الشرطة : بدون إيصال ذاااتو
03-13-2013 04:35 PM

دق جرس الباب .. فتحته .. وجدت أمامي شاب في مقتبل العمر يمسك بيده ورقة ملفوفة .. بعد السلام .. إتفضل .. دخل وجلسنا
- والله يا استاذ أنا من المتابعين لمقالاتك الأخيرة وحثك للناس إنها ما تدفع إلا بأورنيك 15 لكن عاوز أحكي ليك القصة دي
- إتفضل
يوم الأحد الماضي الموافق 10 مارس في الضهر كده كنا واقفين مجموعة من الركشات قدام جامعة الأحفاد في إنتظار (الرزق) فجأتن يا استاذ وقف ليك دفار مليان عساكر .. تلبو من الدفار وكل عسكري دخل ليهو في ركشه
- يا زول أمشي قدام على القسم؟
- في شنو؟
- لمن توصل هناك ح تعرف
ومشينا قسم (الربيع) لقينا القسم مليان ركشات والناس واقفة ، في شنو يا جماعة فالو لينا (لجنة تنظيم ورقابة عمل الركشات) عملت حاجه إسمها (إستيكر) والأستيكر ده بي كم؟ قالوا بواحد وأربعين ألف (عاينو الواحد ده !!)
في اللحظة دي واحد من العساكر (خاطب الجمع) في لهجة آمرة :
- أي زول عندو قروش يجي هنا يعمل الإجراء والناس الما عندها قروش دي تخلي الركشات بتاعتا وتتخارج تمشي تشوف ليها قروش !
لحسن الحظ يا أستاذ القروش كانت معاي مشيت دخلتا على (المساعد)
- عاوز أدفع الرسوم دي وأعمل الإجراء القانوني
- أمشي صور لينا الرخصة وشهادة البحث
مشيت صورت الرخصة وشهادة البحث ودخلتا على (المساعد شرطة) تاني وأديتو ليهم قام دبسهم بالدباسة وجدعهم في الدرج ..
- جيب الواحد والأربعين .. الواحد ده أهم لينا من الأربعين ذاااتا
- هاك دي الواحد وأربعين
بعد ما عداهم وختاهم في (صفيحة مليانه قروش) قمتا سألتو :
- الإيصال وينو؟
- إيصال شنو؟ ما عندنا ليكم إيصالات .. أمشي للزول داك يعمل ليك شهادة
ومشيت للزول القالو ليا المساعد وعمل ليا الشهادة العاملة زي شهادة تخريج الروضة دي ! (وأداني الورقة الكان شايلا) :
إسم المالك – إسم السائق- عنوان المالك- عنوان السائق رقم اللوحة .. وأهم حاجة (سارية المفعول لمدة عام من الإصدار) .. عشان ده دخل سنوي معتبرشوف في كم ركشة في العاصمة بس !!
قال لي والدمعة في عينية :
مش حرام يا أستاذ الورقه دي بي 41 ألف ..والله يا أستاذ القروش دي نحنا بنطلعا لامن روحنا تطلع .. شوف بي بساطة وبالقوة الناس دي تجي تشيلا مننا .. !!
إنتهت المأساة .. بقي أن تعلم أن هذا الشاب لديه بكالريوس تربية جغرافية ولغة إنجليزية ودبلوم في شبكات الكمبيوتر ودبلوم في التحليل الإحصائي ودبلوم في الـGPRS ويعول أسرة مكونة من 7 أفراد !
كدي يا جماعة الخير قبل كل حاجة نسال السيد وزير الداخلية والسيد مدير عام الشرطة (دخل الشرطة بالموضوع ده شنو؟) ؟ إذا ما عندها دخل (تكون مصيبة) وإذا عندها دخل (تكون المصيبة أكبر) لأنها بتشيل قروش بدون ما تدي الناس دي إيصالات .. طيب الشرطة تشوف عاوزه ياتو واحدة في المصيبتين ديل وتتكرم بالرد علينا !!
بالله مش شئ مضحك ومبكي في آن واحد .. ونحن نعلنها حملة من أجل عدم الدفع بأي أيصال آخر ألا أورنيك 15 نقوم نلاقي الشرطة تشيل قروش الناس وبدون إيصال ذاااتو !! لا وكمان لو ما دفعتا يحجزوا الركشة ورزقك ينقطع وأولادك يجوعو وما يلقو البياكلوهو !!
طبعاً الشئ الطبيعي والمفروض يحصل في (حاجه تمس الشرطة زي دي) إنو (المكتب الصحفي) يسلم تقريرو اليومي (عما جاء في الصحف) للسيد مدير عام الشرطة .. يقوم السيد مدير الشرطة يقرا المقال ده ويطلب من مدير مكتبو الإتصال بالصحيفة وأخذ رقم هاتف العبدلله .. ويتصل فيني مدير المكتب يقول ليا السيد مدير عام الشرطة عاوزك في موضوع لو سمحتا تشرفنا بكرة الساعه عشرة صباحا .. وتقوم المدام تصحيني تقول ليا :
- إنتا ما عارف ولدك ده ممتحن .. قوم عشان تراجع معاهو شويه وتوصلو المدرسة !!

كسرة :
الإيصال الما 15 عرفناهو .. كمان بدون إيصال ذاااااتو ؟

كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟

[email protected]

تعليقات 41 | إهداء 0 | زيارات 7316

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#611176 [ابو احمد]
0.00/5 (0 صوت)

03-16-2013 02:38 PM
اخونا الفاتح تصدق إنك بتنفخ في قربة مقدودة ...
يعني شنو ماعندهم إيصال (15) هي البلد كلها ماشة كده ... تدفع ثم تدفع ثم تدفع غصبا عنك في كل مناحي الحياة في السودان ...
وده يمكن يكون شيء بسيط بالنسبة للحاجات التانية البتاجروا فيها من قوت الشعب وصحة الشعب وحياة الشعب زاتها يعني زي ماقال (الزبير ) في منطقة مروي نسال له الرحمة نص يموت ونص يحي ...
يعني حينفذوا وصيتو دي كيف ؟؟؟؟ مالازم يعملوا كده ...
والمشكلة إنو أنا مستغرب الشعب ده عايز شنو تاني يسوا ليهو عشان يثور ...


#610532 [خالد حسن]
3.00/5 (2 صوت)

03-15-2013 12:08 PM
البلد دي حالتها تجنن
عندنا نهرين والبلد عطشانه
وعندنا سدين والكهربا قاطعه
عندنا جيشين وحدودنا منتهكه
وشرطتين ومطلعين ميتينا
وحمارنا البشير عنده حمارتين واولاد مافي
البلد دي راكبه حمار اسمه عمر
كما غار الحمار مابنعدل حالنا


ردود على خالد حسن
United States [aviv] 03-15-2013 08:10 PM
هههههههههههههههههههههههههههههههههههه ,الله يهون


#610417 [ابكرونا]
0.00/5 (0 صوت)

03-15-2013 08:00 AM
اى تعامل مع الشرطة لايتم باورنيك15 امشى اقرب مركزترخيص للعربات تدفع فقط اقل من نص القروش بدون اورنيك 15 بالاضافة لدعمالشرطة ودعم الدفاع المدنى ودعم الطلاب وووووووووو


#610401 [malik mohd amin]
1.00/5 (1 صوت)

03-15-2013 07:10 AM
كدا الشرطة فتحت بند ( إتصرّفوا ) و الله يستر ... غايتو الحكومة دي تب ما قصّرت مع الشعب قدر ما حاولت تستفزّوا عشان يثور ضدّها غلبتا الحيلة .. لكن أظنّها حكمة من الشّعب ( بلداً زي دي يسلّموها منو ؟؟ ) جنّاً تعرفو .. شعب غتيت بشكل


#610335 [زول]
0.00/5 (0 صوت)

03-15-2013 12:13 AM
حقا نحن نعيش فى دولة الفوضى ( الاسلامية) والاسلام براء من كل الحاصل عندنا فى سودان الانفاذ وبالمناسبة يا استاذ المسؤلية تمس راس الدولة مباشرة ومش بس الشرطة التى كانت من المفترض ان تكون متبعة القانون فى كل معاملاتها


#610216 [عبده الحاج حسن]
5.00/5 (1 صوت)

03-14-2013 06:23 PM
أنا أجزم بأن بعض الرُتب الشرطية لاتفقه شيء حتي في مجال عملها إلاشئ واحد وهو الإزدراء وإحتقار المواطن البسيط ،أنا بجي أتعذب أقصد أأجز مع الأولاد كل سنتين ونقول نشوف الأهل والأولاد إتعرفو علي بلدم،بدخل البلد عن طريق المطار ومافي أي حاجة من الناس البسجلو ديل وهم بكتبو شنو؟ أنا ماعارف، وبمشي تسجيل الأجانب برضو مافي حاجة، والكلام دا ليهو عشرة سنين،القصة إنو لمن أجي مسافر وعند واحد من جواجز الضفة الغربية الكتيرة دي بقولو لي إنت مطلوب لأنو إسمك دا مُطابق، بقومو برسلوني لواحد من المكاتب الفيها الدبابيرالكبيرة دي وهي بتطوطح بالكُرسي ،كان حتي حييتا وما برٌدو التحية، بقوم بحكي أنو أنا مطلوب وداير أشوف الحاصل شنو ، وهو لسع بتلولح بالكرسي،بقول ليّ عندك ما يثبت إنك سوداني؟ بقول ما معاي، بفتكرو حا إقول لي أمشي لانو ما بقدر أقارن بينك وبين المطلوب ، بقوم بقولي إنت ما حا تسافر إلا تراجع حاجة إسمها القوائم، والكلام دا دايماً بكون بعد نص الليل والولية والأولاد مُتنشنين وحرق إعصاب وبلوة،وأنا أشيل وأسأل ياسعادتك الزول المطلوب دا ما عندو تاريخ ميلاد ولا محل ميلاد ولا صورة عشان تقارنوه بي أنا ؟ طبعاً الرد جاهز طوالي يا زول ما عندنا أقعد أنتظر، المهم بعد إخجل من نفسو بقوم إتصل وإعمل فيها مشغول وأنا قاعد بقلي من جوه ،علي أي حال بقوم بعداك بقول لي قوم يازول خلص أمشي سافر قالو دا ما إنت،طبعا أنا بكون داير أهجم عليهو وأكسر ليهو رقبتو لأنو مقعِدني وهو ما فاهم هو بعمل في شنو، الله يا جماعة هذه السألة تكررت أربعة مرات، وفيها مرتين بلقي نفس الضابط،، وبتصرف معاي نفس التصرف ،أخر مرة قبل شهرين،وأنا مقادر مكتبو سألتو، يا سعادتك المسألة دي حا تستمر لمتين؟ قال لي كلٌ ما تجي هنا حا يحصل ليك دا، طيب ياخي لمن هسي قلت دا ا أنا،مش يفترض تكتبو ملحوظة بالبيانات بتاعتي وتقولو دا ما أنا ،قال لي يازول إنت داير تعلمنا شغلنا،
وطبعا أسرعتا الخطي قبل ما إغير رايو ،
ودا حال الشرطة ومنسوبيها،


ردود على عبده الحاج حسن
[محمد حسن] 03-24-2013 12:51 PM
هل تصدق نفس اللي بحصل معاي بالتفصيل الكلام دا من سنة 1973 وحتى الآن أنا كل سنة بنزل السودان وكل سنة بحصل معاي هذا السيناريو بكل تفاصيله التي ذكرتها يا ود الحاج .. هل تصدق في واحدة من المرات نزلوني من داخل الطيارة .. الحل شنو ؟؟


#610200 [حاجة تجنن]
0.00/5 (0 صوت)

03-14-2013 05:42 PM
الفرق شنو بين الشرطة وجماعات النهب المسلح؟؟.. ما كووولها قوات مسلحة!!.. الفرق انو الاولى نظامية والتانية متفلتة.. الاولى بتنهب لصالح السدنة الكبار والتانية بتنهب لصالح نفسها.. بس شغالين نفس الشغلة.. ترويع وارهاب وقلع حق الناس.. يعنى المفروض يكون نفس العقاب يطبق عليهم الاتنين.. يا مواطنين ثوروا ضد الظلم ورجعوا حقكم وحاكموا الناس البينهبوكم نهاراً جهاراً..


#610191 [د/يوسف الطيب/المحامى]
0.00/5 (0 صوت)

03-14-2013 05:33 PM
الأستاذ الكبير/الفاتح
السلام عليكم ورحمة الله وبركاته
ان عدم وجود دولة المؤسسات يقود لمثل هذا التصرف المشين فنسأل الله الكريم أن يسخر لوطننا الحبيب من يصلح حاله المائل .وذلك ليس على الله بعزيز.


#610133 [mansour]
0.00/5 (0 صوت)

03-14-2013 03:53 PM
بسيطه وانت قايل ارنيك 15 ده بيردع التعدي علي المال العام والله في راعي للمال العام من اصلو


#610049 [lwlawa]
5.00/5 (2 صوت)

03-14-2013 01:34 PM
لا خير في اورنيك 15 ولا بدون اونيك ..؟؟..هنالك حفائق لابد ان يعرفها اي سوداني بقي داخل السودان القديم انكم عمال (سُخْرَة)..للكيزان واذنابهم..؟؟.. واورنيك 15 لا يحمي المال العام.
بلد حاميها حراميها فما فائدة اورنيك 15 المالي ...؟؟


#610041 [Ahmed Saeed]
5.00/5 (2 صوت)

03-14-2013 01:22 PM
قلت لي الشريف جاب شركه عارف زي الجايب صيوان لعرس بتو.... قتلتني بالضحك .... الله يحفظك من شرهم.


#609942 [عبد الرحيم موسى]
5.00/5 (1 صوت)

03-14-2013 10:32 AM
يااستاذ كما قالوا كثرة الطق يفك اللحام ان شاء الله حيجى يوم يتكرن الشعب السودانى يقوموا يقلبوا هذه الحكومة عما قريب ان شاء الله هذا الشعب الصابر كثير الاحتمال ولكن عندما تحين الساعة لن تقف أمامها حكومة ولا شرطة وهذه الظلامات يسأل عنها الرئيس البشير ونائبه البارد على عثمان فمزيد من فضح هذه السلوكيات العجيبة من الحرامية الموظفين نشالى طعام الشعب والفقراء والشرطة ذااااااتااااااا حاميها حراميها !!!!!!


ردود على عبد الرحيم موسى
United States [malik mohd amin] 03-15-2013 07:14 AM
ساعة أبوي دي بتجي متين .. بقت علينا حكاية الشايل اسكين لليوم الأسود .. أسود من اليوم شنو يعني ؟؟ يوم السماية ؟؟


#609922 [محموم جدا]
5.00/5 (2 صوت)

03-14-2013 09:59 AM
أخي الفاتح أنا كنت في إجازة و معي السيارة التي حضرت بها لتقضية الاجازة و دفعت رسوم المرور الموقت و دفعت التامين و في يوم من الايام و أنا أقود سيارتي إذ بشرطي المرور يقف أمامي بحركة بهلوانية و صفارة أوف سايد طويلة و قفت على جانب الطريق و أخبرته بأن السيارة غير مرخصة عندكم لكن أوراق العبور و التأمين و الرخصة الممنوحة من الدولة التي حضرت منها هنا و الطفاية موجودة هنا و لما لم يجد شئ قال لي التظليل لازم يزال فقلت له يا أخي التظليل لا يحتاج لإذن في تلك الدولة لأن مناخها يشبه مناخ السودان و الجماعة الخبراء عندهم حسبوها صاح لأن التكييف يوفر عملة صعبة على الدولة فرد علي أنا ما عارف كل الكلام دا لكن أحسن شيئ تراجع الضابط وأين هو هناك تحت الشجرة و ذهبت الى الضابط الذي إبتدع مكتبا و لا أدري كيف ادخل العربة في ذلك المكان الضيق و معه مساعد لزوم مسك الفلوس و إصدار أورنيك غير مختوم و يشبه أورنيك 15 المتهم لكن لا ختم مالية و لا يحزنون فبدأت أشرح كل ذلك الدرس الطويل عن أهمية التظليل لسيارة في السودان لما يوفر من الطاقة على المحرك و التكييف و بالتالي الاسبيرات التي تستورد بالعملات الصعبة و قطعا سيساهم في تخفيض الدولار و بعد لأي و جهد أقنعني بأن أدفع مبلغ الثلاثون ألف لأنهم أستخرجوا الايصال و لو داير تراجع الادارة ممكن لكن أنصحك بصفة أخوية لا تضيع زمنك و لو في واحد وقفك لحدي نهاية الاجازة أعطه هذا الاورنيك و ستحل المشكلة و الحمد لله سافرت بالسيارة الى عدة مناطق في السودان و الى أن رجعت لم يوقفني أحد فعرفت بركات ذاك الضابط الشاب و أورنيكه الغير مختوم مدد يا شرطة السودان


#609914 [shereen]
5.00/5 (1 صوت)

03-14-2013 09:47 AM
احكي ليك مشيت اسنبدل رخصة السواقة بسودانية ادخل من هنا واطلع من هناك وفي النهاية قالوا لي ادفع 317 دفعت ولانني تعبت من الجري من مكان لاخر لم اعاين الايصال الا بعد يومين تخيل مكتوب فيه كم 297 فقط (مائتين وسبعة وتسعون جنيها لا غير ) عربي وحساب اها نشتكي لمنو والشرطة والقوات النظامية كلها في خدمة الشعب المغلوب علي امره حسبنا الله ونعم الوكيل


#609902 [عبد الواحد المستغرب أيما إستغراب!!]
5.00/5 (1 صوت)

03-14-2013 09:30 AM
والله يا جبرا وكأن الخالق عز وجل أراد أن يبتلى أمتنا بهذه الجماعه ليبلونا (اينا أحسن عملا!!)وأنا ازيد للاراده الربانيه وأقول(أينا أكثر صبرا!!)وعلى كل حال القولين يفضيان الى الجنه بحسب وعد من الرحمن الرحيم الذى لايغفل ولا ينام،وفى نفس الوقت الخالق عز وجل إبتلى هذه الجماعه بأن سلطهم علينا علهم يحسنون إدارة شئوننا وصبرنا بشكل لايفضى الى فقدنا للصبر وننكص على عقبينا(لاحظ دى عملوها قبل كده أصحاب رسول الله صلى الله عليه وسلم فى عصر أبوبكر الصديق رضى الله عنه وأرضاه وقضيتهم كانت ماليه أيضا متعلقه بالزكاة فقط ورغم إنها كانت فريضه إسلاميه فقد تمرد الصحابه وكل منهم كان له مبرراته إلا أن اورنيك 15بالتأكيد لم تك من بين الاسباب التى أدت الى تمردهم وخروجهم من ملة الاسلام رغم علمهم سلفا بأن هناك آيه قرآنيه تعاقب المرتدين مهما كانت المبررات!!).
والشىء الذى إستغرب له حقيقة أن أرى سودانيون لحما ودما فى مواقع مسئوليه وهم يجارون النظام فى ظلمه الذى لا يتوقف وينفذون له آوامره بصرامه وعلمهم علم يقينى أن النظام عبث بمقدرات البلاد والعباد على مدى ربع قرن من سنوات تسلطه وأفلس خزائنه وطفق يجوس بين الخلائق بحثا عن أى شىء يسد به نهمه للمال والاعجب أن هؤلاء المسئولون الذين لا يردون للحاكم طلبا وكأنهم لايعلمون إنهم عند الخالق عز وجل فى صعيد واحد وميزانهم عند ربهم واحد وهم فى هذه الحاله مثلهم مثل سحرة فرعون يؤمرون فيطيعون!!ونسأل الله أن يؤوب هولاء المسئولون الى ربهم كما آب سحرة فرعون.


ردود على عبد الواحد المستغرب أيما إستغراب!!
United States [ياسر] 03-15-2013 03:10 PM
أخونا طلال , راجع تعريف كلمة " الصّحابة " إصطلاحا .

United States [طلال عمر] 03-14-2013 09:33 PM
يا أخ عبد الواحد إنما الصحابة هم السابقون الأولون من المهاجرين و الأنصار و ليس كل من أسلم في حياة رسول الله صلى الله عليه و سلم يعد صحابياً. لم يكن المرتدون من الصحابة بل كان جُلّهم ممن أسلم من بعد الفتح و لك التحية


#609896 [Fato]
5.00/5 (1 صوت)

03-14-2013 09:24 AM
حسبى الله على هذه الحكومة يعنى ده نسميه قلع عديل وبحمرة عين ومن غير أيصال أورنيك15 عشان نضمن أنها دخلت للمالية ده يعتبر قانونا نصب وأحتيال وأخذ قروش الناس بالباطل وغدا نسمع بدخولهم للبيوت لأخذ أتاوات هواء الله البنتنفسو من غير نفتح فمنا ونقول بغم,طيب الحل هو الخروج عن طاعة هؤلاء اللصوص والتدافع نحو الشارع والقيام بالمظاهرات حتى لو مات ربع الوطن فباقى الأحياء يعيشوا بكرامة من غير ذل ومهانة.الحل أن نتوحد لكنس حكومة الكيزان لعنة الله عليهم فى الدنيا والاخرة.وشكرا جبرة وواصل حتى تنمو بذرة الثورة.


#609834 [mutasim]
5.00/5 (2 صوت)

03-14-2013 07:49 AM
هو يا استاذنا فضل حرامي ما قدم في الشرطة
__ و لو ما مصدقنا اسال ناس المباحث عن نظام البرنده


#609827 [حسن الصادق]
5.00/5 (2 صوت)

03-14-2013 07:40 AM
والله مشكور ياستاذ انك تناولت هذا الموضوع وهو موضوع كبير للقف واخذ المال العام بدون وجه حق وبدون محاسبة قبل كم شهر كنت فى اجازة وحضرت احدى الموظفات تطلب رسوم النفايات وطبعا ايصالات مطبوعة وين مامعروفة ومدون فيها كل شى الاسم وخلافه تدفع تقطع ليك الايصال سالتها عن اورنيك 15 قالت ياعمى انا ما بعرفو نحن ادونا الايصالات دى بس. طبعا مادفعت ولكن يظهر جاءت فى اليوم الثانى ووجدت ام الاولاد طبعا دفعت ليها علشان كدة ياستاذ انا بناشد كل المواطنين عدم دفع اى رسوم الا باورنيك 15 وكمان من اليو حقو نسميهو (ايصال جبرا ) اى زول يطالبوه بدفع رسوم يقول ليهم ايصال جبرا وينووتكون كسرة لاى ايصال زى خط هيثروا.


#609762 [غاندى]
5.00/5 (1 صوت)

03-14-2013 12:16 AM
والله الليلة فى برامج المحطة الوسطى الشريف بدر فقع مرارارارارارارت جد جد جد جد ابو ابو ابو صليبنا زاتو وبس يا داب عرفت ليش نحن نرجع الى الوراء فى عجلة تناقصية وليس فى عجلة تسارعية اذا كان رئيس مجلس ادارة سودانير ما قادر يجاوب على سوال واحد فقط من الاسلة التى طرحت عليه واسفى على السودان من الزى الشريف بدر والله واالله راعى الضان فى الخلاء يخجل من كلامو بالله كيف زى ديل يولهم امر شعوب اذا كان ماقادر يقول ليهو جملة مفيده واحده


#609756 [الفاتح]
5.00/5 (2 صوت)

03-13-2013 11:50 PM
نصيحة اللواء شرطة / أحمد المرتضى أبو حراز لخلفه فريق شرطة / هجو محمد أحمد في مذكرة التسليم والتسلم
يقول اللواء أبو حراز الى الفريق / هجو

( الله الله .... الجوازات أمانه .... الله الله الشرطة أمانه .... الله الله الوطن أمانه .... الله الله .. الرعاية أمانه .... أدي الأمانه بحقها ... أنهض بالمسئولية .. عصاك قبلها لا إله إلا الله والضار النافع هو الله ... فإن أحببت فحب لله أما لنفسك فلا وألف لا .. ) إنتهى

من ضيع الأمانه؟؟؟؟؟؟ من ضيع الأمانه؟؟؟؟؟؟؟؟؟ و ها هي الشرطة تسرق المواطن الغلبان نهارا جهارا

لا حول ولا قوة إلا الله .... حسبنا الله ونعم الوكيل


ردود على الفاتح
United States [عبد الواحد المستغرب أيما إستغراب!!] 03-14-2013 09:52 AM
عن أى قيادات شرطيه تتحدث أخى الفاتح؟!! قيادات الشرطه هى آكبر جوقه داخل النظام تمارس الآفك والنفاق والضلال بكافة مستوياتهم وهم يعلمون إنهم آفاكون ومنافقون وضلاليون وهمهم آن يكملوا ما بدأؤوه من مبانيهم الشاهقه قبل أن يجرفهم طوفان الإحاله للمعاش اوالإقاله التى لا تتوقف فى هيئة الشرطه بالذات !! وقادة الشرطه يسعون لارضاء الحاكم اولا ثم الزوجه والولد وليس فى ذهنم من قريب او بعيد إرضاء الواحد الاحد!! أما المذكره التى تركها لخلفه أراد أن يخاطب بها الرتب الوسيطه والصغيره بأن لا يستمعوا الى الشائعات !!التى قد تحيط به بعد تركه لموقعه وكأن هؤلاء الضباط قادمون من كوكب آخر وبصراحة مشكلة المسئولين فى بلادنا إنهم يذكروننا دائما بأسطورة النعامه التى تدس رأسها فى الرمال ومؤخراتها كفاتح كفه يتعبد الشمس ولا حول ولا قوة إلا بالله .


#609734 [صقر الجو]
5.00/5 (1 صوت)

03-13-2013 10:48 PM
فكرة حصر الركشات ومعرفة تفاصيل عن المالك والسائق فكرة صحيحة ، بس الرسوم كتيرة ومفروض يكون في وصل ، هناك الكثير من الحرائم التي ترتكب بواسطة الركشات، وحصرها سوف يقلل كثيرا مه هذه الجرائم، يعنى نتفق معاك في موضوع الايصال، لكن ايجابيات حصرها يفوق سلبية (لهط) الفلوس بكثير


#609721 [امدرماني الركابية]
4.00/5 (3 صوت)

03-13-2013 10:22 PM
شعب باطل خيبان يستاهل اكثر من كده..........قال شعب معلم قال؟؟؟؟؟؟؟ ايصالات ايه واورنيك 15 ايه؟؟؟؟ الشعب لابد ان يثور بداية من اصحاب وسائقي الركشات مرورا بكل اطياف المجتمع والا سوف نكون عبارة عن هياكل عظمية في وطن صار فيه الحرامي هو سيد هذا البلد المنهوك.......


#609715 [الزراف]
5.00/5 (2 صوت)

03-13-2013 10:04 PM
ولا تجزع لحادثة الليالي فما لحوادث الدنيا بقاء ..
وتلك الايام نداولها بين الناس ..
لو دامت لغيرك ما آلت اليك
بكرة انشاء الله احلى


#609713 [wedhamid]
5.00/5 (1 صوت)

03-13-2013 10:01 PM
أخى العزيز التشيكى ....نذدار ...أهوى....هوّن عليك و لا تخللى نفسك حار علينا نحن الشعب الفوق الطوّه... زى ما ذكرتوا يا الديموقراطيين السودانيين فى يراغ للرئيس التشيكى الجديد مذكرين فخامته بالــ(( بما يقوم به النظام الديكتاتوري الحاكم في السودان تجاه مواطنيه من جرائم بشعة .
النظام الحالي وصل الي السلطة عن طريق انقلاب عسكري في العام 1989 ومنذ ذالك التاريخ يحكم شعبه بطريقة وأسلوب القمع والإرهاب والتعذيب والقتل الجماعي. خلال ال 24 عاماً من حكمهم لقي أكثر من 800000 الف مواطن سوداني حتفهم نتيجة الحروب الأهلية في مناطق مختلفة من السودان وأكثر من 3 مليون مواطن تشردوا نتيجة الحروب التي يشنها النظام الإرهابي الحاكم في السودان الى دول الجوار.
النظام الحاكم في السودان نظام لا يتمتع بالكفاءة وهي حكومة فاسدة لا تعمل من أجل حماية ورعاية شعبها بل تشن عليهم الحروب وحملات الإبادة الجماعية. الأمر الذي ادي محكمة الجنائيات الدولية إصدار أمر القبض علي الرئيس السوداني وعدد كبير من اركان نظامه وتقديمهم للمحكمة الدولية لارتكابهم العديد من الجرائم في حق أبناء شعبهم الأعزل .
لكل هذه الأسباب مجتمعة واستمرار القمع والعنف و الاغتصاب والتعذيب والقتل وقمع الحريات العامة وحقوق الإنسان ومنع التجمعات والمنظمات وغياب دولة القانون ))

و كما تعلم يا التشيكى .... مقاىمة هذا النظام لم يتوقف يوما بل و رفعت جهات عديدة السلاح لمحاربته و كلما حاول الشباب الثورة بالخروج للشارع لإسقاط النظام نرى كتائبه و ذئابه ينهشونهم بشراسة شديده و شراهة فى إنتهاك حتى الأعراض ...فهو نظام تم إعداده و تدريبه بواسطة الحرس الثورى الإيرانى و المرتزقه اللموم من كل أصقاع الدنيا.... إن هذا النظام قد فاق فى الإجرام فى حق الشعب السودانى الأعزل.... جرائم النازية و الفاشستية فى العنف و العدوان... النظامان الذان لم ينهارا إلا بتضافر كل الشعوب و الأمم مع نضالات شعوبها المقهورة و تلك التى سطوا عليها.. ...لذا أرى أنه ليس من العدالة أن تقول لنا (تستاهلو....خالينهم ليه والله بعد دا مافضل ليهم الا ينطو في بيتكم ويستبيحو نسائكم وانتو قاعدين تتفرجو< و هذا ما نخشاه>.... عشان بقيه الشعب جاهل وموهوم..... تستاهلو اكتر من كده....)

نحن لا نلومك على إختيارك للبقاء بعيدا عن البلد و لكن برضوا نىيد منكم العمل على مناهصة هذا النظام من على البعد و لذا نثمن مذكرتكم الأخيرة للرئيس التشيكى ...مع تحياتى للرفاق و الكبير باسعيد.....


ردود على wedhamid
United States [انا] 03-14-2013 01:55 AM
يا اللخو انت دخلت من باب الخروج....!!


#609712 [حمد]
5.00/5 (1 صوت)

03-13-2013 10:00 PM
تصدق انو النيابة نفسها بتحصل من غير اورنيك 15 ورق دبل كيت ساكت وديل الراجينهم يحمونا ونشكيى ليهم اللصوص والحرامية وبعد دا يجيك قاضى من المحكمة العليا يقول كلام فاضى عن العدالة فى السودان


#609692 [انصاري]
4.94/5 (5 صوت)

03-13-2013 08:49 PM
في تقرير المراجع العام، اكثر وزارتين مخالفتين تجنيبا للمال، وبيع عربات الحكومة، خوه.. خوه، وصحبة.. صحبه،ودفعة..دفعة، ولعب في عطاءات التشوين، وتبديد للمال العام فسادا، واستلام شركات وهمية لمبالغ دون وجه حق، هما الدفاع والداخلية الجيش والبوليس حرامية وقوات نظامية انت شكلك راسك كبير وضد الشريعة جيبوا ليهو النظام العام " التهمه كلام فاضح" واتهام الذات البوليسية!! وشعار القداسة،، وقضاة النار جاهزين، وعندهم نسبة من الغرامه وفقا لفقه الاستثمار!!!!! (وقدوا قدوا) يقدل بالسوط، (يباطن) الحريم في حوش المحكمة (صبحيه)!!، امام قضاة النار!!، المحروسين الكاش والكلاش!! والشريعة المدغمسة!!، وبعد التصفية بعد الحصاد في القضارف !!!


#609656 [MAHMOUDJADEED]
4.75/5 (7 صوت)

03-13-2013 07:14 PM
كل دولة بايصال بتاعو الا السودان ما عندو ايصال ليه كدة بس كدة بس .


#609654 [الرشيد فضل]
5.00/5 (4 صوت)

03-13-2013 07:10 PM
والله يا جبره كسرتك الثابتة دي بعد شوية بتبقي بالصفحات ...


#609652 [aaa]
5.00/5 (6 صوت)

03-13-2013 07:04 PM
ياجبره انت قديم لسه من زمن الايصال الورقى الناس ديل فاقو الامريكان فى التكنلوجيا القروش بتاعتكم حتنزل فى السستم يعنى بالواضح كده حقكم فى الحفظ وحترجع ليكم فى الخدمات انشاء الله ومن ضمن الخدمات الاكسجين المجانى القاعدين تتنفسو فيه ده .


#609651 [المتفائلة جدا]
5.00/5 (1 صوت)

03-13-2013 07:03 PM
يا أستاذ السودان بقى كله عريان ..وهذا زمانك يامهازل فامرحى ...


ردود على المتفائلة جدا
United States [المتفائلة جدا] 03-14-2013 01:38 PM
أنا أقصد بكلمة عريان مش الشعب طبعا لكن أقصد الدواوين الحكومية يعنى الأستاذ جبرا قدر مايشد الغطاء عشان يغطى حتة تنكشف حتة تانية وحيغطى شنو ولا شنو ؟؟
أما الإجابة على الجزء التانى لست نائمة ولاراسى داش ..لكنى متفائلة بأن نهايةهذه العصابة قربت ومتفائلة جدا كمان ..وأين أنت ياأخى من تفاءلوا خيرا تجدوهوا؟؟
وكدى خلى تفاؤلى أنت منور نور ليه ما هى الدنيا كلها مضلمه فى السودان ..
يا أخى الليل مهما طال بعده نهار ومهما تضيق سوف تفرج بإذن الله..هذا يقينى ..

United States [منور نور] 03-14-2013 08:49 AM
ما دام السودان بقه كله عريان بس وريني تفاؤلك الجدا ده جاء من وين ؟؟!!!!!!
ورينا سر التفاؤل في زمن المهازل ........ انت صاحيه ولا داشك رأس ...... أقصد راسك داش


#609650 [زمن]
5.00/5 (2 صوت)

03-13-2013 07:01 PM
مقالاتك مخيفه ياجبرا .. دائما مانصاب بالهم والغم والخوف من المجهول .. من بداية النفايات اصبحت
كلما قرأت لك مقال اصبت بحاله من الكآبه والتفكير المتواصل فى حال البلد والاهل والغلاء والفوضى
من ولاة الامر ؟؟ وربن استر


#609649 [مرق خلاها و طفش]
5.00/5 (7 صوت)

03-13-2013 07:00 PM
الناس ماقادره تفهم انو دى عصابه او بالاصحه همباته لانو العصابات بتكون اكثر تنظيما. ناس تلبت من دفار و كل واحد ركب ركشه و اقتادو اصحاب الركشات لحوش كبير وهناك اما الدفع او ان تترك مصدر رزقك و ترجع بيتكم تونس بنات افكارك. خيارين احلاهم مر مش كده؟

الهمباته ديل مما جو حكمو على الشعب السودانى المنهوب بالسجن المؤبد مع الاشغال الشاقه. هم المسلمون و نحن الكفار ولذلك توجب علينا دفع الجزيه وكل مانملك بالنسبة لهم غنائم حرب. اما الداير يتكلم عن قانون و حريات و ديموقراطيه فاليرتطم بارض الواقع برفق شاء ام بعنف ولكن يجب ان تفيقو و تصحو من تلكم الاحلام.

لااجد تفسيرا اخر لتصرفاتهم غير هذا التفسير


#609648 [ابونضال]
5.00/5 (1 صوت)

03-13-2013 06:55 PM
يبدو انو الكسرة حتنبثق منها كسرة وكسرة الكسرة حتنبثق منها كسرة وكسرة كسرة الكسرة حتنبثق منها كسرة .......كسرة: موضوع النفايات حصل فيه شنو؟...


#609642 [أحمد السيد]
5.00/5 (2 صوت)

03-13-2013 06:42 PM
كلام يحير المابتحير


#609637 [المشتهي الكمونية]
4.94/5 (5 صوت)

03-13-2013 06:27 PM
يا جبرة الناس بقت في حاجة الى شرطة لحمايتها من الشرطة
الشرطة تقتل وتسرق وترتشي وتبتز وتقلع حق الناس على عينك يا تاجر ، السرقات تتم في نوفذ الخدمات الشرطية وفي الشارع من قبل كمائن شرطة المرور ومن الدوريات ومن نقاط التفتيش ، ومدير الشرطة ونوابه ومساعديه يعلمون ذلك ولا يفعلون شيئا لأنهم أيضا يسرقون بوسائل أخرى ، والغريب أن الذين تتم سرقتهم والتعدي على حقوقهم هم الفقراء والغلابة والبسطاء الذين لا يستطيعون الدفاع عن حقوقهم ولا يملكون شيء سوى الانصياع للصوص الشرطة


#609622 [ابو فريد]
5.00/5 (2 صوت)

03-13-2013 05:54 PM
ربنا يخليك للغلابة والمقهورين والمظلومين اصحاب المطالب العادلة ، واحييك انك ما ذكرت اسم الشاب المكافح لأنو ما ناقص شهرة تدخلوا السجن ، لاكين زي ما بقولوا الركشات دي ناس المرور خاتنّها نقاطة مضمونة لو اللواري نشف ريقها والبصات انطفى بريقها ، ولسان حال العسكري : قروش الركشاوي ، حلال ما رشاوي .
اهم حاجة الشاب المكافح ده حقو ارجع ليهو ، بعيل اسرة كبيرة وهو خريج غير مستوعب وكت ما ادوهو ضمان اجتماعي دايرين اشيلو حقو ،، نطلع مظاهرة ونقول : لا رشاوي من الركشاوي


#609612 [عبد العزيز الزهجان]
5.00/5 (1 صوت)

03-13-2013 05:34 PM
مصيبة والله مصيبة البلد دي ماحا تقوم ليها قايمة


#609607 [Alczeeky]
5.00/5 (3 صوت)

03-13-2013 05:20 PM
تستاهلو....خالينهم ليه والله بعد دا مافضل ليهم الا ينطو في بيتكم ويستبيحو نسائكم وانتو قاعدين تتفرضو....انحنا اخدناها من قصيره وقعدنا خارج السودان.... ماعشان الحكومه السافله دي.... عشان بقيه الشعب جاهل وموهوم..... تستاهلو اكتر من كده....


#609596 [نبيل أبو نادن]
4.88/5 (4 صوت)

03-13-2013 05:08 PM
أستاذنا جبرا .. واصل على ذات النهج .. و أفتح مثل هذه الملفات .. نعم لن تغير في الأمر شئ .. ولكن الرصاصة اللي ما تصيب تدوش.. تحياتي .


#609581 [الباشا]
5.00/5 (3 صوت)

03-13-2013 04:45 PM
أستاذ جبرا ..لك التحيه بعد فراغي من قراة المقال تذكرت ما قاله د.محمد عبد الحي في اشعاره ( الله في زمن العنف). حسبي الله ونعم الوكيل.


#609579 [عبد الله عبدالله]
5.00/5 (4 صوت)

03-13-2013 04:43 PM
أكل أموال الناس بالباطل! حاميها حراميها! كل لحم نبت من سحت فالنار أولى به!


ردود على عبد الله عبدالله
United States [ابومصعب] 03-14-2013 05:34 PM
والله يا جبرا الناس ديل حيرونا حاميها حراميه ونتمنى ان يصل كلام هذ الفتى للمكتب الصحفى بتاع الشرطة ونشوف تعليقهم شنوووووو خريج بكلاريوس ودبلومات سايق ركشة ( ليس تقليلا للمهنة ) لكن منتهى الانحطاط والفساد وتدمير الكوادر فى ظل هذا الكابوس اللا انقاذى وانت العساكر ديل ماسمعوا باورنيك 15 والفاتح جبرا فى الصحف ولا امكن ماعندهم حق الصحيفة اعجبنى مداخلتك مع الحرامى بتاع مشروع الجزيرة وخط هيثرو اللا شريف ودبدر وكلامه كله اتحداهم ذى العنده حاجة قابضها على الجماعة المعاه وصيوان عرس بته دا ان شاء الله يكون صيوان لكشف الحقائق


الفاتح جبرا
الفاتح جبرا

مساحة اعلانية
تقييم
9.18/10 (10 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة