02-08-2013 02:47 PM

في ذلك الصباح البارد قرر (الجداد) انوا يبدأ الاضراب عن وضع البيض...(يعني ماداير يبيض تاني),المبررات كتيرة والغباين أكتر!
ارتفعت الرايات واللافتات:الجداد ما بنوم.... الجدادة شغالة شغل الجن وبتبيض في اليوم مرتين والنور مولع,أصحاب مزارع الجداد همهم يا في البيض,يا يشحموا الجدادة عشان يضبحوها!...... الديك ما شايف شغلوا.......لا للنجمة السريعة والاستيرويد.....حياة كريمة أو الموت دون ذلك.
اجتمع أصحاب مزارع الجداد وقعدوا يتفاكروا في أبعاد الموضوع:الجداد ما عندو حق؟! والجداد جاحد للنعمة,وخليهم يومين ,برجعوا يبيضوا براهم تاني...ولب لب لب.واحد نعسان كدة ومزرعتو ما شغالة قال ليهم:أها والديوك رايهم شنو؟؟ رد عليو واحد :الديك أساسا" قاعد جمال منظر وكماليات,لا بقدم لا بأخر ,الجداد يساهر عشان يجيب البيضة التانية والديوك ضاربة النوم,ياخي أذان الصبح ذاتوا بقت الجدادة تصحي الديك وتقول ليو عليك الله سمعنا صوتك الما قاعدين نسمعوا دة!!!
طيب والحلل؟
اتفق أصحاب الدواجن على انهم يخلو الموضوع يومين كدة,احتمال تكون نزلة طيور ولا مغارز للديوك!! وهنا الفيلم بدا يسخن.........
أسعار البيض طارت السما,والشعب طبعا" ما بركز في زيادة المتين والتلتمية,لكن بدا يركز لما البيضة الواحدة بقى سعرها 10 جنيه! يا راجل البيضة الواحدة بي 10 جنيه...أي وبيض قديم و كمان مخزن.لأنو الجداد مصر على موقفو ومطالبو......(لا تراجع لا اذعان,لن تأكلوا بيض بعد الآن).وطبعا" بقى طلب الفول خالي بيض,والكيك من غير بيض,والشفع بنوموهم بي (بكرة حنجيب ليكم بيض),يا زوووول والعرس الما خمج بقى الناس يتفشخرو فيهو بالبيض المسلوق يوزعوهو مربوط بي فيونكة أثناء الجرتق! .....
والفلم مستمر.......
النكتة انو في واحد مفلس مرتوا بتتوحم شابكاهو شامة ريحة بيض,عليك الله جيب لي بيض,قال ليها:في بيض بياكل بيض! ههههه ,طبعا" قعدوا يضحكوا الاتنين,هي شبهوها بي حاجة سمحة,والراجل مبسوط بي انو غشاها بي الغزل المن أمو!
أصحاب الجداد طبعا" اجتمعوا تاني لأنو الحال وقف,فقرروا يقولوا للجداد انو الموقف لو استمر كدة حيضطروا يضبحوهم ويبيعوهم مجمدين,بالاضافة لأنو بالطريقة دي نسل الجداد في المنطقة حينقرض.ردت (ستو) رئيسة لجنة الاضراب بي كلام مختصر ومفيد:(مليون شهيد ,ولا حبة بيض)
......... والديوك تعاين!
ابتدا طبعا" تنفيذ الوعيد, مذابح جماعية ,و جداد بي الكوم والردوم.و طبعا" دي لحظات مهمة :بعض الجداد الخايف على روحو رجع يبيض ,وظهرت مجموعة كانت طابور خامس قعدت تبيض 3 مرات في اليوم! دا ما الجداد الوطني والبهتم بي المصلحة العامة...يا سلام.
وبدت أسعار البيض تنزل شوية,ولكن لسة المجموعة الأكبر من الجداد بقيادة(ستو) راكزة وبتردد :(مليون شهيد ,ولا حبة بيض)
والديوك يعاينوا..!
ويا حليل الديوك,الديوك ما ماتوا في رويال بروست.
وابتدت شائعة تسري: حيجيبوا بط من تشاد,والناس حتاكل بيض بط وسعر البيضة حيكون بي نص جنيه ومعاها ضمان لو قدرتا تكملا.... تحصل على بيضتين هدية من المحل...
يتبع انشاءالله


د.هوازن عباس
[email protected]

تعليقات 4 | إهداء 0 | زيارات 1503

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#580725 [alfanjary]
0.00/5 (0 صوت)

02-09-2013 06:12 PM
مقالك دا الزيث الحار البنجض البيض وواصل فى السلق كمان


#580112 [khalid]
5.00/5 (2 صوت)

02-08-2013 08:59 PM
مقال جميل ورائع وفيه ابداع بلا حدود
وانا ذاتي مع الجداد مليون شهيد ولا حبة بيضة..
والله اكبر على الطابور الخامس..
واصلي الكتابة عليك الله ما تقيفي حتى آخر ديك ميت من النوم..
اسلوب جميل في الكتابة ورمزية الجداد جات في وقتها تماماً.
وقفك الله..
نحن في الانتظار على أحر من البيض او من الجمر.


#580025 [السودان الذى كـــــان]
4.50/5 (2 صوت)

02-08-2013 05:10 PM
تسقط كل الديوك -وحتى الرومية- ولا نامت أعين الدجاجة الصغيرة الحمرااااااااااااااء.


د. هوازن عباس
مساحة اعلانية
تقييم
10.00/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة