07-19-2012 08:33 PM

ربع عامود

حاتم الجميعابي
[email protected]

مثل إنقاذي " القال ليك بلدنا جيعان أداك صورة مقلوبة "
حكمة الخميس " وطن ممتد لحد حدود .. وطن لا فيهو هم لا غم .. فقط نسعد .. بلاد حد الشمس والضو.. نحلق ما يحدنا جو .. نقيل فيها مرتاحين .. وريـــــحة البن ..
(1)
البشير يدعو مرسي لزراعة مليوني فدان بالسودان..
عليك النبي ما تورط الزول ساي .. هي الزراعة أنتو فضلتو فيها شنو عشان تدعو ليها .. ناس مصر، نشفتو ريق مشروع الجزيرة وخليتو زي الزول الصائم في رمضان " عطشاااااااااااااااااان" وحالتو بالبلاء .. عليك الله البلد دي فيها شنو غير المزارعين .. ما كلنا قرينا واتعلمنا من أبواتنا .. أن الأرض هي أعظم شئ عند الأنسان لكن أنتو حولتوها لي حجيم لا يطاق.
يا خيابتنا لما المصريين يجو يزرعوا لينا أراضينا .. البناكل من عيش !!!
(2)
الخضر: تصاعد أسعار اللحوم غير مبرر!!
عليك النبي .. عليك الرسول .. طيب شنو المبرر في البلد دي .. زيادة تعاطي المخدرات بالنسبة مبررة، لانها تساعد على تدمير العقول الأنتو أصلاً ما فضلتو فيها حاجة.. بالله عليكم لا تضحكوا على هذا الشعب، تصريحاتك أخير منها تسكت .. وتصم خشمك لانو ما مبررة أصلاً ..
(3)
سعر كيلو الضان بلغ (40) جنيها وكيلو العجالي (32) جنيها وكيلو الدجاج بلغ 22جنيها ؟
ده طبعاً للناس الأصلاً قاعد تأكل لحمة .. لانو في ناس شوفتا للحمة في عيد الضحية فالمقتدر بضبحا في بيتو والما مقتدر بيأكلها عند الجيران، مع العلم بأن رمضان على الأبواب يعني ملاح "الشرموط" السنة دي مافي ... الشعب السوداني يتعذب أكتر من كده كيف يا أخوانا ... حرمان من كل شئ حتى من لحوم مخلوقات الله المحللة ..
(4)
أكثر من (1114) طالب وطالبة من اكاديمية العلوم الصحية بالقضارف قضوا فترة أربعة أعوام نهلوا خلالها من مختلف التخصصات في التمريض والصيدلة والعلاج الطبيعي والتخدير وطب الأسنان .. بلا شهادات..
هذا حال التعليم العالي في دولة المشروع الحضاري حينما تستوعب سياسات التعليم العالي طلاباً .. برسوم دراسية باهظة وبيئة دراسية طاردة .. مع عدم كفالة حق السكن والترحيل والذي منو .. يستحملوا كل ده الأسرة في النهاية يجو يطلعوا من دون شهادات بالله عليكم ماذا يكون شعور هؤلاء .. ألا يكره السودان (100) مرة ... هم الأن لا يتحدوث عن التوظيف هي مجرد شهادة جامعية .. تمنح للطالب بعد يكمل ما عليه من ساعات حسب نظام الأكاديمية ولكن أراد هؤلاء أن يتخرجوا زيهم وزي أي شخص طلع العمارة ونزل منها لا شهادة تمنح ولا بطيخ !!
(5)
حظر (سودانير) من الهبوط بمطار القاهرة
معليش سودانير .. معليش الناقل الوطني .. معليش يا سودان .. هذه قمة المهانة للسودان أن يحظر طيرانه الوطني من الهبوط في إحدى المطارات لانها غير مطابقة للمواصفات العالمية، بعد نشفوا ريقا الكيزان .. لحسوها زي عسل النحل حتى ما خلو شوية في الخلية .. شغل مضرة بس .. الناس ديل مفروض يدهو شهادة في التدمير أي حاجة أدمرت .. ولحق أمات طه (طه منو؟) تخيلوا ما عارف .. المهم مثل ينطبق مع الحالة ..
(6)
الوطني : مساع عربية للجمع بين البشير والترابي
أنتو ما تقولوا الكلام بالواضح .. عربية ولا الجزيرة ..
الكلام الواضح : دولة قطر أشترطت على السودان شرطين لا ثالث لهما لتوفير الدعم المادي واللوجستي ..
الأول : توحيد صف الحركة الإسلامية خصوصاً الشعبي والوطني.
الثالث : أيقاف الحرب في دارفور .. والتي يعتقد الكثيرين بأنها تدار بواسطة جناحي الحركة الإسلامية ..
الجائزة : مليارات الدولارات تضخ إلى خزينة السودان .. مع إيجاد مؤامة للعلاقة المتوترة بين الشمال والجنوب بواسطة علاقات قطر بأمريكا.. شفتو الكلام ده مظبوط كيف ..
(7)
إستبعدت إدارة الحج والعمرة عددا من أمراء أفواج الحجيج بنسبة 30% لضعف أدائهم العام الماضي وأبقت على عدد منهم!!
.... الأداء كيف يا ربي .. بجدعوا السبة جمرات بره الكعبة ... يمكن !! غايتو جنس محن الواحد يعينو أمير للحجاج ويمشي السوق وينسى حجاجو، وشغاااااااال في شغلتو .. غايتو الله يستر ما يقوموا يزوغوا تاني .. وتبقا حجة وزوغة ..
(8)
سعر جركانة الزيت الكبيرة 36 رطلا يصل نحو (111) جنيها وقبل 20 يوما كانت سعر الجركانة 36 لتر(98) جنيها بزيادة 22جنيهات، واما سعر الجركانة 18 لتر(73) جنيها و9 لتر(57) جنيها وبلغ سعر جوال البلح القنديلة (587) جنيها وبالنسبة للتوابل فقد ارتفعت اسعارها وبلغ سعر ربع الكبكبي (44) جنيها والعدسية (35) جنيها للربع وسعر التبلدي (36) جنيها للربع ويبلغ سعر رطل العرديب (18) جنيهات والكركدي (13) جنيها ، واشار حامد الى أنهم يتوقعون زيادة في الاسعارالى الضعف مع بداية رمضان في كل البهارات بحيث بلغ سعر رطل الشمار عشرة جنيهات والكسبرة 15جنيها للرطل فيما بلغ سعر رطل الفلفل (13) جنيهات و بلغ سعر الشطة العادية (8) جنيهات.
أها شفتو الكلام ده في رمضان بعد العيد شيلوا شيلتكم الشطة حتبقى بي (100) جنيه .. مش مستوردة .. من الصين ..
ثمن عامود :
شطة بي (8) جنيه دي زكرتني خطاب الدورة والميزانية في الإتحادات الطلابية التابعة للكيزان يقول ليك عملنا إفطار الصائم في الجامعة وكان تمن الشطة (مليون جنيه) السؤال شطة في رمضان وبي مليون جنيه البياكلوا دي فيرااان وناس ؟
آخر العامود:
الواحد لو غلبو الكلام .. يعمل شنو ..
يقعد يطقطق في أصابعينووو !!!

تعليقات 1 | إهداء 0 | زيارات 927

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#431949 [ام ميار]
3.00/5 (1 صوت)

07-19-2012 08:49 PM
ربع عمود ولكنه كامل الدسم!!!
كل سنه والسودان بالف خير


حاتم الجميعابي
مساحة اعلانية
تقييم
9.75/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة