12-02-2012 02:39 PM


بسم الله الرحمن الرحيم

حزمة الهمس البتمرق من مسام الغيمة ... مرثية للحراز ..

عروة علي موسى
[email protected]

همست ليك ساعة الصباح
والليل أباح
حزمة الهمس البتمرق من مسام الغيمة
شان تغسل حنينك لي الرجوع
وكتين بقت كل المسافات مسقية بي طعم الهجوع
ومشيت .. مسافة الهمسة الحنينا معاي
بروق وطلوع
مشيت .. همس الحنين جواي مات مصروع
بكت نجمة الصبح البِتُوقِد في طريقا شموع
توسّع لي مدارك الهمسة في جواي
بي الشغف الحنينو دموع
إلاّ همسك لي المطر
فاتن سنينو سبوع
وبان جواك مسدار الحراز مطبوع
وكان حبوبة .. بي نضم الحنين جواها
توري صغارا...
ليه سيف الحراز في وجه الخريف مرفوع !!
وكانت عزة النفس الوراها الجوع
صمد الحراز واقف
وطفرت سيرتو تقدِل من ربوع لي ربوع
وهمست ليك ..
وحزن الحراز من حزن الغلابة سؤال
أشوفك مارقة من نغم الحنين موال
و من صوت الحراز في غناك
غريبة حكاية الحزن السكن جواك
وغريب الليل إجمع حزنو في محياك
إنقّط مطرو من جوفاَ عيونو سماك
إقوم زمن الحزن .. إنزّل حزنو من تالاك
آهـ .. يا بديعة الألوان
آهـ .. يا بديعة الأكوان
آه .. لو تعرفي البي
حزنك إنت زاد الكي
وحزناَ لي مسافر فوق هجير الصي
مات في العتامير حي
ما شفتيه يا مسكينة ؟
كيف شفتيه .. حرازاً لي ..
وهمست ليو
حتجي (الصخب) الغمام
وتحجب (الشمس) البتحرق كل تفاصيل الكلام
وترش عبيرها فوق قلوب صابها الهيام
يا مطر من كل عام
يا مطر غطى البلودات بي الغرام
يا مطر شق الزحام
واشتقت ليك ...
صليت على طرف الفريق بي ركعتين
وقلبت توبي الكان علي ..
وسدرت راجع لي البيوت بي خطوتين
وبديت أفتش لي الغمام
ألقاه وين ..؟
وأنا في رجاه
مصلوب على (ضل الحراز )
لا قدرت أوصل لي الفريق
لا قدرت أعرف لي دليل ..!!
وهمست ليك !
عروة علي موسى



تعليقات 0 | إهداء 0 | زيارات 1718

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




عروة علي موسى
مساحة اعلانية
تقييم
6.25/10 (4 صوت)


الاكثر تفاعلاً/ق/ش

الاكثر مشاهدةً/ق/ش




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة