02-27-2013 09:00 AM


كنت ظهر الأمس خارج المنزل حينما رن هاتفي الجوال فسمعت صوت طقلتي الصغيرة تهتف في رعب (يا بابا البوليس جانا في البيت) فقلت لها في دهشة وإرتباك (عاوزين شنو) فأجابتني بيسألوا منك !
قلت في نفسي يا ربي الواحد بقى (يبيع بنقو) وما عارف؟ ثم إتجهت بسرعة بعربتي صوب المنزل وحين وصولي ناولتني طفلتي وهي ترتجف ورقة صفراء مروسة بعبارة (تكليف بالحضور) دعني عزيزي القارئ أقوم بنقل محتوياتها لك :
أمام محكمة جنايات السوق بأم درمان - المنعقدة في جلسة 27/2/2013م – إلى (الإسم) الفاتح جبرا – محل الإفامة : أم درمان بيت المال – حيث أنه قدمت لي شكوى بأنك خالفت المادة 4 من قامون رسوم الخدمات قد أو نظن أنك (إرتكب جريمة) عليه فأنت مكلف بالحضور أمام مولانا (فلان) وإذا لم تحضر في التاريخ المشار إليه بدون عذر مقبول يصدر أمر بإجبارك على الحضور !!
ما أن أتممت قراءة ورقة التكليف هذه حتى إبتسمت فرحاً وبذلك أكون أول (مجرم) في العالم يستدعية القضاء فيبتسم فالعبدلله ينتظر هذه اللحظة بفارق الصبر كما يقولون .. كيف وليه؟ طيب نحكي القصة :
كان ذلك قبل عدة اشهر .. دقت متحصلة رسوم النفايات المنزل فأخرجت لها من جيبى (الستة جنيهات) التي إعتدنا على دفعها إلا أنها قالت لي في عفوية
- (عملوها تمانية جنيه)
- سألتها في إندهاش (العملا منو)
- فأجابتني (ناس الشركة)
- فقلت لها :( يعني ناس الشركة ديل يقولو أي مبلغ ونخنا ندفع ؟
لم تجبني بالطبع وحين قمكت برفض إستلام الستة جنيهات قلت لها :
- قولي لى ناس الشركة ديل في زول إسمو (الفاتح جبرا) قال ليكم ما بدفع الزيادة دي)
وذهبت المتحصلة وبقيت منتظراً أن تاتي هذه اللحظة التي أستلم فيها هذه الورقة الصفراء التي جعلت القضاء يستدعيني للمثول أمامه والتي جعلت منى مجرماً يطرق بابه (البوليس) مدخلاً الرعب في قلوب أطفاله .
نعم كنت أنتظر هذه اللحظة عشان نشوف رأي القضاء في هذه المهازل .. يعني أي موظف في شركة النفايات يخت ليهو كباية شاي ويرفع كرعينو في التربيزة ويولع ليهو سيجارة ويقوم يزيد ليهو جنيهين تلاته و(الفاتح جبرا) يدفع؟ وكان ما دفع يرسلوا ليهو البوليس (العديل ده) ويمشي زيو وزى أي (لص) ويقيف قدام القاضى؟ مش بالله بلد (فوضى جد)؟
القانون سادتي الإعزاء (ده لو فضل فيها قانون) كان من المفترض أن يضع هذه الشركة الشاكية (متهمة) وذلك لمخالفتها المادة 8 بند4 من قانون الإجراءآت المالية والمحاسبية لعام 2007 والتي تقرأ (لا يجوز لأي من أجهزة الدولة فرض أو إلغاء أي رسوم أو ضرائب قومية أو إيرادات أخرى إلا بموافقة الوزير وإصدار القانون الخاص بذلك)
فهل تتم زيادة رسوم النفايات الكل يوم زايدة دي بموافقة الوزير وإصدار قانون خاص بيها وللا القصة كوووولها حتة موظف يشيل قلمو (ويزيد) والمواطن الغلبان ده يدفع ؟
وكذلك لمخالفتها للمادة 8 بند 5 من ذات القانون والتي تقرأ (لا يجوز لأي من أجهزة الدولة تحصيل أى أيرادات أو رسوم أو أي متحصلات إلا بموجب النماذج المالية الأصولية الملحقة باللوائح الصادرة بموجب أحكام هذا القانون)
طيب فين هي النماذج المالية الأصولية؟ فين أورنيك 15؟ الإيصالات التي تعطيها هذه الشركة للمواطن يمكن طباعتها في أي مطبعة متواضعة في السوق الشعبي ؟ كيف للمواطن الغلبان أن يعلم بأن هذه القروش القاعد يدفعا ح تمشي خزينة الدولة وليس أي (كرشاً) آخر؟ وكيف نضمن أن هذا المتحصل يتبع للشركة وما (طابع ليهو إيصالات) طالما الإيصال ليس لإيصال 15 ؟
كما جاء في ذات القانون في الفصل السابع باب (بموجبه الأحكام العامة ) في ما يخص الجرائم والعقوبات الفقرة (29)/2/ز أن كل من يقوم تجنيب الإيردات أو تحصيلها بنماذج غير الأصولية يعتبر مرتكباً جريمة ويعاقب بالسجن لمدة لا تجاوز عشر سنوات أو بالغرامة أو بالعقوبتين معاً ..
طيب أهو دي شركة النفايات وبتتحصل الرسوم بنماذج غير أصوليه يلا حاكموها لينا ؟
الشئ الغريب أنو شركة تخالف نصوص القانون بصورة وااااضحة وصريحة تكون شاكية ومواطن يرفض أن يشارك في هذه (الجريمة) يكون (متهم) بالله مش حكاية عجيبة ؟
اليوم بإذن الله تعالى في تمام الساعة الثانية عشر منتصف النهار يقف العبدلله ممثلاً عنكم أمام القضاء وإني لفي شوق شديد لذلك (عشان نشوف البلد دي ماشة كيف) وكده !

كسرة :
كان ما لقيتو المقال الجاي تكون القصة فيها (تربسة) وكده … كمان جابت ليها سجن !!

كسرة ثابتة :
أخبار ملف خط هيثرو العند النائب العام شنو(وووو وووو وووو)+(ووو).


[email protected]





تعليقات 56 | إهداء 1 | زيارات 9251

خدمات المحتوى


التعليقات
#602545 [دولي]
0.00/5 (0 صوت)

03-05-2013 02:19 PM
وفعلا حصل التربسا يا استاذ الله معاك ومع الزيك ..


#598591 [كوكى]
0.00/5 (0 صوت)

03-01-2013 12:28 AM
يا جبرا هو وزير العدل اسموا دوسه
يعنى حيدوسك حيدوسك بل راسك ساى


#598545 [ابو صالح]
4.50/5 (2 صوت)

02-28-2013 10:27 PM
مرة فى واحد كبير فى السن استدعوه ناس محكمة النفايات و عندما وصل للمحكمة ساله القاضى ليه ما دفعت حق النفايات قال للقاضى انا عندى سؤال ليك القاضى قال شنو سؤالك رد عليه الراجل يا حضرة القاضى انت ابوك قرااك القانون وراجيك المدة كلها عشان تطلع قاضى (وساخات) القاضى انفعل وطرده من المحكمة وقال تانى ما يمشوا للراجل دا وخلوه ما يدفع ثانى نفايات يا ود جبرة جرب الحيلة دى عشان يان صابت ولا خابت ويودوك السجن


#598106 [عالم غريب]
4.00/5 (1 صوت)

02-28-2013 10:23 AM
من متين يا جبراااالشعب ما بدفع كلوو مره نحتج ونكورك وبرضووو في الاخر بندفع وحسي تدفع 8 او 10 وبعد سنه تاني يذيدوها وتكرر القصةتاني وفي نهاية نتعود ومافي حاجه بتنقص


#597933 [محمود يس]
5.00/5 (2 صوت)

02-28-2013 07:01 AM
الحمـــد لله ربنا وقعهم معاك انت عشان تقدر تفضحهم ، وفقك الله ..


#597797 [لبواحمد]
5.00/5 (1 صوت)

02-27-2013 09:57 PM
خليها لله ساكت يا جبره اخوى.الى بيسمع ويشوف منو؟؟؟؟.


#597763 [الفاتح]
5.00/5 (2 صوت)

02-27-2013 09:11 PM
تسلم أخوي الفاتح

سنكون في أحر من الجمر لقراءة المقال القادم أي بعد الوقوف امام القضاء
النفايات وما أدراك ما النفايات

الان إذا أخرجت نفايات البيت قبل الموعد المحدد ستوقع عليك غرامة مالية
يعني أنا ساكن في شقه صغيره والنفايات أحتفظ بها في المطبخ لمدة ثلاثة أو أربعة أيام حتى لو رائحتها طلعت وملأت أرجاء الشقه لا يمكننا إخراجها لأنه ستوقع علي عقوبة .


#597753 [lwlawa]
5.00/5 (2 صوت)

02-27-2013 09:02 PM
كسره:
أخبار الفاتح جبره (المتربس) شنووووووووووووووووووووووو ووووووووووو...؟؟
الله يكضب الشينة.
الفاضل الاخ جبرة هذه ليست دولة قانون حتى يتم محاججتها والمرافعة امامها بالقانون. هذه دولة همباتة. ويمكن القاضي او مندوب الشركة يقول ليك قوانينك وفقراتك دي بلها واشرب مويتا.؟!
اخي جبرة، التعامل معك او مع اي مواطن لا تختلف كثيرا عن صاحب الدرداقة الذي قام صباح اليوم ببعج بطن مندوب محلية السوق الشعبي لذات المشكلة الجبايات الجبايات الجبايات، وبدون اي قانون او مقابل خدمي مقنن.
اوصيك بتجهيز سكين سنينة للمرة القادمة.


#597684 [احمد ابونصر الشمالي]
5.00/5 (2 صوت)

02-27-2013 07:18 PM
تسلم ياجبر . بس الغريب في الامر انت كيف داير ايصال اصلي والوزير ذاتو ما اصلي


ردود على احمد ابونصر الشمالي
United States [صخر] 02-28-2013 01:47 AM
الوزير براهو ما هو كلو ما اصلى - مضروبين ياشيخنا


#597640 [Zoul sakiit]
5.00/5 (1 صوت)

02-27-2013 06:06 PM
انت كنت قاعد تدفع ستة وعملوها ليك ثمانية طيب إيه رايك انا قاعد ادفع عشرة ومن. زمن طويل جدا وما عارف الرسوم دي الفرضها منو وهل ناس بحري نفاياتهم اكثر من ناس بيت المال ؟ الله اعلم


#597586 [ود العباسية]
5.00/5 (1 صوت)

02-27-2013 04:56 PM
يا جبرا انا قايلك مفتح لكن طلعته ماعارف
معليش للكلمة يا خال ..

لكن انت من زمن السجن الحكومة دايرة قروش يعنى قبضو اولاد الحلة سكرانين القاضى قال غرامة النفر 300 جنية السكارة قال شاربين برميل ,قالو للقاضى اجلدنا قال ليهم الجلد اصلو موجود لكن الغرامة اهم لينا من الجلد ...يا ود بيت المال جهز معاك الغرامة اقل شى 100 جنية


#597533 [Fato]
4.25/5 (4 صوت)

02-27-2013 03:48 PM
تسلم يا جبرة من كل شينة وأنشاءالله تخرج منتصر للمواطن المغلوب على أمره. أخوى / الفاتح أعتقد الزيادات البتحصل من غير أصدار قار من وزير ماليتنا الأرتيرى هذا سواء كانت صادرة من شركات ولا مؤسسات دولة وراءها رؤؤس كبيرة ما بتنهبش والقضاء الهامل ده سوف يقف مكتوف الأيادى ده لو أدانوك ودفعوك غرامة زيادة وده كلووووو عشان خاطر الرؤؤس الكبيرة.البلد القانون الفيها قانون الغاب وياحليل القانون وأهل القانون الأشراف, لذا أرى أن تذهب بورقة أستدعاءك هذه وتقابل الدلدول أبو فقرة الأعرج (عمر البشير) وقول ليه شوف ده نوع قليل من عينات الفساد التى تبحث عن أدلته.


#597522 [كركدى]
5.00/5 (2 صوت)

02-27-2013 03:35 PM
سلامات با استاذ انا شايف ان الناس ديل قاصدنك عديل البنية دى مدسوسه نتمنى انك ترجغ بالاسلامه و لكن لو يعنى لا قدر الله دخلوك فى ---- ركز لينا على البحصل شنو وراء التخشيبه ده مهم


#597468 [المؤكوك الفضائي]
5.00/5 (1 صوت)

02-27-2013 02:31 PM
العم الفاتح جبرا اذا كان الحكومة نفسها وسخ ونفايات وكيزان وسخانة جلبت كل الامراض للبلد والفساد والدعارة والقتل والنهب والسلب 0


#597465 [واحد صحيح]
5.00/5 (4 صوت)

02-27-2013 02:27 PM
والله ياجبرة لو شفت الايصال الجانى ما بتصدق
إيصال مالى
المبلغ ..
المدفوع ..
كتابتا ..
الاجمالى ..
مطبعة عبدالمنعم سعيد السوق الكبير


#597460 [بدر رسلان]
0.00/5 (0 صوت)

02-27-2013 02:24 PM
حتشوف الويل وسهر الليل هههههه (الله يعينك) في انتظار النتيجه


#597436 [يحيي العدل]
5.00/5 (2 صوت)

02-27-2013 02:01 PM
حبيبنا جبرا
شركوا ليك بقناة أم درمان أولا
ولما أمثالي من الراكوباب إعترضوا قالوا ده ما بجي إلا بالبوليس .

الحكاية نكاية وفيها إننننه

عايزين يسكتوك يا جبرا
ولو وقفت مقالاتك نقول حسبنا الله ونعم الوكيل


#597427 [الشايل المنقة]
5.00/5 (4 صوت)

02-27-2013 01:53 PM
...اتمنى من القاضى ان يحكم عليك باسبوع سجن,وما اظن مريت بالتجربة ,جميلة وح تحتك بجميع المجرمين الكبار و الصغار من نشالين خطوط المواصلات وغيرهم,بعد ما عرفت وخبرت دروب سارقى خطوط الطيران من الكبار ,وتطلع من السجن بذخيرة وافرة من القصص وتجى تتحفنا بيها,ما تخاف عمودك محفوظ وح نصلك بأعمدتنا الدسمة انت وزملانك فى الزنزانة,لكن المشكلة فى بتك الصغيرة ,امها تقول ليها شنو؟ابوك اتسجن عشان ابى يدفع الجنيهين الذيادة حقت البت النفايات!!


#597426 [ابو العينيين]
5.00/5 (4 صوت)

02-27-2013 01:53 PM
والله الفاتح جبرا شكلك بتاع شبك نحن في منطقة اللاماب بندفع 11 والمعاشيين بدفعوا 7 طبعا دي شركة دكتور ياسر محجوب للنظافة طبعا الرجل ده بكتب عمود في صحيفة المجهر بالله يالفاتح جبرا اكسب فينا اجر وكلم لينا زميلك يرحمناا شوية نحن ما بتاعين مشاكل الله ينتقم منهم كلهم دنيا واخرة


#597412 [سونو]
0.00/5 (0 صوت)

02-27-2013 01:39 PM
معليش ي جبرة هانت الايام
بعدين خلينا نهون ليك القصة
دا انتي اهو تحمد سيدك
قاعد ف بيت المال وجنب الحكومة
ناسنا الغبش القاعدين
في سمت لقط ديل اسوووووا شنو
والله تجي الزيادة فيهم
زي بصااات ابو رجيلة
وشوف قلة الادب بتاعتهم
بعد تدفع الزيادة
ادوووك ضربة ف راسك
اها هسه دا اقول عليه شنو
وجع بلاد وعباد
الله المستعان


#597403 [عصام احمد]
5.00/5 (1 صوت)

02-27-2013 01:30 PM
استازنا الكبير جبرا القانون في هذا السودان قانون جاهليه يطبق علي المساكين ويطنش اصحاب السلطه والمال نحن معك اخي كن قويا بالحق كما عهدناك والله ناصرك علي الظالمين


#597398 [محمد احمد]
0.00/5 (0 صوت)

02-27-2013 01:21 PM
يا حبيب روح اقيف قدام القاضي وارفع مرافعتك وتعال ورينا القاضي قال ليك شنو
وانا صراحة ما عندي اعصاب لتصرفات شركات وبنات والكلام الحاصل ده عشان كده مغترب واذا حكموا لصالحك تراني بكرة اجي نازل السودان،، ونقول عندها يا سودان العدل جاك راجل


#597385 [ابوعديلة]
0.00/5 (0 صوت)

02-27-2013 01:10 PM
((أخبار ملف خط هيثرو العند النائب العام شنو(وووو وووو وووو)+(ووو).))
وحياتك ياجبرة ماتنسى كمان تسأل لينا القاضى عن المسألة دى. وليك على لو موضوع النفايات بقى فيه سجن انا ملزم بثيرمس الشاى لغاية مانشرفنا بره تانى.


#597359 [المتفائلة جدا]
4.79/5 (7 صوت)

02-27-2013 12:46 PM
عندى بنت خال دمهاخفيف و روحها رياضية دقت ليها الباب بتاعة النفايات وطلبت منها الزياده دى.. بنت خالى قالت ليها ماعندى ..قالت ليها أنا بمشى المرة دى وبجيك تانى لكن لو مادفعتى المرة الجاية بنرفعك (بنفس العبارة دى) قالت ليها ترفعينى يعنى شنو ؟؟ قالت ليها بنرفعك بنوديك السجن ..فكان رد بنت خالى ..لو رفعتونى ووديتونى تكونوا عملتوا خير لأنى أنا ذاتى زهجانة من الحاصل و محتاجة للتغيير..
ووالله الشىء المحير يا أستاذ إنه البلد دى ما إتملت نفايات ولا بقت قذرة ووسخانة زى أيام جماعة جباية النفايات دى ..عليك الله يا أستاذ تسألهم لينا رسوم النفايات بتمشى وين؟؟..
كسرة ..برضو ماتنسى تسألهم لينا من أين أتى هؤلاء ؟؟؟


#597351 [محموم جدا]
0.00/5 (0 صوت)

02-27-2013 12:36 PM
في زمن الادارة الاهلية عمك حمدون جلد ليه واحد في مشكلة بسيطة و المجلود اشتكى للعمدة و أعلنوا عمك حمدون بيوم المحكمة و هو عادة أحد يوين في الاسبوع هي نفسها أيام السوق في القرية فحضر العم حمدون و الشاكي و عند سماع الشاكي سأل العمدة عمك حمدون الكلام دا صاح يا عم حمدون فقال نعم و عند الحكم نطق العمدة و قال حكمت عليك المحكمة ب 50 قرش غرامة فقال العم حمدون حكمك عدل يا عمدة لكن عمك حمدون كان شاف الخمسين يسحرها فقال العمدة مافي عوجة دي بندفعها ليك لكن تاني ما تدق ليك زول ..حاضر يا عمدة و خرج عمك حمدون طليقا فعلق العمدة و الله ناس عمي حمدون يدقوا الناس و نحن ندفع الغرامة للحكومة
أنا أقترح عليك ان تسأل الشركة هل زادت نفايات الناس؟ لا العكس نقصت و الشاهد الحالة الاقتصادية..
طيب زدتوها ليه؟ تبعا للدولار يعني نفاياتنا بقت عملة صعبة ..


#597349 [قفة]
3.00/5 (1 صوت)

02-27-2013 12:34 PM
ما تخاف مش الطحنية بنجيبا ليك


#597326 [انا السودان]
5.00/5 (2 صوت)

02-27-2013 12:18 PM
عفارم عليك الاسناذ الفاتح جبرالو كل مواطن اتخذ موقف كموقفك هذا كان البلاد اتصلح تماما وكان كل زول عرف الى ليه والى عليه0 انت انسان فاهم وعارف قدر نفسك 0 نرجو ان تسود هذه الثقافة لدى العامة 0


#597324 [ابو السباع]
5.00/5 (1 صوت)

02-27-2013 12:17 PM
ياود جبرا كدي شوف الشركة دي وراها منو؟


#597322 [سامر المدنى]
3.75/5 (3 صوت)

02-27-2013 12:15 PM
بارك الله فيك اخى الفاتح .. والله لو كل الناس عملت زيك كده البلد دى كان انصلح حالها لكن نقول شنو ؟
كسرة اولى بالله انت من ناس بيت المال ؟ ناس منو وياتو حوش ؟
كسرة تانية بكرة ورينا الحصل شنو وكان مالقينا عمودك برسل ليك العامودمع كثير احتراماتى


#597319 [هدهد]
0.00/5 (0 صوت)

02-27-2013 12:13 PM
لا تستغرب يا استاذ الفاتح فى عهد حكومة التجار هذه كل شيىء جائز ومافى شخص يحاسب آخر فالجبايات اصبحت حسب مزاج الموظف المختص يزيد حسب مزاجه وبدون أى تردد لأنه يعلم سلفا لن تكون هنالك محاسبة هنالك مضغة فى الجسد اذا فسدت فسد سائر الجسد ألا وهى قلب السيد رئيس الجمهورية . فطالما ان الفساد آتى من كبار القوم فلا غرو ولا عجب ان يأتى من صغارهم ونعلم سلفا الحرامى لا يحاسب حرامى أى موظف فى الدولة يسرق كما يشاء لأنه يعلم كل الجماعة على شاكلته فهو يسرق بعين قوية ويقلع وكمان بالبوليس اا عجبنا أو لم يعجبنا !!. قمة الفساد وحاجة والله مخجلة بنات يدخلن باب المواطنين ويتحصلن منهم قروش بالسم الدولة متمثلة فى موظف محليتها الفاسد هذا لا يحصل فى العالم ولا فى الصومال !!!!!أنا شخصيا حالف ما ادفع حاجة اسمها نفايات هذه حتى لو دخلت السجن دعائى على هذا الخنزير البشير الطرطور الجالس فوق . عموما محمود يريد ان بعد خروجك من السجن كم يوم قضيته مسجون وعايزين نعرف القاضى دا حكم عليك كيف فى ظل دولة الشريعة والتوجه الحضارى هذه .


#597311 [اجتماع]
0.00/5 (0 صوت)

02-27-2013 12:08 PM
عليك الله بعد ما يجاكموك على الاتنين جنيه الابيت تدفعها اسال لينا القاضي ده عن الزول الكتل مجدي محجوب والكتل ال28 ظابط في رمضان ح يعملوا ليهو شنو؟


#597302 [حاتم أب تفة]
0.00/5 (0 صوت)

02-27-2013 12:04 PM
يديك العافية يا أستاذ.. أنت صوت من لا صوت له، في البلد الظالم حكامها دي..!


#597301 [عادل نقد]
0.00/5 (0 صوت)

02-27-2013 12:02 PM
حيدفعوك اجباري البلد فيها قانون طواري لا تنسى البلد الدايره تحاكمو بتحاكمو وبتفصل ليهو قانون من مافي..........
وما اكثر الترزيه..............


#597295 [كوكاب]
2.50/5 (2 صوت)

02-27-2013 11:59 AM
اخى جبرا العالم من حولنا (يلمع) وبلدنا(طافحة) زبالة وشركة النفايات هى المسئولة عن نظافة الاماكن العامة بموجب توليها الامر لكن الشوارع (عمت) من العفن و (الكرور) فاين تذهب ملايين الرسوم التى من المفترض ان توظف فى النظافة (وما دام بى قروشنا ما بننضف)خلونا وسخانين.


#597289 [مامون]
5.00/5 (2 صوت)

02-27-2013 11:53 AM
أستاذ الكلمه الفاتح جبره
اعمل حسابك القصة ما قصة رسوم دى مكيده من اجهزة الامن عايزين يفهموك إنو بأى سكة بنجيك لا تذهب لوحدك شوف ليك واسطه و تقل جيبك لأننا عايزنك بره ما جوه و ربنا يكضب الشينه الله يحفظك و ينصرك و يحميك .


ردود على مامون
United States [ابوعديلة] 02-27-2013 02:58 PM
لأ يامامون اجهزة الأمن ماعندها علاقة بالقصة دى , الموضوع وراهو اسرائيل عدييييييل كدة . ماشايف اليومين ديل اسرائيل مقبلة علينا كيف ؟ شي يرموك شيى سوناتا وشيى صقور تجسس وشيى جراد. دى مؤآمرة كبيرة خلاس .


#597278 [ابو أحمد السوداني]
0.00/5 (0 صوت)

02-27-2013 11:45 AM
ههههههههههه
و الله دي حقارة عديل كده

ربنا يحفظك و يديك الصحة و العافية يا أستاذ


#597239 [بلال]
0.00/5 (0 صوت)

02-27-2013 11:10 AM
يا استاذ / خليك جاهز لكل شي وخد معاك العده


#597226 [ابو عبد الله]
1.00/5 (1 صوت)

02-27-2013 11:03 AM
ايام ما كنت ممارس للمحاماة في السودان كان عندي قضية في محكمة النظام العام كرري ، فقلت بالمرة أسأل القاضي عن أمر التكليف بالحضور للمواطن الرافض دفع رسوم النفايات وسألته طبعاً ما ممكن تصدق ياجبرة انو القاض قال لي .. ما بنعمل ليهم شي بنخوفهم ساي لحد ما يدفعو!! يعني القاضي (بكل مكانته الادبية والاخلاقية) بخوف سااااااي
امشي يازول ادفع وتاني كان جابوك لي هنا بي مشكلة ذي دي بحبسك
وبوليس طالع بي ورق اعلانات ، وموظف وقاضي وبنزين كلو شانيخوفو الزيك ياجبرة

السودان في ظل الانقاذ يقي مهزله


#597204 [بت السوكي]
0.00/5 (0 صوت)

02-27-2013 10:52 AM
طيب ياالفاتح انت افضل من المواطنين القاعدين ادفعوا. ماده قانون دوله يجب انك تحترمو والقانون ده لمصلحة المواطن يعني في النهايه الرسوم البندفعها دي ماشه للمواطن في شكل خدمات. انت عائز الدوله الدوله تعمل ليك تعليم ومويه وصحه وامن وماعائز تدفع اي رسوم مالكم كيف تحكمون


ردود على بت السوكي
United States [بره الشبكة] 02-27-2013 09:28 PM
انتى خلى بالك ذى برة الشبكة ...عمرك كم ..النو قبل عشرين سنة فى حاجة اسمها اورنيك 15..دة بيكتب فيهو الدكتور اسم الدواء للمريض(اسمو روشتة)... فهمتى ولا اشرج تانى

قالت قانون قالت

United States [واحد تانى] 02-27-2013 02:34 PM
اين هى الخدمات التى تقدمها الحكومة....؟؟

United States [بدر رسلان] 02-27-2013 02:27 PM
بت السوكي الدكتور بتكلم عن الايرادات المابتدخل وزارة الماليه (اورنيك 15)القانوني

United States [يحيي العدل] 02-27-2013 01:57 PM
يا بت السوكي إنتي راكبة غلط
قطرنا ده قطر نيالا أنزلي المحطة الجاية

وبعدين شايفك حفظتي حاجات المؤتمر وخطبه . ما شاء الله عيني باردة

United States [ود الحلة] 02-27-2013 01:24 PM
انتي دفعتي ولا لا؟


#597203 [DafinDigin]
5.00/5 (1 صوت)

02-27-2013 10:52 AM
واضح ياجبرا القاضي العاوزك ده لا يفقه شيء في البنود والمواد الجبتها انت في العرض أعلاه. ولا يكون عارفها بس داسيها خباثة منه عشان لما ييجوا ناس الشركة يقوم يتربسهم عشان تخرج انت مثل الشعرة من العجين؟
ولما ترج بالسلامة أنا اقترح كل "الكسرات" تكون عن مواد وبنود القانون عشان نعرفها ونكون جاهزين لمثل هذا النهب "المصلح" من هب ودب.


#597189 [ود الجزيرة]
0.00/5 (0 صوت)

02-27-2013 10:45 AM
الله معاك وقلوبنا كذلك .. نتمنى من الراكوبة متابعة الاحداث لحظة بلحظة ........ فالاستاذ يستحق الاهتمام ..


#597181 [سم زعاف]
0.00/5 (0 صوت)

02-27-2013 10:41 AM
تعرف يا أبو الجبابرة القاضي حيقول ليك شنو: الفقرات القانونية التي اقتطفتها في مقالك دا بلها وأخلطها في خلاط سانيو وأشرب مويتهاوبعد داك ألحس كوعك (كلام القاضي). يا حبيبنا أدفع من سكات وفوض أمرك للباري. منتظرين الحكم عليك وعلى فكرة سمعنا تحت تحت أن مقالاتك وسخرياتك ومسخراتك كوووولها المنشورة في الصحف والمطبوعة في"المدونة" تكون طبعن كووووولها مفهرسة عندهم(بما في ذلك الكسرة الليها ما يقارب العشرين شهر ديك) ومتربصين ليك وهذا أول السيل، بس نحنا معاك قلبا وقالباوإذا احتجت لأي شئ في الحبس رقبتنا سدادة، بس ما فيها البتاعة ديك ولا ورقها. أها أقول ليك الله معاك وينصرك على القوم الظالمين آآآآآآآمين يا رب العالمين ودعتك لي الذي لا تضيع ودائه ومنتظرين عمودك بكرة


#597178 [adil]
0.00/5 (0 صوت)

02-27-2013 10:40 AM
بصراحه كده ياكاتبنا العزيز وحسب فهمي لللاقانون السوداني القصه دي جايبه ليها سجن..وياريت وبحكم انك شخصيه مشهوره انك تطلب من القاضي انك تقضي فترة السجن في لاهاي..يكون عمل فيك خير..


#597175 [وطني غيور]
3.00/5 (2 صوت)

02-27-2013 10:40 AM
إن بقت الحكاية على كده هينة لكن الكلام داخله كلام والله يستر والله معاك .


#597152 [hozifa osman]
0.00/5 (0 صوت)

02-27-2013 10:26 AM
كان تكتب كسرة خط هيثرو من اليوم ....
كسرة ثابتة :
أخبار ملف خط هيثرو العند النائب العام شنو(وووو وووو وووو)+(وووو).....
قبل ماتمشى الرج
ولا وكل زول يكتبها بدلك لزم الاحتفال وكدة


#597147 [د بله]
0.00/5 (0 صوت)

02-27-2013 10:22 AM
الله يعينك يا استاذ بس الناس ديل قانونهم قانون الغاب بالنسبة ليهم ملائكى.


#597127 [game over]
0.00/5 (0 صوت)

02-27-2013 10:13 AM
باذن الله براءه لانها قضية اشبه بالبلاغات الكيدية (ديل عاوزين يخرصوا صوتك لانك بتقول الحقيقة الهم ما دايرنا تطلع) وقضيتك حتفضحهم اكتر مما يسكتوك يا استاذنا الساخر خفيف الدم والقلم الفاتح جبرا


#597101 [وحيد]
3.00/5 (2 صوت)

02-27-2013 09:59 AM
لك التحية استاذ جبرة و قلوبنا معك .. و اهو ان ترمي حجرا في البركة الآسنة ... عموما انصح باصطحاب ضامن ... البلد دي بقت اقطاعية و يسري فيها قانون الاقطاع و ليس اي قانون آخر.. القوانين التي ذكرتها يضعها النظام لتبييض وجهه اما الاجانب اما القانون الساري و المطبق فهو قانون الغاب .. اي شركة للجماعة و اي متنفذ في النظام و اي اقطاعي من التنظيم الحاكم بفرض ما يشاء من الرسوم و يتحصل بمزاجه و بالورقة التي يريد او بدون ورقة ... هي الشرطة ذاتا بتتحصل باورنيك 15؟ في حد سالها او طيق عليها القانون؟ الرئيس عارف و وزير المالية عارف و وزير العدل و الداخلية و كل مجلس جيوش الوزراء و برلمان نوام الشعب كلهم عارفين في واحد طبق القانون؟
عموما ربنا ينصرك و دعوة لكل جماهير الشعب السوداني بعدم دفع الاتاوات الاقطاعية و خلي الشعب كله يمشي المحاكم .. علي الاقل ينغصوا حياة اللصوص المحميين بالقانون


#597067 [ام حقين]
4.00/5 (1 صوت)

02-27-2013 09:42 AM
قانون ...؟ قال قانون قال ..هم جو بى قانون علشان يمشوا بالقانون ..
ديل جو بالبندقية قلع عديل كدا ومستعدين يقلعوا عينك موش قروشك ياخى هم قلعوا وليدات الناس وقتلوهم فى الجنوب واخرتا ادوهم جوالين سكر ومائتين وخمسين الف جنيه لزوم مستلزمات البكا وكدا
قال قانون قال امشى ادفع والا التربسة راجياك دا اسمه قانون الاذعان هم يقرروا وانت تدفع وساكت والا كان راجل البندقية قدامك ابق راجل وشيلها علشان يحترموك والا لا يا اخوى ادفع بس ..


كسرة


حافظ على وليداتك ما يخطفونهم ويحملونهم نحو النيل الازرق قالوا الكرمك سقطت تانى او قول اتحررت تانى


#597063 [خالد حسن]
5.00/5 (1 صوت)

02-27-2013 09:41 AM
انا قايل سجنوك عشان مؤيد الفجر الجديد
خخخخخ
اتاري القصه ناس الزباله الخامين قروش الناس والبلد غرقانه لي شوشتها في الزباله والاوساخ
كان ماشفنا عمودك هنا بنجيب ليك عمودنا في كوبر خخخخخ
هي جابت ليها سجون الليله مامن 89 ونحن عايشين في سجن كبير سجانه الحمار البشير


#597062 [ود عامر]
0.00/5 (0 صوت)

02-27-2013 09:41 AM
أستاذى الفاتح جبرة يا بختك أكيد حتكون رمز لهذه الثورة القادمة بأذن الله وخليهم كان عندهم رجالة أختوك فى السجن ليوم واحد , للأسف فأنا خارج العاصمة والله لو كنت بالخرطوم لجعلت هذه القضية شرارة لحرق هؤلاء المجرمين , ونرجو من محبى الرجل الشجاع والغيور الفاتح جبرة بالتوجه فورا الى هذه المحكمة , وبالمناسبة فقد أتضح جبن وخوف سارقى قوت الشعب وما فعله جثمان الفقيد محمود عبد العزيز يوضح ذلك , أليس هم من أرسل طائرة تتبع للأمن حتى تأتى بالجثمان من الأردن ليلا ؟ ليس حبا فى محمود ولكن خوفا من الحواتة وقد فعلوا فعلتهم الخبيثة التى تشبههم حتى يتم دفن الفقيد ليلا وحتى يتكنوا من منع الحواتة من التجمع . فأنت يا جبرة رمز لنا جميعنا ولن نتركك لهذه الشلة الفاسدة , قل ما تريد للقاضى فكل محبيك يقفون سندا لك .


#597059 [hajabbakar]
0.00/5 (0 صوت)

02-27-2013 09:37 AM
ياأخى الكريم احسب ان المتحصلة تقوم بعملها طاعة لله ولانزكى على الله احد
ألم تسمع بالمشروع الحضارى والذى لايعترف بترقيم الايصالات فمن يرقمون ايصالاتهم دنا عذابهم
فى جنيهين فقط ستقف امام عدالتهم ولو هبرت ليك هبرة بستة مليارات لكفتك الوقوف وصرت مجرد تقرير يتلوه علينا المراجع العام امام مجلس النوام ولحقت بخط هيثرو


#597050 [ود النعيم ودحمد]
5.00/5 (1 صوت)

02-27-2013 09:29 AM
هههههههههههههه ماتخاف لو مالقينا مقالك ليوم غدا إن شاء الله بنجيب العمود وبنجيك في السجن,,,ودا السبب المودي البلد دي لي ورا لارقابة ولامحاسبة ولامراجعة أي واحد طابع ليه دفتر تحصيل ولافي بيه والمواطن المسكين يدفع ومرات كمان الموظف بكون معاه بتاع شرطة للهرش وكدا,, وللمصادفة قريت خبر قالوا بتاع درداقة في السوق المركزي الخرطوم ركب ليه سكين في موظف ,,بعد دا أي واحد يربط سكينو في ضراعو ولو ماعندو سكين اللخت عكازو جمبو


#597047 [زول]
5.00/5 (1 صوت)

02-27-2013 09:28 AM
والله انت اظهر عليك بقيت من الطبقة الأولي نحن عربية النفايات دي والله الشهر كله مابنذكر يوم طلعنا لها شئ أصلا ماعندنا لأننا جعانيين حتي باقي الوسخ بنستغله في النار ماعندنا التكتح


#597039 [samni]
0.00/5 (0 صوت)

02-27-2013 09:21 AM
أهههههه انت جيت لي بيت النشوف القضاء داك كلوا عرفناهو ...دي ما أول حالة فوضى شركات ولا أفراد النشوف القضاء هو زاتوا ابو الفساد..........


#597003 [محمد السوداني]
5.00/5 (1 صوت)

02-27-2013 09:08 AM
ربنا معاك يقويك ويحفظك يااستاذنا


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة