المقالات
منوعات
العوض علي الله
العوض علي الله
03-29-2013 12:18 PM

أحضنوا الأيام) واحدة من أجمل أغاني (وردة الجزائرية)، فيها تتحسر على خيانة الحبيب، الذي سعى لإيقاعها في حبائل حبه بشهد الكلام وسكّر الأماني، وعندما سقطت في عسل الغرام باعها بالرخيص.. (تغني وردة):
م الشهد دوّقونا وبالـسكر دوّبونا.. وبعد ما حبّيناهم وبعد ماهنيناهم
بالمر سقــونا.. وبالرخص باعونا
وبإيدينا آه إنكوينا.. لما بالحب إبتلينا.. إبتلينا وإتنسينا وإنتهينا
بس طول ماهو جاي بكره.. ربنا يعوّض علينا
يعوّض الله.. يعوّض الله.. يعوّض الله
الدنيا لسه بخيرها.. والله يعوّض الله
وقديماً كانت العادة عندما يموت لإحداهن طفل ثم تضع بعده مولوداً جديداً، أن تسميه (العوض) أو (عوض الله)، وإن كانت المولودة بنتا تسميها (عوضية)، ولكن تلك العادة اختفت ولم نعد نسمع هذه التسميات بين أسماء الأطفال..
وإن ضاع من أحدهم شيء ولم يتمكن من استعادته، أو زاره (الحرامية) وقمّحوه وعدّموا بيته (نفاخة النار).. يؤاجره الناس بـ (الله يعوّض عليك) و(عوضك على الله)، فعندما زار (أبو الحرمرم) ديار حاجة (أم زين) للمرة الثانية بعد بضعة أشهر من زيارته الأولى، آجرتها جاراتها بـ (عوضك عند صاحب العوض).. أجابتهم في كرب ونكد عظيم:
هو حرامي البخت ده ما كان يستناني لمن أتعوض ملاياتي السرقن المرة الفاتت.. لليلة نارن ما بردت!!
كذلك تسمى الغرامة (عوض)، وخير مثال لذلك عندما تستلف إحداهن من رفيقتها غرض ما ويتلف أثناء وجوده في حيازتها، كأن تشحت توب جارتها الفسلة ولسوء حظها (تتشه) المكواة قبل أن تقشر به للحفلة، أو تستلف شبشب صاحبتها الكعب العالي شَدّة، فتتسبب كرعينها المفلطحات وعراض في انبراشته وتفتق جوانبه، أو أن تتسبب مشيتها المكعوجة في فقد أحد كعابه وتعود به (سكّرّج)..
حينها سيكون عليها أن تختار بين أمرين أحلاهما مر، إما أن تعيد الغرض المعيوب لصاحبته كما هو وتعتذر عن أن ذلك حدث (غصباً عنها) وتتحمل (حنفة الوش) والغضب المكظوم الذي سيقابل به اعتذارها، أو أن تاخدها من (آصرها) وتقوم بشراء غرض جديد عوضاً عن التالف وتعيده من سكات، وهنا - احتمال كبير – إذا اكتشفت صاحبته أمر الاستبدال أن تعيده لها بحجة (والله نحنا ما بنقبل العوض)، وتقولها في سياق يفهم منه (عشان تبقى ليك توبة.. آخر مرة تشحدي مني)!
و(العوض) لمن تتوفى عنه زوجته وتترك له صغار (لحمة حمرة)، يتم بتعويضه واحدة من شقيقاتها لتحل محل المرحومة بعد حذفها من الدنيا، وليس على زوج المتوفية أن (ينقي) أو يختار بين الشقيقات إذا كان للمرحومة أكثر من شقيقة (هو كمان عندو نفس؟)، وإنما يرضى حامد شاكر بمن يقع عليها اختيار الأسرة، لتضحي بنفسها من أجل ألا تتولى امرأة غريبة تربية صغار شقيقتها.. لم تزل ظاهرة العوض بشقيقة أو قريبة المتوفية موجودا، وإن كان بصورة أقل مما كان يحدث زمان.
- خلّص (يونس) نفسه بمشقة من بين يدي شقيقه (حسن)، وحاول إجلاسه على الأرض وهو يقول:
استغفر.. استغفر يا حسن ياخ.. انت زول مؤمن الدوام لله.. إخلاص في الجنة ان شاء الله لأنها ماتت في الوضوع.
تتفن (حسن) على التراب وجعر جعرة عالية وحارة، وقال بين شنهفاته المكلومة:
اععععععع الليلة يا اخلاص بعدك بسوي شنو.. آآآآ كان تسوقيني معاك!
انتهره (يونس) وهزه من كتفه بعنف:
بطل بكاء النسوان ده فضحتنا فضيحة.. أصبر شوية ياخ الرجال ما ببكوا كده!
- لكن ما قادر.. ما قادر.. آآآه يا يونس خليني أبكي بي راحتيييييييي!
وهنا اقترب منهم الحاج والد (إخلاص) وقد تحزم بعمامته في وسطه من هول المصيبة.. جلس على الأرض بجوار (حسن) و(يونس) وقال بثبات وصبر:
الحمد لله الذي لا يحمد على مكروه سواه.. الفقد واحد يا حسن يا ولدي ونارك ونارنا واحدة.. لكن دايرك قدام أخوك ده، تختار أي واحدة من أخوات المرحومة التلاتة وحرم أعقد ليك عليها يوم التالتة.. إن درتا (آمنة) الكبيرة العاقلة عشان تبقى لعيالك أم.. ماعندي مانع، وإن درتا المتوسطة (نوال) وقلتا تمرقا من الشغل ما بنقول ليك لا.. يا زول إن درتا الشافعة الصغيرة (انصاف) الما تمت المدرسة دي...
قبل أن يكمل الحاج جملته كانت دمعة (حسن) الحارة قد طارت.. مسح (حسن) أنفه السائل بطرف جلبابه وقال بشحتفة شديدة وصوت مبحوح من كثرة الجعري:
إنصاف.. إنصاف.. داير إنصاف!!

[email protected]

تعليقات 18 | إهداء 0 | زيارات 2219

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#624343 [masood abdlwhab]
0.00/5 (0 صوت)

03-31-2013 09:56 AM
والله منتهي الابداع اتمني التعرف عليك


#624086 [عطشقى سفرى]
0.00/5 (0 صوت)

03-30-2013 09:49 PM
لازم يتغير المفهوم من العوض على الله الى العوض من الله.........


#623665 [ibrahimiyat al-garn]
0.00/5 (0 صوت)

03-30-2013 12:25 PM
الله يعطيك الف عافية ويقيك من كل المراض ..
بصراحة اسمحي لي ان اسمي عمودك اتكاءة علي شاي لبن بالعصيري
انا عادة قبل افتح المقال تبعك بجهز شاي بعدما تعبت اصابعي
من التجوال في المواضيع البوجع القلب..
بعد الانهاء من المقال حقك اشعر بالراحة وبينسيناالهموم الكثير
كتر منها مع شوية بهارات ..


#623637 [بريجاوي]
0.00/5 (0 صوت)

03-30-2013 11:51 AM
ههههههههههههههههه


#623592 [مدحت الهادي]
0.00/5 (0 صوت)

03-30-2013 10:58 AM
يا منى خلاص إنتهت مواضيع المجاعة والناس اللي ماقادرة تاكل في السودان ... صدقيني يا منى أنا في الأسبوع الماضي جالس في التلفزيون سمعت كلام من مواطنين بعد أن توجهت الكمرة إلى خارج الأستوديو واحدة ( حرمة قالت كلام وجِع القلب ) قالت إذا أكلنا الغداء ماعندنا العشاء وإذا أكلنا العشاء نشيل هم بكرة !!!! وبالله عليك يا منى يا أختي دة زمن يفكروا الواحد في إنصاف ولأ في واحدة من أخواتها .... وإنت عشان "" كاتلة الدجاجة وخامة بيضها "" يا أخت منى إنت عايشة في قمة الحياة الرغدة والهنية """ وربنا يزيدك """ والله مانا حاسدنك لكن نرجوك أكتبي بس في حاجة تهزي لينا فيها شوية الكيزان ديل ... وإذا كان خايفة من المقربين عليك مايهمك ولا تخافي تاني فوقك .... حرّم ماهم جايبين ليهم واحدة تانية ....


#623583 [أشرف دهب أحمد]
0.00/5 (0 صوت)

03-30-2013 10:54 AM
ههههههههههههههههه

ربنا ما يحرمنا من كتاباتك البترد الروح، بعد ما الزول تكون بطنه طمت من قراية الأخبار هنا

مبدعة يا منى


#623167 [um amed]
0.00/5 (0 صوت)

03-29-2013 08:24 PM
واللة يا منى عليكى حلاة خفة دم عسل بس بحبك جدا


#623103 [اسمر]
0.00/5 (0 صوت)

03-29-2013 05:55 PM
هههههههههههاى دى جامده اتارى الرجال اندهم مرض حامد


#623085 [ام محمد]
0.00/5 (0 صوت)

03-29-2013 05:15 PM
رائعة يامنى ان بعرف واحد زوجته ابنها الكبير في رابع ابتدائي لمن ماتت وفي غربة بوصي في الرجال انو داير واحدة سمحة سبحان الله المرحومه كانت ما شاء الله


#623075 [um amed]
0.00/5 (0 صوت)

03-29-2013 04:44 PM
ناس البشير منه العوض واليه العوض


#623071 [ahmmed]
0.00/5 (0 صوت)

03-29-2013 04:35 PM
انصاف في عينك ،ودرت ديك داير تودر انصاف،اصلو اللبو مودر من زمن.


#623051 [وادي الشويب]
0.00/5 (0 صوت)

03-29-2013 03:47 PM
ههههههههههههههه


#623046 [قلام]
0.00/5 (0 صوت)

03-29-2013 03:36 PM
هههههههههههههههههههههههههههههههههههه

كمان ليهو نفس يعزل


#623043 [عباس بن عباس]
5.00/5 (1 صوت)

03-29-2013 03:29 PM
هي دي عائلة والا شركة تامين؟؟؟؟؟؟؟


#622985 [Hussein101muss]
0.00/5 (0 صوت)

03-29-2013 02:02 PM
ادي بالغتي فيها يامني..رايعة يا مني
وانا بقول مني..مني..مني


#622945 [مريود]
0.00/5 (0 صوت)

03-29-2013 01:10 PM
لو عارف بعوضوه إنصاف كان سمم المرة قبل زمن طويل.


#622930 [عبده]
0.00/5 (0 صوت)

03-29-2013 12:52 PM
والله يامنى تلقطى فى جنس محن


منى سلمان
منى سلمان

مساحة اعلانية
تقييم
5.88/10 (4 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة