08-28-2012 08:38 PM

ماجستير الرئيس معمولة بحب!!
يا ناس أسلام المعرفة الكلام ده تقولوا لي زول ما عمل ماجستير قبل كده

حاتم الجميعابي
[email protected]

بمناسبة رسالة الماجستير الأدوها للريس، ياخي دي مناسبة مهمة لازم الواحد يكتب فيها شئ زي عيد الميلاد بتاع الناس الفي الفيس بوك. تمشي البروفائل بتاع الزول العيد ميلادو الليلة وتقول ليهو كل سنة وانت طيب انشاء الله تلقا ليك لايك ساكت في صمة خشمك .. بالله الواحد يكون ما عارفوا روحو ولدهوا متين.. يعني يوم شنو ويوم كم في الشهر وسنة كم، بالله الواحد في البلد دي الشئ الوحيد البتذكروا يوم المرتب ده بالنسبة للناس الشغالين بي نفقة الشهر، في ناس شغالة بي رزق اليوم باليوم بس بعرفوا الجمع بس والعطلات الرسمية، غير كده مافي، نرجع للموضوع، اتذكرتا كلام بوشي في مداخلتو لي دكتور نافع " في زمن الأنقاذ ياما ناس أخدت الدكتواه في الوضوء وما عارف شنو!!). أها عمك جابا كبيييييييييييرة قدر ده وقالوا عنوانا " "تحديات تطبيق الشريعة في المجتمعات المعاصرة"، المعاصرة دي ظاهر عليها حركات علي عثمان، معاصر ميييييين والناس نائمين نحنا اسي عليك الله مجتمع معاصر ولا محاصر بالحكومة دي ياخي !!
بعيداً عن السخرية لكن مش عشان تأخد ماجستير في اي حاجة مش لابد أنك تكون قريت جامعة، اسي الريس ده قراء ياتو جامعة، الكلية الحربية معدودة جامعة غايتو سمعنا وشوفنا لكن زي ده ما شفناا!! يقول الخبر " منح معهد إسلام المعرفة في جامعة الجزيرة درجة الماجستير في علوم الشريعة للرئيس عمر البشير، الذي قدَّم أطروحته تحت عنوان: "تحديات تطبيق الشريعة في المجتمعات المعاصرة". وقال المعهد إن البشير انتظم في دراسة استمرت ثلاث سنوات. وقال مدير المعهد، محمد عمر وراق، إن الرسالة تعتبر قيمة من واقع الخبرة والتجربة التي اكتسبها الرئيس خلال سنوات الحكم. وأشار إلى أن البحث المقدّم مسنود بممارسة وتطبيق للباحث، ما يكسب الرسالة أهمية كبرى". أنتهى
النقطة الأولى : هي أنتظام الريس في الدراسة لمدة تلاته شهور، وبعدها طوالي قاموا ادوهو الماجستير، والله ده ماجستير " معمول بحب" ولا كيف شكلوا كده، 3 شهور القصة دي كانت حلقة تلاوة ولا شنو.. ياخي البلد دي بتحصل فيها حاجات غريبة جداً، الواحد يخش الجامعة بي حلالوا يعني لا أبناء مجاهدين ولا دباببين ولا ابناء قيادات وما شابهة ذلك ولا حاجة !!! قراية × قراية سنة كاملة فيها كورسات وقصص، تجي تلقا معاك في نفس المدرج زول أقل منك درجة بي 10 % تسأل يقول ليك ده من أبناء المجاهدين، ولا كان دباب، ياخي مغسة ساي تشقك .. تجتهد 4 أو 5 سنة وتجيب تقدير ممتاز أو جيد جداً، يفطوك في التعين لمساعد التدريس بإعتبارك أحد المبرزين، ويعينوا الزول الخشا الجامعة بالدفرة 10% لانو واصل واستطوا قوية ، ده كلو بحصل عادي جداً الغريبة مش الجهاد أنتهى في ناس لغاية اسي بتخش الجامعة بالحنك ده .. نرجع للموضوع البشير قالوا كان تاكل 3 شهور في المعهد ده وكاسر قراية، وبشرب عصير وبياكل سندوتشات ومرااااات بضرب البوش عادي يا معلم .. ما كمان رئيس جمهورية شعبها كلو بياكل فول وبالكتير عدس ، انا ما عارف المعهد في القصر الجمهوري يا ربي !!! يعني البلد كانت هاملة لي 3 شهور فاتت .. طيب الكان بصرح ده منو ؟ دحين مو البشير، يعني ما فيها حاجة لو قالوا الراجل اديناهو الحاجة دي ساي يعني مافي زول سألهم أصلاً من الموضوع، لكن في داعي للإنتظام ده، وبعدين الراجل عندو ولايا ومرتين في البيت وبلد بي حالة والحرب مدورة في دارفور والجنوب قافل أنبوب النفط وفساد ومظاهرات وكبه كبيرة يعني القصة كده صعبة يكون أسي الراجل ده نفسوا قام من ال3 شهور دي.
اها النقطة التانية : إنو الرسالة تعتبر قيمة من واقع الخبرة والتجربة التي اكتسبها الرئيس خلال سنوات الحكم. وأشار إلى أن البحث المقدّم مسنود بممارسة وتطبيق للباحث، ما يكسب الرسالة أهمية كبرى" يا ربي طبقا وين الحكاية دي ومارسا وين في كافوري ولا في كوبر ولا وين بالضبط، في السودان الخيالي ولا الواقعي، كدي أفتونا يا ناس أسلام المعرفة، غايتو حركتكم جبانة، أسي لو جاء العبد لله ممكن تدوهو ماجستير في 3 شهور انشاء الله في اي حاجة، انشاء الله في "اللقاليق" زي ما قال عادل امام ما فارقة معاي !! المهم رسالة ماجستير، وبعدين الشغلة كانت كيف عبارة عن بحث مكتوب ولا كورسات.. عشان نفهم برضو .
أخر حاجة :
والله عندي رغبة أكيد في قراية هذه الرسالة، لانو وش البامية ما ياهو يعني التطبيق دي شوية بقيف لي أحسن نقراء النظرية، ونشوف إحتمال اية الأستهلال بادية بي " وجعلنا من بين أيديهم سداً" خلتكم تغضوا الطرف عن الماستر ده.. المهم خليكم عارفين أنا داير اقراء معاكم واسجل للماجستير في اي علوم تروها مناسبة وانشاء الله ما نحرمكم من حاجة، وبعدين الراجل لازم يكون سدد رسوم الرسالة يعني يكون رسالة ملح ساكت..
اي زول داير يعمل ماجستير يمشي اسلام المعرفة سريع ..





تعليقات 8 | إهداء 0 | زيارات 2630

خدمات المحتوى


التعليقات
#456861 [صادميم]
0.00/5 (0 صوت)

08-29-2012 04:09 PM
وقال المعهد إن البشير انتظم في دراسة استمرت ثلاث سنوات.
طيب الكان البرقص لينا طول الزمن ده منو اكيد قرين الرئيس


#456828 [قفة]
0.00/5 (0 صوت)

08-29-2012 03:23 PM
حقو تاني تسموه الرئيس أبو ماجستير على وزن أبو زلومة وابو مركوب وأبو الكلب
هذا زمانك يا مهازل فامرحي والمهازل شدة ما مرحت وسرحت لمن غلت خسارة التعب وسهر الليالي وقديد العيون في المذاكرة وناس يلقوها مملحة حظوظ أول مرة أشوف لي ماجستير مملح بنكهة المرارة


#456794 [wudoof]
0.00/5 (0 صوت)

08-29-2012 02:41 PM
هانت الزلابيه عقبال الدكتوراة كمال حقنه عامل دكتوراة في العلاقات الشادية وهو يفتقر الى ابسط انواع العلاقات الانسانية !! وواحد قالو عامل دكتوراة في (العقّاد)و.............................الخ.


#456410 [زوله وما ساكته]
0.00/5 (0 صوت)

08-29-2012 08:21 AM
محمد عمر وراق المدير السابق لجامعة سنار والحالي لجامعة الجزيره معروف عنه انه من لاحسي الجزم وحارقي البخور للرؤساء ولا ادري كيف يكون مديرا للجامعه ومديرا للمعهد وحسب خبرتي بالجامعات ادارات المعاهد هي ادارات صغيره تحت مظلة ادارة الجامعهولا يمكن للمدير ان يجمع بين الادارتين اللهم الالكي يمنح الرئيس هذه الدرجه
ويجدر بي ان اذكر عن هذا الرجل انه وصل جامعة سنار الي الحضيض ماليا واداريا واكاديمياثم سلمها من بعده للاسوأ
وبمناسبه هذه الدرجه التي منحها للرئيس سيكون وزير التعليم المقبل قريبا باذن الله ويا د خميس ربط عفشك


#456357 [عصمتووف]
0.00/5 (0 صوت)

08-29-2012 07:40 AM
اكيد ناهلها من ديوان الزكاه كما الاخرين


#456287 [fatmon]
0.00/5 (0 صوت)

08-29-2012 04:49 AM
عليكم الله يا ناس الباسطة كان عندكم ولاء ووطنية جد وصلوا لزولكم المقال ده عشان يقراه مع قصيدة محمد الحسن بن عوف (مسدار النصيحة)وكان نفسي أشوف شعوره شنو؟ وهو بيقرأ مثل هذه المقالات هو يا ربي بفهم سريع يعني بيقرأ بين السطور ويستوعب المعاني ويفهم المراد طبعا الاجابة معروفه لا وألف لا
لأنه لو كان بفهم وبقرأ بين السطور لكان السودان الآن غير السودان وكنا إرتحنا منو زماااااااان
الله يكون في عونا نصبر عليهو الأيام الجايه دي رغم إنها بسيطه لكنها برضها حتكون ما ساهله وثورة ثورة حتى النصر


#456253 [سايكو]
0.00/5 (0 صوت)

08-29-2012 01:22 AM
ما قصرت يا استاذ قمه الروعه في الكتابه الساخره


#456178 [واحد من ناس رزق اليوم باليوم]
0.00/5 (0 صوت)

08-28-2012 10:27 PM
ليت الأمر توقف عند ماجستير الجنرال بتاع التجربة المكتسبة من حلاقتو في راس الشعب ، هناك جامعات وكليات خصصها نظام الابرتهايد (العنصري)
هذا لابناء قبائل بعينها او لابناء المؤتمرجية او الجوقة و لاحسي الاحذية و الانتهازيين التابعين للعصابة .
أمر الماجستير المضروب من هذا المعهد النكره ، أمر بات طبيعياً ولايثير االاندهاش ، بعد ان افقدنا هؤلاء اللصوص ((الدهشة)) .


حاتم الجميعابي
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة