03-11-2013 10:26 PM

ما أن إستيقظت من النوم صباحاً أول ما نزلتا ليك كرعيني في الواطة أسمع ليك حاجة قالت (كع) .. قلتا ما مشكلة أوك (طقيت) ليا حاجة .. قمتا بعد ما نزلتا كرعي جاني إحساس كده إنو في حاجة تاني كده لازم أنزلا .. غايتو المهم مشيت الحمام قلت إتسوك عاوز أمسك الفرشة دي غلبتني تب قامت وقعت مني في الحوض قلتا أجيبا ما أسمع ليك إلا كشششو .. راسي ضرب في المراية والمرايا إتكسرت ليك حته حتة .. قامت أم الأولاد الظاهر صحت لأني سمعتا ليكا حاجة كركبت أتاريهو ده باب الشارع .. ما أشوف ليك إلا (حمارة) داخلة الحوش قمتا نهرتها .. قامت طوالي وقفت وقالت ليا : اجي يا راجل إنتا جنيت دي ما أنا مشيت أجيب الفطور للأولاد عشان يمشوا المدرسة
ومما رفعت راسا إلا وإنهارت واقعة على السرير من الدهشة :
- ده شنو يا راجل .. القلبك حمار ده منو ؟
- لا خلاس انتي الما عملو ليك (تعديل) امشى شوفي وشك ده وأضنينك ديل
ومشت المدام على الحوض حيث وجدت (المرايا مكسورة) فرفعت راسا في زعل :
- المرايا دي الكسرا منو !
وما أن رفعت راسا حتي (قامت) بالحوض (ما راس حمير) الذى تطاير في الهواء وتناثر إلى قطع صغيرة مما جعل الماء ينهمر من الماسورة (المكسورة) ويملاء المكان .
- كدي أطلعي لي بره وخلينا نقعد نشوف الحاصل ده شنو؟
- الحاصل شوفو براك كان علي أنا ما شايفة الموضوع بستحق ما نحنا حمير من زمان .. كدي هسه اضرب لي حسنين السباك ده يجي يصلح ليا الموية الكابه دي !
- طيب جيبي ليا الموبايل الفي السرير ده ! وللا أقول ليك خليكي بجيبو براي
كان السرير منخفضا لدرجة كبيرة حيث باءت كل محاولاتي لحمل الموبايل بالفشل فكلما هممت بالإمساك به كانت (يدي) تبعده قليلا (ما يد حمار) ، بعد تفكير قمت بالركوع أمام السرير ناحية الموبايل وحاولت أن أستخدم لساني للضغط على الأزرار غير أن ذلك كان غير ممكنا لتخانته (ما لسان حمير) !
- شوفي أقول ليك حاجة طريقة أضرب ليهو مافي فقبل ما الموية دي تغرق الدنيا أنا ح أمشي أناديهو!
- خرجت من الباب بصعوبة .. كانت الشوارع خالية إلا من بضع حمير هنا وهناك يسيرون بلا هدي وكأنهم يحدثون انفسهم بينما تبدو عليهم علامات الذهول والإعياء !

ما أن وصلت إلى منزل حسنين حتي قمت بدق الباب وقد كنت حريصاً على أن أدقه برفق حتي لا يسبب إزعاجا للجيران والدنيا صباح إلا ان الباب كاد أن ينخلع من قوة الضربات وإنفتح على مصراعيه (ما كدارين حمير) .. الشئ الذي جعلني أرى حسنين بوضوح وهو (يفنجط) في الحوش متجهاً نحوي :
- يللا بره بره .. كمان جابت ليها حمير من أول الصباح .. يللا
- يا حسنين يا خوي إستغفر !
- في دهشة : كمان حمار وبتتكلم !
- القصة دي هسه يا حسنين يا خوي خليها كدي شيل عدتك وتعال معاي عشان البيت ده عاوز يغرق
- دي ما المشكلة يا أستاذ
- طيب المشكلة شنو؟
- المشكلة هسه لو عاوزني أنقذ ليكا بيتك ده من الغرق انا أشيل العدة دي كيف ؟

كسرة :
المقال ده بالذات أي كسره فيهو بتبوظو !!

كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟

الفاتح جبرا
[email protected]

تعليقات 32 | إهداء 0 | زيارات 7954

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#609529 [ود الجد]
0.00/5 (0 صوت)

03-13-2013 02:50 PM
استاذي الكبير جبرا
لك مني الف الف تهنيقة وتهنيقة
ودمتم دوما مهنقين
ابنكم الجحش القاعد يتعلم التهنيق


#609053 [الهبار]
5.00/5 (1 صوت)

03-12-2013 11:34 PM
والله بصراحة نحن فى حيرة من امرنا ما فى زول حكم السودان والا استحمرنا يعنى نحن نستورد عماله تحكمنا من الخارج وبعدين ما تسمع شعارات الناس العامله فيها معارضة الواحد اول ما يمسك الحكم ترجع حليمه لعادتها القديمه.يعنى الجميع شبهينا واتلاقينا.
(ياجماعه انعدمت الامانه فى السودان والجميع اصبح لا يعرف الحرام من الحلال بصراحه حال السودان يبكى)
واحد مغترب


#608923 [المشتهي المرارة]
5.00/5 (3 صوت)

03-12-2013 07:04 PM
يا جبرة ما قلنا سجارتك دي بتجيبها من وين؟؟؟؟؟؟؟؟؟؟؟؟؟؟؟؟؟؟؟؟؟
سجارتك كاااااااااربة ،، وراسك مزبوووووووووووووووووووووووط


#608847 [ابو الكجص]
5.00/5 (1 صوت)

03-12-2013 05:14 PM
ما هم مستحمرننا من زمان ياجبرا إنت ياداب حسيت بأنك مُستحمر؟

يا أخي ديل من شدة ما أدمنو استحمارنا وسكوتنا، بل قل قهرنا على استحمارنا فقد كادوا أن يرونا بقال بدل عن حمير.


#608693 [محمد احمد]
5.00/5 (2 صوت)

03-12-2013 01:57 PM
كسرة تالتة اخبار الجنيهين الزادهم مدير النفايات صار فيهم شنو


#608688 [ابو ابراهيم]
0.00/5 (0 صوت)

03-12-2013 01:49 PM
يا اخوي الرئيس ما وجه قبل كده بعشرات الامور في واحد من التوجيهات دي اتنفذ؟ دا كله كلام في الهوا هو الكلام بي قروش؟


#608658 [BABA]
5.00/5 (3 صوت)

03-12-2013 01:15 PM
يا استاذ جبرة انا يطرشنى كان سمعت بماسورة فيها موية فى السودان،
لكن كمان تغرق البيت بالموية فدى ما بصدقها الا اكون حمار.


#608600 [الحردان]
5.00/5 (2 صوت)

03-12-2013 12:12 PM
طعبن انت هسي في المرحلة قبل الاخيرة بالظبط من التشطيب .. ودي اسمها النفتاكوزا السريرية يعني بقيت شغال بي كرت مقفول وكده .. طقه تاني ونخش في المتخارجة البرانية ودي متلازمة نهائية فيها صواني واشارات .. والاخيرة دي مرحلة متطورة القردامسيكال النضمية القديمة .. لكن مافي مشكلة الطب ماشي يطور بنلاقي ليك مخارجة .


#608577 [محمد محمدين]
5.00/5 (2 صوت)

03-12-2013 11:52 AM
يا جبرة أحمد ربك ما شاء الله عندك حوض للسواك وكمان فرشاة ومعجون والله ما شاء الله وكمان مرايا تشوف وشّك كل طالع نازل وكمان الموية غرقت البيت معنى ذلك البيت ماشاء الله وعاوز بعد كده شنو؟؟؟


#608538 [عاطف]
5.00/5 (1 صوت)

03-12-2013 11:22 AM
نركب الفهامة ؟


ردود على عاطف
United States [ابن حلايب] 03-12-2013 08:49 PM
لا عليك الله افعهمها ياخى وهى طائره .


#608515 [louba]
5.00/5 (1 صوت)

03-12-2013 11:01 AM
انا داير اعرف الواحد بعد ما يسوقوه ناس الامن بيبقى ( حمار ) أم ( حماره )


#608483 [أوشيك]
5.00/5 (2 صوت)

03-12-2013 10:25 AM
قلتا لي يا أستاذ حسنين الرقاص ما قادر يشيل العدة ههههههههههههههههههههههه


#608480 [بت الفكي]
5.00/5 (1 صوت)

03-12-2013 10:23 AM
والله قلتاالحق نحنا لو ما حمير نقبل بالحاصل ده


#608457 [ود الحاجة]
5.00/5 (4 صوت)

03-12-2013 10:09 AM
الما بفهم المقال ده يا استاذ يكون من (البشر) !


#608452 [د. هشام عثمان]
5.00/5 (2 صوت)

03-12-2013 10:06 AM
مقالك ده يا استاذ ذطرني بكتابات الكاتب التركي عزيز نيسين الرمزية .. حسنين عشان يعمل حاجة لازم يكون بيقدر يشيل العدة عشام ينقذ البلد (البيت) لكن حسنين (الريس) لا حول له ولا قوة !! تسلم يا رائع


ردود على د. هشام عثمان
United States [عبد الواحد المستغرب أيما إستغراب!!] 03-12-2013 04:05 PM
معليش يا الغضنفر (العيب على النظر!!) وأنا لا حظت أن المعلقون (الموكرون)من أمثالنا المتلهين القاعدين جبرا فى (ارابيز!!) النظام لانه لم يحالفنا التوفيق والحصول على (فيزا تبل الشوق) نعانى من ضعف نظر مؤكد نتيجة نقص فيتامينات ضروريه نضبط بيها إيقاع الكيبورد وخاصة فيتامين (A)ولامجال لتناول الجزر والارز وغيرهما لغلاء أسعارها بينما إخوتنا الذين هُجروا قسرا فجاء التهجير فى صالحهم وكأنهم إتولدوا من جديد ومثل هذه المعينات التى تجعل نظرك حديد من فرط رخصها فى دولة المهجر ترمى لا مؤاخذه للحمير وسائر الكائنات العشبيه حتى لاتصبح معمشه كحالنا!!ولذا ربما لا تلاحظ أخطاء مطبعيه إن جاز لنا أن نقول فى تعليقاتهم او حتى فى مقالات كتابها، ومستقبلا أخى الغضنفر أرجو أن توجد لاخوانك عذرا والله المستعان .

United States [المشتهي الكمونية] 03-12-2013 12:38 PM
الكاف والطاء متجاورين في الكي بورد يا غضنفر

United States [الغضنفر] 03-12-2013 10:56 AM
ذطرني .... تقصد ذكرني


#608437 [ودامدرمان]
5.00/5 (3 صوت)

03-12-2013 09:55 AM
تخريمة بدل الكسرة:
اسعار البرسيم كيف اليومين ديل؟؟


#608431 [صقر الجديان]
5.00/5 (3 صوت)

03-12-2013 09:52 AM
دي ما كانت زيارة لمكاتب أمن النفايات .. التخليك تكتب باللغة الحميرية يا جبرا

و بكرة أحلي و سوداننا جدي الجديان بجد باذن الله .


#608405 [azama]
5.00/5 (1 صوت)

03-12-2013 09:37 AM
والله ذكرتنى حمار الحكيم يا خوى انت ما تبت من الحمير الجد جد ولا شنو ؟ اعمل حسابك المرة الجاية ح نوديك زريببة ادم عبد الشافع بالمناسبة ادم عبد الشافع شيخ البلد عندنا الله يرحمو


#608391 [عبد الواحد المستغرب أيما إستغراب!!]
5.00/5 (1 صوت)

03-12-2013 09:26 AM
قصدك تقولينا ياجبرا (كسره ثابته جديده:أخبار تنفيذ توجيهات السيد/الرئيس بخصوص ملف هيثرو شنو ؟!!) فى عامه الاول !! موسيقى تصويريه< تررررا... ترررا... ترت ترت ... ترم ترم.. صوت تكسر زجاج كشششششو..صوت حركة قطار يجرى بسرعه شديده دنغ..دنغ..دنغ.. وصوت جماعى يأتى من الاعماااااق ليقول لكل فرد فينا عييييش ياااا حماااار !!.


#608382 [حمبرة]
5.00/5 (2 صوت)

03-12-2013 09:13 AM
فعلآ حمير تجيهم مملحة و ( مقنطرة ) و يكوسوها قروضة ..

هاك نفايات هيثرو دي ..


#608378 [منور نور]
5.00/5 (1 صوت)

03-12-2013 09:09 AM
الظاهر يا جبرا عربيات النفايات ركبت خط هثرو وبقيت تشوف الجرجير سدر والكرعين ادنين والله يستر ما تشوف ال zero وتقول صفر


#608376 [الزبال]
5.00/5 (2 صوت)

03-12-2013 09:07 AM
حالتك يرثي لها والشوارع خالية الا من بضع حمير لدعمك لحمل العدة لانقاذ بيتك الغريق ..

الله يعينك و ينصرك في مواجهة اعداء السامية و الحمير .


#608313 [عبده]
5.00/5 (2 صوت)

03-12-2013 08:24 AM
الفاتح جبرا حيرتنا ،،،،، يبدوا أن خط هيثرو ده هو السبب في حمرنتنا


ردود على عبده
United States [جنينة الحيوان] 03-12-2013 09:41 AM
يا راجل !!! ده حماركم البكر عمره 24 سنة .


#608312 [nasereddin]
5.00/5 (1 صوت)

03-12-2013 08:23 AM
والله يا سيدي مقال جميل ، نتجمد زمن معقول علي كدا ،الي أن يرد الله أمره فينا ونرجع بشر تاني.... وعلي هذا الاساس( الكسرة التانية بخصوص تنفيذ توجيهات الرئيس بخصوص خط هيثرو)، دي مفروض تتجمد لفترة رجوعنا بشر تاني... سيدي اذا الأمر كلو يوجه للرئيس ما الحاجة الي قضاء ؟ وما الحاجة الي دولة ؟ وما الحاجة الي خطوط طيران ، اذا كداالحال،يمكن لكل حارة حارتين أو قرية قريتين يتجمعوا ويعملوا ليهم نظام اداري يرضوهو براهم؟ العايزين خطوط طيران يتجمعوا لوحدهم ، والعايزين مشاريع زراعية يعملوها بمزاجهم والعايزين يعملوا سدود وشركات نفط وشركات تنقيب ذهب وبترول ،براهم والعايزين يتمردوا بي أسلحتهم يتمردوا براهم -أصلوا هم متمردين بي مزاجهم..ومافي داعي لي دولة وضرائب وسرقات ما لها نهاية،، وكان الله يحب المحسنين..


#608304 [المشتهي الكمونية]
3.50/5 (3 صوت)

03-12-2013 08:20 AM
لو افترضنا فعلا إنه الكيزان استحمروا الشعب السوداني ، طيب هل في حمار أكبر من البشير؟ وهل البشير استحمر عبد الرحيم محمد حسين ، لأنه عبد الرحيم حمار عديل ما فيه أي كلام ، أمس شفتو في التلفزيون يتكلم عن اتفاقية الترتيبات الأمنية وكمان بين كل عبارة والتانية يقول ليه كلمة بالانجليزي ونظرا لأنه لسانه كبير جدا الكلمة الانجليزية ما بتنفهم لأنها تطلع من خشمه زي الضرطة ، والله بدون أي مسخرة شكله وكلامه حمار جد جد بس فاقد البرسيم، عشان كدة يا جبرة أعكس الآية ، الحمير هم ما نحنا


ردود على المشتهي الكمونية
United States [المشتهي الكمونية] 03-12-2013 12:49 PM
تسلم يا نصر ، والله نحنا لو حكمنا التيبوي بتاعكم دا أفضل لينا من زريبة الحمير العندنا دي

United States [NASRELDEEN ALI] 03-12-2013 09:28 AM
ابداع
والله ضحكت لحدى ما جانى ( التيبوى - بتاع البوفيه ) وقال لى : عمى سودانى ايش فيك هو كلو سودانى كده : موظف بدال شغل فى يضهك ( يضحك ) فنان سودانى فى يبكى رئيس سودانى فى يرقص ... طيب امام سودانى ايش فى سوى ؟!
قلت امام سودانى فى تلاته نوع :
واحد يتهنتك وواحد نسيب البتهنتك بيتلكك وواحد بالجهة الشرقية للنيل بيتلبد ولا بتبلد ماعارفو
قاطعنى التيبوى : عمى انت اليوم فى مزنون ( مجنون )


#608272 [ود الفكي]
5.00/5 (1 صوت)

03-12-2013 07:49 AM
يا فاتح يا جبره دي المرحلة الأولى ولسع راجياك مرحلة اللبده ثم السرج ثم البطان والضناب ثم اخيرا اللجام - عشان يلجمونا مره واحده والله لو فنجطنا او لفخنا او رفسنا كله ما ينفعنا .ولسع يا جبره تعيش كتير تشوف كتير وتنقبض من ناس الامن كتير يخلوك مش ذي الحمير .........


#608211 [زول]
1.00/5 (1 صوت)

03-12-2013 04:57 AM
اوعي يكون رفعو الضنب


#608177 [القرم تفاحة ابل]
5.00/5 (2 صوت)

03-12-2013 01:36 AM
الكيزان فعلا استحمرونا


#608169 [الكليس]
5.00/5 (3 صوت)

03-12-2013 12:34 AM
حظك حظك . دي رحمه من الله عشان كان ناس الأمن لولحو ليك الصوت ولا يهمك ( ماجِلد حمير ) .

بعدين لو قايل ده بيعفيك من الذهاب للمحكمه كوس غيره , بيجيبو ليك هوستن وناس خبره في نقل
الحمير .


#608162 [قلام]
5.00/5 (3 صوت)

03-12-2013 12:07 AM
المقال دا بي كم كرت يا جبرا


#608137 [wedhamid]
5.00/5 (4 صوت)

03-11-2013 11:09 PM
أخونا الفاتح ...
كدى بسمل و قولينا الجماعه فى جهاز الأمن بالظبط عملوا فيك شنوووووووو؟؟؟؟؟؟


ردود على wedhamid
United States [سامر المدنى] 03-12-2013 07:53 AM
ماتخليها مستوووووورة يا ابوالشباب

United States [bringi] 03-12-2013 02:27 AM
3alik alnabi ya ostaaz alnoo3 da bjiibo liik mino..?????

United States [سوداني مبارك] 03-12-2013 02:03 AM
يعني ما فهمت يا ود احمد ما عاملو زي الحمار انت قايلو كاتب المقال ده ساكت


الفاتح جبرا
الفاتح جبرا

مساحة اعلانية
تقييم
9.99/10 (14 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة