01-07-2013 10:29 AM

زكاة أسماك

الفاتح جبرا
[email protected]

العم العزيز الأستاذ الفاتح جبرا المحترم

السلام عليكم ورحمة الله تعالى وبركاته وكل عام وأنتم بخير وإن شاء الله السنة دي (واواتك) تعمل شغل كويس وملف خط هيثرو الليهو سنة وشوية عند النائب العام
تعرف أخبارو شنو؟

أستاذي :
أنا إبنك (ع.م) أحمل بكالريوس في الهندسة وكباقي الخريجين المساكين إنتظرت في صف الوظيفة لحدي الصبر قالي انا بكرهك ؛ وجريت جري مارثوني لحدي ماحسيت باني سوف أذهل العالم إذا خشيت في مسابقة جري لأني متاكد ح أكسر أي رقم قياسي عالمي ؛ وبعد الواسطات وكسير التلج وياريس ويابوص وياكومندان ويامدير و؛و؛و؛و في الآخر طلعت كعادة جميع أقراني (البدون ضهر) ولا (تزكيات ولا توصيات) طلعتا بخفي حنين !
طيب أعمل شنو ؟ عشان ما أخش في مجال السوق الكترت مشاكلو وشيكاتو الضاربه وسماسرتو ولصوصو اللي بقو أكتر من الناس الفيها خير ؛ بديت أفكر في عمل يكون حلال مافيهو أي شبهة حرام ولا حتي يجمعني بأولاد الحرام المابعرفو الله والرسول ؛إاخترت مجال صيد الاسماك.
الوالدة ربنا يخليها داخلة ليها في (صندوق) قمتا (حنكتها) أدتني (قريشاتو) وكمان ما قصرت قامت (فكت) ليها غويشة وقمتا بالقروش دي إشتريت ليا (مركبين) بتوعين سمك وباقي أدوات الصيد من (شباك) وخلافه ولميت أولاد اهلي الظروفهم تعبانة ودايرين رزق حلال واتجهنا صوب اقصي شمال السودان ويالبحر جاك زول ؛ في البداية الناس بدت تضحك في فكرتيلكني ما إشتغلت بى زول المهم بعد 15 يوم من العمل الشاق فتح الله لي بشحنة (سمك) ماكنت بحلم بيها ؛ وانا جاي علي العاصمة وفي منطقة خلوية صادفتنا نقطة عبور افتكرت ح أدفع رسوم العبور اللهي 10 جنيه لكن فجأة ظهر واحد وقف قدامي وبعد ما أخد ليهو لفة حول العربية قال لي يا أبو الشباب إنتا شايل سمك (وهو عارف كويس اني شايل سمك وشكل التلاجة ظاهر) قلت ليهوأايوة والله بى نيتي الطيبه افتكرتو عاوز ليهو سمكة سمكايتين قلت زول قاعد في الخلاء ده اكيد مشتهي سمك ؛ فجاءة دخل أيدو في جيبو وقام مطلع ليا ايصال مالي وقال لي في برود شديد : ( 50 الف جنيه) ؛ قلت ليهو: ( 50 بتاعت شنو؟) قال لي : (زكاة )
ماتستغرب يا أستاذ زكااااة ؛ قلت ليهو : (لكن السمك ده حال عليهو الحول متين؟) قال ليا : ( يازول انا موظف ومابعرف شي ) ؛ دحين يا أستاذ جبرا انا واقف في العبور ده وبعد مشاكل وتحانيس أبيت أدفع ال50 دي قلت حتي ولو اخسر الشحنة كلها ؛ عليك الله يااستاذ أسأل ليا شيخ بس مامن السودان يكون من اي دولة تانية حتي ولوالفاتيكان لانو اكيد ح يعرف ويكون ملم بابسط الأحكام في شريعتنا الاسلامية اكتر من الشخص ده قوليهو هل هسه في حالتي دي مفروض يشيلو مني زكاة ؟ وبيحسبوها كيف؟ يعني الشايل طن سمك زي الشايل نص طن ؛ والشايب سمك (بلطي) زي الشايل (كبروس) وللا (قرقور) وانا مستعد ادفع اذا في شيخ افتي ليك هسه ؛ حتي في الحلال عاوزين يحاربوني ؛ رد علي هسه ياجبرا واستشير مشتركينك لانو رواد صفحتك ماحبوك الا عشان وضوحك ودفاعك عن الحق ؛ وارجو عدم ذكر الاسماء ماخوف لكن شئ في نفس يعقوب ؛ وجزاك الله خيرا

الرد :
الإبن العزيز (ع . م) : الثابت أن زكاة السمك 5% لكن مسألة الحول والكمية والنوع وكيفية تقديرهم فعاوزة ليها فتوى لذلك نرفع فتواك لأهل الإختصاص وللإخوة في ديوان الزكاة على وجه الخصوص علهم يردون على أسئلتك .. بس ما بطريقة (سياسة بسمارك الداخلية) !

كسرة :
الزكاة البيربطو ليها في الخلا دي والله ما شايفين ليها اي اثر في مجتمعنا .. وللا شنو يا جماعة؟!!

كسرة ثابتة :
أخبار ملف خط هيثرو العند النائب العام شتة(وووو وووو وووو)+(وو)





تعليقات 23 | إهداء 0 | زيارات 6381

خدمات المحتوى


التعليقات
#554668 [المشتهي الكمونية]
0.00/5 (0 صوت)

01-09-2013 12:09 PM
نعم يا أستاذ جبرة يوجد زكاة على السمك فعلا ، وكذلك زكاة على أي شخص ينوي أن يأكل سمكامالم يكون كوزا ،، يعني الكيزان مسموح لهم بأكل السمك دون دفع زكاة ، دا القانون كدة يا جماعة ،، يعني العايز ما يدفع زكاة يأكل موية فول وعدس بس


#554090 [محمد امين]
0.00/5 (0 صوت)

01-08-2013 05:12 PM
انصحك ؟ (اتكل علي الله واشتغل رقاص في سوق ستة)


#553865 [بنياس]
0.00/5 (0 صوت)

01-08-2013 11:23 AM
والله الدقنية قرررربت.
و زمان فرعون فرض ضريبة على المقابر لتمويل بعض مشروعاته الحضارية و عندما لم يكفي المال امر باخذها من الاحياء مقدما باعتبار انهم حيموتو بالتاكيد.
يعني بكرة ممكن تلقى بني كوز مرسلين متحصليهم لمستشفى الدايات لتحصيل ضريبة الدخل الشخصي من المواليد مقدما مع ربط ذلك بشهادة الميلاد.


#553857 [كاره الكيزان]
5.00/5 (1 صوت)

01-08-2013 11:09 AM
الاستاذ جبرا القصص كثيرة ولا حد لها ,,, واحد من ابنائنا يدرس بالجامعة واتى الاجازة ولديهم غنم عدد لا يستهان به وكان يرافق (راعي الغنم) لانهم منتقلين بها في المنطقة مابين المناقل والنيل الابيض وبينما هم في هذه المنطقة اتاه (الجباه)موظفو الزكاة بسيارتهم ومعهم رجل شرطة يحمل بندقية فسالوا الراعي عن الزكاة فقال لهم نحنا الحمد لله مزكيين فاخرج له ايصال الزكاة فعندما قأه موظف الزكاة قال له :انتو زكيتو في المناقل ودا النيل الابيض فما منهم الا ورفعوا اسمن خروفيين من الغنم وبينما هم على تلك الحالة قبل التحرك ظهر لهم (قريبنا)وساله من انتم فقالوا له :نحنا ناس الزكاة فرد عليهم : طيب نحنا مزكيين فقالوا له للاسف انتو زكيتوا في المناقل والان انتم في النيل الابيض ,,,, فقال له قربينا اول مرة نسمع بالزكاة تختلف من منطقة الى منطقة مالكم كيف تحكمون فناقشهم نقاشا حادا بالادلة القرانية ومن السنة وبعد نقاش مطول قال احد الموظفين للاخر (سيبوهوا يا جماعة دا زول مفتح)نزلوا ليهو خرفانو وذهبوا ....رايك شنو يا جبوري زكاة في السنة ربما تكون (26) مرة في السنة بعدد ولايات السودان قبل الانفصال اذا تجول هذا الراعي على كل هذه الولايات؟؟؟


#553779 [ابو منار - المدينة المنورة]
5.00/5 (1 صوت)

01-08-2013 09:54 AM
إلى صاحب التعليق البسأل عن أموال زكاة المغتربين أمشي مباني المغتربين وشوف الموظفات لابسين ذهب قدر شنو الواحده ياالله ترفع يدها من كثرة الذهب الفي يدها بتعرف بعد داك وين تروح أموالنا والله العظيم بدفع الزكاة مرتين مره لوجه الله سبحانه وتعالى ومره غصب لوجه هاؤلاء


#553608 [صدقونى]
5.00/5 (1 صوت)

01-08-2013 07:35 AM
كيفن السمك ما فيهو زكاة؟؟؟!!!
شايل ليك ثروة وما داير تدفع حق الله!!
أبقى أدفع مرة والتانية كب الزوغة


#553365 [ابو صالح]
5.00/5 (1 صوت)

01-07-2013 08:59 PM
اذا كان الناس دفعوهم الزكاة فى شجرة منقة واحدة قدام البيت للظل وكدا انت شايل ليك سمك
عديل و ماشى تبيعوا وعايزهم يخلوك
بعدين الراجل طلع ظريف معاك يعنى ما قال ليك نفايات وكدا
او زى ما قالوا قبل كدة الاغاثات تمر فوقنا ساكت كدا


#553360 [قاسم مشترك!!]
5.00/5 (1 صوت)

01-07-2013 08:52 PM
كان تديهم سمكتين كان خلوك تمشي!!هسه عمك جبره حال الحول علي خط هيثرو ولي اسه ماعارف زكوهو وله لزوهو كيف ولي مين!!دي الافتي ليهم فيها منوووو الشيخ ال كابوني!!!!


#553285 [سيف]
5.00/5 (1 صوت)

01-07-2013 07:10 PM
اخي الفاتح وبالمرة اسال عن زكاة المغتربين المغلوبين على امرهم واين تذهب ومن اجازها من شيوخنا اصحاب المثنى والثلاث والرباع والفلل والفارهات


#553167 [دا كلام ما صاااااح]
5.00/5 (2 صوت)

01-07-2013 04:23 PM
قياسا على زكاة الحرث
اذا كان الصيد فيهو منصرفات مالية ..
يبقى تبقى زكاة مال .. وبتكون بعد البيع
واذا كان الصيد من غير تكلفة .. يعتبر
زى الزراعة المطرية .. وآتوا حقه يوم حصاده
لكن هنا الزكاة بتكون عينية .. ولازم نصاب
وتحديد اوناع السمك والكمية
يعنى اجدع ليك كم سمكة للزول دا وخليهو يتصرف
دا كلام عقل ساكت وما عنده علاقة بالفقه


#553163 [مجدى محجوب وجرجس]
5.00/5 (2 صوت)

01-07-2013 04:16 PM
كما يقول كبروس ( نحن بنعيش عصر اللامعقول ) .
أبنى ( ع . م ) حاول تشوف مصائب الآخرين تهون عليك مصايبك .
قبل 24 سنة ، هؤلاء الذين سموا أنفسهم بالانقاذيين ، كتلوا شاب اسمه مجدى محجوب ومعه آخرون ، بذريعة أنهم يحملون دولارات خاصة بهم لا شائبة عليها . والدة مجدى فعلت أى شىء لتنقذ ابنها من حبل المشنقة ولو بمقابل أملاك والد مجدى الثرى ..
ابنى لا تقنط من رحمة الله ، وقل فى هؤلاء المجرمين ، حسبنا الله ونعم الوكيل ، إن الله يمهل ولا يهمل .


#553141 [ود البوب]
5.00/5 (2 صوت)

01-07-2013 03:44 PM
اسال لي شيخ حتي ولو في الفاتيكان

حلوة دي شديد!!!


#553140 [المتفائلة جدا]
5.00/5 (2 صوت)

01-07-2013 03:44 PM
قالوا فى اعرابى كان بيصلى بسرعة ورآه سيدنا عمر بن الخطاب فقال له أعد الصلاة,فأعاد الأعرابى الصلاة على مهله , فسأله سيدنا عمر أيهم أفضل هذه الصلاة أم تلك ؟؟ فرد الأعرابى بدون تردد وقال لسيدنا عمر تلك ..فقال سيدنا عمر لماذا ؟؟ فقال الأعرابى تلك كانت لله وهذه لعمر.. ورغم الفرق الشاسع بين الفاروق ومن تسموا بإسمه زورا وبهتانا لكن ياسيد السمك نقول ليك الزكاة البدفعوها للناس زندية دى والله ليست لله بل هى لناس بشبش وازلامهم..وماعليكم إلا الصبر.. الدين البتاجروا بيه ده ما ليه رب شايف فعائلهم دى؟؟ وليهم يوم بإذن الله..


#553099 [عماد]
3.75/5 (3 صوت)

01-07-2013 02:56 PM
زكاة بقرة و تور: -

العم الفاتح و الاخ الباشمهندس السماكى انشاء الله ربنا يفتح عليك فى السمك دا و تقوم تحفر ليك حفرة لشهادة الهندسة حفرة للاباط و تدفن الشهادة و تمشي فيها بكورعيك عشان تخليها دلجة و تانى ماتفكر فى الهندسة لانو اخوى مهندس مدنى شغال بـ( 700 ) جنيه بالجديد.

نرجع لزكاة التور و البقرة - عمنا رحمه الله وا سكنه فسيح جناته رحل عن دنياناهذه و كان يملك فقط بقرة و عجلهاقام بتربيت هذا العجل الى ان صار ثور ثمين ليذبحه فى زواج ابنه.
و عندما خرجت البهائم للرعى مع راعى القرية داهمهاجماعة الزكاة و معهم لورى و عمال لحمل ورفع كل ثمين واخذوا ثور عمنا رحمه الله الذى قام بتثمينه و تربيته لزواج ابنه المتعوس و عند ما احتج عليهم ذلك الراعى اعطوه ايصال و اوصوه بان يسلمه لصاحب البهائم فقال الراعى ان البهائم لميمة لكل الفريق و صاحب الثور هذا لا يملك غير هذا الثور و هذه البقرة العجوز العجفاء .

عاد الراعى و ابقاره بسرعة للقرية ( احد قري شمال الجزيرة ) ليبلغ صاحب الثور و عندما انتفض عمنا المسكين و حاول اللحاق بلورى الزكاة كان اللورى قد حمل ما طاب و تحرك نحو المدينة التى يوجد فيها ديوان الزكاة .
وعندما حاول ان يسافر للمدينة نصحه الناس بانك تلحقهم وعندما تصل فلن تجد المسؤولين فالصباح رباح و اتركهم ليوم باكر سافر فى اليوم الثانى و قابل امين الزكاة فى اليوم التالى و سلمه الايصال وحكى له بأنه لا يملك النصاب وليس عنده سواء هذا الثور و امه العجوز فقال له امين الديوان اليس هذه البهائم تحلب مع بعضها قال لا كل من له بقرة يحلبها فقال هذا المسؤول اليست براعى واحد ومراح واحد قال نعم ولكن كل شخص يملك واحدة او اثنين و هي لميمة و تخص كل اهل الفريق !!!!!!!!! هنا قال هذا المسئول أن الامام ( يقصداحد الائمة الاربعة ) و الله لا اذكره اسم الامامالذى ذكره قال له قال هذا الامام اذا البقر بترعى مع بعض بتتزكى مع بعض و تجمع كلها فقد تكمل النصاب فقال عمنا محتجا نحن من الله خلقنا مالكية و السودان دا كلو مالكية عشان تقلعوا تورى دا تتبعنا لامام التكارنة - و عندها قال العم على الطلاق دا مازكاة دى زندية ساكت .


ارجو يا عمناالفاتح تلمها على قصة الباشمهندس السماكى و تشوف لينا فيهااهل الصيرة .
لكن الحمد لله العريس صاحب الثور ربنا عوضه و تزوج و رزق مولودا ربنا يخليه ليهو .


#553073 [كتكوت]
0.00/5 (0 صوت)

01-07-2013 02:29 PM
خليك مفتح زى جارنا (لونوما اخدر )مرة مسكوهو ناس النظام العام سكران فى المحكمة قال ليهم انا اسمى مرقص . فقه الزوغة وكدا والله عليم وحده العليم بسبب هذه الزوغة


#553024 [ود الشيخ]
5.00/5 (1 صوت)

01-07-2013 01:25 PM
توجد نسبة 5% زكاة يخرجها الإنسان بعد بيع محصوله...
أما سمك فى ثلاجة ولسه ماوصل السوق يحدد ليه زكاة موظف
عنقالى فى الخلأ ..دى ما سمعنا بيها فى الأولين ولا فى الآخريين..
والله أعلم..وفوق كل ذى علم عليم...


#553004 [حسام تومابى]
0.00/5 (0 صوت)

01-07-2013 01:05 PM
يا عمك ما تعمل مفتح و تزوغ بالقريشات

الزكاة بتاعت ربنا لقيناها شوية عشان كدة عملنا واحدة جديدة لا يحول الحول و لا يحزنون ويمكن الحول ذاتو ما يجى عشان كدة و لاننا مقدرين ظروف الشباب خليناها على العمل بعد ما كنا عايزين نعملة على النية فقط (يعنى تنوى تشتغل تدفع الزكاة طوالى )


#553000 [ابوانوار]
5.00/5 (3 صوت)

01-07-2013 01:00 PM
الناس ما عارفه حقوقهاولوكل واحد برفض الاشياء التي ياكلون اموال الناس بها بالباطل كانوا وقفوهم عند حدودهم حكى لي صاحب دفار تم ايجاره من قبل ديوان الزكاة ومعه اخرين بانهم ذهبوا الى مخازن الديوان وحملت الدفارات بالذرة وتم وضع لافتات قماش على جوانب الدفارات كتب عليها نفرة ديوان الزكاة لاغاثة النيل الازرق ورصوهم امام الديوان وحضر المسئولين وبعد الاستعراض والتصوير تم اعادة الحمولة الي المخازن مرة اخرى ودفع لكل صاحب دفار 400 جنيه. ولذلك لا تجد اثر على المواطنين والفقر كما زاد ياهو في حالو.


#552993 [Wyoming]
5.00/5 (1 صوت)

01-07-2013 12:49 PM
يا زول أنت شفت حاجه لسع نمن تصل الخرطوم بيقولو ليك حاجات تانية


#552986 [كبروس]
5.00/5 (1 صوت)

01-07-2013 12:38 PM
نحن نعيش عصر اللامعقول .. فالزكاة تجمع قسرآ من السمك الصغير .. و بقدرة قادر تلهطها الاسماك الكبيرة كما ابان المراجع العام فى تقريره الاخير بوجود فساد فى مصارف الزكاة .. انهم ينهون عن المعروف كرباطة الزكاة فى الخلاء ويحلون المنكر وان طال اكل مال الله والرسول من زكاة واوقاف .. ولا حول ولا قوة الا بالله .


#552950 [وحيد]
5.00/5 (1 صوت)

01-07-2013 12:11 PM
المشكلة في اساليب جماعة المشروخ الحضاري انهم يغلفون اساليب البلطجة بشعارات الدين و صدق اسامة بن لادن رحمه الله حين وصف حكومتهم بانها خليط من الشعارات الدينية و الجريمة المنظمة .... الزكاة بطريقة الانقاذ عبارة عن بلطجة باسم الله ... جباة جفاة غلاظ جهلة بابسط قواعد المعرفة عن الزكاة يعملون " متحصلين" لديوان الزكاة و بنظام الربط كمان ... الربط من الرباطة و من الربط المالي اذ ان تحصيل الزكاة يحدد بسقف و لا يهم ان جمعت حسب النصاب ام لا ....
المشكلة الاكبر بعد ما يجمعوها وين بتمش؟؟؟؟ استثمارات في البنوك ... تبرعات بالدولار للقنوات الفضائية المضروبة، ايجار قصور و شراء سيارات فارهة و مباني فخمة و اموال ضخمة يوزعها كبارات السلطة لغير مستحقيها بصحبة الاعلام و الكاميرات، ثم المصرف الاكبر و هو العاملين عليها! و لا ننسى ذلك المتنفذ في الزكاة قبل سنوات الذي غير طلاء سيارته ببضعة ملايين من مال الله لان لونها ما عاجب الاولاد!


ردود على وحيد
Israel [محموم جدا] 01-07-2013 02:02 PM
قبل عام كانت علي زكاة متأخرة و جيت عشان أعمل تسوية و طلبت منهم تخفيض الى النصف وبعد فترة سأدفع الباقي المهم حولوني لأمين الزكاة و الراجل شكلا شيخ مافي اي كلام حكيت القصة و مافيها إنني التزم بالباقي قبل الحول فالراجل قال مافي مشكلة لكن نخفض ليك الربع فقط لأنه اليوم أنا ما عادتي أخفض فقلت طيب لو جيت بكرة فقال لي بكرة ممكن المهم لا بكرة و لا غيرها أنا دفعت و من يومها أنا محتار في هذا الفقه البخفض في يوم و في يوم ثاني لا إلا الربع فقط


#552940 [باش تمرجي]
4.00/5 (3 صوت)

01-07-2013 12:04 PM
لإبن العزيز (ع . م) .. شايل سمك ولا شايل جراد ياكا الدافع الزكاة وما تعمل لينا فيها ذكي وعايز تزوغ بخط هيثرو ابو واواتو الفي وجناتووووووو وو


#552934 [هامجور]
5.00/5 (1 صوت)

01-07-2013 12:00 PM
الزكاة البيربطو ليها في الخلا دي والله ما شايفين ليها اي اثر في مجتمعنا .. وللا شنو يا جماعة؟!! والله ضحكت حتى دمعت عيناي والله مبدع ياسيد جبره ربنا يخليك لينا وللغلابة


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة