12-12-2012 07:53 AM

مليون أحبك يا بلد - قصيدة

صديق ضرار
[email protected]

أحبـك يـا بـلـد
ـــــــــــــــ

شعر : صديق ضرار


مليون أحبك يا بلد . . وأقيف عشانك متحد
* *
مين عنده زى وآطاتْ حقولنا المشمسة
مين عنده زى نيلنا وعيونه الناعسة
ممدود على الغابات حنان ومؤانسة
مين عنده مليون مربع ميل ، وقادر يحرسها
مين أرسى للحريات أصول ، ومؤسسة
سودانا من قبل الخلق
ديمقراطيته كانت مدرسة
وكان فى التفرد بتحسد

* *

وعشان عيونك يابلد
بكت المدامع وصبَّبت
لامن رأت حالة بنيك المضهبين
ما اتحملت
الغربة ، و السفر الطويل . .
والرجعة ليك اتأخرت
لاكين عزاها بأنه إسمك
كان فى الشمس ،
حين دورت
حطت رحالها على مدارك
وفوق ترابك ارتمت
والدنيا من حولك
ضياءً نورت
كل المدن فى مجد عرسكْ
بالحلىِّ اتجملت
والكون وقف ،
موكب مهيب ،
متله العيون قط ما رأت .
زهرة بنفسج فى عيون العاشقينك
قد نمت
ونما الحنين الِّليك
وفطفط فى الكبد
وهتفت بى صوت مواصل ، ومضطرد
مليون أحبك يا بلد * * مليون أحبك يا بلد
وأقيف عشانك متحد

* *

ورجعت بى أدب المنافى
وبى أهازيج السجون البائسةْ
كل المرافى اتغيرتْ
والكان زمان بتقيف معاىْ ، . . اتبدلت .
قالوا المراكب شرقتْ
واضحت حكاوى الحب ، أغانى مسيسة
وبصقت فى وجه النوافذْ
والأزّقة العابسة
قالوا المراكب شرقت
الدنيا عدّتْ من مدارها
وعن مدارك حَوّرت
ولأنى أصلاً فى جذورك منتمى
أقفز فى حضنك وارتمى
أعتز بيكى ، وبين ضلوعك أحتمى
وتجينى من جوّايَا
أصوات صفوف اتلازمتْ
مليون أحبك يا بلد
وأقيف عشانك متحد

* *

يانـى البحبـك يا بـلد . . وكونى منك مفخرة
يا ذات الشمائل قد سمت . . ذات الصفات النادرة
يا أحنى أم ضمت بنيها . . وظلت عليهم ساهرة
ترباية بالكلمة الحنونة . . . وبالعيون الزاجرة
إن بزُّوا إنتى هى السند . . وإن غلطوا كان بتمدى يد
)فى الدنيا لو يظهر بطل . . بيقولوا سودانى اتولد(
ما ضعنا أبداً ، ما اتونينا. . ولا اتكلنا على أحد
سودانا كان فى عيونا جد . . ونخيلو ظل الهاجرة
وصحارى تضهب سائرا . . وسماه دايما ماطرة
فى نيلو ابترد الجسدْ . . طاهرين ليوم الآخرة
يكفينا إنك طاهرة . . . وإنك مقدسة للأبد
وعيونا منك لا عمتْ . . لا الثورة فينا بتتخمد
فى ريفنا أو فى الحاضرة . . تستنى أول بادرة
من حلفا حتى الناصرة . . تشعل لهيبها المتقد
مليــون أحبك يا بلد .. وأقيف عشانك متحد
سأظل عشانك متحد





تعليقات 1 | إهداء 0 | زيارات 4522

خدمات المحتوى


التعليقات
#534163 [Gashrani]
3.00/5 (3 صوت)

12-12-2012 07:59 AM
أصحا يا بريش. أنت نائم من زمن كانت مليون ميل


ردود على Gashrani
United States [صديق ضرار] 12-12-2012 09:22 AM
وعشان الكلام دا كتبنا

لكن قسما بالله حنجيبها

وحنجيب كل أهلنا من جميع السودان

ونتلم

وخصوصا أهلى الموجوع عشانهم

أهلى فى دارفور والذين كنت معهم فى خندق واحد

بل مع جميع أهلى


[email protected]

بحلم إنه الورد طريقنا وانه عشانا الحب مكتوب
وإنه العالم فجأة بيصحى ويلقى عليه النور مسكوب
حتى كمان القمر الصــيفى من الليلك يلبس تـــوب
* * *
بسأل عن أقمار بتسافر فى أعماق الكون تتجول
تخبى النرجس فى جنحاتها عز الليل الشاتى ، وترحل
بسأل عن غابات وقــراها وعن هجرات عكسية بتحصل
كيف فى يوم مجنون تتبدل وتسيب أنهار الحب مجراها
بسأل عن أجرام وكواكب وكيف تتخطى مدارها الأول
وأحلم بى نجمات قد كانت يضوى سمانا شعاعها المنزل
بس والما مفهـوم يا زولى إنك من تاريخك تفصل
* * *
زى أزهار وورود بتفتـح كان الحب يكبر جوَّانا
وكان قدامنا بلاد وعواصم تمدَّ جسورها وتستنانا
وترمى علينا غلالة دعـوة ترمى علينا وما أغرانا
كنا بنطرح رؤية جديدة وجدنا العالم فيها معانا
* * *
وقفت براى والمطر يتساقط رياح مجنونة ورعد وبارق
شهر النور عن وجه تريزا شقت غلس الظلمة الخانق
فجت سحب الشك وارتفعت نيزك ينزل فَوْ من حالــق
غسل الماء الحزن الفيى جاتنى ملاك فى ظلال مرئية
تنادى على بى صوت متراعش صوت مملوء لمسات حنية
ليه إتأخرت حبيبى على وكان برجاك فى الزمن السابق
كنت هناك فى نفس البقعة من بين شجرات المنقا بتاوق
خايفة عليك والليل متوحش من خوفى عليك شديد بتضايق
* * *
بينى وبينك شهروا سيوفهم عبُّوا كلاشنكوف وبنادق
وحاة الحب البينا تريزا حنشهد ضوء الفجر الصادق
من أجل سعاد وألير ومرية من أجل روابط دم أسرية
خضت غمار الحرب القذرة قاتل أو مقتول ، ما فارق
بصد ضربات قوات همجية دوىّ الدانة فى أذنى مطارق
هم إتلموا تريزا علىَّ هم يا أم ألير حصرونى
لأنك كنت الضى لعينى فتشوا عنك جوَّا عيونى
رسموا حدود وأقاموا حواجز فرقوا مابين لونك ولونى
حرقوا الأخضر عقب اليابس وقالوا يكون اللون متجانس
أطلقوا فتوى عليكى زرية هدموا القائم بينك وبينى
وضعوا الجزية عليكى عقوبة فرضوا رسومهم بالزندية
حتى الملبس فيه اتحشروا وقالوا تكون أثواب عربية
شقَّ السوط أجساد بنوتنا إشتغلوا غلط فى هادى الملَّة
سخَّروا للبنيان أخوانهم تعبان وألور واستنى شوية
وبقى السودان طالبان الأخرى يهتزُّوا ويرقص عمر المُلا
فين بالله تودُّا وشيكم منَّ العار الأصبح لازق
دخلوا النفق المظلم تانى بى كرعينهم حفروا الطابق
هم إتفقوا وعقدوا النية الوطن الواحد يصبح مية
ديل شان ما يوصلوا للمدنية دايرين مليون سَنَوات ضوئية

حرقوا الأخضر عقب اليابس وقالوا يكون اللون متجانس
هم إتلموا تريزا علىّ لأنى بآآآآآآآآآآآمن بالحرية
ديل شان يوصلوا للمدنيـة دايرين مليار سنوات ضوئية
أصُبْرِى كمان مديها حبالك العبء الفوقك ماهو شوية
أجيكْ من تانى خلاسى مؤصل خاتف لونين شلاَّخى مطارق
( أجيكْ من تانى خلاسى مؤصل خاتف لونين والبنية قوية )
وأبدا معاكى الخطوة بخطوة إيد على إيد نمشيها سويا


وكفاية بالله ما تألمونا


صديق ضرار
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة