في



بدون طيار
12-08-2012 10:02 AM

الفاتح جبرا

بدون طيار

والله اني لأعجب واندهش.. بل وانحني احتراماً لتلك العبقرية التي تتعامل بها حكومتنا مع الأخطاء والكوارث والمصائب التي أصبحت تأتينا من كل فجٍ عميقٍ.. تلك الطريقة الفذة التي لا يُمكن بحال من الأحوال أن تتميّز بها أية حكومة على ظهر الكرة الأرضية (والكور المجاورة)، فحكومتنا الرشيدة لا تعترف بأي قصور أو خطأ ليس ذلك لبرود في دمها - لا سمح الله - وإنّما سلوك (استخفافى) ليس له ما يبرره ينظر إلى المصائب والأخطاء وكأنها شئ عادي حتى وإن أدت هذه الكوارث إلى فقدان الأنفس وتدمير الممتلكات وإن شئتم مثالاً واحداً يكفي لما أوردته، فهاكم هذه المقولة التي وردت على لسان أحد المسؤولين عند دخول قوات خليل إلى أم درمان (لقد استدرجناهم)!! ولك أن تعلم عزيزي القارئ أن هذا الاستدراج قد بلغ حي (العرضة) وشارع (الأربعين) وما جاورهما من أحياء سكنية!

طيِّب إيه لزوم المقدمة دي؟ لزوم هذه المقدمة ما جاء في الأخبار اخيراً عن سقوط طائرة استكشاف (بدون طيار) أمام أحد المنازل بمدينة الثورة والتي كان من الممكن أن يتسبّب سقوطها (هكذا) في كارثة لا يعلم مداها إلاّ الله.. كان من المُمكن أن تسقط في مدرسة.. محطة وقود.. موقف مواصلات ...إلخ ويموت العشرات لكن القصة (جات سلامة) وربنا قدّر ولطف بهؤلاء المواطنين (الما عارفين يلاقوها منين)!

هل يمكن أن يحدث مثل هذا الأمر في أيِّ بلد في العالم؟ طبعاً لا.. لسبب بسيط وهو عشان الزول يتعلّم (السواقة) وما يقوم يعوق ليهو زول بيقوم يمشي حتة (خلا) حتين بعد ما يتعلّم كويس بيجي يسوق داخل المدينة.. من الواضح ومن الحاجات الما عايزة ليها اتنين تلاتة هي إنو (أنحنا جديدين) في حكاية (السواقة البدون سواق دي) فكان العقل والمنطق بيقول إنو المسألة تتم في حتة (خلا) بعيداً عن المواقع السكنية حتى لا تحدث كارثة!

طيب السؤال البيفرض نفسو هو ماذا لو أن سقوط هذه الطائرة قد تَسَبّبَ في موت وجرح عدد من المواطنين؟ الجواب يا عزيزي للأسف الأسيف (ولا حاجة) يعني دي أول مرة تخطئ فيها (جهة) والموضوع يمشي وكأنو ما حَصَلَت حاجة؟ الطيارات الوقعت ذي (المطرة) دي حَصَل يوم قريت ليك (تقرير لجنة تقصي)؟

بعدين هو ذااااتو طيارات شنو البدون طيّار العاوزين نصنعا ونحنا (بندافع بالنظر) مش مفروض (قريشات) المشروع ده (نوفرا) عشان نشتري بيها (رادارات) ومنصات صواريخ (دفاع جوي) عشان نأمن بيها أجواءنا البقت (مَلطشة) دى ... وللاّ ما كده؟

كسرة:

يا جماعة الخير خلونا أول (نظبط) طيّاراتنا (أم طيّار) وبعدين نشوف قصة (أم بدون طيار)!!

كسرة ثابتة:

12/12/2012م بإذن الله تعالى الإحتفال بالذكرى السنوية للكسرة الثابتة (أخبار خط هيثرو).. ترقبونا..





تعليقات 39 | إهداء 0 | زيارات 6932

خدمات المحتوى


التعليقات
#547648 [محمد نصر]
0.00/5 (0 صوت)

12-30-2012 05:56 PM
shame on us


#539025 [adil]
0.00/5 (0 صوت)

12-19-2012 12:08 PM
زمان كان فى زول يسمو طيار ايام العدالة الناجزة- يدوهو حقو ويمشى يجازف عشان يجيب السنة. يمكن ده طيار بدون طيارة فى هذا الزمن الاغبر


#531677 [عوص محمد احمد]
0.00/5 (0 صوت)

12-09-2012 02:50 PM
الاخ الفاتح تحياتى مسالة تقع طياره دى مشكله يعنى لو وقعت في امبده او اى حته مليانه ناس ذى كورة الهلال والمريخ الكلها شلاليت - يعنى يموتوا الفين تلاته دى مشكله ؟ يكون الله عز وجل ريحهم لانو الشايفنوا قرب يجنن ، كمان يجيهم يوم بكره المامعروف الحايكون فيه شنو - وطبعا حايعملوا لجنه للتحقيق وتنبثق عنها لجان اجتماعات واجتماعات وفى النهايه يحول للسيد النائم العام ليكمل نومته مع اخوانه ذى خط هيثرو- اما مسالة استدرجناهم دى - يعنى عمليهم مصيدة تسلل - يالله ده كلام مسئول وان كان كذلك هل امسعول ده هل مازال على راس العمل - ان كذلك فانا لا استبعد ان ينزل الطيارين في مطار الخرطوم ويدمروا كل شى ويتناولوا العشاء فى احد مطاعم الخرطوم ويرجعوا بالسلامه وتكون هنالك لجنه لوداعه في المطار - مافى شى غريب في بلدنا -قبل يومين كنت بتكتب عن الابراج وطبعا السعداء هم مواليد برج الحوت وهم القله الساده المسعولين والبقيه هم برج النحس وهولاء الشعب السودانى الله يكون في عونه وان يحفظه من الطيارات البتقع براها بي طيار وبدونهلك ولشعبنا الصابر كل تحياته ونساله تعال ان يرفق بالشعب السودانى ويبعد عنه الطيارات والمسئولين الذين ينصبون مصيدة التسلل للغازين داخل المدن وان يجعل كيلو اللحمه بعشره جنيه


#531625 [don bushra]
0.00/5 (0 صوت)

12-09-2012 01:43 PM
سبحان الملك العلام؟ سابع المستحيلات انو تكون سودانية ؟ واذا افترضنا انها سودانية بعد منحها الجنسية (على غرار المتلاعبين كرة القدم المحترفين ) من ايران(الشقيقة) ملاحظة : الايام الاخيرة كل الدول بقت شقيقة الصين اثيوبيا ايران روسيا تشاد(حسب الاعلام الرسمى الحكومى) وبعدما سوودناها ما الغرض منها ؟ ليس هنالك معلومات مخفية عنك لكى تجمعها؟ دفاعك بالنظر ؟ اسرائيل بتوريك دايرة تضربك متين وين كيف ليه؟ ارحلووووووووووووووووووووووا لا يرحمكم الله؟؟


#531565 [Alia]
0.00/5 (0 صوت)

12-09-2012 12:42 PM
كدي خلينا من الطيارات دي هي الطيارة بطيارها بتقع خلي من غير طيار انا حسه همي في احتفالك ده حتعمل شنو تاجر صالة برستيج ولا الذهبية ولا نيلتون الايجار 25 مليون مع الفنان ولالعشا ء يعني زي 100 مليون حتجيبها من وين حنقول حرامي وانت اللي سرقت الخط
انا رائي تعمل فتة وتجيب مقرئين يختموا ليك القران كم مرة كده علي روح الخط وربنا يلزمك الصبر والجاتك في مالك سامحتك وخيرها في غيرها


#531547 [محموم جدا]
0.00/5 (0 صوت)

12-09-2012 12:04 PM
جري و طيران ما تلقوا للنعامة و منو القال وقعت دا كلام إعلام ساكت الجماعة بجربوا يوقفوها و يرجعوها كيف قامت وقعت على خشمه لأنه السفه ما كانت من سلطان الكيف المرة الجاية الطيار بجي أول ثم الطيارة بطيار و قايدة بتها الطيارة بدون طيار لحدي ما تعرف الدرب و أخيرا الطيارة بدون طيار عشان تقول ليكم انا بقيت اعرف أطيييير !!! لازم تجيبوا ليكم بامبرز مقاس كبير للإحتياط يا جبرا... و الحفلة لازم نحضرا


#531519 [ابكرنك]
5.00/5 (1 صوت)

12-09-2012 11:36 AM
ياجبرة انت ماسمعت ببدون جراحة ووبدون مواد حافظة وبدون هوية دي كلها عندنا في السودان وبدون روشيتة وبدون بنج .


#531487 [بدر النهار]
0.00/5 (0 صوت)

12-09-2012 11:15 AM
مش مفروض (قريشات) المشروع ده (نوفرا) عشان نشتري بيها (رادارات) ومنصات صواريخ (دفاع جوي) عشان نأمن بيها أجواءنا البقت (مَلطشة) دى ... وللاّ ما كده؟


يحكي أن قيادة قواتنا المسلحة كانت قد تعاقدت علي منظومة دفاعية تضم رادارت حديثة جداً معها صواريخ هذه الصواريخ تنطلق بمجرد إستشعار الرادار بدخول الأجواء أي جسم غريب غير مبرمج في المنظومة ... لقد وصلت الرادرات ولم تصل الصواريخ وهي الآن بمخازن القوات المسلحة بدون فائدة أما الصورايخ المكملة لتلك المنظومة فقد سقطت في جيوب من تعاقدوا عليها سبحان الله صواريخ تقتل البعض واخري تثري جيوب البعض .... عشان كده بلادنا وأجواءنا وشعبنا بقي ملطشة .... ولكن تبقي تلك الآية القرانيةالعظيمة (وتلك الأيام ندوالها بين الناس )عزاؤنا لانهم نسوا الله فأنساهم أنفسهم .


#531413 [حسن]
0.00/5 (0 صوت)

12-09-2012 10:23 AM
اسرائيل وامريكا يفضلون استمرار هذا النظام الجاهل ولا يحتاجون الا الدفاع بالنظر
يعنى جانبهم مامون
اما الطائره بدون طيار فهى لمتابعة جحافل الجبهه الثوريه الت ستجتثاهم تماما باذن الله


#531364 [ابو مبارك]
0.00/5 (0 صوت)

12-09-2012 09:47 AM
انتو عارفين حكاية حكومتنا مع الطياره البدون طيار دي ذي شنو؟!!!
ذي الزول العريان العندو شوية قريشات ومشى السوق بدل ما يشتري ليهو لباس (نيكس) اشترى (فونيكس) ( عجله) ، قال شنو عشان يدخل بيها السباق العالمي للطيارات اقصد الدراجات ، عشان يورى اسرائيل والعالم كلو انو السودان في الموضوع دا بالذات ح يتفوق ويقوم سداري كمان .



اتمنى انو واحد يتطوع ويعمل الموضوع دا في شكل كريكاتير وله شكري


#531363 [سمير]
0.00/5 (0 صوت)

12-09-2012 09:44 AM
تحية ليك استاذنا على هذه الروائع .. على طاري الاحتفال عندي ولدي (محمد سمير) مولود في نفس اليوم مع ( كسرة خط هيثرو) بالله ضيفو معاك في الاحتفال ..


#531357 [راجل المرا]
0.00/5 (0 صوت)

12-09-2012 09:41 AM
دى الرشاقة الكتلت اشراقة
ياخى نحنا سراويل ما قادرين نصنعها..... الابرة الصغيرة دى بنستوردها من الصين
يجو مرة واحدة يقول نصنع طيارة بلا طيار...... قدر القريشات العندنا خلاص كملت بالسرقة والكلام الفاضى الزى دا
ياخى خلونا نشبع كسرة اول


#531356 [سم زعاف]
0.00/5 (0 صوت)

12-09-2012 09:41 AM
أخبار الخط العند النائم العام شنو يا جبرا؟ يا أخي ولا حد عبرك ولا قال ليك جر بعد مرور عام كامل إيلا 3 أيام. يوم الأربعاء القادم شوف لينا كسرة جديدةولا بطل كسرات وعوارة just kiddingأحسن ليك


#531214 [صدقونى]
4.50/5 (2 صوت)

12-09-2012 07:06 AM
لامن يوم يكتلوليهم زول
الناس ديل ما نصاح ولا شنو؟؟؟


#531051 [koko2012]
0.00/5 (0 صوت)

12-08-2012 09:52 PM
ياخي الطيارة كان بتفتش باقي ناس الحولة التخريبية


#531036 [مدحت عروة]
0.00/5 (0 صوت)

12-08-2012 09:33 PM
يا جبرا انت ما عارف انه الانقاذ برضه عملت طيارين بدون طيارات؟؟؟؟؟
وفاقوا العالم اجمع!!!!!
انت اخبار نمور الثورة بالنص شنو؟؟؟لسه بيقاتلوا الحكومة وكذلك اسود الصافية؟؟؟ما الياهو الفضل!!!!!!
والانقاذ انقذت السودان من السلام والاستقرار!!!اصلهم حوص!!!!!!


#531026 [Ali Alsunni]
5.00/5 (1 صوت)

12-08-2012 09:22 PM
يا أخي مين اللي قالك الجماعة كان بيجربوا فيها ، يا أخي دي مرحلة الجماعة اتخطوها زمان ، كل ما في الأمر أنها كانت تتابع ( تحركات مشبوهة) و يقال أن شخير (الحنفية) الخالية من المياه في أحد الحمامات هو الذي جذبها فاصطدمت بصبة السقف و تحطمت .. شفت الدقة كيف ..!!!


#530946 [منتظر الصباح]
0.00/5 (0 صوت)

12-08-2012 06:28 PM
بوبار فاضي، ده كلو مابينفع مصانع سلاح و طيارات بي طيار و بدونه وطيار بدون طيارة و الما عارف شنو داك، ده كلو مابينفع و انحنا مفضوحين في العالم : ترتيب السودان رقم 3 في الدول الفاشلة بعد الكنغو و الصومال، تخيل !!!!!!!!!!!!!!!


#530914 [ودامبعلو]
1.00/5 (1 صوت)

12-08-2012 05:14 PM
عووووك نحن مار قين متيييين اناس هوي

انشاء الله الطيارة التفجخكم واحد واحد،

حلاتم المصريين وهم في التحرير وهم في الاتحاديه ده بس عشان مشروع دستور

ونحن ياحسره.....،،
وبرضو تقولوا ،،،،،،،،،،،،،،،،،،،،،،،،،،،،،،،،،،ممممممممم
اها نمرق الشارع متبن وله لسسسسسسه شويه


#530897 [أبورياض]
3.50/5 (3 صوت)

12-08-2012 04:42 PM
مفروض (قريشات) المشروع ده (نوفرا) عشان نشتري بيها ( نظارات)


#530896 [سمبلة]
4.50/5 (4 صوت)

12-08-2012 04:41 PM
مرة قاطعين الشارع جوا الناس العويرين البيركبوا العربات المبرقعة جاريين بعوراة عجيبة التقول لاحقين ليهم انقلابيين ،،،، المهم ربنا سترها علينا في اخر ثانية ، سألت زوجي لو عربات الشرطة دي قتلت ليها زول بسبب العوارة دي بيتحاكموا ؟ قال لي يتحاكموا!!!! ؟؟؟ علي الطلاق ديل يفتحوا بلاغ يطالبوا اهل الضحية بالتعويض .


ردود على سمبلة
Saudi Arabia [أبوأسامه المهاجر] 12-09-2012 10:55 AM
حلوة يا سمبلة


#530859 [ود نااااااس]
5.00/5 (7 صوت)

12-08-2012 03:53 PM
ياناس هوي
الطيارة ام خمسة كيلو دى كانت ماشة تضرب اسرائيل بس قطعت بنزين
نحن مش قلنا ليكم نحتفظ بحق الرد....
اهو بس الله ما سهل


ردود على ود نااااااس
United States [سند] 12-08-2012 06:24 PM
حلوة


#530844 [أبوأسامه المهاجر]
5.00/5 (5 صوت)

12-08-2012 03:23 PM
يا أستاذ أهنئك على إختيار يوم 12 شهر 12 سنة 12 بعد الألفين ليكون يوم الإحتفال بحولية المرحوم خط هيثرو تغمده الله بواسع رحمته وألهمنا الصبر وأتمنى من الله ألا يرينا مكروهاً في عزيز مثله وأن يكضب الشينة في خط الخليج
أرجو من أستاذنا جبرة أن يكون هذا اليوم مناسبة سنوية للترحم على النزاهة والشفافية والمحاسبة على أن يذبح ثور أسود وفي العام القادم ثوران وهكذا.
أرجو من الشرفاء في السودان تحديد مكان مناسب للتجمع والإحتفال وأنا مستعد للمساهمة في سعر الثور.


#530843 [أبوأسامه المهاجر]
0.00/5 (0 صوت)

12-08-2012 03:23 PM
يا أستاذ أهنئك على إختيار يوم 12 شهر 12 سنة 12 بعد الألفين ليكون يوم الإحتفال بحولية المرحوم خط هيثرو تغمده الله بواسع رحمته وألهمنا الصبر وأتمنى من الله ألا يرينا مكروهاً في عزيز مثله وأن يكضب الشينة في خط الخليج
أرجو من أستاذنا جبرة أن يكون هذا اليوم مناسبة سنوية للترحم على النزاهة والشفافية والمحاسبة على أن يذبح ثور أسود وفي العام القادم ثوران وهكذا.
أرجو من الشرفاء في السودان تحديد مكان مناسب للتجمع والإحتفال وأنا مستعد للمساهمة في سعر الثور.


#530773 [عباس بن عباس]
5.00/5 (2 صوت)

12-08-2012 01:50 PM
اعجبني تعليق ظريف......الخوف يوم يرمو لينا طيار بدون طايرة!!!!!!!!


#530763 [عطبراوي آخر]
0.00/5 (0 صوت)

12-08-2012 01:38 PM
يا استاذ الفاتح ، القاليك الجماعة ديل مهمتمين بالأنسان السوداني منو؟؟؟ لمن يضيعوا وقتهم في مشاكل الناس ، البيشوف مصالحهم هــم منو ؟؟ ديل قاعدين يتنافسوا في بناء الأبراج في ماليزيا وأوروبا وغيرها وكمان هنا في السودان ،، طيارة تقع ، طيارة تقوم دا ماشغلهم ،،
لكن يا جبره أنا محتار جدا ، أنت الناس الحكام ديل مش مفروض جايين عشان خدمـــة المواطن ؟؟؟ وعملوا أنتخابات ( حتي ولو كانت مخجوجــة أو مخجلوله ) مش وقفوا قدام الناس ووعــدوهــم بالذي والذين ، طيب وين الذي خليك من الذين ؟؟؟ عندك النواب أو الأسم الصحيح ليهم ( المصفقاتيه ) لمن تحصل زيادة على كاهل المواطن يقوموا يصفقوا ، وعندك رفع الدعم من البترول وزيادة السكر وخلافه ، بيصفقوا ليه ؟والله يكون عندهــم كوتات ؟؟؟ قال ممثلين الشعب قال ... يمكن يكونوا ممثلين الشعب ( بضم الشين) اللي هي شعب اللغف واللف والدوران والكذب ؟؟ ما أصلوا هــم حكايتهم أتولدت وترعرعت في ظل كذبة كبيرة ومن شب على شيء شاب عليه ،، والكذب باطل ، ومابني على باطل فهـــو باطل ،،، علينا نحن الشعب السوداني الفضل (كوووولنا كما يقول أستاذ جبره ) أن نلزم بيوتنا في عصيان مدني لعل وعسى أن تزول هــذه الغمــــة والطغمـــة من كاهلنا ،،، ( أن الله لا يغير ما بقوم حتى يغيروا ما بانفسهم )
صدق الله العظيم


#530751 [سند]
5.00/5 (4 صوت)

12-08-2012 01:27 PM
اجمل تعليق قالوا مواطن بعفوية في التلفزيون انو الطيارة دي كانت بتحلق في السماء و بعد شوية جات ( ركت ) في راس البيت!!!!!!!!!!!!!!!.


ردود على سند
Saudi Arabia [koko2012] 12-08-2012 09:54 PM
حمار كلتوم ما كان هناك

Australia [احمد] 12-08-2012 06:08 PM
هم الظاهر ما سمعوا اغنية محمود تاور : " طيرى ياقمرية وركى فى الزنكية " بالرغم من انه غناها قبل عشرين سنة ؟؟ عجايب

United States [احمد ابونصر الشمالي] 12-08-2012 04:47 PM
ماكانت طافية نوره


#530747 [سند]
3.25/5 (3 صوت)

12-08-2012 01:22 PM
{{(لقد استدرجناهم)!! ولك أن تعلم عزيزي القارئ أن هذا الاستدراج قد بلغ حي (العرضة) وشارع (الأربعين) وما جاورهما من أحياء سكنية!.}}..... التحية و الاحترام استاذ جبرة و اريحك بانو الكلام ده قالوا ما(و ليس من) يعرف بوزير الدفاع عبدالرحيم محمد حسين في مؤتمر اذاعي بعد الاحداث و قالها بالنص : استدرجناهم لارض القتل و ساله المذيع عن ارض القتل فرد عليه نصاً شارع العرضة و كبري الانقاذ . ودقي يا مزيكا و لسة نحن في الراكوبة شغالين تعليق و مداخالات. شعب......


#530731 [عبد الله]
5.00/5 (1 صوت)

12-08-2012 01:09 PM
حكومة تعمل مصانع للاسلحه والذخائر وسط الاحياء السكنية
حكومة جيشها معظم سكناته داخل الاحياء السكنية
اخخخخ
انا زهجت ، موش عايز اكمل


#530717 [الزوُل الكَان سَمِحْ]
5.00/5 (2 صوت)

12-08-2012 12:57 PM
يا أستاذ

يعنى إنتا عاوز وزير الدفاع ..ووزير الإعلام.. والحاج ساطور.. والصرماتى يطلعوا أى كلام!!!!

هم مش قطعوا عهد إنهم حا يحتفظوا بحق الرد فى الزمان والمكان و(الوسيلة)!!!

الوسيلة أهى الطيارة الأم بدون طيار دى..بعد ما يعيدوا إنشاء مصنع اليرموك و( يذخروها) حلوة يذخروها دى..بصواريخ عُشرهوك بتاعت مندوب السودان فى الأمم المشتتة..يوجهوهالتل أبيب..


ردود على الزوُل الكَان سَمِحْ
Saudi Arabia [koko2012] 12-08-2012 09:59 PM
لا المفروض يستعملو موديل ساطوروفتش وسفروقوهوك
لانو دي الوحيدة البتخلي اسرائيل تخاف مننا

Australia [احمد] 12-08-2012 06:11 PM
ياقريبى مفروض تشرح ان صاروخ عشرهوك مصنوع من نبات العشر لانه كتيرين ما بيعرفوه .. وان كان فى زمننا ده بيكون العشر قام ليهو شوك


#530710 [عالية يوسف]
4.69/5 (6 صوت)

12-08-2012 12:50 PM
طيار شنو وبدون طيار شنو..البلد انتهت وانتو يا رجال السودان قاعدين في الظل..والله والله اقسمت ان لن اتزوج سوداني.............زوين الرجال قاعدين مدسين خايفين في بيوتكم..............تعالو اديكم طرح تلبسوها


ردود على عالية يوسف
Saudi Arabia [سعد] 12-09-2012 12:56 AM
عندك طرحه مقاسيxxxl

United States [يحيي العدل] 12-08-2012 03:00 PM
يا بنتي عالية الشالات المشكلة دي ماهي طرحكم ( ذات نفسها ) ولبسوها الجماعة .

الشعب يريد برقع وخمار وحمار

United States [أبوأسامه المهاجر] 12-08-2012 02:33 PM
نحن مش مندسين وبس كمان تركنا ليهم البلد ولو جاية معانا الإقامة جاهزة والعريس جاهز ولو بتدينا طرحة بيضاء عادي بنلبسها لأنو لبس الطرح للرجال هنا مش عيب

أنا في إنتظار الرد بس مايكون صد (أقصد سد).


#530705 [دوشكا]
0.00/5 (0 صوت)

12-08-2012 12:46 PM
كلام في الصميم تسلم يديك العافية


#530694 [سيد أحمد]
0.00/5 (0 صوت)

12-08-2012 12:31 PM
وين الشولات ؟؟؟؟؟؟؟؟؟


#530685 [wedhamid]
5.00/5 (2 صوت)

12-08-2012 12:18 PM
يا الفاتح يا إبن جبره ........
بالله لا تعجب و لا تندهش !!! مش الريس ( أدام الله فضلو ) بشرنا قبل فتره بأننا صرنا فى مصاف الدول التى تصنع الطائرات البدون طيّار ؟؟؟؟ .... و أهو الدليل - رغم الإبتلاءات - ..... و نحن أمة مؤمنة بالقدر و بنعرف جيدا المثل القائل ( ما طارت طائرة و إرتفعت و إلا كما طارت وقعت) و متعودين على كده حتى و لو بطيّار وطنى أو أجنبى .... بس الما كان متوقع إنها كانت محزوقه ........ و عشان تفك الحزقه آثرت الوقوع على أدبخانه بدل ما تعملها فى روحا أو فى الشارع العام أو فى طرمبه !!!!!! فلذا نرجو أن تاخدوا المسأله بروح رياضيه و hard luck ...و إنشاء الله تكبرو و تاكلو غيرا طالما النظام دا موجود..........


#530657 [كبشور]
5.00/5 (1 صوت)

12-08-2012 11:45 AM
أحمد عمر زعبار - شاعر تونسي
طلع الجلفُ علينا
طلع الجلفُ علينا .. من ثنيات الرعاع
نشروا الجهل فينا .. ولبسوا الدِّين قناعْ
فرضوا القهر علينا .. ورأوا الأنثى متاعْ
ورأوا النصر المبينا .. فى نكاحٍ وجماعْ
أيها المملوءُ طينا .. إنما العقل شعاع
جئت خرّبت المدينة .. جئت بالهمج الرعاع
أيها المدسوس فينا .. ياصاحب القول الخداعْ
سكنوا الكهف سنينا .. مرضى فقدوا الشراعْ
وأباحوا القتل فينا .. كوحوشٍ فى المراعْ
ليسوا أتباعَ نبينا .. إنهم محضُ رعـاع


#530637 [وانا زول غلباااااان]
5.00/5 (1 صوت)

12-08-2012 11:34 AM
طيري يا طيارة بطيار وللا بدون طيار وأقعي فوق راسنا الكاشف سهلة دة ... لكن ماذا نقول في حكومة سادة دي بطينة ودي بعجينة ولا هماها الحاصل بينا ... اللهم سترك يارب فقد فقدنا الثقة في كل من حولنا إلا أنت يارحمن يا رحيم


#530592 [ود الجد]
0.00/5 (0 صوت)

12-08-2012 11:03 AM
حلوة يا استاذ جبرة حكاية الكور المجاورة دي الظاهر نحن ننتمي الي مجموعةالدليب ولا القرع


#530591 [NASRELDEEN ALI]
5.00/5 (1 صوت)

12-08-2012 11:01 AM
اقتباس :
بعدين هو ذااااتو طيارات شنو البدون طيّار العاوزين نصنعا ونحنا (بندافع بالنظر) مش مفروض (قريشات) المشروع ده (نوفرا) عشان نشتري بيها (رادارات) ومنصات صواريخ (دفاع جوي) عشان نأمن بيها أجواءنا البقت (مَلطشة) دى ... وللاّ ما كده؟

تعليق :

ما كده لأنو نحن فى الأول حقو نوفر مواصلات نصل بيها محلات ضرورات الحياة وبعدين نشوف الجرى ثم من بعد ذلك الطيران

معلومة :
البتاعة دى وقعت فوق راس ( W.C. ) حسب الافادة ممن شاهدها وهى تضرب الدلجة والحمد لله لاخرمتو ولا خرتتتتتتتتتتتتتت

طييرة ذى حقتم دى فى بلاد برة بيلعبوا بيها الشفع فى المتنزهات الكبيرة ( المفتوحة ) علما بأن نماذج الطائرات بدون طيار هى اصغر من طائرات رش المبيدات قليلا وليس صغر بالدرجة التى وصفت بها التى سقطت فوق ( المستراح ) دى

اقول شنو تانى
يا أخى سيبك دى قصة فارغة


ردود على NASRELDEEN ALI
United States [المؤكوك الفضائي] 12-08-2012 03:53 PM
رد بليغ من الطيارة البدون طيار قالت ليهم صناعتكم محلهاW.C اوماتتعبوا حالكموله ممكن يكون الطيار صرصور ابوشنبات.


#530571 [بت الخرطوم]
5.00/5 (3 صوت)

12-08-2012 10:46 AM
بدلا ما تهنئ الصوارمى وعبدالرحيم بالانجاز والاعجاز بالطيارة ام فكو تنتقدهم وتقول يمكن تعمل كارثة ويعنى ايه لو قتلت ليهاالف قول مليون ما عادى جدا المهم والاهم عملوا طيارة وكمان ايه بدون طيار مقدرة


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة