قفلنا عليكي وكده
08-25-2012 10:19 AM

قفلنا عليكي وكده

الفاتح جبرا
[email protected]

على الرغم من أن برامج مرشحات (فلاتر) البريد الإلكتروني أصبحت ذات كفاء عالية في اقتناص الرسائل غير المرغوب فيها والتخلص منها، إلا أن عمليات الاحتيال عبر الانترنت لا زالت تهيمن على الشبكة العنكبوتية وآلآف المستخدمين يسقطون يومياً ضحايا لعمليات الاحتيال عبر الانترنت وهنالك طرق كثيرة للإحتيال من أبرزها هذه الطريقة التي تبدأ بمثل هذه الرسالة التي وجدتها في بريدي الأليكتروني والتي قمت بالرد عليها وكأنها رسالة (جادة) .. وإنو المسألة (مشت على العبدلله وكده) ! وهاكم الرسالة والرد :
أنا صفية فركاش زوجة الرئيس الليبى الراحل الزعيم معمر القذافى( رحمة اللة) ,أثناء الثورة الليبية لم استطع تحمل الأوضاع فى بلدى لذا سافرت الى جارتنا العزيزة الجزائر مع ابنتى التى كانت حامل وانجبت بسلام (والحمد للة) , ومنذ فترة وانا ابحث عن شخص أثق فية ويكون شريك لى وأستطيع أن أعتمد علية فى الأمور المهمة, قبل ان يتوفى زوجى (رحمة اللة) قمت بتحويل مبلغ من المال بواسطة إحدى الشركات الخاصة فى الشرق الاوسط باسمى, وبعد الثورة قررت الأمم المتحدة وأمريكا ودول الإتحاد الأوروبى عدم استخدام اسم القذافى فى أى جهة اذا كانت بنك او شركة أو أى شى ولا أستطيع أن أقوم بفتح حساب فى أى بنك لذا صراحة لقد راسلتك لكى يتم تغير هذا المال باسمك إذا سمحت لى وأنت من ستقوم باستلامة نيابة عنى فى بلدك , ولكن وقبل كل شى يجب أن تعدنى بان تلتزم الصمت حتى يتم الأمر فى سرية تامة ولا يعلم بة أحد.
سارسل لك مزيد من المعلومات بعد أن ترسل لى موافقتك وانك شخص يمكننى أن أثق فية, فى الوقت الحالى لايمكننى ان اتصل بك لاسباب أمنية ولكن ساتصل قريباً إن شاء اللة,سنتواصل عن طريق الايميل
وشكرا
مدام. صفية فركاش القذافى

الرد :

السيدة الفضلى صفية فركاش القذافي
تحية طيبة ..أول حاجة عاوز أقول ليك البركة فيكم فقد كان موت زوجكم ملك ملوك أفريقيا فقد كبير لكل الفرق الكوميدية بالقارة السمراء أذ بعد موته أفتقد الناس التصريحات الذكية التي تدل على إنو (الفهم قسمة) ، أثناء فتحى للبريد الأليكتروني الخاص بي لم أستطع تجاهل رسالتك لذا قمت بفتحها وها أنا ذا أرد عليك وبالمناسبة بركة (بتك الإتحلت بالسلامة) وإن شاء الله تكون جابت ليها (قذافي) سغيروني عشان بعد تلاتين سنة يعمل ليهو إنقلاب ويمسك الحكم تاني وما يفكو لحدت ما يرث الله الأرض وما عليها .
الأخت فركاش .. عملتي كويس إنك حولتي ليكي قروش لي بره يعني معقولة بس تكوني شغالة ليك أربعين سنة (زوجة رئيس) وتطلعي منها ساااكت كده؟ زوجات الرؤساء المكنكشين ديل كووووولهم قاعدات يحولو ليهم (قروش بره) إشمعني إنتي؟ لكن يا صفية إنتي طلعني كيشه وما فاهمة اللعبة لأنك حولتي القروش بعد ما (الحفلة إنتهت) والناس قاعدة (تلم في الكراسى) .. ما شفتي زميلتك في المهنة (سوزان مبارك) ظبطت إمورا من بدري كيف؟ وللا كمان (ليلى الطرابلسي) زوجة زين العابدين الطلعت ليها بي طن ونص (دهب) ، عموما حصل خير وبرضك إتصرفتي ، لكن ناس الأمم المتحدة وأمريكا ودول الإتحاد الأوروبى ديل إتلومو فيكي لوم شديد شنو يعني لو خلوكي سحبتي القروش دى؟
أنا ما عاوز أقول ليك القروش الحولتيها بره دي (كم) عشان زوجات الرؤساء ديل معروف إنهم بيهبرو هبر شديد المهم يا زوله مافي مشكلة وخليكى مطمئنة إنك لقيتي الزول الممكن تثقي فيهو ، غايتو بس نقول القصة دي حصلت عشان الله يلمنا فيكي وكده .
أنا أشكر ليكي صراحتك لأنك راسلتيني عشان أساعدك في تحويل القروش دي بإسمى وإستلامها نيابة عنك هنا في الخرطوم وأعدك يا صفية يا بت فركاش إنى أحفر ليا حفرة كبيرة وأدفن فيها الكلام وناس (الأمن الإقتصادي) ديل الكلام ده (شم ما يشموهو) ، أنا برسل ليك الرسالة دي عشان أعلن ليكي موافقتى على الصفقة دي أقل حاجة الزول يشتري ليهو قطعة قطعتين في المنشية وللا كافوري وللا قاردن سيتي يبنيهم (أبراج) ويسميهم أبراج (الفاتح) عشان يضمن مستقبل أولادو الما معروف ده !
أنا منتظر منك مزيد من التواصل عشان نكمل العملية دي وأي حاجة تدينا ليها قبلانين بيها بس ما تعملي نايمة وتقطعي أخبارك لأني قفلنا عليكي وكده ومن بكرة أنا ح أمشي البنك أشيل ليا مرابحات عشان أعمل صيانة للبيت عشان باقي الخريف ده كان جات مطرة (كاربه) ح يقع لينا في راسنا !
وتقبلي تحياتي !

كسرة :
ناس ما عارفه حاجة ساكت .. هو أنحنا عندنا حاجة عشان يشيلوها مننا .. غايتو إلا يشيلو المرتب البنتهي من يوم خمسة ده !

كسرة ثابتة :
أخبار ملف خط هيثرو العند النائب العام شنو(ووو وو ووو)؟


تعليقات 19 | إهداء 0 | زيارات 6409

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#456011 [ود البلد]
0.00/5 (0 صوت)

08-28-2012 06:42 PM
هاهاهاهاها منتهى الروعه مقااال اكنر من رائع وخيال وااسع والغرقان قالوا ياااخونا جبرا يتعلق بقشه اهوا ده حالك وحال جميع السودانيين يمكن حاجات النت البكتبوها دى يااخوى تصادف ليها عرق وفقكم الله ودمت


#455629 [adil]
0.00/5 (0 صوت)

08-28-2012 10:08 AM
سلام
كلامك دده فيهو حاجة انت يمكن داير مرة رئيسنا تحول القروش الفى ماليزيا باسمك. اعمل فيها ماعارف


#454297 [البشير على نافع الجاز الفللى]
0.00/5 (0 صوت)

08-26-2012 02:39 PM
مبرووووك عليك الهبرة دى
انا خبير استثمارات واستمارات واستراحات واستسماحات وفقه سترة ومعلومات لو عايز تستعين بى حضرتى تلقانى جاهز فى اللفة به هناك
مبروك عليك تستاهل


#454163 [السوداني]
0.00/5 (0 صوت)

08-26-2012 11:27 AM
خط هيثرو ولخط تلودي والطيرن الغيرو اسم شركة من كده الي كده تحايل علي القوانيين .الحاجة الجميله انو كانت في شهادة واستشهاد ربنا يتقبلهم شهداء انا خايف الجماعه يختلفو في الدنيا من بعدهم.طيب انت بت فركاش اوع تكون فركشت الموضوع وبعدين ماتنسانا من العموله بتاعة التحويل عشان نحولها من فركشه الي قركشه والفائدة تعم الجميع .انت الجماعة القريبين دي ايملاتهم بتفوت وين .؟الرد منك جميل يااستاذ جبرا.


#453788 [احمد محمد]
0.00/5 (0 صوت)

08-25-2012 07:02 PM
وانت يا استاذ ابوالقاسم محمد ابراهيم دى مابيها مالك ؟؟؟!!! تلتو ولا كتلتو


#453776 [ود الشريف]
0.00/5 (0 صوت)

08-25-2012 06:36 PM
التاح ياأخي ما تبيع أحلامك تدل أنه وضعك المادي أخير تحن وجنس حكاويك دي بتخلي باقي دهيباتكم تمشي أبو حراز


#453755 [الشاذ الافاقي]
5.00/5 (1 صوت)

08-25-2012 05:53 PM
د. الفاتح كل عام وانتم بخير . صرح المستشار مصطفى عبد الجليل انه تم الاتفاق مع الحكومة الجزائرية ان لا تسمح الاخيرة بسفر اسرة المقبور القذافي خارج الجزائر لحين الفراغ من محاكمات المشتبه فيهم من الاسرة ذكور واناث . انا انصحك بشطب الايميل ونسيان الموضوع بنت فركاش عايزة تتوهك ساكت ابقى علي راتبك عشرة واذا مصر تترزقك من هوانم الربيع العربي الخلص واللسه ما خلص (واللسه في الطريق)سيب البتعمل فيه ده وقابلني في السوق العربي بس بعدين نصيبنا النص في النص بتاعك لزوم الخدمات وكده . انت لسه بتسال عن خط هيثروا ولسه ما خلص التحقيق في خط تلودي ؟


#453748 [عبدالرحمن]
3.50/5 (3 صوت)

08-25-2012 05:43 PM
زولتك دي طلعت طيرة سااااي. معقولة تسمي سقوط حكم زوجها ( ثورة)؟؟؟؟
ممكن كان تقول ناس شذاذ الافاق ...


#453745 [عبدالواحد المستغرب أشد الاستغراب!!]
5.00/5 (1 صوت)

08-25-2012 05:39 PM
ياجبرا وحياة والديك وخصيمك النبى كان ما تميت جميلك ووجهة رساله لوداد بابكر بإعتبار ما سيكون فى القريب العاجل بإذن الواحد الاحد،،،وطالما بقيت موضع ثقة ارامل المجرمين ومستودع لاسرارهن ،،قطع شك ستصلك رساله عما قريب من وداد وزوجة الهالك ملس زيناوى وعيرهن كثيرات وبصراحه انا ابتديت اشك فى انك بقيت شيخ صالح وواصل كمان بدون سابق إنذار وربما تجلت لك ليلة القدر وانت ما جايب خبر!!ولمعلوميتك صفيه فركاش ماعندها (التكتح) بالمقارنه (بجماعة الريس)00 وهى00صفيه دى كانت فاضيه من النظر الى داخل غرفة نومها عبر مفتاح الباب عشاف تشوف (بعلهاالتور) وهو يضاجع النساء من كل جنس ولون؟!!بعكس (صاحبك ابو راسا قرعه) البيقضى يومو كلو كضب محسن بالطلاقات!! وهز الارداف واشياء اخرى لعنة الله تغشاه هو وخالو(الهبنقه)!! 00كسره شبه ثابته وحسب مقتضى الحال: من فضلكم شوفوا لينا مرشد ايا كانت جنسيته من بنقلاديش ولا سرلانكااو جزر القمر او حتى من قبيلة الارومو المهم يكون مرشد نتباهى بيهو وسط الامم التى إستقلة حديثا فى مؤسم الربيع العربى!! وعيب علينا يجينا د/محمد بديع زائرا ويفاجاء (بدوله رساليه) بدون مرشد ويتهمنا فى دينا00 وبعدين نودى وشنا وين يا أخوانا0


#453686 [صالحة جماع]
1.00/5 (1 صوت)

08-25-2012 03:28 PM
انا عايزة اعرف قصة خط هيثرو دى شنى فى زول يتبرع يشرح لى ولا استاذ الفاتح ذاته


ردود على صالحة جماع
United States [3Atel] 08-26-2012 11:03 AM
الجماعة باعو الخطوط الجوية السودانية لى مجموعة عارف عن طريق سمسار وبعد فترة اشتروها تانى بروضو بواسطة سمسار ...كل الخطوط رجعت الا خط هيثرو (بريطانيا) الما رجع ووصافو ما اتوصف .الفاتح جبرة سكاهم بالكسرة 6 شهور لمن وصلو الفايل للنائب العام قبل شهرين واسى ساكيهم عشان يعرف الفايل اخبارو شنو(ووو وو ووو)؟
دة شكلو كدة بأذن فى مالطة!

Saudi Arabia [واحد تانى] 08-26-2012 08:26 AM
انتى عايشه وين ....؟؟ارجعى لارشيف مقالات الفاتح جبرا .....


#453677 [حسكنيت]
5.00/5 (3 صوت)

08-25-2012 03:15 PM
عقبال إيميل وداد بابكر


#453663 [ابو علاء]
1.00/5 (1 صوت)

08-25-2012 02:53 PM
ياهو الفضل كى ياشيخ الفاتح ماتستعجل امكن دى ليلة القدر كدى حافل افتكر الادعية بتاعتك فى العشرة الاواخر من رمضان


#453654 [ابو عمار]
5.00/5 (1 صوت)

08-25-2012 02:31 PM
مشكور استاذ الفاتح
اول شي موضوع خط هيثرو ده احسن تنساهو لانه وقته فات وماراح تلقي منه حاجه والعوض من الله
انت عارف ربنا عطوف رزاق وجاب لي ناس السودان امطار تعويضا لفشل الزراعه
وراح نلملم قروش الحصاد ونعمل لينا مرابحه ونفتح لينا مشروعات كبيره مع فلانه ونشتري مشروع المناقل كله بعد ما طريق الاسفلت وصل
انت عارف فلانه دي بتهبر كجم كجم وهاك يا دبي وماليزيا قبل ما تقوم الكعه
انا مستعد تكون معانا شريك وراح نعطيك فله في كفوري
سمعت لي خبر انه فلانه دي عملو ليها اصانصير من النيل الي غرفة النوم طوالي في البيت الفي حي السفارات بكفوري والمسكينه التانيه لها الشفاء
ونرجع خط هيثرو ونسافر قبل الكعه


#453636 [حليم-براغ]
3.00/5 (2 صوت)

08-25-2012 02:05 PM
الأخ الفاتح عيد مبارك وكل عام والجميع بخير..
أهه لمه القسمة تحصل وتتزوج بت فركاش ماتنسانا وتنسي أصحابك لأزم تزلق.. بس في مشكلة يا الفاتح بت فركاش لسه عندها أولاد علي قيد الحياة ..مابتخاف يجوه يغتالوك ؟؟؟ وتكون عملتها في روحك براك
نصيحتي ليك خليك علي راتبك البخلص بعد 5 يوم وبطل شراب السجائر..وله جرب السعوط؟؟؟


#453602 [aaa]
3.00/5 (2 صوت)

08-25-2012 01:15 PM
تصور جانى إيميل زى ده من بنت الطرابلسى لكن لسه مافتحتو اذا هو نفس الموضوع نلم قروش صفية وليلى مع بعض ونرجع خط هيثرو بقروش الحريم ديل . وابشرك إيميل سوزان جاء لواحد صحبى وإيميل اسماء الاسد فى الطريق وإيميل فلانه كمان انشاء الله قريب .


#453577 [ودالنيل]
1.00/5 (1 صوت)

08-25-2012 12:29 PM
انا مافاهم اي حاجه مالفهم هو قسمه ولاشنو وكمان البلد دي لو فهمت فيها ببقي ذيك كدي يعني مجنون ولاشنو يا مستمعين


#453550 [محمد سكر]
5.00/5 (1 صوت)

08-25-2012 11:28 AM
الاخ الدكتور الفاتح كل عام وانت بخيروانت بتتحفنا بكتاباتك فى الخيال وامثال صفيه فركاش فى بلدنا موجودات بل فى كل ولايه بها زوجه حاكم وبحولوا القروش الى خرج السودان ماليزيا ودبى والصين عشا ن بخافوا من الكعه بتقوم فى كل لحظه وناس


#453547 [تختخ]
5.00/5 (1 صوت)

08-25-2012 11:24 AM
ياعمو الفاتح أنا عارف إنو مافي حاجة اسمها ليلي ولافركاش ولاغيرو .بس مدامكم بت كامل دي جابت ليك سيجارة تانية(ولاكلمة)أنا سمعتها بأضاني دي البيكلها الدود دي قالت انت خطير في السجاير.بعدين يكون المرتب كمل من يوم خمسة وطريقي مافي لانو بتاع الشهر الجاي (أمنا الحيكومة)كتر خيرهاصرفتو لينا بدري


#453546 [بت الخرطوم]
1.00/5 (1 صوت)

08-25-2012 11:23 AM
اول حاجة العيد مبارك عليك وانشاء السنة الجاية تكون عندك كسرة كاربة وعندى ليك بشرى انما هى اية موش النائب العام حول ملف خط هيثرو وكمان كل الخطوط الباقية مناصفة ما بين شركة ابابيل وصفية بنت فركاش وريحك وريحنا معك من كل الخطوط دحين شوف ليك كسرة تانية كسسسسسسسسسسسسسسرة اخبار الصناديق السوداء بتاعت الطيور ال 20 الوقعت من عام اول واول واول واول واول شششششششششششنو بس فلاحتك فى خط هيثرو


الفاتح جبرا
الفاتح جبرا

مساحة اعلانية
تقييم
9.75/10 (10 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة