دي السرقة وللا بلاش
02-19-2013 09:42 AM

نفسي اعرف) .. مقولة يطلقها أهلنا وحبايبنا في شمال الوادي كلما تعذرت عليهم المعرفة وإنعدمت أمامهم (الإجابات) والعبدلله يجد اليوم نفسه يردد ذات المقولة (نفسي اعرف) والسؤال العاوز أعرف إجابتو هو : (من أين أتي هؤلاء) الخواجات الكفار بكل هذه الشفافية ومحاسبة النفس والضمير المتيقظ ؟ ففي كل يوم تحمل لنا الأخبار إستقالة لمسئول (خواجة طبعن) يقوم بتقديم إستقالته فقط لأجل (إتهام) يمس شخصه تتقاصر معه (جلطات) مسؤولينا الـ (بالثابتة) !!
في الأسبوع قبل الماضي إستقالت وزيرة التربية الألمانية، أنيت شوافان، من منصبها ليست لأنها (جنبت قروش الوزارة) وفتحت بها حساباً شخصياً في أحد البنوك .. وليس لأنها أشرفت على بناء عمارات سرعان ما خرت (ساجدة) لخالقها ولا لأنها قامت (في شكل تعاون) بتشغيل زوجها مديراً لمكتبها ولا لأنها سرقت من منزلها ملايين من العملات الصعبة (خليك من الساهلة) ولا لأنها قد قامت بإنشاء شركات يإسمها تتاجر في كل شئ بينما الدستوروالقانون الألماني (طبعن) يمنع ذلك !
هذه الوزيرة (الملحدة) يا سادتي الأماجد فعلت ما هو أبعد من ذلك بكثير إذ تجردت من كل إنسانيتها وتناست في لحظة ضعف أنها لا لدنيا قد عملت فقامت بتسبيب الأذي لغالبية مواطني الشعب الالماني (الفضل) وذلك بنقلها لمادة علمية ونسبتها إلى نفسها دون الإشارة لمصدرها وذلك في أطروحتها لنيل درجة الدكتوراة من جامعة (هينريك هين في دوسولدوف) والتي نالتها قبل نحو ثلاثين عاماً !
والله خواجية (حرامية) وعينك قوية تسرقي ليكي كم صفحة وتنسبيهم لي روحك؟ إنتي ما عارفة السرقة حرام و(القبر قدام)؟ أها بعدين موقفك شنو يوم القيامة وإنتي شايلة (العمارتين) أقصد (الصفحتين) ديل فوق ضهرك؟
أيه الفساد وعدم الضمير ده ؟ ألا تعلمين أنك بفعلتك الشنعاء هذي قد أضريتي بالبلاد شر ضرر وأنك بذلك قد أسهمتي في زيادة نسبة التضخم وإرتفاع سعر الدولار مقابل (الشنو ما عارف) مما يؤثر على مستوى الإنتاج والاستهلاك الشئ الذي من شأنه أن يعيق التنمية الاقتصادية مما يؤثر على مستوى رفاهية الفرد (الألماني) المسحوق؟
ثم ألا ترين انك بفعلتك هذه قد أوصدتي أبواب الإستثمار (بالضبة والمفتاح) مما يضر مصلحة البلاد العليا والسفلي وما بينهما ؟ يعني هسي منو ح يجي يستثمر ليهو في بلد الوزير فيهو بيسرق ليهو (صفحتين)؟
ثم بعدين الشلاقة والتسرع ليكي شنو؟ ما تخلي (نوام الشعب الألماني) يعملو للموضوع (طلب إحاطة) و(إستجواب) وشنو ما بعرف .. ويقوم البرلمان (الألماني طبعن) بمناقشتها وعمل لجان تحقيق وبعدين يحولوها للنائب العام (الألماني طبعن) و (تحتل ليها هناك كم سنة) لحدت ما (كاتب صحفي) في صخيفة (الفرانكفورتر الألمانية) يعمل ليها (كسرة ثابتة) ويقول فيها :
- (أخبار ملف سرقة الوزيرة للصفحتين العند النائب العام حصل فيهو شنوووو) !

كسرة:
قال أيه صفحتين ... دي السرقة وللا بلاش !!

كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)؟

[email protected]

تعليقات 48 | إهداء 0 | زيارات 10317

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#591551 [salah]
1.00/5 (2 صوت)

02-21-2013 02:49 PM
اخونا الفاتح جبرا كتاباتك ساخرة ولكن خليك دائما فى موقع محايد ولاتحكم على كفر والحادية الشعوب الاخرى لانك ليس رجل دبن ومتفقه , وخلى الخلق لخالقها هذا اقل ما يكون...
نجى للموضوع الذى تطرقت له بطريقة ساخرة وهادفة فى نفس الوقت ولكن اقول بكل صراحة انيتا شافان (حاملة الدكتوراه من جامعة دوسلدورف منذ اكثر من 32 عاما)لم تستقل بمحض ارادتها كما ذكرت ولكنها واجهت ضغوط قوية من منافسيها السياسيين فى الاحزاب الاخرى , كما فعلوا مع وزير الدفاع السابق فون قوتنبيرج وهوالاخر كتب فى رسالة الدكتوراة بتاعته كم صفحة(بلاجيات) دون ان يذكر الذين سبقوه فى ذلك ودون ذكر المراجع وهو الاخر تعرض لضغوط من رئيسة الوزراء انجيلا ميركل للاستقالة من منصبه وقد فعلها وهاجر الى امريكا دون رجعة.على فكرة شافان وفون قوتنبيرج هما من المقربين الى انجيلا ميركل ولكن عندما يكون هذا هو الحال فلا تشفع شفاعتها. فياترى كم من حاملى الشهادات العلمية الكبيرة عندنا وكم صفحة وكم كتاب كتبوه بدون ما يذكروا المراجع الاخدوا منها ودى بتعتبر بلاجيات كما حدث مع انيتا شافان وليست شوافان عزبزى الفاتح. لك ان تكتب ماشئت وهذا حق موفور لك ولكن الشئ الهادف لوسمحت وعشان انحنا مرة مرة بنقرا ليك , فاحترم عقولنا اخى لوسمحت,,,,,,,وان عدتم عدنا


#591366 [fattah]
1.00/5 (2 صوت)

02-21-2013 11:33 AM
عادل امام عندما علم ان جورج بوش فرقعوه زمبه فى الانتخابات قال لوزيره كان يكلمنى كنت ارسلت له كم خبير من عندنا يقعدوه فى الحكم حتى يعتزل الدنيا .فالسيده الوزيره كانت ترسل دعوه مباحسات لاحد الوزراء من عندنا وعند نهاية المباحسات تسلمه تلك الورقتين وينتهى الامر وتعيش وزيره حتى تعتزل الدنيا كلها


#590875 [ود الفاضل]
1.75/5 (3 صوت)

02-20-2013 10:51 PM
الفاتح جبرا ليك التحية 00 بمناسبة من أين اتى هؤلاء اهديك والقراء مقالة الكاتب العالمي الطيب صالح عليه رحمة الله ،والتي قال فيها من اين اتى هؤلاء يقصد حكامنا العينة الخاصة فى حكام الكرة الارضية 00




نحو افق بعيد 144

آخر ورقة - مجلة المجلة

بقلم: الطيب صالح*

" هل السماء ما تزال صافية فوق أرض السودان أم أنّهم حجبوها بالأكاذيب ؟
هل مطار الخرطوم ما يزال يمتلئ بالنّازحين ؟ يريدون الهرب الى أيّ مكان ، فذلك البلد الواسع لم يعد يتّسع لهم . كأنّي بهم ينتظرون منذ تركتهم في ذلك اليوم عام ثمانية وثمانين . يُعلَن عن قيام الطائرات ولا تقوم . لا أحد يكلّمهم . لا أحد يهمّه أمرهم . هل ما زالوا يتحدّثون عن الرخاء والناس جوعى ؟ وعن الأمن والناس في ذُعر ؟ وعن صلاح الأحوال والبلد خراب ؟
جامعة الخرطوم مغلقة ، وكل الجامعات والمدارس في كافّة أنحاء السودان . الخرطوم الجميلة مثل طفلة يُنِيمونها عُنوةً ويغلقون عليها الباب ، تنام منذ العاشرة ، تنام باكية في ثيابها البالية ، لا حركة في الطرقات . لا أضواء من نوافذ البيوت . لا فرحٌ في القلوب . لا ضحك في الحناجر . لا ماء ، لا خُبز ، لاسُكّر ، لا بنزين ، لا دواء . الأمن مستتب كما يهدأ الموتى .
نهر النيل الصبور يسير سيره الحكيم ، ويعزف لحنه القديم " السادة " الجدد لايسمعون ولا يفهمون . يظنّون أنّهم وجدوا مفاتيح المستقبل . يعرفون الحلول . موقنون من كل شيئ . يزحمون شاشات التلفزيون ومكرفونات الإذاعة . يقولون كلاماً ميِّتاً في بلدٍ حيٍّ في حقيقته ولكنّهم يريدون قتله حتى يستتب الأمن .

مِن أين جاء هؤلاء النّاس ؟ أما أرضعتهم الأمّهات والعمّات والخالات ؟ أما أصغوا للرياح تهبُّ من الشمال والجنوب ؟ أما رأوا بروق الصعيد تشيل وتحط ؟ أما شافوا القمح ينمو في الحقول وسبائط التمر مثقلة فوق هامات النخيل؟ أما سمعوا مدائح حاج الماحي وود سعد ، وأغاني سرور وخليل فرح وحسن عطية والكابلي المصطفى ؟أما قرأوا شعر العباس والمجذوب ؟ أما سمعوا الأصوات القديمة وأحسُّوا الأشواق القديمة ، ألا يحبّون الوطن كما نحبّه ؟ إذاً لماذا يحبّونه وكأنّهم يكرهونه ويعملون على إعماره وكأنّهم مسخّرون لخرابه ؟

أجلس هنا بين قوم أحرار في بلد حرٍّ ، أحسّ البرد في عظامي واليوم ليس بارداً . أنتمي الى أمّة مقهورة ودولة تافهة . أنظر إليهم يكرِّمون رجالهم ونساءهم وهم أحياء ، ولو كان أمثال هؤلاء عندنا لقتلوهم أو سجنوهم أو شرّدوهم في الآفاق .

من الذي يبني لك المستقبل يا هداك الله وأنت تذبح الخيل وتُبقي العربات ، وتُميت الأرض وتُحيي الآفات ؟
هل حرائر النساء من " سودري " و " حمرة الوز " و " حمرة الشيخ " ما زلن يتسولنّ في شوارع الخرطوم ؟
هل ما زال أهل الجنوب ينزحون الى الشمال وأهل الشمال يهربون الى أي بلد يقبلهم ؟
هل أسعار الدولار ما تزال في صعود وأقدار الناس في هبوط ؟ أما زالوا يحلمون أن يُقيموا على جثّة السودان المسكين خلافة إسلامية سودانية يبايعها أهل مصر وبلاد الشام والمغرب واليمن والعراق وبلاد جزيرة العرب ؟

من أين جاء هؤلاء الناس ؟ بل - مَن هؤلاء الناس ؟"
_________________________


**


#590668 [المدشر]
1.00/5 (2 صوت)

02-20-2013 06:01 PM
ياود جبرا اسمحلي اقولك ود جبرا احلي من الالقاب انت فاكر انه العمارتين اثقل من الورقتين ؟؟؟ لالالالالالالالالالالالالالالالالالالالا الورقتين ديل بتاعين كفار وزنهم تقيل في الاخره اما العمارتين ديل بتاعين اصحاب المشروع الحضاري وفقه الستره ديل وزنهم في الاخره بكون خفيف جدا لانهم مبنين تحت شعار هي لله هي لله لا للسلطه ولا للجاه اللهم نسالك ان تجعل كيدهم في نحرهم امييييييييييييييييييين يارب


#590270 [ummariam]
5.00/5 (2 صوت)

02-20-2013 11:23 AM
ناس بتسرق ملايه,,,وفى ناس بتسرق خروف السماية,,,تصدق انو فى ناس بتسرق ولاية,,,اكيد ناس المانياما سمعو بيهم


#590174 [zayed]
5.00/5 (2 صوت)

02-20-2013 09:58 AM
الضميـــــــــر
الامانــــــة

تتصور حرامي عينو قوية يسرق من بيتك وكمان يبيع المسروقات يفرش بيها جنب باب البيت
واحد حراني بيسرق في بيت ليهو 23 سنة وما اختشي نقول ليهو شنو

في الاسبوع الماضي ذهبنا في واجب عزا الي الدافنة في المقابر ومن هول المنظر سالت رفيقي من لا يعتبر من هذا المنظر فليفعل ما يشاء ، تتصور المرحوم الهنا كان وزير والهناك غفير وده جزار ود نقلتي كلهم كوم تراب وفاتحة ونتخارج
ها عمر البشير وصحبو ديل ما بجو المقابر ،، رد علي صحبي قالي امبارح دي كانو في جنازة فلان
الناس دي خلاص ما منهم امل نسو الله فانساهم اخرتهم لا امل الا باجتزازهم كالضرس المسوس لا امل من شفائهم
هم ما عارفين البعملو فيهو ده شنو ، هم شايفين البعملو فيهو ده لله ( اوادلكم علي الاخسرين اعمالا الذين يظنون انهم يحسنون ،،، الي اخر الايه ) الناس دي شيطانهم بيبارك ليهم في غيهم ، نحو فجر مشرق

فلنخرج الي الشارع


ردود على zayed
United States [ابوشنب] 02-21-2013 09:48 AM
قل هل ننبئكم بالاخسرين اعملا(*) الذين ضل سعيهم في الحياة الدنيا وهم يحسبون أنهم يحسنون صنعا (*)أولئك الذين كفروابايات ربهم ولقائه فحبطت اعمالهم فلا نقيم لهم يوم القمية وزنا (*)ذلك جزاؤهم جهنم بما كسبو واتخذوا اياتي ونذري هزوا (*) صدق الله العظيم


#589963 [saad]
5.00/5 (1 صوت)

02-20-2013 07:47 AM
بسم الله الرحمن الرحيم

الاخ الفاتح جبره لك تحياتى

الرجاء نشر هذه الشكوى بعد ادخال بعض الفواكه منك

ذهبت الى جامعة العلوم والتقانه (معتز البرير

وطلبت من الشئون العلميه اقصد العلوم الهبتيه بختم ارنيك من الجهه التى تدفع لنا نسبه من مصاريف التعليم فطلبت منى الذهاب للمسجل كلية الطب وبعد ماشرحت له ما اريد فأرسلنى الى الشئون الماليه وهناك طلب منى دفع مبلغ 3000 الف جنيه بالجديد عشان يعطينى افاده بأننى دافع رسوم الدراسه والذى قدره 24600 جنيه بالجديد وبالقديم 24600000 جنيه يعنى مابعترفوا بالايصال المستخرج منهم وحاولت افهم معنى ذلك لكن للاسف لم اجد رد من الموظف والذى كان يعاملنا معامله قاسيه جدا وبدون احترام لفارق العمر والغريب فى الامر رفضوا ان يضيفوا مبلغ 3000 فى الارنيك الذى اريد ان اختمه يعنى ما بس امنا الحكومه هى التى تفرض رسوم وجبايات من راسها

والسؤال الذى يحيرنى هل معتز البرير يعلم بهذا؟

ولك تقديرى ع م ا


#589877 [صدقونى]
0.00/5 (0 صوت)

02-20-2013 05:33 AM
رد على المتفائلة جدا
كضبتيها
بشبش ما حيشيل فوق ضهرو بلد مساحتو مليون ميل مربع
حيشيل باقيهو بس!!!


ردود على صدقونى
United States [المتفائلة جدا] 02-21-2013 08:47 AM
لا والله حيشيل المليون ميل مربع كاملة لأنه لما إستلم البلد سنة1989 إستلمها مليون ميل مربع بالتمام والكمال هو الفتتها حته حته ..ده مش حيشيلها وبس.. ده لازم يدنقر يلمها بالأول بعدين يختها فى ضهرو..

United States [ود توتي] 02-20-2013 01:14 PM
وتفتكر فصل الجنوب عشان يخفف الشيلة


#589859 [ابو]
0.00/5 (0 صوت)

02-20-2013 02:28 AM
هههههههههههههههااااااي. الله يجازيك يا جبره والله لأمن دمعته من الضحك
والله حرامية وعينها قويه هي ما شافت ناس المؤتمر سرقتهم حلوه كيف
بسرقوا حاجات صغيرة ما بتأثر علي المواطن في شئ
لك الله يا بلادي


ردود على ابو
United States [aviv] 02-20-2013 08:22 PM
إقرأ المقال تناي بتمعن كويس , شوف السرقة دي كيف ؟ ماعدا سرقة الصفحتين اللي سرقتها معالي الوزيرة ,


#589849 [zizo]
5.00/5 (4 صوت)

02-20-2013 01:24 AM
الحكاية مبدأ لأنو الليلة صفحتين وبكرة بابين لإبن الوزير وبعد شهر رسالة كاملة لزوجة الرئيس.المسألة حتكبر كدا يا جبرا لمن تصل العمارات و البلد كلها تغرق. الحاجة دي بتتعرف بالأخلاق او بالعلم, الخواجات عندهم علم, المصيبة لو ما في لا أخلاق و لا علم


#589821 [البروف]
5.00/5 (3 صوت)

02-20-2013 12:10 AM
صفحتين بس ؟؟؟ يا راجل ده نحن عندنا بحوث دكتوراة بحالها تم الاستيلاء عليها .. وعاملين فيها نايمين ولم يسمعوا بادب الاستقالة .. ده غير الهبروا غنوا و طالعين في العلالي مع تقلة الدم ..


#589818 [جربندي]
5.00/5 (3 صوت)

02-19-2013 11:58 PM
يا شيخ جبرة جماعتنا حالفين يمين يكونوا قدوة ويصدروامشروعهم الرسالي لدول العالم .. بما فيه اصول فقه السترة والرأفة بالميامين واللاهطين من أهل التمكين .


#589770 [أبو علأمة]
5.00/5 (1 صوت)

02-19-2013 09:52 PM
بسسسس !!! خلاص هانت يا جبرا يعني فضل تاني 6 سنوات

وامنا الحكومة تقفل 30 سنة وضميرة يصحى !!!!!!!!!! .


#589768 [حاجة عجيبة!!]
5.00/5 (4 صوت)

02-19-2013 09:47 PM
2012 اكبر فضيحة تهز اركان الحزب الاشتراكى الديموقراطى فى السويد حيث حصل السكرتير السياسى على استحقاقات مالية بدون وجه حق.. و أصل الحكاية انو بندكت هوكان ظل يتقاضى مخصصات دعم السكن للمتزوجين فى حين انو مطلِّق زوجته منذ عامين ولذلك يحق له فقط نصف الدعم (عزّابى وكده).. مع انو صاحبنا قدّم اعتزارات وتبريرات وقام بدفع المبالغ المالية المستحقة, برضو ما شفع ليهو من ان يقدم استقالته بعد حجب الثقة بالاجماع لعدم امانته فى شئ قليل يخصه شخصياً.. ومعظم تعليقات جماهير وانصار الحزب العريق صاحب الاغلبية فى السويد انو زول غير جدير بالإئتمان على مصالح الدولة.. ورد فى الانجيل : (كن اميناً على القليل أُقيمك على الكثير)..


#589667 [قدورة]
0.00/5 (0 صوت)

02-19-2013 06:22 PM
هذا انما يدل على عدم التواصل الثقافي والشفافي والشنو داك ماعارف بين سفارة المانيا والخرطوم وداانا اعتبره تقصير شديد من السفارة الالمانية بالخرطوم ويجب محاسبتها قبل محاسبة الوزيرة
لانو كان الوزيرة دي ممكن تلقى ليها سنين الف مخرج


#589652 [طاهر محمد]
0.00/5 (0 صوت)

02-19-2013 05:53 PM
ياالفاتح انت والي الخرطوم ده ديييك توووور في شنووووووووو ومن وين ؟؟؟؟؟ههههههههيا حليل المانيا بقيت فاسدة


#589619 [منتظر الصباح]
0.00/5 (0 صوت)

02-19-2013 04:46 PM
في 2012 كان ترتيبنا ( السودان ) رقم 3 في الدول الفاشلة في العالم يعني قدامنا الكنغو الديمقراطية و الصومال، كل باقي دول افريقيا التعبانة أحسن مننا، و دول آسياو أمريكا الجنوبية و دول كثيرة لا تعرف نظام و لا تعليم و برضو أحسن مننا،معقول ده يا ناس؟ كانت بعض الجنسيات في دول الخليج يدعون بانهم سودانيين، و لمن شافوا فضايحنا في كل العالم تخلواعن هذه الفضيحة و صاروا يتباهون بدولهم!!!!


#589551 [البشير على نافع الجاز الفللى]
4.97/5 (6 صوت)

02-19-2013 02:34 PM
الالمان ديل ناس جهلة ومنقفلين على نفسهم ولو كان بيقروا ثقافات الشعوب الاخرى كان لقو لى المراة دى مخرج
يعنى اصلو ماسمعو بى فقه السترة؟
طيب ماعندهم مستشار ثقافى فى الخرطوم
وقاعد منتظر شنو اذا كان ما بينقل حاجات ذى دى للحكومة الالمانية


ردود على البشير على نافع الجاز الفللى
United States [قفة] 02-20-2013 10:21 AM
حلوة فقه السترة دي كان يسلفوا الوزيرة السراقة دي صفحتين من فقه السترة دي عشان تلقى ليها مخرج.


#589542 [ابو مبارك]
5.00/5 (1 صوت)

02-19-2013 02:24 PM
والسؤال العاوز أعرف إجابتو هو : (من أين أتي هؤلاء) الخواجات الكفار بكل هذه الشفافية ومحاسبة النفس والضمير المتيقظ ؟

اعمل حسابك يا جبرا الناس ديل بلهطوهااقصد بفهموها وهي طايره ياجبرا
اهو نبهناك عشان بعدين ما تقول مالكم ما نبهتوني .


ردود على ابو مبارك
United States [aviv] 02-20-2013 08:28 PM
ههههههههههههههههههههههههههههههههههههههه, كلامك صاااااااااااح يا ابو مبارك , لكن سيد جبرا يمكن عندو ضهر مانع يا خوي ما تاكل هم , خليهو يمتعنا ويفت ليناالناس دي فت


#589537 [المتفائلة جدا]
5.00/5 (4 صوت)

02-19-2013 02:15 PM
إقتباس :-والله خواجية (حرامية) وعينك قوية تسرقي ليكي كم صفحة وتنسبيهم لي روحك؟ إنتي ما عارفة السرقة حرام و(القبر قدام)؟ أها بعدين موقفك شنو يوم القيامة وإنتي شايلة (العمارتين) أقصد (الصفحتين) ديل فوق ضهرك؟
يابختها وياهناها وسعدها اللى حتشيل صفحتين فوق ضهرهابس .. ياربى أغنياء الغفلة( ناس من أين أتى هؤلاء) حيشيلوا شنو ولا شنوفوق ضهورهم ؟؟ شيلهم تقيل خلاص ..وكيف من ناس بشبش الذى سيحمل وطن كامل مساحته مليون ميل مربع على ضهره..
واذكرهم هنا وأذكر نفسى بوصايا سيدنا لقمان لإبنه: يابنى إعمل للدنيا بقدر بقائك فيها.. وإعمل للآخرة بقدر بقائك فيها.. وإرتكب من المعصية بقدر ما تطيق من العقوبة... وإذا أردت أن تعص الله.. فاعصه فى مكان لا يراك فيه .. يا ويلكم يا (من أين أتى هؤلاء) من الحمل الراجيكم حمولتكم كتيرة خلاص وفاتت الحد.. ياويلكم من يوم لا ينفع مال ولا بنون إلا من أتى الله بقلب سليم ..


#589530 [مفجوع]
5.00/5 (1 صوت)

02-19-2013 02:05 PM
لكم أن تتخيلوا الفرق بين المسلمين والكفار ...؟
أليس ذلك مدعاة للتفكير لما نحن المسلمين كذلك ...؟
فالكفر يعملون ومتمسكون بجوهر ماجاء به الإسلام والمسلمون عكسهم تماماً....!


#589520 [مهند****]
5.00/5 (1 صوت)

02-19-2013 01:53 PM
اخبار ابو قانية الشالووووووووو+ووو شنو ياجبره


#589518 [كاســـو]
0.00/5 (0 صوت)

02-19-2013 01:53 PM
انا لو فى المانيا كنت طلبت من الحكومة ان تكافئى هذه الوزيرة بتكريمها فى حفل عــام يحييه الفنان السودانى بلال موسى بشرط ان تكون أغنية البداية ( صحــوة ضميرك جات ليك بعد 30 سنة الى أخر الاغنية)


#589497 [صلاح مصطفي أحمد]
5.00/5 (1 صوت)

02-19-2013 01:34 PM
رحم الله إمرءِأٍ عرف قدر نفسة ديل كل أعمالهم دينية علي السنة ( ذهب إلي أروبا ووجدت إسلاما ولم أحد مسلمين وذهبت للشرق ووجدت مسلمين بلا إسلام . رحمة الله الشيخ محمد عبدة


#589487 [صادميم]
5.00/5 (1 صوت)

02-19-2013 01:24 PM
قبل اشهر وزير الدفاع في المانيا قدم استقالته وذلك لنفس الجريمة التي ارتكبتها هذه الوزيرة يا ترى كم عدد شهادات الدكتوراه المسروقة في السودان واصبح حملتها يحملون لقب بروفيسورات كمان


#589476 [لاظوغلي]
5.00/5 (5 صوت)

02-19-2013 01:12 PM
العجيب في الموضوع يا بروف انه الوزيرة قالت انها قدمت استقالتها عشان الجامعة راح تعمل
تحقيقات في الموضوع وبما أن السيدة الوزيرة كانت تشغل منصب وزير التعليم فشغلها للمنصب
في هذا الوقت قد يؤثر أو يشكك في نتيجة التحقيقات لذلك فضلت الاستقاله قبل البدء في التحقيق
هسه عليك الله الحركة دي ذااااتها ما بتستاهل لها دكتوراة
كسرة عشان خاطر البروف بيحب الكسرات
مش كان عندنا محافظ والا والي شهاداته مزوره الحصل له شنووووو


ردود على لاظوغلي
United States [khlifaalsudani] 02-19-2013 04:07 PM
ياعم --- هي بفت علي المحافظ أو الوالي براهو يا اخي أنظر لكل المسؤلين بالسودان الان فجميعهم مشكوك في شهادة الكتوراه التي يحملونها - أبسطها لغة واسلوب تخاطبهم - ثم انني وقبل شهرين تقريبا قراْءت في جريدة قطرية بان احدي جامعاتها وبعد تحقيقات قد اكتشفت با 78 (ثماني وسبعون ) شهادة دكتوراه قد منحت من جامعتها وهي مزورة - أي والله مزورة - والعجب ان 74 ( اربعة وسبعون منها منحت لسودانيين) فمن يكونوا ياتري ؟؟؟؟ والسوداني القح لا يملك الان ما يسد به معاشه لشهر متواصل فمن أين له بدفع قيمة الشهادة المزورة ؟؟؟ إن لم يكون الحاصلين عليها بسعرها الفلكي هم من الاثرياء الجدد !!!؟؟؟ ولم يقف الامر عند هذا الحد فان لم يكن هذا المسؤول الذي يسبق إسمه لقب دكتور ومشكوكا فيها فالاخرين عنما يراد تعيينة في وظيفة دستورية كبيرة فبقدرة قادريظر انهم أصبحوا يحملون شهادة دكتوراه من جامعة امدرمان الإسلامية أو جامعة القرآن الكريم فإن علمنا إن الشخص يدخل جامعة ما ليتخصص في مادة معينه ليعمل بها في حياته العملية - فأين مكان عمل من يحمل شهادة دكتوراه من جامعة القرآن الكريم ؟؟؟ - هذا ا، صدقنا بانها صحيحة؟؟؟؟؟؟؟؟؟؟؟؟؟؟؟؟؟؟؟؟؟؟


#589471 [ايوب]
5.00/5 (2 صوت)

02-19-2013 01:05 PM
ناس الحكومة دول عندهم العمارتين زى الصفحتين بتاعت الالمانية ياعالم


ردود على ايوب
United States [احمد ابونصر الشمالي] 02-19-2013 04:51 PM
عمارتين والله انتو ناس متفالين .. العندوا عمارتين دا شريف وطني اصيل اوشايل هم البلد في راسوه ديل عندهم بلاوي يابلد


#589455 [Ahmed mohd. tahir]
5.00/5 (1 صوت)

02-19-2013 12:50 PM
والله حمد الله علي السلامة يا استاذ جبرا.اخيرا وسل خط هيثرو الي النائب العام...
كمان عايوينك تشد حيلك في سفارتنا في القاهرة المميزة موقعا وتاربخا...الجماعة باعوها ورحلوا السفارة الي زقاق في احد احياء القاهرة .....


#589453 [snamaka]
5.00/5 (1 صوت)

02-19-2013 12:46 PM
الفاتح جبرا ربنا يفتحها عليك ما ما تقبل، وما قصرتا اضفيت علي صباحنا الإبتسامة من تحت الركام والحطام


ردود على snamaka
United States [ناجى] 02-19-2013 07:30 PM
بالعكس اضفى عليه الالم والخيبه وما كتبه جبرا ممبكى بحق وحقيقه


#589452 [السارق مالنا ودمنا]
5.00/5 (1 صوت)

02-19-2013 12:46 PM
ايه رأيك في السرقه بتاعتي دي يا جبره بتنفع اقدم اسقالتي عشانه ياخي دي مؤهل عالي لتعييني مستشار ولا مساعد رئيس واقدم اسقالتي ليه هي لله هي لله لا للسلطة ولا للجاه


#589448 [ابو قصيصة]
5.00/5 (2 صوت)

02-19-2013 12:41 PM
صدق الامام محمد عبده عند رجوعه من فرنسا و قال مقولته الشهيرة ( وجدت هناك اسلامآ بلا مسلمين و عدت هنا فوجدت المسلمين ولم اجد الاسلام ) .. علها تكون علامات آخر الزمان اذ بات الاسلام اليوم غريبآ وتتم كل الرذائل و المنكرات من وراء مدعيي شرعنته و هو براء مما يمكرون .


#589446 [ابونصر]
5.00/5 (2 صوت)

02-19-2013 12:40 PM
والله يااستاذ ديل لو كانوا بيحسوا من اول مقالك لك انت بالذات كانوا قدموا استقالتهم . لكن ديل ينهبوا البلد ليهم 24 سنة ولسع ماشبعوا لعنة الله عليهم تجار الدين الحرامية . نسال الله ان يجعل برحيلهم اليوم قبل الغد مزقوا السودان وبهدلوا الشعب السوداني


#589442 [علمانى سنى]
5.00/5 (2 صوت)

02-19-2013 12:34 PM
كلو كملتو ,, بقيت تهابش فى الألمان ؟؟؟ وكمان عايز توريهم فن الكسرة الثابتة ؟؟ شكيتك على الله ..


#589438 [badrudin. Y]
5.00/5 (1 صوت)

02-19-2013 12:29 PM
الأخ الفاتح
تحياتي
معجب بابداعاتك أطال الله في عمرك ومتعك بالصحة والعافية
ولكن أود أن اسألك سؤالآ بريئآ - ألا يقرأ زملاؤك الصحفيون امثال الهندي عز الدين هذه الرسائل الدسمة؟


#589425 [واحد من الناس]
0.00/5 (0 صوت)

02-19-2013 12:17 PM
التحية لك أستاذنا الفاضل وأنت تلاحق بقلمك الساخر كل أشكال الفساد ونتمني أن تحقق مجهوداتك الجبارة عودة أموال الشعب الفضل ومحاكمة اللصوص وسارقي قوت الشعب وفي ما معني الحديث أن الله لينصر الدولة العادلة ولو كانت كافرة
مع شكري وتقديري


#589423 [السماحة]
4.50/5 (5 صوت)

02-19-2013 12:16 PM
المقال الظريف يشبه قصة تحكى ان احد الابناء تزوج من أجنبية كافرة ورجع البلد , وهاك الاب سب ونبذ خليت بنات أهلك ...!! تأخذها كافرة .... ده الفضلت ...!!! ما خلى ليهو حاجة وبعد يومين احتاج الولد يسافر يكمل اجراءاته بالخرطوم وترك زوجته الكافرة مع الاسرة في البلد ,,,,,
وبعد رجوعه من البلد سأل والده أها يابا الكافرة كيف .... فــــــــــــرد عليه
" والله يا ولدي أن جيت على الصدق أمك الكافرة " ..
ما خلت الاب يحتاج حاجة غذاء رياضة وأكل صحي وتناول الدواء في مواعيده

أها دي حكومتنا المتأسلمة


#589408 [صبحي]
5.00/5 (1 صوت)

02-19-2013 12:03 PM
مسكينة "أنيت شوافان" .. ما عرفت تدغمسهالما المسروقة منو الصفحتين ذاتو ما يعرف إنها حقتو .. محتاجها إنتداب أسبوع "بس" للتدريب عند حكومتنناالرشيدة.. وتاخد البروفسيورشيب مش الدكتوراة!!!.


#589409 [حسن]
5.00/5 (2 صوت)

02-19-2013 12:03 PM
شكرا على هذا التلميح (الصريح) بلصوص السودان الذين يمارسون السرقة باسم الدين ويظنون أنهم يخدعون الناس حين يقولون (بسم الله والحمد لله والصلاة والسلام على رسول الله)!! عليهم لعنة الله.. لماذا تكرم (المستر) جبرا بزيادة ياء من عنده على كلمتي (أضريت وأسهمت).


#589395 [sadiq]
5.00/5 (2 صوت)

02-19-2013 11:46 AM
شتان مابين الثري والثريا


#589391 [زول مقهور]
5.00/5 (2 صوت)

02-19-2013 11:40 AM
وإنتي شايلة (العمارتين) أقصد (الصفحتين) ديل فوق ضهرك

والله الضحك شرطنا


#589350 [DafinDigin]
5.00/5 (3 صوت)

02-19-2013 11:02 AM
يا بختك يا أنيت يا شوافان بقيتي من عندهم(ألمانية). لو كنت من عندنا (سودانية)ا كان طبقنا فيكي الشرع وصلبناكي في ميدان أبو جنزير أو على الأقل قطعنا ليكي ايدك البتسرقي بيها دي عشان تكوني عبرة لغيرك يا فاسده وعشان ما تفسدي لينا وزراؤنا الطيبين الطاهرين ((يخس)).


#589346 [abdelmonem]
5.00/5 (1 صوت)

02-19-2013 10:58 AM
الله عليك يا جبرة والله الليلة ضحكتني انت عارف انا لي مدة ما ضحكته


#589338 [يحي البطري]
5.00/5 (1 صوت)

02-19-2013 10:52 AM
الماجستير الجد جد زمان كان الموظف الما مسؤل من أمه جعانه زى الشعب الالمانى كان بيدوهو تفرغ سنتين ودى حضرت فى الشريعه الالمانيه كيف واللا ميته وطايره الله أكبر


#589333 [حسن]
5.00/5 (1 صوت)

02-19-2013 10:49 AM
ما تحرمنا من نفحاتك يا جبرا


#589327 [تماضر الحاج صالح عبد الصبور شاكر]
5.00/5 (1 صوت)

02-19-2013 10:45 AM
ســرقتنا وفسادنا لله ، ألم نقل لكم من البداية هي لله. يا جماعة لـو انحــنا فاسـدين ما كان الشيخ /دكتور الحبر يوسف نور الدائم (وامثاله في التقوي) صبر على فسادناالمدة دي كلها وهو الراجل الورع عضو مجلس الشعب القومي ، اذا نحن كذلك لنقدنا داخل مجلس الشعب القومي الذي تتدفع انت يا محمد أحمد الغلبان راتبه.ولـقال عنا قصيدة تهـز ركن كل بيت ســوداني.


#589319 [محموم جدا]
4.50/5 (4 صوت)

02-19-2013 10:39 AM
تخيل صفحتين في رسالة دكتوراة فيها أكثر من مئتين صفحة يعني النسبة على أحسن الفروض أقل من 1% و أن نسبة الخطأ المقبول في كتابة هذه الابحاث أكثر من هذه النسبة يعني بالعربي العندنا من رسالات فيها أكثر من هذه السرقة بمراحل و على اعتبار هي رسالة دكتوراة في المانيا و قبل ثلاثون عاما يا رقيب ياالله دا حال الكفار و الله دي قصة الواحد لما سمعها في الاخبار يا استاذ الفاتح تذكر حساب صاحب الليمون البقش في البيع و صاحب البطيخ جاره يعني ابو صفحتين دا بيضحك على أبو عمارتين و ابو عمارتين بيضحك على أبو سودانير و أبوسودانير بيضحك على أبو الخطوط البحرية و ابو الخطوط البحرية بيضحك على أبو مشروع الجزيرة و ابو مشروع الجزيرة بيضحك على أبو البترول و أبو البترول بيضحك على الضيع البلد كلها و الضيع البلد كلها بيضحك على الشعب الفضل فيها


#589309 [كاره الظلم]
5.00/5 (2 صوت)

02-19-2013 10:30 AM
ناس عندها دم و بتختشي ، صفحتين فقط جعلتها تخجل ، ناس يسرقوا ولاية و كلو لله ... واحد بلدياتنا كان شغال مدرس ابتدائي ، كان اباطو و النجم ، تلقاهو موقي سفتو و لابس عراقي بلدي ، جات الانقاذ و الحالة اتغيرت ، يوم ليلى علوي و يوم بكسي دبل قبينة و مرات صالون النوع داك البي 500 مليون ، و عمارات و راحات و كلو لله ... اقول ليك يا جبرة و ما تزعل : تعرف و للا ما تعرف الخازوق راكب فينا و فيك و ملعون ابوكي بلد .


#589287 [DafinDigin]
5.00/5 (2 صوت)

02-19-2013 10:06 AM
دي لو عندنا كان صلبوها في ميدان أبو جنزير أو على الأقل قطعوا ليها ايدها البتسرق بيهادي(بعد قبول استقالتها "طبعن")، عشان تكون عبرة لكل من يحاول العبث بمقدرات الشعب.


الفاتح جبرا
الفاتح جبرا

مساحة اعلانية
تقييم
10.00/10 (30 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة