10-18-2010 01:57 PM

الشايقية ..شيَالة حال

عبد الله الشيخ

رياح الأيام لم تترك السنجك سيد أحمد يهنأ في ليالي (مولاص)الجزيرة، بالرغم من أن (بت محبوبة) ست البيت كانت تحجز له الركن والبنبر وتقول بنبرة حاسمة للقادمين:-
\"هوي، دا محل السنجك\"!..
مع تمدد سلطان البنك الدولي وصندوق النقد الدولي في مؤسسات القطاع العام بمعاونة (استثمارية) من المتعافى عرف سيد أحمد السنجك انه بعد بيع الانقاذ لمشروع الجزيرة ،، لن يطيب له المقام فى (صعيد الله الرسول) كما كان يسمى تلك النواحى ..صار السنجك كثيراً ما يهذي بعبارة( البلد بقت مِقحطي، الله يسنح السناحي السواها فينا )..! ..
ويكتفى بهذا المستوى من الدعاء ضد الانقاذ لكون ان بعض المتوجسين من أهالى جزيرة الفيل ، ( خوفاً وهروباً من نقد الحزب الحاكم يشتمون سناجكه،، فقط).. كان سيد أحمد السنجك يسخر من حاله ويقول أن (منوفلى ـ أي الفلس ـ مصنقر فى ضهرو زي اللستك الإسبير منذ أن جاءت الانقاذ)..! ..وهو فى هذا الحال وصلته رسالة شفاهية من أمه مع إحدى الشايقيات .. و،، زي ما إنتو عارفين، إنو الشايقية ( شيالة حال)..!
داهمته الشايقية وسط السوق وقالت له: آآ مايل الرجال ، أُمك خجيجي قالت لك (الأصبع اليابس ما بيتلحس)!.. أهمل الرد عليها وقد فهم مضمون ، وجوهر الرسالة .. لكنه طنطن بنبرة عالية وقال في نفسه:- زمن، والله زمن.. رعيناها زمن مخدري.. يا ربي أخير الواحد يرجع كريمي؟. وما مرّ شهر على ذلك ( البث المباشر) حتى جاءت شايقية أخرى من طرف أمه، كانت شايقية قاهرة ،، وصلته عند بيت بت محبوبة صاحبة أشهر محل للبقنية فى حلة موسى .. وقالت له قِدام الرجال:- آآ سجم الرماد ،،أُمك خجيجي (قالتلك) إنت ماك عارف أمر الشاي صعيب؟ رد عليها:- قوليلا إنتي ماكي عارفي الناس ديل باعوا السناحي دا..؟ ...
وأضاف:- قوليلا نان أنا أجيب من وين ؟الحكاية جات زانقي من ورا.. وأضاف أيضاً:- قوليلاً كاتلي كاتلي بي شوية التمير لامن ربنا يفرجا.. تدخلت بت محبوبة في الحوار وقالت :- يا سنجك ،، يا مايل الرجال إنت عندك تمر في البلد ؟؟ و ،، يوم من ذات الأيام ما ضوقتنا من تمرك دا..؟.. صفق سيد أحمد الشايقي يديه حسرة وقال لها :- آ خرابه،، قولي بسم الله.. تمر شنو البياكلوهو؟ يا خرابة التمر بيشربوهو ، وبس .. حرَّم ،، و،، وحات سيدي الحسن أنا في كريمي عندي اكتر من مية عود بركاوي ، يوم من ذات الأيام ما دخلت لي حباية منو في خشمي؟..

وضاقت الأحوال أكثر على مؤسسات القطاع العام بتمدد استثمارات النظام، وضاقت الوسيعي على السنجك،، الذي شوهد داخل بيت بت محبوبة كثير الشكوى، وكثير التذلل لبنت محبوبة :- (ضيقوها علينا، تضيق عليهم الوسيعي).. كان في الليالي يأتي إلى بنت محبوبة فارغ الجيوب ويقول لها:- آآ خرابة.. انا الليلي معِّلم الله.. أسكتي أكتبي في الحيطة لامِن تجي التعويضات . وتشخبط بت محبوبة الحساب في الحيطة.. هي الأخرى بدأت تطنطن وتقول له :- السنجك يا مايل الرجال.. الحيطة دي ،،بعدين ،،بتبقى راجلاً تليِّسا؟..
فيرد عليها السنجك :- آخرابة انتي دايري تشطبي حسابات الدفتر العمومي؟..

في ليلة من الليالي جاءت بت محبوبة غاضبة .. و وقفت أمام السنجك سيد أحمد الشايقي وقالت:- يا سنجك هوي.. أديني حقي.. !!قال لها :- آآ خرابة قولي بسم الله.. خليني أنجم، قطعتي قلبي، الله يقطع قلبك ،، إنتي ماكي عارفي إنو الناس ديل باعوا العفش كلو)..؟..فوجئ السنجك ببنت محبوبة تسأله :ـ ( الناس منو..؟) ،، عرف أن بت محبوبة ( الليلة ما براها).. هذه المرة كانت صارمة وأبعد ما تكون عن الهزار والانتظار..قالت :ـ يا سنجك هوي.. يا مايل الرجال.. أنا دايرة حقي الليلي؟.. الليلي؟.. نان يا خرابه اجيب ليكي من وين؟.. قالت:ـ ما بعرف.. أكان ما اديتني حقي بكورك وأفرَّج فيك ناس الكمبو.. قال لها :ـ آخرابة، ناس الكمبو كلهم مافى واحد فيهم صرف ...! و،، مرقت بت محبوبة إلى الشارع وكشفت رأسها وبدأت تكورك.. و السنجك سيد أحمد الشايقي يقول لها:- آآ سناحي أدخلي، أدخلي،، تدخل فيكي الدخلت فى البالات ..!! وبنت محبوبة تكورك وتقول له :ـ لا ما بدخل..! شكيتك علي الله.. حق مريستي دا أشيلو منك يوم القيامة.. يوم الخلوق واقفين صفوف.. !.. و،، لن تفت عضد السنجك سيد أحمد الشايقي مثل هذه العبارات \"الدينية\"، فقد قال لبنت محبوبة:- آآ خرابة.. حرَّم تجيبي سيرة المريسي دي في طرف خشمك ،، في اليوم داك ،، إلا يتفرجوا فيكي خلايق يوم القيامة ، إنس، وجِن،،إنس وجِن، إنس، وجِن،،إنس وجِن..وظل يرددها حتى حال بينهما الظلام ..!!

أجراس الحرية





تعليقات 6 | إهداء 6 | زيارات 2785

خدمات المحتوى


التعليقات
#36260 [مونتي رغلو]
0.00/5 (0 صوت)

10-19-2010 08:47 AM
دايره ليها حق مريسه يوم القيامه ههههههههههههه والله بالقت


#36162 [شايقية]
0.00/5 (0 صوت)

10-19-2010 04:04 AM
البقنية والمريسة والبلح دى لو الى اليوم موجوده زى زمان الوسيعى دى مابتطيق ونفز من البلد


#36138 [حافظ فنجالي]
0.00/5 (0 صوت)

10-18-2010 10:58 PM
يادكتور انت شكلك بقيت من الامس انت من زمن الشايقي بشرب مريسي وبياكل ملاح اخضر الشايقية اتغيرو ومنهم الان اولاد الشيخ الكاروري وعلي عثمان وصارو نبراس للاسلام وهم الان عمود فقري للحكومه ولو بشربو ما كان اولادهم دعمو الانقاذ وانسي شايقي الستينات


#36130 [سومي العسل - الدمام]
0.00/5 (0 صوت)

10-18-2010 10:14 PM
صراحة ما فهمته حاجة .. لكن اللي بعرفوا أنو الشايقية ناس جميلين وذوات صفات حلوة وليس شيالين حال وبعدين ما بشربوا المريسة لأنو البركاوي كثير عندهم ..
وفي النهاية التحية لأهلنا الشايقية ..


ردود على سومي العسل - الدمام
Sudan [شايقية] 10-19-2010 06:20 PM
شكرا ليك عشان انت زول بتفهم الناس صح وحقيقة الشايقية بيعاشروا بي نية صافية جوة وبرة واحد ودي خصلة نادرة في الزمن دة وكمان معاها حلآوة شكل ولسان ..

وشكرا تاني عشان انت انسان .


#36112 [mohd]
0.00/5 (0 صوت)

10-18-2010 08:29 PM
يا ود الشيخ بطل طرطشة وإتكلم عدل . دحين يا حرابة الحكاية دايرة اللفة دى كلها!


#36062 [شايقية]
0.00/5 (0 صوت)

10-18-2010 05:26 PM
أنا فهمت حديثك دة عشان أنا من ناحية كريمي. أبقي شاطر المرة الجاية أعمل حاشية أشرح فيها للناس الماحيفهمو كلآمك دة .

أقو ليك كلآم . الشايقي مابيشرب المريسة عشان متعود علي طعم حق البلح القارص داااك .

ياربي خلآيق يومالقيامة فيهم جن ؟؟؟


عبد الله الشيخ
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة