08-30-2012 02:47 PM

ناس خرطوم

ميرغني النقي
[email protected]

ناس خرطوم
لقيتم في فراش مرحوم
اسمو العدل مات معدوم
يحللو في درون النيل مع المريخ
ومتناسين وما ناسين
إنو في أربعة وستين
ما هاب الرصاص والسيخ
شعباً هبّ في تشرين
صباح الحادي والعشرين
وحول دفة التاريخ
وخلّد صفحة للسودان
*******
ناس خرطوم
لقيتم في نهار رمضان
وجوه غرقانة في الأحزان
ناس وجدانا دامي نزيف
وناس بدموعا يوما خريف
وناس مكسوفة من الضيف
وناس ما عارفا تفطر كيف
ومتناسين بلا نسيان
ساعة هبوا كالبركان
وجملةً أعلنوا العصيان
ورفضوا الرجعة مهما كان
كيف اتصدع الطاغوت
وكيف إنهار جبل جبروت علي الفيران
وكيف إنزاح ظلام الليل
صباح يوم ستة من أبريل
وعمّ النور ملا الأركان
ولكن ......
ولكن حرف استدراك
وما استدركنا حتى الآن
إنو نهاية الخذلان
يعود العدل للتابوت
ويعود الحق لجوف الحوت
والحرية تحت البوت
وتبقى هموم حياتنا القوت
ونبقى الكورة غيرنا يشوت
وبعد الضقنا من فرعون
نركع تاني لي هامان
******
ناس خرطوم
حالة تشيب الولدان
لاقوني الصباح داقشين
بين سوامق الأسمنت
زي طفلاً غريب ضهبان
وجوهم فيه ستين سين
ومخنوقين بحبل الصمت
وبين خرطوم وأم درمان
حذاءٌ يلعق الأسفلت
وموية تصب من القمصان
*******
ناس خرطوم
ليلم دج في الإظلام
وصاروا يتيم وسط أيتام
وزي الكورة بين أتيام
بلا حكام
ناس داقشين ورا الكبريت
وناس آمالا فنجان زيت
وناس يا ألله نصل البيت
ولسان الحال يقول يا ريت
حليل الكان
وهم باللفة والدوران
من دكان ولي دكان
زي جواب بلا عنوان
وما لاقين سوى البمبان
*******
ناس خرطوم
حديثم يكتم الأنفاس
عيونن ماب يطولا نعاس
يرقدوا الليل على الأمواس
ويقوموا مع نبيح جرقاس
يعبوا من الهموم الكاس
ويدقشوا عمايا في أغلاس
والحق من ورا الترباس
يصيح يا ناس
يصيح يا ناس
يا الماشين ورا النخاس
جربوا مرة علو الراس
وهم ماشين بلا إحساس
همومن منتهى الإفلاس
ناس في السين عن التموين
وناس في المنحة قالوا متين
وناس في حصة البنزين
وناس الأهلي غلب اتنين
ومتناسين وما ناسين
في كل يوم
يموت مظلوم
ويفطر بالدموع مكلوم
*******
ناس خرطوم
اسمع قولي يا فرعون
وهاك نصيحتي يا هامان
ويا اللابسين تياب الدين
وكل جميل بعينكم شين
وكل عظيم عليكم هان
أوع يغشكم إبليس
يجيكم في تياب قسيس
ويضحك فيكم الشيطان
يقول لكم أقرو سورة الناس
وتنو الفاتحة والإخلاص
ونوموا واصحوا في اطمئنان
تكون جهالة كان صدقتو
وأصلو جهالة مهما كنتو
وكان دايرين ترقدو أمان
ومافي ضمان
اقفلوا ما تخلوا زقاق
بالمحشية بالنيران
واطلقوا في دروب الناس
كل كلباً عقور سعران
وباعدوا حتى في الأزواج
وفرقوا حتى في الأخوان
وابنوا بكل زاوية سجن
وسووا لكل زول سجان
وعشان تتهموا كل حساس
بتهمة خاين أو دساس
أخلوا الساحة لي جرقاس
لأنو منتن الأنفاس
بينبح زهرة الريحان
وكان حسيتوا مافي ضمان
وجاكم خوف من الفيضان
كل محال على الإنسان
عندكم إنتو بالإمكان
أمحو من الوجود النيل
من كمبالا لا أسوان
وأدفنوا ما تخلوا حفير
وعلها ما تفضل بير
والحسوا حتى ريق الطير
وعشان الوضع يبقى مريح
غيروا اتجاه الريح
كان حسيتو في خريف
ولأنو عرقنا سيلو مخيف
بي بركة دقون الزيف
خلوا شتاها وامحوا الصيف
وكان نضحت جراح مكلوم
وفاضة أنة المحروم
من كادقلي
كوستي كريمة بورسودان
خشم القربة كرمة رفاعة
من قيسان
وكل خلية في السودان
وطفح الكيل
وقال يا ليل ودفر السيل
مصبو النيل
مقرنو بحري وأم درمان
خلوا دفاعكم الشعبي
يحميكم من الطوفان
ويكون للعلم
مركب نوح
لن تحمل سوى الإنسان
*****
ناس خرطوم
مهما كان ومهما يكون
ومهما طغيت يا فرعون
موسى بكل زول مخزون
وسماهم أصلو ما مضمون
وليهم يوم


تعليقات 0 | إهداء 0 | زيارات 987

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




ميرغني النقي
مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة