المقالات
الشعر
أسماء الجنيد
قال إضطراب وجداني قال !!!!
قال إضطراب وجداني قال !!!!
09-29-2012 10:29 PM

قال إضطراب وجداني قال ؟؟؟

أسماء الجنيد
[email protected]

مخيــر الله والله . أول مرة في الزايلة ام قدود دي نسمع بي المرض العضال ده ؟. يطرشنا طرش الرقدوا المقابر , غايتو عن نفسي انا بت الجنيد الغبيشة دي, يطرشني ما سمعت بي النصيبة ده..
محمد معانا ما تغشانا ،، اها والمرض ده بجي كيف ولي منو ؟ واعراضه شنو؟
بما إنه وجداني معناها والله اعلم الزول بتكون أحاسيسو مفندكة يعني (متفوفة في الفندك الواحد ده تف تف،، تف ..) وبعدما تتفندك مظبووووط تتحلب فيها ليمونة وحبة شمار وتوم لزوم الحبكة تكون طاعمة ومسبوكة , والعملية دي قطع شك بتكون بفعل فاعل , يعني الزول براه ما بقدر يفندك أحاسيس روحو!
اها والغرض منها لما الحرامي ينقبض بي ثابتة, يقوووم كده الإضطراب الوجداني ده ريحتو تفوح, وساااهل على المريض التعود من اول( زررررة) على اعراض المرض, وهي شحتفة الروح، خمة النفس، الهضربة في الفارغة ومقدودة، ودي طبعا اصحابنا ما بكوسوا ليها تــــب بالإضافة لي كتيل العيون دليل عدم النوم.
اها وطبعا يسوقوا ليك المريض فووووو لي مستشفى المجانين عشان يأخدلو إنجمامة بي مزااج،راحات وأكل ونوووم لمدة كم يوم ولا إسبوع، لغاية الموضوع يأخد هدنة شوية ويتنسي كما اتنسى وتناسا هذا الشعب الميجوع وناااائم حقهم نص النهار!!!
وبعدها يحدد الطبيب المختص في المرض النفيسي ده ( ودي جاية من الزول النفسو ساقطة وصغيرة ) يقولوا ليك نفيستك صغيرة يعني دنيىء .. اها الدكتور الخطير ده يحدد لي الزول سفر ومخارجة من الزنقة زنقة دي برة البلد. عشان ابو إحاسيس ووجدان مضطربة ومفندكة يقضي باقي عمرو بالقروش الهبرها من الغلابة والمطحونين , يقضيه في منتجعات وفنادق مكندشة مع السواقط الزيو ويظهر على حقيقته برة البلد لا من شاف ولا من درى ,, وطبعا خوف من الله نوهاااائي مافي ..
روشتة لكل الغلابة للمعلومية فقط:
اولا الشيء المؤسف يقولوا ليك شيخ كبير وإمام مسجد معروف في الخرطوم !!!!
طيب ما تفضحوا للناس عشان تعرفوا. برضو خايفين على شعوره الحي عشان ما يصاب بي شلل هزاز مثلا ؟
تانيا العملية الخطيرة دي مشتركين فيها كل من له نفس ساقطة وساعد هؤلاء المجرمين للتمادي كل يوم بما فيهم الشعب نفسه لسكوته على المصائب يوما بعد يوم.
يعني بإختصار الشرطة ،القاضي الأمر بتحويله للطبيب، والطبيب الأمر بتحويله لمستشفى المجانين وهو نصيييح يناطق الحجر!وطبعا أكييد أهل المريض المدعي المرض. أخيرا الزول الأطلق التسمية العشوائية دي , داير يجنن باقي الشعب الفضل ده , صبر وصبر وصبر وفي النهائية ظهر مرض إسمو إضطراب وجداني , وبكرة جضمارة حلزونية تخلي الواحد يتدردق في الصقيعة , وبعدها حمى مستنكحة، ما عندها اي شغلة غير إنها تجي تستنكح الغلابة ..
متاوقة
زمان قلنا الكيزان شككوا إبليس في نفسو, هسه بقى إبليس والدمبعلو . الدمبعلو ده ما تسألوني منو شنو لكن زمان حبوبتي كانت بتخوفنا بيه ...
يمهل ولا يهمل

تعليقات 18 | إهداء 5 | زيارات 3941

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#482190 [ahmed]
0.00/5 (0 صوت)

09-30-2012 07:41 PM
غايتو يا بت الجنيد مشاطك عينه


#482092 [ابوعشه]
0.00/5 (0 صوت)

09-30-2012 05:30 PM
هوي يا بت الجنيد ازيدك من الشعر بيت المرض اعراضوا تربي لديك دقن وتبقي مع ناس الانقاذ قلبا وقالبا وتستخدم فقه الضروره وسياسة التمكين وسرقة البنوك علي عينك يا تاجر والمحكمه تبرئك باضطراب وجداني استغفر الله حلوه وجداني ما دكاترتهم المنافقين كتيرين كترة الضبان وكلوا في فقه الضروره موجود كان لقو معاك بت وفي حالةخلوه دي حلها في فقه الضرورة سكرتيره ولا بده منها وكان سرقت بنك وشلت المليارات وسويتا ركشات دي علاجها في فقه الضرورة موجود معسر وديوان الزكاة بسدد للمعسرين وكان سرقت واطه حقت خواجة وصادرتها الدوله في زمن نميري تبقي دي في فقه الضروره ميراث ما ابوك اصلو كان شغال مع الخواجه الكافر دا حارس في المزرعه وكان بقيت حرامي وعينك قويه تحرر شيكات بدون رصيد وتؤم المسلمين في خمس صلوات دي في فقه الضروره إضـــطـــراب وجــــــــداني وكمان تجيء زوجتك وتطلب يعملوا عليك حجر لأنك مريض وناقص الاهليه!!!!!!! والله ناقص دين بس . عالم استخدموا الدين أسوأ إستخدام ويجيء علي عثمان يتبجح ويتحدث عن نزاهة القضاء!!!! لعنة الله عليكم اين ماذهبتم وأين ما حللتم.


#482055 [bet rad j3l]
0.00/5 (0 صوت)

09-30-2012 04:43 PM
مسئولين من الخير المرض دا اصلو ما لاحظو اعراضو الا بعد ما نام بالمليارات دي كلها, الله لا خلا فيهم نفاخ نار الما بخافو من الله و لا بخجلوا من الناس.


#482041 [أبو الدقير]
0.00/5 (0 صوت)

09-30-2012 04:31 PM
أشهد بأنك كاتبة مجيدة... وأن حرف من مقالك هذا لهو عقوبة قاسية لو يعلمون..شكرا لك مجددا.


#481949 [طشاش]
0.00/5 (0 صوت)

09-30-2012 02:15 PM
لكل مقام مقال

قالوا كان في (شيخ) بيلعب مع اصحابوا كتشينة (مطعمة) يعني قمار


وكان دليماً بيخرتم ويعدمم القرش لمن يبكوا

وفي صلاة الجمعة طلع المنبر وكانت الخطبة عن الميسر والمال الحرام

كانت خطبة قوية خلت المصلين يبكوا وشاف اصحابو بكوا بكاء شديد

عاين ليهم وقال هلا هلا هنا ابكيكم وهناك في الكتشينة ابكيكم


#481926 [عمر]
0.00/5 (0 صوت)

09-30-2012 01:50 PM
ياخونا كدي اشرحوا لي منو اكل منو والمبلغ كم بالدولار . وود امبعلوا ده عندنا كتير منو من البشير للخفير


#481892 [ثائر حتى النصر]
0.00/5 (0 صوت)

09-30-2012 01:14 PM
يا أسماء يا بت الجنيد البشير ذاتو طلع عنده اضطراب وجداني ، الدكاترة من زمان كانوا شاكين فيه لكن افتكروه عوير وعبيط ساااي زي وزير الدفاع بتاعو ، أسه طلع عنده اضطراب وجداني وسمعنا أنه محاميه قالوا ماشي لاهاي يوري ناس المحكمة الدولية المرض الاكتشفوه دا عشان يقدر يخارجه من المحاكمة


#481713 [اصيلة]
5.00/5 (3 صوت)

09-30-2012 10:08 AM
اول حاجة انا ماقريت ولا سطر فى هذا المقال يااسماء الجنيد بس ابت نفسى الاان اعلق مصححة لعبارة مخير الله فالله مختار وليس مخير والمخيرين هم البشر لان الله يخيرهم بين الخير والشر على حسب علمى وماتعلمته فى التجويد فى صغرى من الخطاء ان نقول مخير الله فالله هو المختار.بعد ان كتبت هذا التعليق يمكننى الان قراءت المقال


ردود على اصيلة
Sudan [اصيلة] 09-30-2012 08:01 PM
ياباباالمخير فى علم التوحيد تعنى المسير والله ليس بمسير وفى اسماء الله الحسنى ورد اسم المختار وانت قلت المختار مميز ويقصد بها محمد لان الله اختاره اذن من الذى اختار محمد رسولا للبشرية؟؟؟؟؟؟؟؟؟؟؟هوالله اذن المختار هو الله والكلام يطول اذا ابحرنا فى علم التوحيد ...

Saudi Arabia [ابوعشه] 09-30-2012 05:38 PM
هذه كلمه مستعمله في قاموس اللغه العاميه السودانيه ومعناه أن الله هو القادر المختار وهكذا تستخدم ولا يستخدم المعني للدلالة الفقيه والتفسير الشرعي وعندنا في كردفان نقول في اغنيه كردفانيه عاميه (يوم دخلو العنابر *** مخير الله القادر *** محمد صغير ما بحمل الدرادر )) آمل أن اكون قد أوضحت ولو القليل للاخت الاصيلة ولك الشكر.

Saudi Arabia [اصيلة المصححة اللغوية] 09-30-2012 12:34 PM
أصيلة سلام عليك اتفق معاك في ( عبارة مخيّر الله ) ولكن ليس ما تعلمتيه في علم التجويد لان التجويد يختص بمخارج الحروف واتقانها لكن الاصح تقولي في علم التفسير .... حسب تفسير الجملة وليس تجويدها .

يلا نرجع للمعال معاك

Ireland [BABA] 09-30-2012 11:43 AM
المختار هو المميز او المُفضَل عن غيره، ومخير هي تصغير مختار
والله ليس بمختار لان المختار هو من يتم اختياره ولفظ المختار يطلق على
سيدنا محمد عليه الصلاة والسلام.

Sudan [اصيلة] 09-30-2012 11:33 AM
معليش اقصد التوحيد وليس التجويد


#481652 [الشايل المنقة]
0.00/5 (0 صوت)

09-30-2012 09:22 AM
...فيليب عباس غبوش , محمد الامين الغبشاوى ,عائشة الغبشاوى ,الغبشة ,غبشة ,غبيشة, غبيش , تغبيش ,سومى القمر , سومى العسل ....


#481574 [سونو]
0.00/5 (0 صوت)

09-30-2012 07:38 AM
في الحالة السودانية حالياً والله كترت المصطلحات السياسية أو الاجتماعية وهناك جهات رسمية من الدولة مختصصة في هذه الأشياء ... واسلاميين النظام والمرتزقة منهم ... في تقديري هم ألعن من الشيطان نفسه هم الظاهر كدا ماسكين ليهم (في طرفهم) أبليس كبير يكون من كهنتهم وهو بالتأكيد بحركهم حسب الحالة والغرض المعين والله أعلم ... عشان كدا أي شيطان ما عندو قوة ولا بكون عندو مفعول معاهم ... فقط الصالح الاستعمال والقوي الفعال إلا يكون سفلي ملعون زيهم والقريبة الدول المعشش فيها هذا الاتجاه تذهب مباشرة لهؤلاء الأوغاد حتى تنال ليها جنااااا سفلي صغير تهدد بيه دول كبيرة عدد سكانها بالمليارات ... وفي رأي المتواضع يا بت الجنيد واحترامي الشديد ... شعبك دا ما بخاف من الدبعلوااااا ... وأنا خوفي بعد شوية أبقي هو الدبعلوااااا... وما يفرق بين الناس ليتم ترهيب وجلد الخونة الخائنيين لذممهم وأوطانهم وبين الناس الغلابة ...
بالأحري كدااا... هم عايزين يجوطواااا الكيمان
وزي ما بقول المثل " التسوي كريت ببقي في جلدا"
بس هم بحق الشعب " بـ ركبوا ليهم عاكس أحمي جلودهم الغضة من الخدش "
وبالمناسبة هذا المرض هم طبقوه أول ما بدأ السلاميين في الحكم إذا الناس متذكره ... إعتمدوا عليه اعتمادا اساسيا عندما كونوا أمنهم من الناس المضطربين نفسيا وأجتماعيا .. ولا نذكركم
ولكي تقديري في تناولك للأشياء


#481569 [المضطرب وجدانيا]
0.00/5 (0 صوت)

09-30-2012 07:25 AM
عندما كنا اطفال نعيش فى احدى المدن السودانية الصغيرة اتى الينا نصاب من بلدياتنا و ذهب الى السوق و نصب على التجار بمشاريع وهمية و نسبة لصغر المدينة و معرفة الناس لبعضها البعض لم يستطع ان يتخارج من الزنقة فادعى بمرض الغضروف و حملناها ليلا الى مواصلات الخرطوم برفقة احد الاقارب و عند وصوله الى الخرطوم قال للجماعة مع السلامة انا كنت مزنوق قروش بلا غضروف بلا كلام فارغ يعنى صاحبنا ده لو كان عمل مضطرب ذهنيا كان جانا من اخر.


#481549 [بدر]
5.00/5 (1 صوت)

09-30-2012 06:03 AM
اظن والله اعلم ان التشخيص كان ( اضطراب وحداني ) وليس ( وجداني ) بس النقطة دى نسوها ساكت ويظهر انو وحدانى لان الشيخ لبع الحاجات ( وحّدو )يعنى نام بالجماعة ولامن عصلجت اضطرب والله اعلم ...........


#481535 [القرم تفاحة ابل]
5.00/5 (3 صوت)

09-30-2012 03:35 AM
مجرد سؤال شروط امامة الصلاة معروفة اهمها العقل الزول دا صاح وجدانياتو مضطربة كيف الناس بصلو وراهو والان بعد عرفو انه مريض يعيدو الصلاة ولا كيف مجرد سؤال


#481534 [القرم تفاحة ابل]
4.75/5 (5 صوت)

09-30-2012 03:21 AM
زول اكل تلاتة مليار مفروض يجيهو اضطراب في المعدة لكن ناس ما بتجيها اي شى ديل اكلو الظلط \طريق الانقاذ الغربي\ ما عمليهم شي جابو الاحساس من وين عشان وجدانهم يتاذا


#481476 [حتى مطلع الفجر !]
0.00/5 (0 صوت)

09-29-2012 11:53 PM
الاضطراب الوجدانى معروف جدا للسادة الأطباء وهو حالة مرضية شائعة جدا وتسمى bipolar disorder وهى تصنف ضمن الامراض الذهانية ويعانى فيها المريض من حالة من الاضطراب الوجدانى والتجاذب بين اعراض الهوس والاكتئاب.
بس زولكم امام الجامع دا هل هو مصاب به ام لا فتلك حكاية أخرى ... اما المرض من حيث وجوده فهو موجود ومعروف جدا .. وليس كما هو الحال فى حالةامبعلو كما ذهبت الكاتبة !
عموما تحياتى ... والرجاء من الكاتبة السؤال والتحقق قبل الخوض فى الكتابة والتندر على مسمى مرضى معروف ... وهذا شىء يعيب الكاتبة ويبرز عدم المامها بماتكتب عنه ولو كان ذلك على سبيل التندر والتنكيت ! حيث كان يمكنها تناول الموضوع والانتقاد من زاوية أخرى بدلا عن محاولة نفى ماهو معروف للآخرين .


ردود على حتى مطلع الفجر !
European Union [أبو الدقير] 09-30-2012 04:47 PM
إلي الأخ حتى مطلع الفجر...داير ياتو زاوية؟؟ الراجل طلع نصاب ودفاعو انو مصاب بمرض حسب تعليقك موجود ...وكاتبة المقال لم تنف وجود المرض بل تهكمت في الإدعاء به ...وهذا الإدعاء ليس مكانه في المخارجة من عملية النصب والاحتيال...بل مكانه عيادات المختصين والأطباء النفسيين وأنت الأدرى. فلماذا تجهل الكاتبة إذا؟؟؟.

Saudi Arabia [Dr abdul-Whab] 09-30-2012 03:01 PM
الاضطراب الوجداني هو affective disorder وليس bipolar

United States [امدرماني الركابية] 09-30-2012 06:53 AM
ياخي كتر خيرك لشرح هذا المرض وكثير من القراء وانا واحد منهم لم نسمع بهذا المرض من قبل ولكن ليس من المقبول ان تتهكم علي الاستاذه كاتبة هذا المقال بهذا الاسلوب لمجرد انه وقع في دائرة اختصاصك..........نشكرك لشرح هذه الحالة


#481454 [mohd]
5.00/5 (1 صوت)

09-29-2012 11:03 PM
ود امبعلو دا هو البشير بي شدوقو ولغودو ديل - عرفتيهو ولا اشرح اكنر؟ لكن من من شطارتك في المعجم اللغوي وتبحرك في اللغه عااارفك فاهماهو - الله يفهم لينا باقي البورداب


#481437 [عاشق]
0.00/5 (0 صوت)

09-29-2012 10:40 PM
الاضطزاب الوجدانى بسببوا الجكس النضيف لكن تلاته مليار بتسبب شنو؟؟؟؟؟؟؟؟؟؟؟؟؟؟؟؟؟؟؟


ردود على عاشق
United States [amir] 10-03-2012 10:35 AM
بتسبب اضراب وجداني للجكس النضيف


أسماء الجنيد
أسماء الجنيد

مساحة اعلانية
تقييم
10.00/10 (4 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة