المقالات
السياسة
ارشيف مقالات سياسية
دفاع بالنظر .. دخل الفرد 1800 دولار .. أنقلاب بجدادة
دفاع بالنظر .. دخل الفرد 1800 دولار .. أنقلاب بجدادة
12-15-2012 04:17 PM

دفاع بالنظر .. دخل الفرد 1800 دولار .. أنقلاب بجدادة ..

حاتم الجميعابي
[email protected]

يقول صديقي " محمد الفاتح " يجي واحد من ناس الحكومة يقول ليك الدفاع بالنظر والتاني يقول ليك دخل الفرد 1800 دولار والتالت ليك جاي يقلبا بجدادة، إذا حركنا مخنا شوية بتحس بأنوا الحكومة وممثليها بتعاملوا معانا بغباء شديد ، وده ما عهدناه من الإنقاذيين في حكم السودان خلال 24 سنة الفاتت، يعني بستهتروا بينا، وده بدلل على عدم إحترامهم لشعبهم ومحاولة التضليل في كهذا أحداث، الغريبة أنو المواطن السوداني خبر كل أفعالهم وأحاديثهم حتى أضحى هناك شعار ثابت وهو " الحكومة بتقول كلام ساكت" يعني كلام جرائد يعني كلام ما بستند لمنطق أو عقل عشان يتصدق!!، مع العلم في ناس كتيرة ما أتخرجت من ثورة التسطيح العالي، البتطلع الطالب من الجامعة عبارة عن زول فاقد للشئ، المهم أستلم شهادة لا بتشغلوا ولا بتسمن من جوع، حتى في الدول القام ببناء مؤسساتها السودانيين أضحوا لا يعترفون بشهادات جامعات التسطيح العالي، لان في الحقيقة في مجالات العلوم يدرس الطالب تاريخها ولا إكتراث للتطور التقني والتكنولوجي الحادث في العالم، بمعنى أن في مجالات كتيرة نحنا بعدين عنها لأنو بس الحكومة قفلت اي حاجة على الشعب لانو حاسة انو ما بستاهل الناس تخسر فيهو التقول صارفين على التعليم والصحة والموارد الأخرى من جيوبهم، لا صناعة ولا زراعة ولا موارد أخرى نفعت، عشان كده ممكن يجي زول من ناس الحكومة يقول ليك عندنا تقنية جديدة أسمها الدفاع بالنظر، اللهم كيف ما تعرف، والناس تقعد تتداول في القصة، أحرف نجار في البلد وكمساري ما يقدر يعرب جملة الدفاع بالنظر ناهيك عن تطبيقها على أرض الواقع، يعني الحكومة قاصدة واعية وعارفة شنو البقولوا ناسا ديل !!، يعني الحكاية ما دايرين يحرجوا الزول البصرح ده، لكن عايزين يستفذوكم كده بكلام خارم بارم، عشان نحنا نصدق من منطلق أنو المؤمن صديق، يبقى لازم الشعب يعيش مسطح عشان تفهم كلام ناس الحكومة دي، ولا تشرب الحاجات البشربوها عشان تصدق القصص دي.
ويجي واحد تاني يقول ليك دخل الفرد في السودان 1800 دولار، مع أنو بقول أن عند حاجات بتثبت الكلام ده، ولغاية الليلة راجين الإثبات، هو عليك الله لو دخل الفرد بساوي الرقم ده الحكومة دي كان قعدت الوكت ده كلوا .. ياخي الحاجة دي مستفزة جداً . هو الناس بتكابس عشان دولار ونص في اليوم، في البلد دي عشان تحلحل مشاكلاً يجي يقول ليك كده، بفعل حكومتهم دي الناس جاعت وناس ما لاقية تاكل والداير يشوف كلام ده صاح يعاين للفئران زمان وكت الدنيا بي خيرا الزول المرتاح كان بتعرفوا بعدد الفئران الموجودة في البيت يجي منزعج جداً يقول ليك عندي فئران مجنناتني عايز لي كديسة ليهم ، والمراة الدايرة تتفشخر على أختها بتقول ليها فارنا مشاء الله سمين ومدغلب وعندو جضوم دلالة على أنو بيأكل وبتغذى كويس.. وبعدين الفئران بتأكل دائماً الحاجات المخزنة الذرة والدقيق والكبكبي والبامية باقي التموين اسي الحال أتغير ناااااااادر جداً تلقا ليك فار في بيت لانو البيوت ياااادب كده لقمة العيش مكفايها في ناس ما لاقين لقمة العيش ذاااتو .. يعني قصة الراجل البمشي يجب المواد التموينية بتاعة الشهر كلو عشان تغير عليها الفئرات .. دي أتغلت من الخارطة البرامجية وبقا السوق باليوم لانو مافي قروش، عشان كده مافي مكان للفئران في البيت السوداني وده مش لأنو جبنا أدوات مكافحة ليها لأنها هربت وخلت البلد لأنها قاحلة وبقا مافي مبرر كافي لبقائها داخل اي بيت سوداني.. حتى الفئران الكيزان طردوهم من السودان ..
أما قصة الجدادة فدي قلبوا فيها الهوبة عديل كده لانو ده أنقلاب فاشل بمعنى الكلمة بحسابات المنطق والعقل لانو في زول لا يقلب حكومة بتعمد على جدادة .. هو المتعافي خلا جدادة ما جندا للحكومة، وبعدين في ناس كانت بتراهن على أنقلاب داخل الناس ديل ممكن يصلح حال البلد، انا غايتو معاي ناس كتار ما براهنوا على أي تيار جديد داخل الحركة الإسلامية ببساطة لأنو " قلم رصاص مبري بالجمبتين" بجاي بكتب وبهناك بكتب يعني القصة ومافيها عبارة عن إعادة إنتاج لتجربة فاشلة، يعني نحنا صبرنا العمر ده كلوا فقدنا فيهو الجنوب وحرب مدورة في دارفور والنيل الأزرق وجنوب كردفان، وإستنزاف لمواد البلد وسرقة كل مقدراتها وفساد مالي وقيمي وأخلاقي عشان نجي نبدل (العدة بالعدة) في النهاية كلها صحن صيني، الناس دي ما عندها مشكلة في انها تحكم توتي لو بقا ده السودان لأنو السلطة همها الأول والأخير، في سبيل أنها تحكم ممكن تقتل وتضرب طلاب عشان 400 جنيه وتديهم الترعة وممكن رجال يخشوا داخليات البنات ويطردوهم عشان يدافعوا عن الحكومة، بالله عليكم دي ما حقيقة أي لون من ألوان الحركة الإسلامية، يعني الكيزان بكونوا في قمة الإستمتاع بعذابات الآخرين، لما تقتل بتكون فرحانه شديد، لما تعتقل وتعذب بتكون آخر حلاوة بداخل نفسها، وكده يا داب بكونوا تموا النقص الفيهم ..
هذه نماذج لتصريحات أهل الإنقاذ وما خفي أعظم وما تختزنه ذاكرة أي فرد منا من تصريحات حكومية كافية للدالة عن أنو الحكومة دي بتتعامل مع هذا الشعب بقاء، لأنهم غرباء عن واقعنا الذي نحن فيه، غرباء لأنهم لا يعبرون عن طموحاتنا ولا أمالنا ولا تقدمنا، أما أن الآوان لكفهم عن هذه التصريحات بالذهاب بهم إلى مذبلة التاريخ غير مأسوف عليهم لكي نعيد لعقلنا الحكمة والإتزان قبل ما يخربوا لينا ...

تعليقات 6 | إهداء 0 | زيارات 1621

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#537122 [احمد ابونصر الشمالي]
0.00/5 (0 صوت)

12-16-2012 07:55 PM
فيران الفيران اتاكلت جت ..... بس الدفاع بالنظر والطيارة طافية نور ديل ماعرفنهم افيدونا جزءكم الله خير


#537017 [زروق]
0.00/5 (0 صوت)

12-16-2012 03:31 PM
عوووك ده شعب رمة مصدق فعلا انو دخلو 1800دولار لان ناس الحكومة متاكدين تمام ان الشعب السوداني فقد عقلو وبوصلتو بقي لافي ساكت بدون اي هدف ولاغاية شعب ماعندوا اي طموح غير ان الواحد يغترب بره السودان ويرجع يعرس ولو اغترب يقد مليون سنة بره ويلعن في الحكومة ويتابع سعر الريال والدولار ويقراء الراكوبة ويمشي يضاجع زوجتو ويتابع مباريات الدوري الانجليزي والاسباني وقضية هيثم اهم من قضية الطلاب الماتو ولو كانو كفار شعب فقد احساسو بنفسوا جيل كامل انتهي مع نهاية الديمقراطية الثانية علي يد الاسياد المهدي والمرغني والمثقفين المخنثين والكيزان وضباط الجيش الفاسدين والشرطة المرتشية الي يوم الدين


#536968 [..... المشتهي ام شعيفه .....]
0.00/5 (0 صوت)

12-16-2012 01:48 PM
الدفاع بالنظر خلو
اليلحقونا بالاف وتمانمية دولار دي..


#536661 [عاصم]
0.00/5 (0 صوت)

12-16-2012 06:12 AM
يعنى يا جماعة ما فهمتوا الرسالة للآن ما الرئيس بشحموا ولحموا قال ليكم الما عاجبوا يرفع البندقية انتهى الكلام .


#536462 [الشعب الفضل]
5.00/5 (1 صوت)

12-15-2012 06:20 PM
يا استاذ هم ما بستعبطونا ولكن نحن شعب فعلا غبي وجبان لو ماغبي وجبان تلقى ليك شعب ساكت على ممارسات مثلما فعلت فينا حكومة الكيزان؟ الشعوب التي قامت في المنطقة من حولنا قامت ليس لانها جيعانة كحال السودانيين الان او ان الخدمات عندها رديئة كحال السودان الذي لا توجد فيه مياه صالحة للشرب او خدمات صحية نفسها تحتاج لانعاش وتعليم صار لا ينافس في اي مجال وهل الشعوب التي ثارت تذبح و تقتل وتدفن في مقابر جماعية كحال الناس في دارفور وجنوب كردفان والنيل الازرق ؟ بل وصل الحال الى ابادة الطلاب في الجامعات .
يا استاذنا نحن شعب لا نستحق الكرامة لاننا لم نسعى لها لان الذي يستحق المجد يسعى له


#536423 [عباس بن عباس]
4.50/5 (2 صوت)

12-15-2012 05:09 PM
نستاهل ونستاهل ونستاهل...من يهن يسهل الهوان عليه....
الحقيقة هم ما بضحكوا علي عقولنا..ابدا.. ابدا هم ليسوا بهذا الذكاء..انهم شلة من الاغبياء
والله مفتكرين البعملوا فيهو ده قمة الذكاء والفطنة..وسيجزيهم الله عن وعن شعب السودان الفضل خير الجزاء ويدخلهم جنات عرضها السموات والارض...



نحن مشغولين يا صديقي نبكي ونعتصم علي شطب هيثم ونموت ليحيا الحوت


ردود على عباس بن عباس
United States [من جنوبيي السودان الفضل] 12-15-2012 06:40 PM
ينصر دينك...

السطر الاخير ريحتني بيهو

الشكر لي حاتم على اللغة التي تدخل القلوب مباشرة


حاتم الجميعابي
حاتم الجميعابي

مساحة اعلانية
تقييم
8.00/10 (1 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة