تقنية الضحية بالنظر
10-21-2012 06:43 PM

تقنية الضحية بالنظر
عشان ما تقولوا الحكومة حارماكم من حاجة

حاتم الجميعابي
[email protected]

الكلام ده على لسان الحكومة:
بس عشان ما تقولوا أنو الحكومة حارمكم من حاجة، وده طبعاً في إطار سعيها لراحة المواطن عملت ليها كم حاجة كده من اجل الحياة الحرة الكريمة للشعب المسكين، الما عايز يفهم ويصدق أنو الحكومة دي ما فيها خير وكل مرة شغالين، نقصوا لينا سعر المحروقات! والعلاج والتعليم والصحة والدواء والقائمة تطول!!، يعني اسي لو الحاجات دي كلها نقصت وبقت رخيصة الحكومة دي تسف التراب يعني وآمال الناس دي بتصرف قروش من وين؟، المفروض المواطن يسهر عشان الحكومة تشوف شغلها، انتو نائمين ما جايبين خبر الحكومة تعبانة ومرهقة شديد وكرعينها دي حفت عشان أنتو تلبسوا كل يوم في دولة عشان أنتو ترتاحوا، وده كلو عشان منو يعني!!، الناس جايطة عشان الضحية والقصص دي يعني ما معقول.. طيب ما ممكن الحكومة تضحي نيابة عن الشعب كدي دوروها في راسكم لو أنت أصلاً قاعدين تدوروا، وبعدين تتفلهموا ساكت يعني اسي منو العندو قروش عشان يشتري ضحية بالرقم الخرافي ده، غايتو مالين الأسواق دي ساكت وبعدين تعالوا هنا " نحنا مش نشفنا ريقكم ده بتجيبوا القروش من وين يخرب بيتكم لا خلينا مصانع فاتحة لا مشاريع زراعية لا ثروة سمكية ولا معدنية ولا بشرية ذااتو !! نجضتونا، كل ما نصل مرحلة نكتشف أنو الشعب ده مدكن قرووش كتير الإيصالات الكتيرة دي من نوع النفايات والضرائب والعتب والرسوم المحلية والما محلية ما خلتكم تشحدوا في الشارع نعمل ليكم شنو أكتر من كده جبنا خبراء في نهب الأموال من الشعب برضو ما نفع ، الكلام ده يظهر ليك في الأعياد، ماشين السوق تعافروا ساكت ولا بتشتروا، الواحد يقول ليك ماشي أتنور واشوف السوق كيف؟ زي البت البايرة لما تمشي حفلة تقول ليك ماشي أشوف العروس طلعت حلوة ولا شينة! قوووووووولي طلعت سمحة انتي حا ينوبك ثواب توفيق راسين في الحلال يعني !!غايتو جنس عمائل عليكم ،بعد ما تتنورا عليكم الله اشتروا ليكم أنشاء الله كيس فاضي، ياخي شنو اللداحة الأنتوا فيها دي ، بس المحير الحكومة دي أنو قروشكم دي بتجيبوها من وين وتجوا تقولوا الحكومة فيها حرامية وسراقين، نحنا عارفين نفسنا سراقين وحرامية وبنأكل أموال الشعب ده، انتوا ديل قروشكم دي بتجي من وين وبعدين نحنا أي زول كسرنا عينوا وخليناهو يجري وراء لقمة العيش، الواحد يجي عليهوا أول الشهر تلقاهوا مفلس ده لو ما طلع مدين ماهية الشهر من بتاع الدكان والخدار واللبن وووووو الخ. أهما حاجة في خضم الفشخرة الفيها الشعب السوداني ده جات الضحية والناس تكابس في حق الخروف، بالله عليكم زول مفلس وما عندو التكتح بكابس مالوا!، نقترح نحنا غايتو للشعب السوداني ده يخلي كبار الوزراء والمستشارين والكماسرة والولاة والمعتمدين ونهابين المحلية يضحوا بدلكم مادام مفلسين كده يعني مافي داعي الناس تكلف روحا فوق طاقتا وبرضوا عشان نسهل ليكم الشغلة قمنا عملنا الضحية بالإقساط المريحة، وبعدين ناسنا بتاعين الأفتاء ديل ما قصروا تب تديهم القماش وهم بفصلوا ليك زي ما أنت داير يعني ما بحرومكم من شئ مرة عراقي ومرة جلابية ومرة على الله ومرة سروال، يعني عادي ممكن بكرة تطلع فتوى أن البشير يضحي نيابة عن الشعب ويجيب ليهو زي 300 راس بتاعة ضان يضبحهم لو خلى الفسالة الهو فيها دي ممكن يعزم الناس كلها في بيتوا الكبير ده ما كلها اموال الشعب ده في النهاية، لكن كمان نحنا بنتكلم ساكت هو البشير فاضي ليكم يا أخوانا عندو شئ وشويات على قول المصريين، يقعد يشوف الضحى منو والما ضحى منوا . ده رئيس ولا عمدة، غايتو سعياً وراء راحة المواطن فالحكومة عندها بشرى سارة، بعد تطبيق الإقتراع الخطير بتاع السيد عبد الرحيم محمد حسين بتاع تقنية الدفاع بالنظر بعد حادث بورتسودان، وبعد أن أثبت كفاءة عالية في كافة المجالات. الحكومة أعدت ليكم تقنية جديدة بتاعة الضحية بالنظر، ودي حاجة بسيطة اتفقت مع الفضائيات والإذاعات المحلية على نقل مباشر لمراسم الضبيحة من منازل الوزراء والولاة والمعتمدين وأعضاء الحزب الحاكم، وتبث على كافة الشاشات والفضائيات حقتنا المشوشة منها والسليمة، والبث يشمل كل أنحاء السودان، والحلة أو القرية الما فيها تلفزيون أتفقنا مع الإذاعة القومية أنها برضوا تنقل القصة دي، بعد تعديل بسيط من الضحية بالنظر إلى الضحية بالسمع، وكلوا في النهاية تحت السيطرة، الفكرة دي تمت مناقشتها في كل الإجتماعات التي ضمت الكادر المتقدم في الدولة وحزب المؤتمر الوطني وديل هم المضحيين الذين سوف يتم نقل مراسم الأضحية من منازلهم عشان الحكاية تكون فيها تعددية وكده، وبعدين القصة تكون فيها شفافية يعني كل وزير بضبح (خروف - تور - جمل) أمام الجميع، عشان ما تسمعوا من المعارضة أنو د.نافع ضبح ليهو 300 خروف في عرس ولدوا و معاهم 100 جمل و150 تور والصينية فيها (3) ضلع، واحدة بتاعة خروف والتانية جمل والتالته عجل، ناس المعارضة واولاد الفيس بوك ديل جنهم يكبروا المواضيع.
باااااع :
طبعاً هذا العرض غير شامل للشربوت، ده أعملوهوا براكم كده ..

تعليقات 1 | إهداء 0 | زيارات 899

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#492961 [yasso]
0.00/5 (0 صوت)

10-21-2012 10:23 PM
* كلامك الى حد الشربوت كان مقنع
* لاكين موضوع الشربوت ده فيه شوية دغمسة وعدم شفافية
* اذكيف يستوى بالله عليك القيام بصناعة الشربوت دون ان يقتل هذا الامر بحثا في البرلمان ودون ان نعرف راي سادتنا - افادنا الله بجاههم - رجال الافتاء
يامتعلمين يا بتوع المدارس


حاتم الجميعابي
مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة