صاحبنا شول... وحقنة كمال
09-30-2010 08:35 AM

صاحبنا شول... وحقنة كمال

إبراهيم الكرسني
[email protected]

دايرلي حقنة بنسلين
تداوي مرضان السنين
تداوي زولن ساب بلادو
ساب ولادو.........
و ساب حقوقو...وسابلو طين
...
وجا العاصمه.......
و إتبدل الحال من مواطن
أصبح رقم....
في دفتر الوجع القديم
دفتر مهلهل من زمان
مالاهو أسماء الغبش
القالو جونا مهاجرين
...
ديل جونا كيف؟
ديل وصلو كيف؟
قام يسأل الحاكم \"العفيف\"!
ماكل تمام لابس نضيف!!
وبرضو يسأل جونا كيف؟!
...
قام زول ممصرن وقالهن
يا أخوانا كيف...
إنتو \"الحيكومة\" و تسألو
ديل جونا كيف؟!
ماكانو مرتاحين خلاس
ما كانو مبسوطين خلاس
لا شافو ذل لا ضاقو جوع
ضرعات مراحن....
داري ديمة خريف و صيف
...
قاعدين هناك فوق عزهم
كان دار جنوب أو دار غرب
ما كان فراقن بالمراد...
لامن خلاس جات الحرب
...
من دون إذن جاتن جيوش
جا الجنجويد........
من دون إذن هدمولو حوش
و إنتو برضو بتسألو...
ديل جونا كيف؟!
....
جو الجنجويد حرقو الزرع
جو الجنجويد جفا الضرع
جو الجنجويد كسرو الفرع
سألوهو لي يا جنجويد؟
في دهشة قال يستاهلو
ما أصلو ديل حفنة \"عبيد\"!!
و إنتو برضو بتسألو....
ديل جونا كيف؟!
...
قام نزحو تاركين الديار
صارين هدومن في هدم
و البقجة لي شيخن هرم
شايلي الفضل بعد الهدم
يسارو بالليل في الضلام
و كرعين حفن و إتشققن
من المسير طول النهار
و إنتو برضو بتسألو...
ديل جونا كيف؟!
...
قام شول مودع للجنوب
تايه يفتش في الدروب
شايلو شنطة اللت صفيح
غالبو المشي...
كرعين طوال لكين كسيح
...
ما هن دروب الهم كتار
واحد يسوقك للتعب
واحد يسوقك للشقي
واحد يسوقك للهموم
واحد يسوقك للمرض
لكنو رابع المستحيل
تلقي البسوقك للديار
...
سابو البلد وصلو المدن
شافو البدع!! ناسن غراب
ساكنين بيوت مو خمج
ماهن بيوت ألات تراب
شافو القصور حايطاها سور
لا فيها مرحب... لا حباب
...
صاحبنا شول...
دور يفتش شان يعيش
وسط العمارات الطوال
لاقالو بيت الليل عريش
وبي جنبو حوش....
قدامو مربوط كم دحيش
و كومن كبير وسط الحصير
صاحبنا شول....
من الفرح داير يطير
ظناهو عيش...تاريهو خيش
...
صاحبنا شول...
صاحبنا قام دقالو باب
ما البيت ملان أبواب كتار
واحد صغير للصغار
و الباقي للناس الكبار
دقالو بابن كيف كبير
و عصرلو شيتن زي زرار
صاحبنا طالبو الإنتظار
صاحبنا شول..يسأل يقول
يا ربي وين ناس الديار؟!
...
صاحبنا شول شال الهموم
غلبو النعاس ما جاهو نوم
ماسك الدروب يسكت يحوم
سألو زول..\"بلد ده وين\"؟!
ردالو دي الخرتوم عموم
...
صاحبنا شول لي نفسو قال
و الله صح.....
و الله دا الخرتوم عموم
لاتشوف قمر لا تشوف نجوم
و الله دا الخرتوم عموم
بتلقي ناس ساكنين قصور
وبتلقي ناس...
جوا المجاري بقالا دور
و الله دا الخرتوم عموم
بتلقي ناس تاكل الرغيف
وبتلقى ناس...
من المرض تنزف نزيف
و الله دا الخرتوم عموم
بتلقي زول شارب نضيف
و بتلقي زول...
ضاربو العطش عز الخريف
و الله دا الخرتوم عموم
بتلقي زول...
ودوهو لندن شان زلال
و بتلقي زول ميت هناك
حرموهو من \"حقنة كمال\"
و الله دا الخرتوم عموم
...
صاحبنا شول...
قام فجأة إتذكر هناك
الدخلة لي عند الأهل
الناس بتدخل لي بعض
طوالي توووش.. من غير رتوش
لا تلاقي باب..لا تلاقي حوش
...
ما هي المساكن في القلوب
مبنيي بالحب ماها طوب
و كان فد زويل أصبح مريض
تشفيهو دعوات الأهل...
لا بدور \"كمال\" لا بدور حبوب
30/9/2010





تعليقات 1 | إهداء 3 | زيارات 1341

خدمات المحتوى


التعليقات
#28795 [د. ياسر الشريف]
0.00/5 (0 صوت)

09-30-2010 11:05 AM
يا سلام عليك يا كرسني. مشتاقين يا صديقي.


إبراهيم الكرسني
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة