المقالات
السياسة
ارشيف مقالات سياسية
يا سائق البوباي الطيارة جاي ولا جاي؟؟
يا سائق البوباي الطيارة جاي ولا جاي؟؟
11-09-2012 02:13 PM

يا سائق البوباي الطيارة جاي ولا جاي؟؟

أسماء الجنيد
[email protected]


سلام اهلنا الكرام رواد الراكوبة في كل مكان, جمعة مباركة إن شاء الله
يا سائق البوباي الطيارة جاي ولا جاي!!!
مع الإعتذار لشاعر وفنان الأغنية الجميلة,,

بصراحة يا جماعة محتاجين لي سائق البوباي السائق في واطة الله والرسول دي’ يورينا طيارات الجن البطيرن في سماء الله والرسول طائرات بي وين؟ وماشاشات على وين؟؟؟
لأنه والشكية لي الله المسؤلين في بلدنا الميجوع غلبهم كلو كلو يعرفوا دروب حرامية الطيران البجونا مع العشاء وطافين انوارهم!!
بلد هاملة وقاعدة في السهلة تحمد سيدها، لا حماية لا حصانة من الأعداء!!
اللهم إلا حماية ربانية من الله لي عباده الصابرين.
صابرين على المر والأمر منه، مبالغ طائلة مصروفة من دم الغلابة على وزارة دفاع ما شفنا ولا سمعنا من وزيرها غير التصريحات البتورم القلب وتمرض الشعب الفضل ده.!
شاهدت وغيري جلافة هذا المخلوق العجيب الصحىا من نومو فجعتن لقى روحو وزير دفاع!!!
والمصيبة الكبيرة تتجلى في وزارة الدفاع دي زاتها !! زول ما قادر يجمع كلمتين على بعض ، كيف يجمع جيوووووش عشان تدافع عن وطن بحجم السودان؟ حكمة والله وحكاية على قول الفنان!!!
اها الفنجري عصر مخو لامن كب زيت عربات عديييل , لأنه مخ الزول ده مستحيل يكون فيه زيت زي باقي شحوم البشر.
والحيرني طفية نور الطيارة دي قلعها من وين ؟؟
يعني يا سي عبد الرحيم كملت كل الأعذار الفي الدنيا دي؟ كان تكضب ساااااي زول بسعلك مافي.
ما قاعدين تكضبوا كل لحظة, كان تتمها دليبة كبيرة عشان واجهة البلد وكده .
ولا كملتو الكضب كلو ؟؟ بدل تخلي الخلوق كلها شايلة كلامك ولافين بيه مثبت صورة وصوت !!!
ضحكت فينا اليسوى والما يسوى!!!
كان تقول وتصدت دفاعتنا الجوية الخطيرة وعطلت محرك طيارة الجن دي،و وقعت تراااااااااح بالغلط في عربية الزول الكان ماشي في امان الله وقضت عليه هو وعربيتو.
وتتم جميلك وتقول وبعدها نحن كبينا الزوغة طوااالي ونسينا الحصل للزول المسيكين ده وكأنه ما فقدنا مواطن غلبان !!..
كان الحا يغالطك منو ؟ تعرفوا تكضبوا وتحبكوا الكضبة في الفارغة ومقدودة.
وفي حاجات زي دي تقلعوا ليكم بي كلام يضحك العباد على الشعب الميجوع ده!!
يعني هسه طفية النور دي شافع في الروضة بقولا ؟ خيالك لكن لقيت افقو قريب خلاص!!
فضيحتك لا حكت ولا بقت, الله يخيبك ويخيب العينوك لينا خازوق لا يهش ولا ينش!
غايتو يا ناس إسرائيل طلب خاص تاني لما تجونا تضربونا, رسلوا تلغراف قبل عشرة يوم.
وبعدييين تعالوا نصة نهار بعد الفطور ونومة الضهر , لأنه زولنا ده بعد يملأ بطنو بي الفطور الكااارب ويديها جردل جبنة , بتندل في مكانو و ينوووووم وهاك يا شخير ما بتصحيهيو اي صفافير فد نومة لاآآآآآوقت العصير.
ولا يهمكم تجوا تضربوا وتنزلوا كمان تجغموا ليكم موية من النيلين الشاقات البلد دي , وممكن كمان تعوموا بي مزاااج في موية بحرنا الهاملة دي ، واهلنا عطاشة!
بعد تعوموا تعالوا بي باقي الموية وإنتو راجعين رشوها و بخوها لي وزيرنا ده في وشيهو،اخلعوه بيها.
وقولوا ليه يا هومة نحن ضربنا وراجعين تــــب لي اهلنا , كدي قوم شوف الأتكسر شنو والحرقناهو شنو والدمرناهو شنو ؟
وامشي شوف ليك مذيع غفلة ولا صحفي من ناسكم وجعجع ليه لامن تذبد، ما اصلو دي هوايتكم المفضلة من رئيسكم!
وتم خلعتك بي كلام خارم بارم زي الحايم في الفديوهات ومضحك عليكم العباد!!
اهاعلى بال ما يقوم وزير البدافع على البلد بي النظر من محلو ويفتح عويناتو الشافن نور الطيارة مطفي
ويعضي جلابيتو إستعدادا للجكة وترديد عبارات الرد ,,الرد .
عشان يوصل باقي الشمار للبشير ورفاقتو، إنتو بتكونوا وصلتوا اهلكم ورجعتوا بيوتكم كمان،لا من شاف ولا من سمع!!
وبي كدة ما محتاجين تسمعوا ليكم لوم وإتهام مضحك ومستفز،ولا اهلنا الغبش ديل يسمعوا ليهم اعذار واهنة من المخلوق عجيب الأطوار ده!!
المحيرن فعلا ناس الحيكومة بي فوجاجهم ده وفلهمتهم العورة، كيييف متحملين وزير وسطهم بالمستوى ده؟
غايتو يا البشير السويتها في الشعب ده مافي زول سبقك عليها ولا غلبك فيها.
إتشفيت بي مزاااج في الناس لامن قالواالروووب!!
غير الدمار والخراب والشتات والإنقسام, هريتونا بي نوعية البشر عديمي الإحساس والشعور!!
وكمان محكرنهم في مواقع حساسة، ماعندهم شغلة غير الكضب والكلام بي جلافة وإستهتار وعدم مسؤولية!!

المصيبة الكبيرة بعد تفوتوا من البلد دي ومصيركم تفوتوا قريب إن شاء الله.
اهلنا ديل كان خلطوا البحر ده جردقة وشربوها دحن بتفك منهم كوفارة ناسكم المدهشين ديل ؟؟
حسبي الله ونعم الوكيل عليكم جميعا ,, يمهل ولا يهمل ...

متاوقة
يا وزير الدفاع النبي فيك تاني كان تتكلم بي إسم البلد وإسم اهلنا بي نضميك وتهريجك في الفضائيات.
عفيناك تب,, ابقى داب روحك والبلد ليها الله من فوق,,,


تعليقات 6 | إهداء 1 | زيارات 2891

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#508787 [أبوأسامة المهاجر]
0.00/5 (0 صوت)

11-11-2012 01:37 PM
يا بنت الجنيد لماذا لا تكتبي بالعربي الفصيح وتتركي لغة الجبنة التي لا تفيد.


ردود على أبوأسامة المهاجر
[المشرف asmaa] 11-11-2012 04:38 PM
سلام وتحية لكل الأحبة المروا من هنا ,,
يااخ أسامة ما سميتها( لغة الجبنة)على حد قولك في ناس معجبة بها وبي دارجيتنا المحببة لنفوس الكتيرين من اهلنا,, لهجتنا البسيطة النابعة من اهلنا البسطاء ,
حتى اللهجة الفضلت دايرين تحرمونا منها ؟؟
عذرا إن لم يعجبك إسلوبي الذي اعشقه كعشقي لأهلي الغبش’
فهناك من يعشقون هذا الإسلوب ولا نقبل ان تندثر لغتنا كما إندثرت كثير من معالمنا السمحة من الزمن الجميل,,
توجد كثير من المواضيع باللغة الفصحى’ إختر منها ما تشاء , واترك لنا لهجتنا في راكوبتنا وبي بساطتنا , وشكرا جزيلا لمرورك,,


#507995 [قاسم قاسم]
0.00/5 (0 صوت)

11-10-2012 02:41 PM
عفارم عليك يابت الجنيد كلامك قوى وواضح وصريح ......ما فضل ليك الا تقولى ليهم كلام سيدنا عمر لامن قرر الهجره للمدينه من اراد ان تثكله امه وياتم ولده ويرمل زوجته فليتبعى وراء هذه الوادى ....كلامك كلام رجاله ياستاذه اسماء حفظك الله وسدد خطاك


#507881 [ود الجد]
0.00/5 (0 صوت)

11-10-2012 12:00 PM
وكمان كان من المفروض انو تدق بوري عشان تصحي ناس الدفاعات الجوية ولكن لم تدق البوري وهذا غلط والله كبير منها


#507297 [سهشاى ....]
0.00/5 (0 صوت)

11-09-2012 06:28 PM
هى بقت على وزير الدفاع يا بنت الجنيد شوفى بقية المستوزرين تعصريهم
كلهم ما تطلعى منهم باش رئيس فى ترولى سكة حديد .. وزير الدفاع ده
قمة الجهل و العبط و السبهللية ووزير الداخلية البركة فى قيادات الشرطة
التى وضعته فى حجمة الطبيعى و للتشريفات فقط . وزير الخارجية كرتى هذا
الوجه البائس لم يلقى القبول داخليا أو خارجيا و الدبلوماسية براء منه
ولها رجالها الذين عرفناهم عبر تاريخها وليس خريجى الدفاع الشعبى ، ثلاث وزارات
سيادية يتولى أمرها أجهل و أغبى من مر عليها فى تاريخها، وعلى ذلك قيسى البقية
من الطغمة الحاكمة من المتعافى الحرامى الى كبيرهم نافع الاب الروحى لبيوت الأشباح
و القتل و التعذيب .. هذه العصابة تحكم السودان ليس بفكرها ووعيها السياسى
ولكن بفضل استكانة الشعب السودانى للظلم و القهر و الفقر و الجهل و المرض
و خداعة بأسم الدين و الشريعة ..


#507173 [هدهد]
0.00/5 (0 صوت)

11-09-2012 03:31 PM
معذور السيد وزير الدفاع يا سوما الطيارات دى جات الساعة 12 بالليل والواطة ضلمة والناس نايمة وبعدين الطيارات مطفية الانوار وكهربتنا كانت قاطعة كل منطقة الشجرة بما فيها الكلاكلات فكيف يستطيع الوزير الهمام وجنده فى مثل هذه الظروف بهوية هذه الطائرات ؟؟؟؟؟


أسماء الجنيد
أسماء الجنيد

مساحة اعلانية
تقييم
10.00/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة