المقالات
السياسة
ارشيف مقالات سياسية
1800 دولار فقط لا غير و الماعجبو :
1800 دولار فقط لا غير و الماعجبو :
07-18-2012 02:01 PM

1800 دولار فقط لا غير و الماعجبو


عفيف الدين مضوي ارباب
afeif2009@hotmail.com

فلاسفة و مفكري و علماء المؤتمر الوطني يبدعون كل يوم و يدهشون العالم بافكارهم و نظرياتهم الاقتصادية المدهشة .
_ العالم و الشيخ الجليل و ابن الترابي العاق :
الاستاذ / علي عثمان محمد طه ، اصدر فتوي دينية اقتصادية مفادها :
( غلا وارتفاع الاسعار ليس بسبب ارتفاع سعر الدولار ، فالارزاق بيد الله ).
قصد شيخنا الجليل القول :
ان ارتفاع الاسعار و غلا المعيشة ، بسبب انهيار الاقتصاد الوطني ، والذي بلغ اعلا نسبة تضخم ٣٥% ، فعل رباني تسبب فيه بشكل مباشر القدرة و المشيئة الالهيه ، و البشر غير مسئولين عن كل هذا .
و بالطبع كل الحكومات في العالم تدار بواسطة البشر ، و بالتالي تعتبر الحكومة السودانية بريئة براءة الذئب من دم ابن يعقوب ، عن كل ما يحدث للمواطن السوداني من معاناة و مشقة في الحصول علي لقمة العيش ، فالارزاق بيد الله ، و انهيار الاقتصاد السوداني نسبة لفساد الحكومة ، بيد الله و ليس بيد الحاكم و بطانته .
( و الله ما شقالو حنك ضيعو ).
هذه النظرية الاقتصادية المدهشة حقا ، يجب ان تدرس في كل جامعات العالم ( عشان الناس الكفار ديل و اتابعهم من المسلمين ما يجنونا باقتصادهم دا ، شئ ما عارف اقتصاد اشتراكي و اقتصاد راسمالي ، ديل ناس فاضيين شغلة ساااااااي ، يلا يا ناس من بكرة قفلوا كل الكليات المتخصصة في علم الاقتصاد ، مافي حاجة اسمها علم اقتصاد، المسالة كلها مسالة غيبيه - ميتافيزيقية ).
_ العالم و المنظر الاقتصادي الرائع جدا ، نائب رئيس الجمهورية ،
د/ الحاج ادم يوسف
وضع و اكتشف احدث و اخطر نظرية اقتصادية ، بعد دراسة مستفيضة لعلم الاقتصادي ، و بعد تفكير عميق في اشكالات الاقتصاد العالمي و الاقتصاد السوداني بالاخص ، توصل عالمنا المدهش الي الاتي :
( ان غلا و ارتفاع الاسعار يعتبر محمده و ليست مفسده ، ارتفاع الاسعار خاصة اسعار المنتجات الزراعية ، يحفز المواطن علي الزراعة و بالتالي يساهم في النهضة الزراعية و التي بالطبع تساهم في ارتقاء ونمو الاقتصاد الوطني ).
يعني استاذنا الموقر ، فيما يعني :
- عندما يصل سعر طلب الفول ( الوجبة الرئيسيه لمعظم السودانيين ) الي ٥ جنية ، تعتبر هذه الزيادة محمده و ليست مفسده لانها تصب في مصلحةالمواطن و الوطن ( الواحد بدل ياكل فووووول عديل كدااااا ، ياكل موية فول ، عشان نقدرنصدر اكبركمية من الفول الي الخارج ، باعتبار انو نحنا ما قاعدين نستورد الفول و معظم المنتجات الزراعية من الخارج ).
- عندما يرتفع سعر كيلو اللحمه الي ٣٥ جنية ، هذه محمده و ليست مفسده ( هو ذاتو الشعب السوداني الفضل ، قلة الادب و الفلهمه ليهو شنو ، ياخي ما يملا كرشو دي باي حاجة ، يعني الا ياكل لحمه يعني ، شعب دني دناوة شديدة خلاص ).
_ الفيلسوف وعالم الرياضيات و الفلك الاستاذ / ربيع عبد العاطي ، تحدى كل علماء الرياضيات و كل فلاسفة المنطق و اثبت ان سعر الجنية السوداني يعادل ٤.٥ دولار .
وفقا لنظرية العالم الفلكي المدهش جدا جدا ، ربيع عبد العاطي ( طبعا الكيزان نكرو حطب ، لكن بنقول ليهم مافي ليكم طريقة زوغه , ربيع عبد العاطي يقال انه اخو راجي عبد العاطي لاعب المريخ ، و رئيس المريخ الكوز الكبير: جمال الوالي ، اذن راجي عبد العاطي كوز و بالتالي ربيع عبد العاطي كووووووز حتي لو كان تشابه اسامي ساااي ) ان متوسط دخل الفرد في السودان يساوي ١٨٠٠ دولار ، و متوسط دخل الفرد بالجنية السوداني يساوي ٤٠٠ جنية ، حسابيا :
واحد جنية سوداني يساوي ٤.٥ دولار امريكي .
بالفعل الاستاذ / ربيع عبد العاطي ، زول سوداني مدهش .
( لو الامريكان صدقوا كلام الزول دا ، من بكرة كلهم حيجوا اشتغلوا في السودان ، و كل سوداني حيبقي كفيل لتلاته اواربعه امريكان ، الامريكي اشتغل في السودان سنه سنتين و بعديه يرجع امريكا ، يبني ليهو ناطحة سحاب ، و يعرس ، و يعيش باقي عمروا كلوعلي جنيهات السودان، ما الجنية بيساوي ٤.٥ دولار).
_ التحية لعلماء و فلاسفة و منظري حكومة الانقاذ الوطني ، و لا تحية و لا تحيات للشعب السوداني الفضل ( الما بعجبو العجب و لا الصيام في رجب ).
متوسط دخل الفرد ١٨٠٠ دولار ، و بعد كل هذه الرفاهية و الترف المبالغ فيه ، يشتكون من تردي الاوضاع الاقتصادية و المعيشية ( شعب بقدرة قادر متوسط دخلو بقي ١٨٠٠ دولار ، و بقدرة قادر الدولار كان يساوي بعملتو المحلية ٦٠٠ جنية ، بقي الجنية يساوي ٤.٥ دولار ، يعني تاني الحكومة تسوي ليكم شنو اكتر من كدا ).
1800 دولار فقط لا غير و الماعجبو :
- يحلق حواجبو .
- يلحس كوعو .
- يشحد قدام الجامع الكبير .
او...........
يشذ افقيا .
خالص ودي .
التوقيع : شاذ افقيا








تعليقات 0 | إهداء 0 | زيارات 1572

خدمات المحتوى


عفيف الدين مضوي ارباب
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة