ضغط كهربائي
11-22-2010 11:07 AM

ساخر سبيل‏

الفاتح جبرا -

ضغط كهربائي


أكاد أجزم بأن المواطن السوداني أكثر المواطنين فى العالم تهذيباً وإنصياعاً لأى قرار تصدره أى جهة مسئولة

(ومرات ما مسئولة) حتى وإن كان ذلك القرار يتنافى وأبسط أساسيات (القانون) و(المنطق) والأمثلة على ذلك كثيرة خاصة فى مسائل (التعاقد) بين المواطن وبعض الجهات الخدمية والأمثلة على ذلك كثيرة لا تحصى ولا تعد .

عندما فكرت فى إقتناء (خط) هاتف جوال ذهبت إلى مبانى (الشركة الفلانية) التى إستقبلنى فيها مندوب المبيعات بإبتسامة عريضة طالباً منى الجلوس فى ذلك الكرسى الوثير ثم أخذ يعدد لى مزايا أن يكون لدى (خط هاتف) مع تلك الشركة وأن أهم ميزة لا تتميز بها أى شركة أخرى هى أن سقف (الفاتورة) يصل 500 جنيه ، أى أن بإمكانى التحدث حتى ما قيمته 500 جنيه دون أن يتم إيقاف الخدمة عن رقمى ، وبالفعل قمت بدفع الرسوم المقررة وما هى إلا بضع أشهر حتى تم إيقاف الخدمة عن هاتفى فذهبت لنفس الموظف متسائلاً عن السبب فى قطع الخدمة بينما لم أتجاوز السقف المسموح به فكانت إجابة الموظف لدهشتى هى بأن الشركة قامت بإلغاء تلك الميزة ووضعت بدلاً عنها معادلة جديدة (لقطع الخدمة) عن المشترك !!

بالطبع فإن تغيير تلك الميزة التى رغبتنى تلك الشركة للإنضمام إلى مشتركيها يعد إخلالاً بالعقد (الشفاهى) الذى بينى وبينها ولكن ولأننى مواطن سودانى (ما بيخلى حقو) ولثقتى فى أننى قد تعرضت لنوع من أنواع (النصب) والإستدراج وإيمانى بأن هذه قضية واضحة فقد قمت بالتظلم إلى الله سبحانة وتعالى مختصراً الطريق فمن غير الله يستطيع أن ينصف مواطناً بسيطاً من شركة إتصالات تعج بجيوش من المستشارين مما يجعل (قضيتى) تنظر امام المحاكم المختصة عام 6210 ب ف (بعد الإنفصال) على أقل تقدير !

ماذا سوف تكون ردة فعلك عزيزى القارئ إن إنتابك (صداع) حاد فذهبت إلى أقرب صيدلية وطلبت من (البائع) أن يعطيك (شريط بنادول) فأجابك :

- والله يا أستاذ لو عاوز بنادول لازم تشترى معاهو (علبة بف باف) !

بالطبع سوف تصيبك الدهشة وسوف تسأل نفسك قبل أن تسأل البائع ( ما دخل البف باف بالبنادول) ؟ ولأنك مواطن سودانى مهذب وتموت فى الإنصياع لكل ما يفرض عليك فسوف تترك الصيدلية دون الدخول مع البائع فى أى (نقاشات) وتقرر العودة إلى المنزل لتناول كباية شاى (صاموطى) لإزالة الصداع عوضاً عن البنادول أبو(بف باف )

ولكن تكتشف أن البيت يخلو من (السكر) فتلبس هدومك وتتجه نحو (أدم سيد الدكان) :

- بالله يا آدم أدينا نص رطل سكر

- والله يا أستاذ لو عاوز نص رطل سكر لازم تشترى معاهو (كيس صابون البقرتين) !

هنا تحس بأن (راسك عاوز يطير) وأنت تواجه هذه الأشياء غير المنطقية .. فما علاقة السكر بصابون البقرتين وما علاقة البف باف بالبنادول ، نعم لا توجد أى علاقة ولكن (التاجر) فى الحالتين عندو رأى فهو ربما يعانى من بوار هذه السلع ويود تسليكها وكأنى بك أيها القارئ الكريم تسألنى : وأنا كمواطن دخلى شنو؟ دى مشكلتو ومفروض يحلها براهو فأقول لك أيها المواطن السودانى الفضل إنتا لازم تحل لأى زول مشكلتو حتى لو كانت غير قانونية وغير منطقية فها هى (الحكومة ذاااتا) ممثلة فى (هيئة المياة) التى تود (تسليك أمورا) من توفير لمرتبات جيوش المتحصلين الإداريين والمحاسبين وخلافه وتوفير المجهود الذى تبذله فى قطع (الخدمة) فها هى الهيئة تقرر أن (تخت راسا) مع (ناس الكهرباء) فقاما بربط دفع قيمة المياة مع إمدادك بالكهرباء (ولحدت هنا ده كلام كويس وقانونى ومنطقى وبيوفر قروش ) لكن الكلام الما قانونى ويتنافى تماما والمنطق هو إنو لو ما دفعتا (الموية) ح يقطعو عنك (الكهرباء) !!



كسرة :

توقعوا قريباً العوائد والضرائب والنفايات مع (الكهرباء) ... يا دوبك فهمنا ليه بيقولو عليهو (ضغط كهربائى) !!





تعليقات 7 | إهداء 2 | زيارات 2999

خدمات المحتوى


التعليقات
#49046 [سيك سيك]
0.00/5 (0 صوت)

11-23-2010 10:28 PM

يا جبرا صابون البقرتين يمكن زي الوزينة المعلقة في ناقة الإعرابي أو زي مسمار جحا؟


#48946 [زول في الطريق الي الزوال]
0.00/5 (0 صوت)

11-23-2010 04:04 PM
زي مابقولوا اهلنا الفلاته تصدق او لا تصدق انا قضيتك دي ماندي بيها اي قضياء


#48718 [محمود عطية الله حسن]
0.00/5 (0 صوت)

11-23-2010 07:42 AM
أستاذى جبرا كل سنة وإنت طيب
ماذكرته باعزيزى هو نتاج العولمة وإستراتيجية البيع الإضافى فى التسويق ... والله دى حاخة ما بطالة إنو بناع الدكان والصيدلية يروجوا لى سلعه البايرة بطرق التسويق الحديثة ولا تستعجب فى يوم المدام تقول ليك جيب معاك (دكوة) تمشى عشان تشتريها تقوم الحاجة ست الدكوة تقول ليك لازم تشترى معاها شطة (قبانيت)


#48683 [انفصالي وحدوي]
0.00/5 (0 صوت)

11-23-2010 01:10 AM


الاحزمة والبوار والضغط ده كلو قبل الانفصال ، تيب بعدو .. الحال حيكون كيف .. !!!!


#48677 [قدورة]
0.00/5 (0 صوت)

11-23-2010 12:11 AM
من الحاجات العادية البتلاقيك يوماتي اديك دي:

ايه رايك الشهر الفات طلبت من البنك الفيهو حسابي كشف حساب لقيتم دافعين منو من حسابي يعني - مبلغ لصندوق دعم الطلاب قلت ليهم بارك الله فيكم القمتو بالواجب نيابة عني لكن وين ايصال الدفع؟
قالو لي انت عوير ؟ و تبرع كمان داير تحمل عليه مصاريف ورق؟ قلت ليهم طيب انتو ما خاصمين هنا مصاريف مسك دفاتر انا كنت قايل مسك الدفاتر دا ياهو مصاريف الورق لانو انا عارف انو ماممسكتني دفاتر الغريبة انتو المدني دفتر وبرضو شايلين حقو من حسابي يا اخوانا انا القريشات دا ممسكه لكن امانه لليوم الاسود تقومو تصرفو فيها علي كيفكن ؟ وتقول لي الربا مابنتعملبو لانو حرام؟؟؟؟

الحاجة الاير اسعل منها وما لاقي ليها تفسير لي هسع, ناس الكهربا زمان جابو لي عدلد الجمرة وقالو عشان اتمتع بيهو واكون من معاصري الدفع المقدم لازم ادفع تمن العداد يعني بالواضح اشتريه يعني بقى حقي لكن اكتشفت انو انا العداد مستأجرة لانو بدفع عليه اجرة شهرية (دا حرام ولا حلال يا مشايخنا)

بعدين انا واعوذ بالله من كلمة انا بشتري الكهربة كاش يعني بوزنوها لي زيها وزي السكر لكن مرات تقوم تلقى الكهربا قاطعة لساعات طويلة وطبعا انا ماداير اقول شنو البترتب عليها. لكن برضو بسال مشايخنا بيع الغائب حلال ولا حرام



#48598 [محمد كسلا]
0.00/5 (0 صوت)

11-22-2010 06:25 PM
كل سنة وانت طيب ياستاذ الفاتح لينا كم يوم نفتش ليك حمدلله علي سلامة عودة

المقالات وبالله انسي انك عندك اجازات واشبع نهم قرائك العطاشة للشغل البارد


#48524 [monem musa]
0.00/5 (0 صوت)

11-22-2010 02:22 PM
أبدااااااااااااع يا جبرة ودمت ودامت محنك


الفاتح جبرا
 الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة