المقالات
منوعات
منه العوض وعليه العوض
منه العوض وعليه العوض
12-24-2012 01:19 AM

منه العوض وعليه العوض

منى سلمان

سبحان الله في النفس البشرية، وكيف تتغير اهتمامات الانسان بتغير مراحل عمره .. في ايام صبانا الاولى كنا نترقب بلوغ شقيقاتنا وبنات حلتنا الاكبر مبلغ الزواج، ونسعد بحساب الايام على اصابعنا انتظارا لموعد زفاف احداهن .. شوقا وخرمة لـ موضوع، يحرك سكون ايامنا وركود لياليها، ويحولها لـ صفقة ورقيص وتعليمة، وقبل ان يحل الموعد المأمول بأسابيع نمارس الانعباطة على اباءنا طمعا في كسوة العرس، بينما كان العرف المتبع في كسوتنا ايام الطفولة أن تكون من العيد للعيد، ولكن كنا نتعلل باننا – كبرنا حبة – ونحتج على ذلك بـ:
يعني يمة ابوي دا دايرنا نمشي العرس بهدوم العيد الـ ناس الحلة كلهم شافونا بيهم وحفظوهم ؟!!
ثم تليها الانعباطة طلبا للاذن بحضور الحفلة، وعندما نحظى بالامتيازين بفضل المثابرة وهي بالمناسبة اسم الدلع لـ اللياقة، نحرص على الاستمتاع بالمناسبة .. قشرة وعشاء وتطريب !
حينها لم نكن نهتم بشخص الفنان .. حسن شندي كان أم نجم الدين الفاضل أو حتى حنان بلو بلو شخصيا - هؤلاء كانوا نجوم الحفلات في ايام الصبا – فكل ما كان يشغل التفكير هو الاستمتاع باللمة الحلوة وضرب صحون الكوكتيل ثم الالتفات لسماع المعازف والنقزي على ايقاعات البنقز .. اكاد اجزم بأنه لم يكن احد الموجودين في الحفل يشعر بالفارق ما اذا كان الفنان هو نور الجيلاني أو زيدان !
ثم كان أن مرت الـ (ايام وراء ايام .. واتكاملت اعوام) على قولة مجذوب اونسة .. كبرنا وتزوجنا فصرنا بعد الزواج نراقب ورود مناسبات الافراح مراقبة المتنبي لملاريته .. مراقبة المشوق المستهام، وما ذاك الا لما تحمله المناسبات من الهموم لحديثات الزواج، وما تمر الواحدة منهن به من كشف الهيئة الصارم، فدائما ما تقع تلك الفئة تحت طائلة النظرات النابشة الكاشفة لاي قصور في التزامهن بعوايد زينة الحريم مشمومة كانت أو مرئية أو ذات كشكشة .. ثم تعاظمت التكاليف والالتزامات وزادت المسئوليات، فبقدوم كل مولود تقل الاهتمامات بالاجتماعيات وتتحول المجاملات وحضور الحفلات الى هم وواجب ثقيل، تسعي الواحدة منا للايفاء بدينه خوفا فقط من أن ينتقل اللوم بالتقصير من القدم لـ الوجه ..
حسنا للحقيقة، لا اذكر آخر مرة جلست فيها (رايقة وفايقة) لحضور مناسبة زواج، او راودتني نفسي بـ كتل حفلتها .. بي وين عاد ؟!! ان نجحت في توفير الزمن والعافية للحضور قضيت وقتي في متابعة حركات العيال .. الناعس والجائع ومن يغير رأيه ويصر على العودة للبيت بمجرد وصولنا، ربما لذلك لم اتمكن من متابعة ما استجد من ابداعات على ساحة المناسبات، إلا من خلال الاخبار الخالعة وهي التي تسبب (الخلعة) والتي اتابعها سماعيا أو من خلال مواقع التواصل الاجتماعي ..
قبل ايام فقط استمعت بدهشة لما كان في زواج ابنة احدى قريباتي لم اتمكن كالعادة من حضوره، فقد احي الحفل الفنان الشاب (طه سليمان) .. رغم ان عدد المدعوين من الاسرة لم يكن يتجاوز الالف، الا ان الحضور تجاوز ذلك الى اضاعف مضاعفة والسبب بكل بساطة هو اسم الفنان، الذي تسبب في اقتحام المكان بواسطة اعداد مهولة من الشماشة ومتطفلي الحفلات حتى لم يعد هناك موقع لقدم .. حلفو قالوا ليك ان شتتو الملح ما بنزل الواطة !!
لم تكن تلك الدفسيبة بالغريبة في الموضوع بل حالة كون أن الطفيلين مقتحمي الحفل كانوا من الجنسين .. اولاد وبنات !!
نعرف ان الشباب (ما عندهم قشة مرة)، ولا يستحي الواحد منهم في الذهاب لحضور حفل زواج صاحب صاحب ود جيران حبوبة خال ود جيرانه، ولكن ان تقشر شابة وتخرج وهي في كامل قواها المكياجية لحضور حفل زواج غير مدعوة له ولا تعرف احدا من اهله دي جديدة وشديدة .. لا وكمان تكابس لمن تصل للمسرح وتراودها نفسها الامارة بالصعود ومقالدة الفنان .. نظام تعبير عن الاعجاب وكدا !!
بفعل هكذا حركات تسببت احدى الشليقات في اصدار قرار بمنع اقامة حفلات التخرج خارج نطاق الجامعات، وذلك عندما راودتها رغبة عارمة في التعبير عن اعجابها بـ شريف الفحيل فقامت بعمته عمتة كاتمة .. سوتها ولم تخاف عقباها !!
اتاريهو، قبل اكثر من عام فرّغت ظروفي وتمكنت من الحضور مع نهاية حفل زواج ابنة احدى صديقاتي العزيزات، فهالتني الكبسيبة الشديدة وحسدت في سري اجتماعيات صديقتي وكراعها الواصلة التي جمعت هذه الحشود لمجاملتها، ولكن زالت الدهشة عندما صدح الفنان وقال بصوت اجش (الجاب لي اخبارو) فهاجت الجماهير الغفيرة وكأنه قد اصابها مس من الجنون .. سألت يومها (دا منو يا خياتي) قالوا لي (ياهو دا احمد الصادق البقولوهو) فحدثت نفسي (كر علي يا ود أمي عندو نزلة وللا مالو حسو مقروش) ؟!!

مخرج:

تتناقل الوسائط الاعلامية الشمارية خبر يفيد باصدار امر قبض في حق مدير اعمال احمد الصادق .. غايتو القصة المنشورة طويلة وملولة كـ لولوة النيل باليل، ولم افهم منها سوى أن الرجل بتهربه من الالتزام بالعقد تسبب في طلاق العريس لعروسه قبل الزفاف، فعندما اخبر العريس عروسته بعدم تمكنه من احضار الفنان المطلوب خايرته الفالحة بين .. (يا احمد الصادق أو تطلقني) فطلقها غير مأسوفا على كسفتها .. غايتو ان صحت الرواية بهذه التفاصيل فلا نقول في مستوى السطحية والخواء الذي اصاب البعض من بنياتنا الا (منه العوض وعليه العوض) ..

تعليقات 6 | إهداء 0 | زيارات 2423

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#543333 [هناء]
0.00/5 (0 صوت)

12-25-2012 07:36 AM
السلام عليك الأستاذة الرايعة ذات الاسلوب السهل جدا الممتنع جدا جدا
احيك الف تحية على مقالاتك الرائعة ومفراداتك المميزة
والله دايما بوصفك بانو عندك تعبيرات حصرية يعني ناجراها براك من خيالك الواسع بس المقال دا مكان بالصور التصويرية المبالغ فيها على سبيل المثال-بفضل المثابرة وهي بالمناسبة اسم الدلع لـ اللياقة-مشمومة كانت أو مرئية أو ذات كشكشة - ان تقشر شابة وتخرج وهي في كامل قواها المكياجية - احلف بالله التعابير دي ما سبقك عليك زول
شكرا يا عسل ولا فض فوك ولا انكسر قلمك وقشششششششة ما تعتر ليك


#542833 [ام محمد]
0.00/5 (0 صوت)

12-24-2012 02:42 PM
لك الود والتقدير على روائعك الهادفه ربنا اارد لينا الزمن الجميل والعادات الاصيله كما ذكرت بت النيل


#542764 [الفجري داك]
0.00/5 (0 صوت)

12-24-2012 01:11 PM
أختى منى تواصلك معنا أحلى وحقيقةو كل جيل بزمنوا وصراحة جيل الانقاذ للاسف يعشق الكشف والرفس
والبنطلون طيحني وحاجات كثرت في هذا العهد ومن هذا الجيل لأن الرئيس رقاص ،والفسوق بشتى انواعة
عما البلد وصرنانشوف و نسمع بالكثير ،حتى اللأمنجيه وزعوا الحشيش للطلاب بمبالغ زهيده في ليالي أمدرمان .
وعشان يكون للعلم ،أصبح جيل بلا تعليم ولا صحة ولالالالا وده هدف يتبع الانقاذ ، والهلع والجلع كثر
وزمان بقولوا الولد على أبوه ،وماعارف الاباء بيكونوا وين فى غياهب الجب ولاأين ، في السجون ولا بيوت الاشباح ،ولاشردتهم الانقاذ المحطمة لكل القيم .اللوم ليس على طه سليمان ولا غيره فى هذا الوقت
اللوم على الشعب ككل والجيل الغير مسئول جاري وراء الفارغه ومقدوده أفسدوه بقليل فسادهم
وانسوهوا الوطن ،اما بنات الحفلات فيكفي الحديث عنهن ،هي لله والله أكبر ..


#542673 [بت ملوك النيل]
5.00/5 (1 صوت)

12-24-2012 11:24 AM
صدقتي في كل ما قلتي يا دكتورة..انا بتذكر زواج اختي الكبيرة كانت التعليمة حدث ولمة بنات الحلة والشاي باللبن اليومي واللقيمات واحيانا البسكويت واكرمنا الوالد بي كم علبة حلاوة لزوم القزقزة زايد هلاميت الحجة من بلح ونبق وغيرو كانت ايام جميلة وبنات الحلة نفسهم كانو بنات ناس يعلمو ويخدمو ويساعدو والبيوتهم بعيدة يوصلوهم ويسلموهم لي اهلهم صاغ سليم..لما جاء دوري انا بدت النفوس تتغير والغناية بقت بقروش والتعليم بالمسجل..اما الوقت الحالي العرس والناس فقدو الطعم واللون عليك الله يا دكتورة شوفيهم في افراح افراح الوشوش كلها صبغة وفقارة وشمشرة..انا غايتو وووين وووين لما احضر عرس في اجازتي بس حتي البحضرو بستغرب في اقرب الناس البقو يقعدو ليك ضيوف ويعاينو ليك منتظرين منك غلطة ولا تقصير زمان كنا بنقيف مع الاهل ونستر ونضاري ونعشي الغريب ونأخر القريب هسه بنبدأ بالقريب لانو شمشار وشمات ولسانو طويل..اما الفنانيين الملولوين شعرهم ديل حدث ولا حرج اشكالهم نفسها مقرفة..وبصراحة مفروض الفنان ده اووووول حاجة لما يجي حفلة علرس يلبس بدلة محترمة ويسرح كشتو عشان الناس من حقها تحتفظ بي ذكريات عرسها موثقة بي شكل لائق اما يجيك لابس مابعرف كيف ونافش شعرو وشي سلاسل وشي غوايش دي حاجات يسيبها لما يكون ماشي حفلةبتخصو مش بتخص الناس..المهم يا دكتورة وكلو كوم والناس البرقصو من قولة تيت لي تيت كوم تاني الواحد لا بشوف العروس ولا بستمتع من الزحمة سبحان الله زمنا الرقيص للمقربين وبالتحنيس هسه الناس كلها مهسترة ومستنية دقة بس..والبقية تاتي


ردود على بت ملوك النيل
United States [هناء] 12-25-2012 07:42 AM
2000 سلام يا بت ملوك النيل
صدقيني انا بقرا في كلامك وبتخيل حاجات حقيقية حصلت ليناوبتحصل كل في مناسبة) أهمس في أذنك عندك ملكة رايعة للكتابة والصوف الحلو ارجو ما تبخلي من وقت لاخر اكتبي لينا- وتسلمي يا أميرة

United States [Ahmed] 12-24-2012 10:39 PM
ياااااااخ انتي زاتك رائعه زكرتينا بالزمن الجميل


#542524 [بت قضيم]
1.00/5 (1 صوت)

12-24-2012 09:01 AM
الحكاية أصلا كلها ما في (قرشة الحس) دي، تجي تقولي الزول حسو مقروش، عملتي زي واحد يدوهو شاي (مقنن) يقول دا محروق، أو لقيمات مقرمشة يقول محروقة، شكلك برة الشبكة فعلا يا حاجة منى


ردود على بت قضيم
United States [بت قضيم] 12-25-2012 12:58 PM
يا (مؤكوك) ليس هناك اعتراض على ما كتبته الأخت الرائعة منى، بل توضيح بأن (قرشة الحس) التي تعتبرها عيبا، هي القصة اللي مجننة الناس ذاتها وجعلتهم كأن بهم مس من الجنون كما قالت الأخت منى، دا كل الموضوع. أما حكاية تجيب فنان بمواصفات معينة، فهذه مسألة ذوق يختلف فيها الناس. والزمن الجميل مسألة نسبية، والكل يحن لماضيه. تسريحة ابراهيم معروفة، وهي شقة الشعر، ولو عايز أسمع ليك (تذكار عزيز) هسي ما عندك مانع.

United States [المؤكوك الفضائي] 12-25-2012 10:43 AM
يابت قضيم يعني الحكاية في الشكل والشعر الملولو وزي ما بقول المثل مرآءة الحب عمياطيب انا بجيب الفنان عشان يبدع بالصوت والكلمة الرصينة مابجيبو عشان اعرض للناس خلقتو وحاجة مني بتتكلم عن الزمن الجميل مثل بت قضيم المسمية علية اسمك يابت قضيم هل سمعت بتسريحت ابراهيم عوض


#542421 [فرقتنا]
5.00/5 (1 صوت)

12-24-2012 03:04 AM
والله انتي من الزمن الجميل كل ما اشوف صورتك بي سرعة افتح الرابط ووارجع مع الزكريات والاسلوب الاصيل غايتو ايا كان اتجاهك فانتي ننت بلدي واختي التي لم تلدها امي لاني اري بين مفرداتك هويتك سودانية حتي النخاع فشكرا لك ونستينا ونسة ليها ضل وهمبريبة لفحنا بي نسمة سودانية اصيلة فلك الود والتقدير


منى سلمان
منى سلمان

مساحة اعلانية
تقييم
8.25/10 (3 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة