02-06-2013 08:21 PM

زمااان لما سمعت الإسم ده قلت يا ربي المال بختوه في كورة؟ ولا شنطةالعروس بجيبو كورة؟ولا الفهم شنو بالضبط.!
المهم عرفت في النهاية إنه مصطلح القصد منو تقليل نفقات الزواج وتيسيرها للطرفين وبي رضاهم ورضاأهلهم,, والبركة دائما اهلنا الكبار بقولو بتجي من القليل المبارك ، ما من التبذير والبدع( بكسر الباء)
اي شيء فيه تبذير الله من فوق ما بباركو، اهلنا الكبار حكمهم وكلامهم ابدا ما قالوه عبث ولا بقع واطة.
رغم اميتهم وعدم تعليمهم الأكاديمي ,, لكن يشهد الله ربنا حباهم بي حكم وعقول راجحة، حملة الدكتوراة في زمنا ده ما عندهم ربع فهمهم.
اها نجي لي عرس الكورة أو تقليل نفقات الزواج. قبل ما اخوض في عدة امثال ,أبدأ ليكم بي روحي دي أختكم بت الجنيد, يشهد الله ابوي الله يرحمه ويوسده الباردة عقد لي في الجامع يوم 27 رجب بي بلحات فقط ـ اتلملموا اهلنا وحبانا وباركوا العقد والحمد لله لا جوطة لا فتح خشم ولا قولة خير!! وبدون ما يسمى بعرس الكورة !!
فتح الخشم كان الفاتحة الشالوها كبارنا في الجامع ، وقولة خير مباركة أهلنا لينا بعد العقد والحمد لله رب العالمين عايشين في أمن وأمان قولوا ما شاء الله..وكان في عز زمن البوبار والفشخرة الفاضية..
لكن دايرة اقول ليكم في النهاية المسألة قناعة ورضا بين الطرفين قبل كل شيء..
نجي لي الملايين البنسمع بيها من شيلة لي ختة لي شنطة لي أشكال وألوان من مظاهرالزواج البقت كلها مسابقة في البدع ورصة قروش زي طبقات التورتة, وتغليف ارياح وحاجات كده تحلف تقول ما موجودة في البلد النصو تحت خط الفقر!!!
ده غير الحفلات ونوع الصالات والعشيات وحجوزات الفنانيين الغناهم كلو هابط وللأسف بالشي الفلاني,,
حكت لي صاحبتي قالت الفنان بتاع عرس اخوها اتصل بيهم يوم الحفلة الصباح, قال ليهم ادوني أسماء اعمام وخيلان وعمات وخالات واخوان العريس واهل العروسة واخواتها, عشان عنده مفجأة ليكم بعدين!!
قالت لي قلت الزول ده فاهم، داير بعدين يقدم تهنئة لأسرة العروسين قبال الغنا..
اها من قولة تيت الفنان بدأ يشكر في أهل العريس بي الإسم في نص الأغنيات!!
ضحكتني قالت لي عمتي نائمة في الحوش والحفلة في الساحة برة, سمعت إسمها في نص الغنية تلبت جات طابها توبها وهاك يا نقزة، عين مغمضة وعين مفتحة!!
يعني الناس دي عرفت كويس تقلع القروش من الناس الفارغة وقروشها هاملة ، يضحكوا عليهم بي كلمتين في أغنية من زمن الحقيبة مكتوبة, ما على الفنان إلا يدخل فيها إسم الزول ويقلبها كأنه مكتوبة فيه!
والمغصة ناسنا ديل يصدقوا,, ويشيلوا ويرشوه بالقروش,, يشيل قدر عدادو مرتين!!
هاشمية ساااي من الما عندهم شغلة ديل ـ وكثير تلقاهم مديونين!!
ونجي نشوف الشباب طاشي شبكة لأنه ما بقدر مجرد التفكير يفكر في عرس ولا إستقرار من الشيءالشايفو وسامعو كل يوم !!
حتى الناس الجادة تعرس ما عندها فرصة مع جماعة الفوجاج والشوفنية الخاربنها من كبارها.
وفي ناس يقطعوا اللحم الحي عشان يحاكوا غيرهم!!
مديونيتهم بعد العرس ، لي جنا الجنا هادة حيلهم، يدخلوا نفسهم في متاهات هم في غنا عنها تماما.
الناس دي ما تقلد السمح وتحاكي الشيء اليسير!! ليه دائما نكسر رقابنا عشان نسوي الما بنقدر عليه؟
يا ريت لو التقليد ده في شيتا يعدل الحال! وبعد ده نجي نقول الشباب ليه عازف عن الزواج؟
والمشكلة الكبيرة ما يحدث الآن في المجتمع من إفرازات وتصرفات لا تشبه المجتمع السوداني ولا عاداته ولا تقاليده السمحة المعروفة للبعيد والداني!!
كل البنشوفو ونسمع بيه من جرائم يندي لها الجبين وكمية خيالية واعداد وأرقام مخيفة في تزايد مستمر في دار المايقوما من أطفال مجهولي الأبوين! ده للأسف نتاج لتصرفات مسؤولين منها الكبار قبل الصغار!
يجب ان نعيد النظر في كثير من الإمور, ونعالج موضوع الزواج وتكاليفو الباهظة من جذورها.
شيوخ الزمن ده نتمنى يلتفتوا لإمور البلد المهمة ويهتموا بها ، بدل إلتفافهم حول مجرمي الإنقاذ!!
كل يوم نسمع بي بدعة جديدة وفتوى تصب في مصلحة الأباطرة سارقي قوت الشعب !
الناس ديل ما دايمين فيها، الله بسألكم من الجيل القدامكم ومحتاج لتوعية منكم بالسنة والشريعة الإسلامية الصحيحة ، بدل فتاوي فقه السترة وفقه التكفير لكل من عارض الكيزان!!
أمانة في رقبتكم أن تحثوا الناس على ماهو مفيد للمجتمع ـ لتقليل الفساد الحاصل المغتس حجر البلد وناسها!
حتى اهلنا الكبار نتمنى ان تقتدوا بي كباركم وتباركوها,عشان الله من فوق يباركها ليكم,وارجعوا لي زمن عرس الكورة مالوا؟ والله سترة حال وراحة بال ،وتقليل لصرف المال، اصلو المال زاتو مافي، عشان كده باركوها الله يبارك في عمركم ويستر اولادنا وبناتنا ويستر الجميع إن شاء الله ويكفينا مصائب الزمن الأغبر

متاوقة
همسة لكل الشباب.. في إيدكم تفرحوا وتسعدوا بالقليل، المحبة الفي القلوب لا تساويها ملايين ولا كنوز الدنيا كلها، باركوها بالقليلة يبارك لكم المولى بالكتير إن شاء الله ....

أسماء الجنيد
[email protected]

تعليقات 5 | إهداء 0 | زيارات 2475

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#579713 [سامي]
0.00/5 (0 صوت)

02-08-2013 06:55 AM
موضوع رائع وجميل فهل من مجيب ؟


#578782 [هدهد]
5.00/5 (1 صوت)

02-07-2013 07:13 AM
ربنا يديك العافية الاستاذة سوما ولكن بصراحة لن ولم ينتهى عرس الفشخرة والبوبار فى السودان وذلك لغرور معظم الناس والذين يطلعوا مدانين بعد الزواج حضرت عدة زيجات قبل شهور بالسودان ومن ضمنهم احد اقربائى والذى شعرت بأنه اصبح مناكف من الدائنين وهو فى شهر العسل قبل ان يرجع لقريته وهكذا هو حالنا الا فقط من هداه الله ونظر بعين ثاقبة نسأل الله ان يهدينا جميعا ونترك عيشة التكلف والبذخ وكون واقعيين .


#578749 [سارة]
5.00/5 (1 صوت)

02-07-2013 04:33 AM
تسلمي يااستاذه اسماء ,,, انا من ضحايا عرس الخمج تعرفي اهلنا لو بيعرفوا كيف الحياه عركتنا سمح ولفحتنا سخانة الصرف في البلد والاقساط كان خلونا نلم القريشات الاتصرفت و كانوااختصروا علينا عمر من التعب ... فنكهةوفشخرة مشلخات وكلام نسوان فارغ يختي انحنا من زمن ام العروس تجيب غرفة النوم !!!!!! والعريس ماينسي خروف الجرتق !! قوله الخير بطقم الدهب !!!سد المال قومة وقعده !!! فطور العريس (دا كلامه براهو)..!!! بس الرقيص قالو بيجيب العين !!! ..والعرس للمتاعيس والجري بعدين للعريس والعروس (وكان نضمنا نتنبّز) تكميم افواه وكلام كبار لازم يمشي وعيب يابت تتكلمي واختشي دي عادات وغضب امهات وحاجات تانية حامياني كسرت عيني وصمت خشمي ....ربنا يغفر لينا جميعا انشاء الله


#578700 [فرقتنا]
0.00/5 (0 صوت)

02-06-2013 11:31 PM
ايك العافية وامد في عمرك وعمر ذريتك واجعلكم ذخرا لهذا الوطن سودانية واصيلة بالجد وكتر الله من امثالك عندما اقرأ لك وللشرفاء من امثالك احس بأن السودان مازال بخير ويرجي منه وعندما اري المسؤلين وتصرفاتهم واستغلالهم للسلطة احس بأن السودان لصبح الحضيض نفسه


#578637 [مريود]
0.00/5 (0 صوت)

02-06-2013 09:16 PM
مع الفارق .

الواحد لو دخل مطعم وتغدا بي 10 جنيه حتى لو الغدا سمموا ما بزعل.

لكن لو دخل أرقى الفنادق وأكل أطيب الأكل ودفع 150 جنيه توجعه الدهر.

إلا الحرامي. ولا السو... تموها براكم .


أسماء الجنيد
أسماء الجنيد

مساحة اعلانية
تقييم
10.00/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة