03-08-2013 10:24 AM



العبدلله ليهو حوالي اسبوعين عندو (قرفة) وزهجة شديده وإحباط ولما الحاله دي تجيهو بيقوم يقفل عليهو الأوضة بتاعتو وما عاوز مفاهمة مع أي زول .. الدقن تعشعش .. وطفايات السجاير تتملي .. (مع القلب ده) .. ناس البيت عارفين الحتة دي .. وعارفين يتعاملو معاها كيف .
قضية النفايات دي جات مع (القرفة دي) وما عاوز أقول (الفلس ده) وهو بالمناسبة واحد من الاسباب .. وواحدة من اسباب الفلس للمواطن السوداني إنو الحكومة رفعت أيدا من كل شئ ومش كده وبس كمان بتطالبك بدفع حاجات كتيرة .. العتب .. النفايات .. الموية مع الكهرباء .. الشنو مع الما تعرف شنو .. وفي خضم (القرفة دي) جاء للعبدلله (إستدعاء المحكمة) بسبب النفايات .. بوليس لابس رسمي في مسألة (أبلد قانونى) في الدنيا لا يمكن أن يصنفها بانها مسألة جنائية .. (هسه ناس النفايات) ديل كان ما جو شالو النفايات بقدر أشتكيهم (جنائياً) طيب هم يشتكوني جنائياً وأكون (مجرم) ويجرجروني وهم (لا) ليه ؟ لكن طبعن هنا ممكن .. حيث للقوانين (ترزية) و(مكوجية) وغسالين !
الملابسات بتاعت (بلاغ النفايات دي) إنتو عارفنها .. طيب نجي للملابسات بتاعت أخوانا بتوعين الأمن (البجرحوا ويداووا) .
اليوم الساعة أطناشر كان موعد إنعقاد الجلسة بتاعت النفايات بمحكمة النظام العام بسوق أم درمان .. عشان الناس تعرف حقها طلبت من أعضاء المنتديات التي بإسمي أن يقوما بعمل بوسترات تحث المواطنين على عدم الدفع إلا بأورنيك 15 كما يقول القانون وسمعاً وطاعة للسيد رئيس الجمهورية والسيد نائبة (آدم الحاج) وكل المسئولين الذين ما فتئوا يرددون لنا أن عدم التحصيل باورنيك 15 هو جريمة لا تغتفر وإثم عظيم .
اول الواصلين إلى المحكمة تحمل بوستراتها كانت الأخت (بت وراق) والتي لم تعرفني لأول وهلة بسبب (الدقن الأبيض الكث) جلسنا وأنا أرتدي الزي السوداني إضافة للسديري نتحادث في إنتظار أن (يندهنا) حاجب المحكمة
أخذنا نتحدث إنتظاراً للمحكمة وقد تجاوزت الساعة الثانية عشر بقليل وفجأة هجم علينا شباب غلاظ تحسبهم من أقارب (جون سينا) او (هوغ هوجان) على اقل تقدير .. كانوا أربعة .. أمسك احدهم (بالبوسترات اللسه ما فتحناها) والتي كانت تمسك بها الأخت (بت وراق)
- نحنا الأمن جيبوا الورق ده وقوموا يلا معانا !

الأمن ..: يجرح ويداوي (2)- (3)

الفاتح جبرا

- نحنا الأمن جيبوا الورق ده وقوموا يلا معانا !
أمسكت بلفة الورق وقلت لهم : الورق ده بتاعي في شنو؟
- جيبوهو هنا (وهو يجذب الورق من يد بت وراق)
- إنتو ح تشيلوهو بالقانون وللا بدون قانون
- بالقانون يلا معانا ! (مع شوية لكيز) !
شارع المحكمة عبارة عن زقاق صغير على جانبه في مواجهة المحكمة عدد من ستات الشاي والباعة الجائلين مما يجعله لا يسع إلا البوكس دبل كابينة المظلل (الشفتوهو في الصورة) ، عند خروجنا كان هنالك أربعه آخرون على ظهر البوكس (غير الجوة البوكس والسواق)
- أطلع يا زول فوق
- قالها لي في صرامة شاب لم يتعد العشرين من العمر (أكون درستا أبوهو) يرتدي قميصاً طوبي اللون ياقته بها (زينة بالخياطة) – ده عشان يعرف روحو وكده –
تحسرت والله لشباب بلادي الذين يعاملون كهلا مثلي كث اللحية وأبيضها مثل هذه المعاملة التي تفتقر إلى أبسط قواعد الأدب والتربية .
وصعدت إلى أعلى البوكس بينما كانت (أختنا بت وراق) تكابس محاولة الصعود (أنظر الصورة) .. إذ أن الأمر لم يكن سهلاً بالنسبة لها وقد بذلت عدة محاولات (مقدرة) حتى تم لها النجاح بأن ترتقى عتبة (البوكس) .
كانت ضهرية البوكس مليئة بعدد من الخراطيش السوداء التي يستخدمها بائعو عربات المياه بالكارو في زيادة (سرعتها) ،
وجلسنا متقابلين (أنا وبت وراق) في ركنى البوكس الذي إنطلق وسط الزحام حيث الكل يريد أن يشاهد المجرمين الذين كانوا يريدون سرقة (مواد) من المحكمة ! (المواد القانونية طبعن) !
ما أن تخلص سائق البوكس من الزحمة حتي فتح للبوكس فتح (صاح) الشئ الذي جعلني افكر (جديا) في إلقاء نفسي منه (راجع فاتحة المقال والدبرسة) وأهو الواحد يكون (عمل حاجة برضو) !
سرعان ما أزحت الفكرة من رأسي قائلاً (طيب ولو ما حصلت حاجة؟ والواحد إتظلط أو إتشلا ساكت)
.. رن هاتفي فأخرجته من جيب الجلابية لأرد إلا ان (الشاب الأخدر أبو نضارات سوداء ) الذي كان يجلس يميني أشار لي بأصبعه بألا أرد فارجعته إلى جيبي دون أن اعرف من هو المتصل !
وصلنا إلى مبني الامن .. وهو بناية فارهة ذات (حوش) برح .. توقف البوكس وترجل عنه (الثمانية شباب) المعانا وتبقينا نحن .. قال لي احدهم وهو يراني أنظر للمسافة بين سطح البوكس والواطة
: يا حاج ما تنزل !
- أنزل شنو ما دقيقة إنتا قايلني هيثم مصطفي !؟
بعد تلتلة نزلت وتلتلة أكتر نزلت أختنا بت وراق .. ودلفنا إلى داخل المبني !! والشباب يحيطون بنا !!

كسرة :
الحلقة الأخيرة ماذا تم داخل مبني الجهاز؟ وكيف طلب المحقق من سائقه أن يعيدنا بعربته الخاصة ؟

كسرة ثابتة :
أخبار تنفيذ توجيهات السيد الرئيس بخصوص ملف خط هيثرو شنو(و)؟

تعليقات 14 | إهداء 1 | زيارات 7185

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#606261 [عادل السناري]
0.00/5 (0 صوت)

03-09-2013 09:16 PM
واحد قريبنا اشتغل في امن نميري و امن الكيزان مع انو ما كوز قال الجماعة ديل ( يقصد الكيزان لفي الامن ) اسوأ من مشي علي ارض السودان حقد و كيد و نزالة و رزالة خسة و كذب و نفاق و حرامية و لا يراعون لحرمة دم و لا عرض و لا شرف واشك ان لهم اباء و امهات و اخوات و اخوة و كراهية الناس للحكومة ناتجة من عمايل ناسهم الفي الامن --- انتهي كلام قريبنا و هي شهادة انسان عمل معهم اكثر من 18 سنة و لا زال .


#605981 [كمال]
0.00/5 (0 صوت)

03-09-2013 02:01 PM
الفاتح هثرو لك ألف تحية ونسأل الله العلي القدير أن يرفع شأنك ويعلي مراتبك وأن لا يريك مكروه .. دائماً بتعبر عما في صدورنا وبتفش غبينتنا.. وتسعدنا بقلمك الرائع .


#605750 [محمداحمد حسن اوشى]
0.00/5 (0 صوت)

03-09-2013 09:54 AM
شكرآ لك الاستاذ الفاتح جبرا وانت تهزم الطغمه الكاذبه الفاسده وتفضحهم فى قضية كاالنفايات وطريقة تحصيل رسوم بطرق غير شرعية وانا على علم بان مبلغ النفايات لم يكن قاسي دفعه بالنسبه لك ولكن اعرف انك تريد ان تقف فى صف الكادحين الذين كلو من الدفع الزائد كل يوم وبدون رحمه ومتاكد بان زمن المحاكم سيضيع لك اضعاف من قيمه المبلغ المقرر لك ولكن انى متاكد بانك ستصبر الى ان تنتصر لقضيتك .. وفقك الله حبيبنا جبرة .


#605514 [ود نفاش]
0.00/5 (0 صوت)

03-08-2013 11:04 PM
عليكم الله كلمو الشيخ الكارورى انو الجراد جند من جنود الله واية عذاب
مش يقولينا نتفكر فيه
ظهرة الفاحشة والربا والجماعة دول لق الاسلام عايق قدامن وبداوا التغيير الليله بنك التنمية وبكره ايه مش عارف ونافع الكضاب يغش فى الصوفية قال الشريعه ما نسيبه
والله انا شايف غضب الله بدا ينزل


ردود على ود نفاش
United States [Mohd] 03-09-2013 07:39 AM
الحمار الاسمه الكاروري دا
بقول انه الجراد عنده فوائد وانه الصينيين بياكلوا اي شي

طيب ياخي ممكن تعلن الديانة الكنفوشية واللا اسمها شنو حقتهم بتاعت الدلاي لاما دي يا كرور ؟

ربنا سلط عليكم الجراد وسلط عليكم الفئران في الجزيرة انشاء الله تجيكم في بيوتكم واحد واحد يا لصوص ياحقراء يا منافقين يا علماء السلطان انتوا وفرعون حقكم دا يا كلاب يا اتفه من مشى على قدمين


#605469 [lwlawa]
0.00/5 (0 صوت)

03-08-2013 09:36 PM
عاش الفاتح جبرا.......
الفاتح جبرا مدبرس
القاتح جبرا في المحكمة
الفاتح جبرا في مكاتب النفايات
الفاتح جبرا في مكاتب الامن
الفاتح جبرا على اعناق الجماهير ...؟!!


#605406 [ابراهوما]
0.00/5 (0 صوت)

03-08-2013 07:40 PM
شركة الاقطان وراها ناس صـعبين ما بيعرفوا اللعب والهظار والفاتح جبرا يعرف ذلك مثلما يعرف ان (مضارفة المومن على نفسه حسنة).


#605354 [زول الله]
0.00/5 (0 صوت)

03-08-2013 05:57 PM
الاخ الفاتح الف حمد الله على السلامه, نقترح اضافه شركه الاقطان للكسره


ردود على زول الله
United States [فخر الدين] 03-09-2013 10:54 AM
ياالمدعو زول الله يا خوي شركة الاقطان دي طيرت عثمان ميرغني المن الجامعه مع الجماعه وقفلت ليه جريدته التيار (طيرت اب ريش من الدريش).. انت داير تودر الزول دا ولا شنو؟؟


#605223 [خالد حسن]
5.00/5 (4 صوت)

03-08-2013 02:37 PM
كلاب الامن الجربانه بإذن الله سنسحلكم كما يسحل الكلب الجربان
ولو كان فيكم اقاربنا واهلنا ... فمافعلتوه وتفعلوه بوطننا وشعبنا يجعلنا ننسي صلة الرحم
فالوطن اغلي من قربتكم؟
وتذكروا ان هذه المره غير السابقات .. ولن يفلت اي كلب من كلاب اللامن ولن نسمح بمبدأعفا عماسلف
ولن تكون هناك محاكمات سحل وضرب وقتل في الشوارع لكل كلاب الامن الجربانه


ردود على خالد حسن
United States [خالد حسن] 03-09-2013 12:26 AM
يازول انا اشتغل كلب اجرب مالي جنيت
انا كرهتي في الدنيا الامن والجيش والشرطه لانها ادوات لقهر الشعوب في العالم الثالث

United States [المطرطش] 03-08-2013 08:50 PM
يازول انت مش خالد حسن بتاع الامن(فى المطارقاعة كبار الزوار) ولا اسم على اسم


#605199 [محمد]
1.00/5 (1 صوت)

03-08-2013 02:04 PM
دي بلد حاكماها عصابة بلطجية وفتوات وقلالات ادب. بعدين حتى البلطجي العديل عنده قيم بيتعامل بيها وما بيحتمى بسلاح ودولة من وراه. يصعب القول ان هذه دولة او ان هذه حكومة. مافيا ممكن، عصابة بلطجية ممكن. غايتو ربك يهون.


#605196 [لالوب]
4.50/5 (6 صوت)

03-08-2013 01:58 PM
الاستاذ الفاتح جبرا

والله نحنا نستاهل اي حاحة تحصل لينا
الموضوع ده حتواجهو برااك ومافي اي زول حيعبرك، نحنا ناس كتابة وكلام ساي
الشعب السوداني شعب جبان وسلبي، عليك الله لو ما شعب جبان يحكمونا ناس قليلين ادب زي ديل خمسة وعشرين سنة؟؟؟ الناس العملوا اكتوبر وابريل خلاص انتهوا!!!
ولما يجي البشير في واحد من اللقاءات الجماهيرية نفس الناس ديل التعبانبن وما لاقين ياكلوا ولايتعلموا ولا يتعالجوا البتحاول تدافع عنهم وتتكلم باسمهم يطلعوا يستقبلوهو ويكوركوا بكل هستيرية هي لله هي لله

هل تعلم ان الانتخابات الاخبرة دي فاز فيها البشير من غير اي تزوير؟ ويقولوا ليك مافي بديل
بالله ده شعب يستاهل؟؟؟


#605139 [خالد عثمان]
3.00/5 (5 صوت)

03-08-2013 11:59 AM
سيدى هذا البلد شلنا عليهو الفاتحة من عام 89 بس مين كان يصدق......


#605125 [عبده الحانوتي]
3.88/5 (5 صوت)

03-08-2013 11:24 AM
عشنا و شفنا مكاتب النفايااااااااات داخل مبني جهاز الامن .


#605122 [abu sudan]
3.00/5 (3 صوت)

03-08-2013 11:19 AM
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل


#605102 [حسان الادريسي]
4.00/5 (4 صوت)

03-08-2013 10:51 AM
كلنا علي الطريق لن ندفع بغير ورنيك 15 !!جباية وقلت ادب والبلد وسخانة ذي لسان نافع!!!جبره اعمل ليك مستشاريه من المحاميين الشرفاء لمتابعة قضايا عدم الدفع!!! وممكن من هنا كل المحاميين يتابعوا ويذهبوا لمحكمة النفايات دي والقاضي النفاية البدهو حافز سمين ومابخاف من رب العالمين ومابيقول ليهم اشتغلوا عدل والقروش دي حقت الحكومه لانو بس خايف علي حافزوا ملاليم مقابل ان يتم سرقة ملايين شفت الفساد ممكن يكون كيف!!!! وربنا يديك العافية ويبارك في عيالك فانت من بقايا الزمن والرجال الجميليين. ولو بقي لنا بلد بعد هؤلاء الابالسة فستكون اول المرشحين لقيادة هذه البلاد!!! من غير ماتتعب انا متبرع بادارة العملية كراعيا يعني مش ماديا وبشوية خهد فانت الان شخصية العام وكل الاغوام في بلد الفساد والمفسدين والمرتشين والمتاجرين بجهل وحهد الشعب.


الفاتح جبرا
الفاتح جبرا

مساحة اعلانية
تقييم
9.99/10 (13 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة