالكم ياالكشفتو حالنا


#426858 [ودالمناقل]
5.00/5 (2 صوت)

07-14-2012 10:46 AM
لك التحيه ايها المناضل الجسور جبرا كفيت ووفيت ..... لكن بيني وبينك كدا ناس الحكومه ديل مابكضبو احتمال يكون من الشهر دا وصاعدا يكونو عايزين يزيدو المرتبات ل 1800 دولار ؟؟؟؟؟؟؟؟؟؟


#426854 [المغترب]
5.00/5 (2 صوت)

07-14-2012 10:43 AM
لو دخل الفرد مليون وثمانمائة نحنا المغتربين ليها شنو ، ربيع مفتكر انو الاعلام ده كضب فى كضب لكن ما عرف يكضب متين وفى اى وقت ، الغريب بدل الجملعة يرقوا لرتبة وزير اعلام بدل مستشار اعلام الجماعه نكروا وقالوا الزول ده ما فى اى جهة فوضته للحديث باسم المؤتمر الوطنى ، والله يا ربيع عبدالعاطى معليش تكبر وتاخذ غيرها ، فى كل الوطن العربى هناك امثال هذا الربيع عبدالعاطى ومنهم:-
ربيع عبدالعاطى السودان
محمد سعيد الصحاف العراق
مجدى الدقاق مصر
عبده الجندى اليمن
شريف شحاته سوريا


ردود على المغترب
United States [alx] 07-14-2012 03:50 PM
الشي يا خوي ما مليون و تمنمائه انما بسعر اليوم 6 الف تطلع عشرة مليون و اربعمائة وتمانون الف في الشهر..... فمرحبا بك في السودان


الفاتح جبرا
الفاتح جبرا

مساحة اعلانية
تقييم
9.99/10 (16 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة