يا حنفي يا حبيب
04-22-2013 11:17 AM



أنا ما قادر ارثيك يا كمال .. ولا قادر أتصور الرأي العام بدون (إلا قليلا) .. وما قادر اتصور إنك ما ح تجي حفل التدشين بتاع كتابي الجديد عشان تجلس فى المنصة وتمسك المايك وتقول بي صوتك الذي يجذب الحضور كلامك البتقولو دايمن عني في حفلات تدشين كتبي التي أحرص غاية الحرص أن تكون أحد المتحدثين فيها K تقعد بأناقتك ديك وقميصك المخطط الأنيق وتقول (كتابات الفاتح جبرا لازم الزول يعمل يها قراءة تانية عشان الزول يكتشف ما بين السطور ) ... حليل السطور يا كمال وحليلك .. تعرف الحصل كالتالي .. إتصلتا على أخونا المشترك عادل الباز وهو طبعن زي ما عارف بقي رئيس تحريري بعد ما تركت الرأي العام وخليتك (جناح شمال) بدون جناح يمين .. عادل الباز ما رد عليا .. تاني يوم إتصلتا في عادل قام رد .. (وعادل زي ما إنتا عارف) طوااااالي في إجتماعات .. المهم لمن رد عليا قلتا ليهو (يا خ بعد ما تطلع من إجتماعاتك الما بتخلص دي مش حقو كان ترجع ليا؟) .. قام عادل قال ليا : أنا ما كنتا في إجتماع .. ثم صمت قليلا وقال لي : كنت في تشييع كمال حنفي .. إنتا عارف يا كمال الحصل ليا شنو؟ قربتا أجي معاك بي غادي .. أصلو يا كمال خلاس (نحنا إنتهينا) .. الخبر ما قدرتا أصدقو .. في ناس كده لمن يقولوا ليكا ماتو ما بتقدر تصدق .. ما شرط إنو يكون المات ده أبوك ولا أمك ولا زول قريبك .. ممكن امك تصدق إنها ماتت لكن زول تاني (ذيك كده) ما تصدق .
أنا يا كمال حزين شديد وزي الزول الضربتو صاقعة .. عشان كده أنا آخر الناس الكتبو عنك وفقدوك بالجد .. والله يا كمال مما عادل الباز كلمني ولحدت هسه أنا ما قادر اصدق وأقول ليك حاجه .. والله يا كمال ما قدرتا أمشى (الفراش) لأنو الموضوع ده ما عاوز شئ (مادي) يقنعني بيهو .. أنا لم أري شخصاً متحدثاً مثلك ولا كاتباً عبقري الصياغة ً مثلك ولا شخصاً مهذباً مثلك .. ولا شخصا منصتاً مثلك ولا ... ولا .. تخنقني العبرات يا كمال .. وتمتلئ المآقي بالدموع .. وفي القلب وجع شديد .. بالله يا كمال ما ح تجي تدشين كتابي الجديد ؟ ح يكون كرسيك قاعد .. يا حنفي يا حبيب .. ح تكون بيناتنا .. لحدت ما أكون معاك في القريب .. بإذن الله ..

كسرة :
يا للحزن والألم !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟



[email protected]





تعليقات 26 | إهداء 0 | زيارات 6178

خدمات المحتوى


التعليقات
#645503 [الجزيرابي]
2.50/5 (4 صوت)

04-23-2013 02:38 PM
الا رحم الله الفقيد د. كمال حنفي

أضحكتنا .. وأبكيتنا يا أستاذ الفاتح

لك حسن العزاء


#645224 [k]
1.00/5 (1 صوت)

04-23-2013 10:28 AM
انا لله وانا اليه راجعون
والله يا استاذ اصدق رثاء قريتو في حياتي انا مابعرف المرحوم بس دموعي ملت عيوني بالزات الفقرة الاخيرة[ يا حنفي يا حبيب .. ح تكون بيناتنا .. لحدت ما أكون معاك في القريب .. بإذن الله ..]
ربنا يرحمو ويخليك لي وليداتك وللغلابة


#645197 [8855]
1.00/5 (1 صوت)

04-23-2013 10:07 AM
( انا لله وانااليه راجعون )
اللهم اغفر له وارحمه واجعله من اصحاب اليمين والهم اله وزويه الصبر والسلوان
وانشاء الله رلنا يتقبله قبولا حسننا واحسن الله عزاؤكم يا جبرا


#645163 [um ahmed]
1.00/5 (1 صوت)

04-23-2013 09:38 AM
انا لله وانا اليه راجعون وسبحان الحى الذى لايموت اللهم ارحمه رحمه واسعه واجعل مثواه الجنه يارب والله العظيم اخى الفاتح كلامك بكانى كلام زول موجوع زييى انا ما بعرف المرحوم الا من خلال تحليله فى برنامج بعد الطبع فى قناة النيل الازرق والله اخى جبرا كنت احبه فى الله جدا واقول لزوجى انى احب تحليله للاخبار واحب عربيته الفصحى الجميله التى يتحدث بها واحب اكثر اناقته وطريقة لبسه للبدل بطريقه غير تقليديه والله صرخت يوم قريت خبروفاته واصبحت اردد انا لله وانا اليه راجعون والى الان كل ما ارى برنامج بعد الطبع اتخيل جلسته وهو يحاور المذيع حقيقة فجعت لرحيله مثلك كاننى اعرفه .اللهم جازه بالحسنات احسانا وبالسيئات عفوا وغفرانا . اللهم نقه من الذنوب والخطايا كما ينقى الثوب الابيض من الدنس .اللهم اسقه من حوض نبينا محمد صلى الله عليه وسلم شربه هنيئه مريئه لا يظما بعدها ابدا ولا نقول الا ما يرضى الله


#644891 [تختخ]
0.00/5 (0 صوت)

04-23-2013 06:07 AM
أحسن الله العزاء ونسأله الرحمة والمغفرة لجميع الاموات ربنا يحسن صبرك أخي جبرا


#644810 [زول كدا]
2.00/5 (1 صوت)

04-23-2013 12:18 AM
بقت على هيثرو بس
يا حليل السودان كلو


#644788 [سودان]
0.00/5 (0 صوت)

04-22-2013 11:14 PM
يااستاذ البركة فيكم وربنا يتقبلوا. كلامك مؤثر بس بصراحة الواجب في وشك ولازم تمشي تعزي اولادوا كده بتكون بريتوا والناس بالناس ياالفاتح .


#644780 [ابو]
4.00/5 (2 صوت)

04-22-2013 11:03 PM
لاحولا ولا قوة إلا بالله
الله يرحموا ويحسن اليه ويجعل مثواه الجنة
وإنا لله وانا اليه راجعون


#644709 [emad]
3.00/5 (1 صوت)

04-22-2013 08:21 PM
اللهم أرحمه وأغفر له
وأحسن الله عزاءك يا استاذ


#644583 [الفاتح]
2.50/5 (2 صوت)

04-22-2013 04:50 PM
رحم الله الدكتور الانسان كمال حنفي الرجل النظيف في كل شئ الذي لم تغره الدنيا وزملاؤه وبعض تلامذته من اصحاب المليارات ولكنه حافظ علي نظافته في زمن اللانظافه حتي توفاه الله فكان رجل عيقريا بحق


#644557 [هاجر حمد]
4.50/5 (2 صوت)

04-22-2013 04:13 PM
انا لله وانا اليه راجعون اللهم ارحمه واحسن اليه والعزاء لاهله . كان اسلوبه في الكتابة حديدا بلا نظير وكما قال عنه احد معجبيه " اسلوب استريو" تستمتع يالابداع اولا ثم ترجع تفتش المعاني


#644552 [Fato]
2.00/5 (1 صوت)

04-22-2013 04:08 PM
أخى/ الفاتح جبرة أحسن الله عزاكم وعزاء الشعب السودانى فى شخص عرف بهذه الصفات الحميدة,وأنا لله وأنا أليه راجعون.الفقد أليم لأى أنسان عزيز والفراق صعب ولكن نقول أنها سنة الله فى خلقه وكلنا راحلون ونسأل الله حسن الخاتمة.


#644501 [حاتم أب تفة]
5.00/5 (1 صوت)

04-22-2013 03:05 PM
حتى في حزنك نبيل يا أستاذ..
اللهم أرحم كمال حنفي وجميع موتانا، وأجمعنا بهم في مستقر رحمتك..!


#644495 [عماد احمد]
3.00/5 (2 صوت)

04-22-2013 02:59 PM
رحم الله د كمال حنفى رحمة واسعه وادخله في رحمته وجنته انه سمبع كريم رحيم العزاء لاسرته الكريمه ولصحيفة الراى العام ولك اخى الفاتح ولجميع اصدقائه ومعارفه وقراء روائعه رحمه الله رحمة واسعه


#644470 [ام الحسن]
5.00/5 (1 صوت)

04-22-2013 02:18 PM
انا لله وانا اليه راجعون


#644461 [بريجاوي]
3.00/5 (2 صوت)

04-22-2013 02:08 PM
الفراق حارررررررررر...الله يصبرك يا أخوي


#644452 [Hamid]
5.00/5 (1 صوت)

04-22-2013 02:00 PM
له الرحمة والمغفرة ونسال الله له واينا الجنة ولك الصحة والعافية يا استاذ وراحة البال


#644439 [سامر المدنى]
3.50/5 (2 صوت)

04-22-2013 01:44 PM
انا لله وانا اليه راجعون .. الدوام لله الواحد الأحد الفردالصمد.ز ربنا يتقبله القبول الحسن ويكرم اسرته وكل من عرفه بالصبر


#644426 [ابو الجد]
3.00/5 (2 صوت)

04-22-2013 01:24 PM
لقد عصرت بالالم قلوبنا يا جبرة. لا حول ولا قوة إلا بالله.


#644421 [ازرق اليمامة]
3.00/5 (1 صوت)

04-22-2013 01:19 PM
البركة فيكم يا الفاتح
اللهم ارحمه واغفر له
وادخله مع الصديقين والشهداء وحسن اولئك .. رفيقا...
لاحول ولا قوة الا بالله


#644415 [abdo]
2.00/5 (1 صوت)

04-22-2013 01:12 PM
الله يرحمو ويرحم جميع موتى المسلمين ...لكن عيب عليك ماتمشى الفراش


#644384 [الغريب عن وطنو]
1.50/5 (2 صوت)

04-22-2013 12:35 PM
إنا لله وإنا إليه راجعون ...
رحمه الله رحمة واسعة وأسكنه فسيح جناته مع الصديقين والشهداء والأبرار والصالحين ..
أحسن الله عزائكم استاذ جبرا وجبر كسركم والهمكم الصبر وحسن العزاء ..


#644366 [زول مشتاق لسودان زمان]
0.00/5 (0 صوت)

04-22-2013 12:12 PM
يا دكتور الفاتح أحسن الله عزاءكم وربنا يتقبل كمال حنفي قبول حسن ويجعل مثواه الجنه إن شاء الله ... ربنا يصبرك ويصبر أهله ولا نملك إلا الدعاء وقول الحمدلله.


#644363 [Mohamed Osman]
3.50/5 (2 صوت)

04-22-2013 12:11 PM
انا لله وانا اليه راجعون


#644355 [أبو السارة]
0.00/5 (0 صوت)

04-22-2013 12:07 PM
اللهم أرحم كمال حنفي يذكرني بالمرحوم حسن ساتي وجوه مشرقة دائما تشرفنا في القنوات العالمية بحسن الكلام والثقة بالنفس أللهم ارحم كل موتى المسلمين


#644324 [محمد احمد]
3.63/5 (4 صوت)

04-22-2013 11:25 AM
ربنا يرحم الدكتور كمال حنفي ويغفر له ويجعل مثواه الجنة ويجبر كسر قلوبكم علي فراقه
لكن يا ود جبرا ان كسرتي بقت ثابتة زي خط هيثرو بتاعك حصل شنو في موضوع رسوم النفايات والمحكمة


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة