10-31-2012 12:39 PM

ده يكون من شنو؟

الفاتح جبرا
[email protected]


تقول القصة أن سيدة كانت تنتظر طائرتها في مطار دولي، اشترت كتابا من مكتبة المطار لتقرأه (كعادة الخواجات) كما قامت بشراء علبة بسكويت معه ، جلست وبدأت تقرأ كتابها ، وكان يجلس بجانبها رجل يمسك بصحيفة يقرأ فيها ، عندما بدأت السيدة فى أكل أول قطعة بسكويت من العلبة التي كانت موضوعة على الكرسي الذي بينها وبين الرجل فوجئت بأن الرجل بدأ في أكل قطعة بسكويت من نفس العلبة التي كانت هي تأكل منها ، بدأت السيدة تفكر بعصبية لدرجة أنها فكرت أن توجه له صفعة قوية على وجهه لرزالته وقلة ذوقه ... عندما تبقت علبة البسكويت قطعة واحدة فقط نظرت إليها وقالت في نفسها "ماذا سيفعل هذا الرجل قليل الذوق الآن"؟ لدهشتها قام الرجل بقسمة قطعة البسكويت إلى نصفين ثم أكل النصف وترك لها النصف .. كظمت السيدة غيظها وأخذت كتابها وبدأت بالصعود إلى الطائرة وعندما جلست في مقعدها بالطائرة فتحت حقيبتها ،وفوجئت بوجود علبة البسكويت الخاصة بها كما هي مغلفة بالحقيبة ، وحينها أدركت أنها كانت تأكل مع الرجل من علبته، وقاسمها فى علبة البسكويت الخاصة به بدون أن يتذمر أو يشتكى !!!
من القصة (الفوق دي) يتضح أن التريث نعمة .. جاء في كتاب لسان العرب لإبن منظور .. الرَّيْثُ: الإِبْطاءُ؛ راثَ يَرِيثُ رَيْثاً: أَبْطَأَ ورَاثَ علينا خَبَرُهُ يَريثُ رَيْثاً: أَبْطأَ. وما أَراثكَ علينا؟ أَي ما أَبْطَأَ بك عنا ، ورجل رَيِّثٌ، بالتشديد، أَي بَطِيءٌ؛ وتَرَيَّثَ فلانٌ علينا أَي أَبطأَ؛ وقيل: كلُّ بَطيء رَيِّثٌ؛ والاسْتِرَاثةُ: الاسْتِبْطاء. واسْتَراثه: استبطَأَه. واسْتَرْيَثْتُه اسْتَبْطأْتُه.
المسئولون لدينا (التريث ده ما بعرفوهو) فما أن تنزل علينا نازلة أو يقع علينا خطب من الخطوب (وما أكثرها) إلا ويبادر أحدهم (والموضوع حار من نارو) ويلقي بالتصريحات هنا وهنالك وما أن تمضي ساعة واحدة إلا وتكون تلك التصريحات التي ألقى بها ذلك المسئول مغايرة تماماً للواقع ، والسؤال الذي يفرض نفسه هنا هو : ما هو السبب الذي يجعل أمثال هؤلاء المسئولين يسارعون بالتصريح والحديث وبهذه السرعة؟ هل يغتقدون بان ذلك السلوك سوف يكتب لهم في ميزان حسناتهم (الوظيفية) ؟ أم يعتقدون بأنهم بتصريحاتهم تلك يبعثون الإطمئنان في قلوب المواطنين على أساس أن (الحكومة متابعة وعارفة أى حاجة) ؟
بالطبع عزيزي القارئ أنت لا تحتاج إلى أي أمثلة فكل الأحداث والكوارث والنوازل التي مرت على هذا البلد كانت التصريحات التي أدلي بها المسئولين بعد حدوثها مباشرة لا تمت للحقيقة بصلة .. (وهي في واد والحاصل في وادي تاني)
وآخر هذه التصريحات المتعجلة تصريح السيد والي الخرطوم الذي أدلى به عقب (تفجير مصنع اليرموك) والذي أكد فيه نافياً وجود ضحايا في الوقت الذي فاضت فيها أرواح بعض المواطنين إلى بارئها وإحتشدت المشافي بالجرحي !
وحيث أن إنفجاراً هائلاً مثل هذا الإنفجار الذي وصل لهيبه إلى عنان السماء وإقتلع دويه الأبواب والنوافذ وطارت على إثره السقوف وأهتزت من فرط قوته المباني ليس بالشئ السهل التوصل إلى مسبباته في غضون سويعات ولا حتى الـ FBI إلا أن السيد الوالي أفاد وصرح (على طول) وفي عجالة يحسد عليها بما معناه أنه (لا يوجد مؤثر خارجي) معطياً الجهة المعتدية شهادة خلو طرف رسمية وكمان (مختومة) !

كسرة:
ده كلو كوم والإفتاء بغير علم كوم تاااني .. كذلك المستشار الذي صلته باالطيران والطائرات كصلة العبدلله باللغة (الأوزبكستانية) والذي صرح في عدد من الصحف اليومية عند سقوط طائرة (تلودي) بان أسباب السقوط تعود إلى (الطيار الروسي) ! ... ده يكون من شنو؟

كسرة ثابتة :
أخبار ملف خط هيثرو العند النائب العام شنو(ووو وووو ووو)؟

تعليقات 30 | إهداء 0 | زيارات 7277

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#500847 [moa.babker]
0.00/5 (0 صوت)

11-02-2012 03:09 PM
لك التحايا..دي كلها محاولات لتهدئة الخواطر عشان مانقوم تشيل عكازك وتجرى على اسرائيل وتعمل
مشاكل نحنا في غني عنها ياجبرة وعلى رايك ووووووو


#500150 [محموم جداً]
5.00/5 (1 صوت)

11-01-2012 02:59 PM
يا جبرا دي اول مرة تسمع فيها كضب ما سمعته وزير المالية يوم قال في منبر واس بأن الازمة المالية العالمية لا تؤثر على اقتصاد السودان؟؟؟
ما سمعت بوزير الدفاع القال عنده مصنع طائرات و هو ما عنده جهاز رادار ؟؟
ما سمعت من أول الانقاذ أمريكا قد دنا عذابك و ناكل مما مانزرع و نلبس من ما نصنع؟؟
يا أخي الفاتح الكضب بشترو كدي امشي كذب في اسرائيل و غنت مسئول شوف اكان يصبح عليك الصباح؟؟ظ


#500081 [مسلم غيور]
0.00/5 (0 صوت)

11-01-2012 01:29 PM
ده يكون من حظنا التعيس ....


#499973 [مدحت عروة]
5.00/5 (1 صوت)

11-01-2012 11:07 AM
ده بيكون يا استاذ الفاتح جبرا من ثقافة الديكتاتورية العشنا فيها اكثر من 45 سنة(عبود والنميرى والبشير) لان ثقافة الديمقراطية بتعلم الناس التريث والخوف من الصحافة الحرة والراى العام وادب الاستقالة وادب الاعتذار !!!لكن فى الانظمة الديكتاتورية تكذب تصرح تستعجل تستغل سلطتك تلغف تفسد تغلط ما تشتغل كويس قاعد فى منصبك قاعد بس اهم حاجة انك تكون مطبل للنظام وحافظ امنه!!!! هسع عرفت ده يكون من شنو؟؟؟(طبعا بينى وبينك انت عارف الكلام ده)!!!!


#499963 [أبوأسامة المهاجر]
5.00/5 (1 صوت)

11-01-2012 10:56 AM
كدي يا استاذ خلينا من كذب الوالي حكاية النار المولعة ليها أسبوع دي شنو

ياربي الطائرات الإسرائيلية دي رمت معاها شجر ولا شنو
ياربي المصنع دا موجود في الغابات الإستوائية ولا شنو
ياربي دي النار ولعت بتاعت قيقم منتظرين الرئيس يجي يرقص فيها ولا شنو
النار ... النار .... النار ولعت
النار النار ... هي النار ولعت يالبشير تعال ارقص فيها.
إنشاء الله المرة الجاية تولع في رأس البشير وشلته.


#499945 [ود فارس]
5.00/5 (1 صوت)

11-01-2012 10:37 AM
يكون من العنبة الرامية في بيوت المسعععولين


#499919 [كلاشنكوف]
5.00/5 (1 صوت)

11-01-2012 10:07 AM
ايها الشعب السوداني البطل
نسبة لكثرة الهجمات والغارات والحرائق اطلب من جميع الشعب السوداني ان يقوم بعمل نفرة كبرى لازالة الحشائش ( لانو دة البنقدر عليهو نحن كشعب ) حتى لا تأخذ الحرائق وقت اطول وفي نفس الوقت تسهل عمل عمال اللحام
وتكون النفرة تحت شعار ( منجل لحش القش خير من الف رادار في خبر كان )


#499881 [عبدالواحد المستغرب أيما إستغراب!!]
5.00/5 (1 صوت)

11-01-2012 09:33 AM
(كل إناء بما فيه ينضح،،،الفى بطنو حرقص براه بيرقص،،،يكاد المريب أن يقول خذونى )والمسأله وما فيها التصريحات التى خرجت من خشم الوالى ليست لها علاقه (بالعجله ولا حتى البسكليت)والذى تربى وادب بأدب المكر والخداع والغش والمراوغه تكون هذه الافعال دأبه أو دأبهم لانهم يغشون ويراوغون ويمكرون ويخدعون بشكل جماعى ويقدمون هذه الافعال الذميمه والقبيحه والوقحه على ما عداها وأتحدى اى كائن من كان أن يذكر لى حاله واحده من الحالات المشابهه لحالة اليرموك رصد فيها تصريحا لمسئول كان صادقا فيها وهذه الجماعه درجت على إطلاق الاكاذيب فى كل شىء ظنا منهم أن (الكذب منجى)!!بينما الحقيقه التى إستقرة لدى المسلم ووقر فى قلبه حسب حديث منسوب لسيد البريه أن(الصدق المنجى) و(قل الحق ولو على نفسك) إستنادا على الايه الكريمه (قل لن يصيبنا إلا ما كتب الله علينا)وعدم ثقتهم فى قول الله ورسوله رغم أنهم هلوا علينا تحت شعار (الدوله الرساليه،،، والمشروع الحضارى،، والاحتكام لشرع الله!!) وآخر الاسافى شعار (هى لله..هى لله..لا للسلطه ولا للجاه!!)وبالعوده للمأثورات أعلاه كل واحدة منها تنطبق على هذه الكائنات حيث أن إنائهم ملىء بالكذب والنفاق والعفن !!وهم على مدار الساعه يرقصون لان كذبهم ونفاقهم ومكرهم يؤرقهم ويقلقهم ومن حيث لا يدروا يكشفون عن أنفسهم!!ورغم الجهد الذى يبذلونه لمداراة سؤاتهم يظلوا فى ريبه دائمه من أمرهم وتقلب عليهم أنفسهم الاماره بالسوء!!ومثلنا العامى يقول (الشينه منكوره) وإصرارهم على إقتراف الشينه هى التى تجعلهم مرتبكين ومشوشين رغم وضوح الآيه الكريمه السالف ذكرها!! وليتهم إعتنقوا المأثور القائل (العارف عزو مستريح) وهذا المأثور له شروطه منها الصدق مع الله ثم النفس ثم المواطنين وتطهير الاناء من العفن والقاذورات وأن يدعوا قول الزور والكذب وآخيرا وهو الاهم الثقه الكامله فى الله رب العالمين وأرجو من الله مخلصا أن يتبنوا هذه (الوصفه)علهم ينجحون!! ولكن نقول آيه ونعيد آيه ياجبرا هذا هو قدر الشعب السودانى ؟ واللهم إنا لا نسألك رد القضاء ولكنا نسألك اللطف والتخفيف .


ردود على عبدالواحد المستغرب أيما إستغراب!!
United Kingdom [Noorah] 11-05-2012 04:30 PM
أستاذنا الفاضل / عبد الواحد ،،

أرجو قبول مداخلتي في تعديل الآية الكريمة ( قل لن يصيبنا إلا ما كتب الله لنا) وليس (علينا)، وكل عام وأنت بخير .


#499876 [نصرالدين ابراهيم محمد جمعة]
0.00/5 (0 صوت)

11-01-2012 09:29 AM
استاذنا الفاتح جبرة ديل يا استاذ (( مسعولين )) وليس مسئولين


#499782 [دهشان]
5.00/5 (1 صوت)

11-01-2012 07:00 AM
هو شنو الحصل؟
منو ضرب منو؟!!
وين الطائرات الاعتراضية المقاتلة؟؟والمن غير طيار!!؟
انا عقلى طار!!وبقى من غير طيار
ولا قطع غيار!!!
الواحد بقى محتار


#499663 [أب أحمد]
1.00/5 (1 صوت)

10-31-2012 10:49 PM
ديل الواحد فيهم يا بيأكل نص الستة أو كذاب بن المايقوما بالميلاد


#499648 [الديمقراطية لحم راس]
0.00/5 (0 صوت)

10-31-2012 10:24 PM
دي يكون من بسكويت بركة..............................قش يحرق اكتر من يومين دا يكون من شنووووووو


#499624 [wedhamid]
3.00/5 (2 صوت)

10-31-2012 09:30 PM
((وآخر هذه التصريحات المتعجلة تصريح السيد والي الخرطوم الذي أدلى به عقب (تفجير مصنع اليرموك)...))

الأستاذ جبره ...سلامات و كل سنه و أنت بصحه و عافيه و بلا فقع مراره ...
كيف تقول أنو تصريح ود الخدر متعجل يا راجل؟؟؟...... دا كان قرار جماعى إتخذ بعد مداولات مكثفه و فى موقع الحدث مباشرة و بعد التشاور مع لجنة أمن الولايه الذى يترأسه الوالى بنفسه و بعضوية اللى هـم بسلامتهم قائد المنطقة العسكرية الذى يتبع لوزارة الدفاع.. و ممثل الحكومة الاتحادية وممثلين لوزارتي الدفاع والداخلية الإتحاديه و قيادات المؤتمر الوطنى بالولايه.... و بعد أستعراض تقرير من أحد حراس المصنع ....بأنه لا تأثير خارجى و لا أى خسائر بشريه .................. دا ما كلامى أنا دا هو ما جاء فى خطاب إحتجاجى من المسئولين عن المكتب الإعلامى لوالى الخرطوم ضد جنس كلامكم دا تعقيبا على ألإدعاآت بتعجل العجل (الوالى) .....و محمود ( بتاع المدرسة الأوليه زمان) يريد أن يعرف و لم تكن هناك إصابات أو خسائر بشريه فى الحادث .. (أحد حراس المصنع داك ) الذى رفع التقرير للوالى و الزول (عامل اللحام) الكان السبب للإنفجار و الحريقه راحوا وين ؟؟؟


#499572 [sami]
4.50/5 (4 صوت)

10-31-2012 08:00 PM
ياجماعة انتو منتظرين من عمكم جبرا يتناول موضوع سـخن مثل هذا بجدية وشهامة؟! عمكم جبرا لايمكن يغلط ويطلع ليهو كلمة واحدة تزعل عليهو الجماعة (جماعة هي للـه) لأنه راجل محمول ورب أسرة دايرين تقطعوا عيشو.. خليكم ناس عاقلين وخلوا الراجل يسترزق.


#499508 [الحسن]
0.00/5 (0 صوت)

10-31-2012 05:57 PM
ياعمو جبره بالله خليكم ناس (مسعولين) شوية انت وصاحبك الشيخ ودساتي .. ماسكين في عزومة ميتة وموضوع هامشي خااااالص يعني شنو الوالي قال وصرح ولا ماقال .. كتر خير الراجل النط في موقع الحدث وهو ماعارف كيف حصل الموضوع المهم انو واكب .. هسي كان ماجاء كان فتحتو بيت بكاء انت وجماعتك ... بعدين الراجل حاكم الولاية وليس وزير الدفاع ولا عسكري عشان يعرف المواضيع دي .. وكنت اتوقع منكم ان تقولوا برافو لمن يؤدي مهمته وبعدين هو مامشي للصحفيين وبتاعين الجزيرة هم الحوا يعني اصروا عليه في الكلام ... وبالله عليك نحن هسي مشكلتنا في تصريح الوالي وبعدها نكون تمام ... الوالي ده خنقتو ساهلة شديد وممكن في اليوم تفتح ليهو مليون مشكلة حقتو مااتحلت لسه ... لكن خليكم حقاااانيين قول لم احسن احسنت ومن اجتهد كنر خيرك وخليكم من الفارغة والمقدوده حبالها رخم وحيطتها حصير ... والماعندهم موضوع يمتنعون ...


ردود على الحسن
[الحسن] 11-01-2012 06:19 PM
ياحنين انتو ا الزول يا يكون مع القطيع وينبح يامصفق مشاتر .. ياخي لو الوالي اصلا ماصرح انت والبلد مشاكلكم كده اتحلت ... ناس جبره ديل ده اكل عيشهم كده يشتتوا السكر ويلموا النمل والغالبية مودره بيت البكاء نواح في غير محله في موضوع مابأكل عيش ولو ماعملوا كده مابقبضوا راتبهم .. وأسأل نفسك انت قاعد في الصين ابعد من البعيدين لما تسمع كلام زي ده تحس ان الضرب المصنع هو الوالي زاتو ماتصريح في الهواء بعد الضربة .. يابشر اصحوا شوية وركزوا في الموضوع البلد مشكلتها اكبر من كده .. وانا دارس اعلام وبعرف من وين تنفخ في القربة وتضرب الطشت الفاضي ... الصحافة دي بلوتها علي المواطن اكبر من الحكومة زااتو لانو عدم الامانة بقي اكتر من الحق وعندك قبل يومين الصحافة الرياضية حرشت الشباب وفي اقل من شهر كسروا استادين ودخلوا في نفق التعصب الاعمي والعنف الرياضي .. ده من ناس الحكومة برضو .. انا مختلف مع الحكومة بكل تفاصيلها من الي .. لكن مابعرض بره الداره .. وبطعن في عين الفيل .. نحن ماعاوزين زول يحرشنا عاوزين زول يحمسنا للانتاج وانت بره شفت الصينيين كيف بعملوا بدل ماتشتت لينا المديده الحارة خت لينا خطة عمل افكار بس وحمس الناس .. وكتر خير الحكومة العملت اصلا مصنع ذخيرة .. وسلاح .. ولو عاوز تغير الحكومة دي ماالطريقة تقول ليهو انت ضلالي وكضاب ... حتي لو كان هو كده ... لأنك تضيع زمنك في الفاضي .. اعمل واكتفي وقاوم واحكم بعدين بالحق والعدل .. لكن تكسير المجاديف مانفع غيرك كانوا اقوي منك بكتير .. وبالمناسبة الوالي مطلع لي حافز كبير وهو لما بظهر في التلفزيون وبوضح لي مشاريعو العملها ويفتح لي مراكز صحية وتأمين صحي وبعمل الفي قدرتو كتر خيرو اجتهد وماقصر بالمناسبة انا بره ماجوه .. اتمني ان تستفيد من خبرات الصينيين في الانتاج بدل مانشوف وين اللمة ونصفق معاها علي عمانا ......... (ياحنين اكتب لي انا عاوزك [email protected] )

China [hneen] 11-01-2012 12:30 PM
يا الحسن شغال تعلق هنا وهناك انت الوالى دا مطلع ليك حافز ياخ بلى ياخدك انت وحكومتك هى لو نافعة كنتو انضربتو فى بيتكم وبعدين عليك الله بدل تصفق مشاتر اطلع برة شوف العالم عايشة كيف عشان تعرف انك وواليك ما بتساوو سواق تاكسى فى بلد تانى اصلو ماحنبقى حقانيين لزول من الحكومة والله لو قال اسمو حنقول كضاب وضلالى ديل الكذب جرى فى عروقهم


#499504 [اسير الشوق]
5.00/5 (1 صوت)

10-31-2012 05:40 PM
لقد اسمعت لو ناديت حيا ولكن لا حياة لمن تنادي الله امتعك بالصحه والعافيه يا استاز جبره امين


#499495 [حسن كاراتيه]
5.00/5 (1 صوت)

10-31-2012 05:29 PM
اعتقد بختو حاجة فى الفول اللى بناكله, عشام كدا الواحد تفكيره بقيف ويجيك كسل


#499478 [مواطن]
4.82/5 (9 صوت)

10-31-2012 05:09 PM
شعب فارغ كتاب فارغون أنا فارغ نقه نقا بس كل الدول الدول طارة وبقت دول لا نحن اولاد الوسخة أى زول ينظر جوع مرض وسخ حقد سرقة تصلى وراء الواحد بعد الصلاة يأكل مال النبى زنا لقطاء زنا اولاد أخلاق مافى احترام مافى بلد ملانه أجانب من غير ورق بنوك تنهب من اسر معينه حقك يضيع لانك مسكين ناس مابتفرز بين الحرام أى شىء تبلع اقل شىء يقوليك داك القانون امشىء ليه. قاضى مرتشىء امام زانى معلم مغتصب ضابط ملتحى رجل شرطة قواد ياخ عليك الله فكنا شوف ليك مهنة ثانية نحن مابنستاهل شىء الى ان نبقى ناس ودولة تعملو لينا كتب وصحف لأحكام ولاشعب الكل وسخ


#499459 [salah]
4.49/5 (8 صوت)

10-31-2012 04:42 PM
السبب يا استاذ من سنة 89 شايفين عندنا قنابير
وامخاخنا اتلحست.. وبنصدق اى كلام


#499442 [محمد]
4.07/5 (5 صوت)

10-31-2012 04:24 PM
جاء في كتاب لسان العرب لإبن منظور .. الرَّيْثُ: الإِبْطاءُ؛ راثَ يَرِيثُ رَيْثاً: أَبْطَأَ ورَاثَ علينا خَبَرُهُ يَريثُ رَيْثاً: أَبْطأَ. وما أَراثكَ علينا؟ أَي ما أَبْطَأَ بك عنا ، ورجل رَيِّثٌ، بالتشديد، أَي بَطِيءٌ؛ وتَرَيَّثَ فلانٌ علينا أَي أَبطأَ؛ وقيل: كلُّ بَطيء رَيِّثٌ؛ والاسْتِرَاثةُ: الاسْتِبْطاء. واسْتَراثه: استبطَأَه. واسْتَرْيَثْتُه اسْتَبْطأْتُه.


ياخي ده كلام ذي العسل لو سمحتا يا استاذنا عرف لينا كلمة مسوءل شان نقدر نحدد فهمنا


#499438 [ابوطه]
4.60/5 (8 صوت)

10-31-2012 04:11 PM
والله ياجبرا بقيت ذي ساتي ماقادرين تتناولوا لب الموضوع
الموضوع ما موضوع التصريحات المتعجلة الموضوع اكبر بكتير وكان ممكن بمعالجتك الساخره دي تملطش السياسات الجايبه لنا الكفوه دي كووووولها علي قوللك .. هسع ياجبره هي بقت علي تصريحاتو هو براهو ماكوووولهم خايبيين في اقناع اي تلميذ اساس كان هو كان عبدالعاطي
وصاحبك ساتي اسد الفساد برضو موضوعو ذيك كوبي اند بيست وانتو العليكم التكل ياكتاب تنورناوتدهشونا وتضحكونافي المأسي مش تزيدهوا لينا وتكون اقلامكم الكبيره معيده وقت الوجعه وبعد الوجعه تزيدوا الوجعه بكلامكم وتحليكم الهزيل اللهم عمود وحقو مقبوض
عزانا انو البت رشا عوض فكت غبينتنا وطمئنتناانو عندنا بنات نفتخربهن


#499435 [huwidah]
4.42/5 (8 صوت)

10-31-2012 04:05 PM
ده يكون من الاعتماد علي سيوف العشر


#499400 [abuwagar]
3.94/5 (7 صوت)

10-31-2012 02:53 PM
يكون من البسكويت اومكنة اللحام ياجبرا والله حاجة تجنن الواحد الا يطب ساكت


#499378 [zahi]
4.07/5 (7 صوت)

10-31-2012 02:21 PM
يا جبره ده يكون من الطيار الروسي ..........


#499362 [الملا عمر]
4.54/5 (8 صوت)

10-31-2012 02:02 PM
يمهل ولا يهمل .. فقد تعودوا الكذب على الله و خلقه و ما يخدعون الا أنفسهم .. و ليتهم يتحلوا بفليل من الشجاعة و يبعدوا عن الانظار حتى يقرر الشعب الفضل مصيره ويخرج من محنته التي انزلوه بها طيلة 23 عام ..


#499327 [عثمان]
4.54/5 (9 صوت)

10-31-2012 01:23 PM
دا يكون من عدم الاختشاء يا استاذ.. ومن تخانة الجلد.. ومن (يكذب ويتحري الكذب حتي يكتب عند الله كذابا) ولا حول ولا قوة الا بالله العلي العظيم


#499323 [وحيد]
4.52/5 (7 صوت)

10-31-2012 01:19 PM
تتذكر تصريح الطفل المعجزة وزير الخارجية الاسبق ابو نخيرة حين تهاوت طائرة الخطوط الجوية السودانية؟ حين صرح سعادته و هو في زيارة خارج السودان و لحظة وقوع الحادث بان الحادث نتيجة عدم وجود قطع غيار بسبب المقاطعة الامريكية؟ فادان نفسه و حكومته و سودانير بتسيير طائرات غير مصانة؟ و ليس ببعيد تصريح " عامل اللحام الذي تسبب في حريق مصنع اليرموك"!


#499321 [واحدة فاضية وماعندها شغلة]
3.82/5 (5 صوت)

10-31-2012 01:19 PM
بمناسبة الاول من نوفمبر بكرة لازم تعمل عمود فاضي وماعاوزين مقالات بس انا عاوزة اعرف حتوزع الواوات ال 11 كيف بالله من الصباح حاشتري الراي العام واشوف كيفية التوزيع ممكن كده
ووو ووو ووو وو لادي شكلها ما حلو احسن كده ووووو و ووووو اوكي


ردود على واحدة فاضية وماعندها شغلة
China [hneen] 11-01-2012 12:38 PM
بس انا نفسى اعرف بتشترى الراى العام دى من وين هى المانيا دى جابوها الكلاكلة مع انو كل العالم صادق ماعدا حكومتنا والناس المعاها الفاضية الماعندها شغلة
منى ليك اتوقع تكون الواوات و وو وو و و وو وو و 12211221 لو مامصدقين دقو لسيد التلفون دا فى زين

Israel [أبو علأمة] 10-31-2012 11:59 PM
انا شخصيا اتوقع تكون ( ووو ووووو ووو ) مش كده !!!

جبرا ...لقد هرمنا.. هل من مجيييب !!!!!!!!! ؟؟؟

Saudi Arabia [زيزو] 10-31-2012 05:09 PM
لأ أحسن.. تكون بخطة اللعب بتاع مازدا.. (الله يرحمه) ويرحمنا جميعاً..

4 3 2 1
وووو ووو وو و

كده أحسن طريقة ممكن تطير جبرا من الجريدة..


#499317 [الزُول الكَانْ سَمِحْ]
4.74/5 (7 صوت)

10-31-2012 01:15 PM
سا أستاذ

ده يكون من التخمة التى أصابت والى الخرطوم من إدخار المال السايب وهو غير مصدق بأنه عاش فى شظف العيش طفلاً وشاباً فضرب مخه وبقى يتهيأ حاجات زى بتاع اللحام الكان بلحم فى ضنب صاروخ فى المصنع وتسبب بالإنفجار


#499307 [ود نفاش]
4.80/5 (9 صوت)

10-31-2012 01:02 PM
ده من شنو ؟ده من سجارتك الكاكموت الصباحية دى
وانت عارف وانا عارف الكل عارف انو الناس ديل ما عندهم مؤسسيه انا ما عارف الطيب مصطفى قال شنو ؟؟؟؟؟
والوالى الخضر اسال عنه ناس القضارف
وبعدين يا جبره الضربه دى داخله فى الابتلات للامة الموحده السودانية ما سمعته د/نافع قال شنو؟؟

اخبار القش الفى اليرموك شنو ؟؟؟؟؟؟؟؟؟؟


ردود على ود نفاش
Saudi Arabia [saw] 10-31-2012 11:04 PM
مرحبا أستاذ جبرة
بالمرة وبواسطة علاقاتك ممكن تجيب لينا إسم عامل اللحام لأني حاسده أصبح مشهور في كل القنوات الفضائية العالمية؟كون الإسم نكره هكذا ( عامل لحام ) ما شيء جميل.


الفاتح جبرا
الفاتح جبرا

مساحة اعلانية
تقييم
7.49/10 (15 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة