04-24-2013 07:40 PM

ينفع أبدأ المقال بعبارة (والله الواحد ما عارف يقول شنو؟) .. لأنو والله العظيم الواحد فعلاً ما عارف يقول شنو؟ الموضوع وما فيهو الفساد البقى عيني عينك عديييل كده .. الفساد المغتغت خليناهو .. والفساد القالو ودوهو النائب العام منتظرنو .. طيب الفساد الجديد لنج والواضح وسكوت الحكومة عنو ده يقولو عليهو شنو؟ خلاس الناس بقت تفسد بالمفتشر .. خلاس الناس بقت عينا قوية للدرجة دي؟
شنو لمن الحكومة تخصص ليها مساحة من ساحة مسجد الناس قاعدة تصلي فيها في الأعياد وتستخدمها في المناسبات عشان يبني فيها زول مدرسة خاصة الطالب بي كم مليون في السنة؟ هسه أنا الفاتح جبرا ده ولا أي مواطن ممكن يدونا الواطة دي؟ طبعن لا .. ده شغل التكتكة واللف والدوران .. المصلين رفعوا مذكرة للجهات المسئولة ؟ لكن يبدو إنو الجهات المسئولة شايفة إنو الموضوع ده موضوع عاااادي وما فيهو حاجة .. وما فيهو أي شبهة فساد .. زول قال عاوز يشتري ساحة مسجد .. قالوا ليهو جداً ياخ .. قامو (مسحوها) وعملو ليها الكروكي وأدوها ليهو .. قام عمل (الخرط) وقعد يبني !!
.. طبعا الكلام ده حصل قبل حوالي شهرين في مربع 69 بالمعمورة .. وطبعن حصل قبل كده في مواقع وأماكن كتيرة .. ميادين كرة (إنقلبت) بين عشية وضحاها قطع سكنية .. المدينة الرياضية إتوزعت (سكن) ومحلات تجارية و(جمعيات وهمية) وبقت (كمونية).. لم تسلم (ساحة) أو (مساحة) من هذه الهجمة (المغولية) ولكن أن تصل المسالة حد (بيع ساحات المساجد) فدي بتخلي الزول فعلاً ما عارف يقول شنو؟
بقي أن نعلم أن المدرسة المراد تشييدها هي فرع من مدارس كامبردج والتي يقال أنها ملك للوزير أمين حسن عمر إلا أنه نفي ذلك وقال أنه فقط رئيس لمجلس الإدارة وأن المدارس (بتاعت خالو) !
بمناسبة التغول على ميادين الكرة والساحات داخل الأحياء العبد لله يري أنها واحدة من أسباب تدهور الكرة السودانية .. فقد كانت هذه الميادين والساحات (السهلات) يمارس فيها صغار ولشباب الحي (الدافوري) وكرة (الشراب) وما أدراك ما كرة الشراب تلك الكرة التي لو تمكنت من السيطرة والتحكم بها لصار لك (الكفر) حاجة أسهل ما يكون ولكانت دقتك في التصويب و(الباصات) بالسنتي .. لذلك شئ عادي الآن أن تكون باصات اللاعب لخصمة في المباراة أكثر من باصاته لزميله وتصويباته نحو (الكشافة) أكثر من تصويباته نحو المرمي .. وده الخلانا لينا مية سنة لا شلنا لينا كأس وللا حتى (علبة صلصة) .
كسرة :
بالله بعد ما إنتهيتو لينا من(الميادين) ما تقبلو لينا على (المساجد) عشان المساجد دي هي لله وكده
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟


الفاتح جبرا
[email protected]

تعليقات 11 | إهداء 0 | زيارات 4014

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#647866 [abu sudan]
0.00/5 (0 صوت)

04-26-2013 04:32 PM
فساد وتغول على الاراضى والميادين والان وصل للمساجد لا نملك ان نقول
ان لها رباً سيحميها
واهل الانقاذ لم يحترموا بيوت الله من جاءت للحكم فالمساجد كانت المياه والكهرباء
مجاناً الان تباع لها الكهرباء بالسعر التجارى وحتى ان لبعض المساجد وقف من اهل
الخير صار ايجارها يذهب للاوقاف وهذه الاخرى لم تسلم من السرقة كانما امنوا مكرالله
ولا يأمن مكر الله الا القوم الفاسقون


#647815 [صبري فخري محمد]
0.00/5 (0 صوت)

04-26-2013 03:01 PM
جريمة تكفي لاستقالة رئيس

المريض ياسر ابراهيم حالته الصحية تستدعي الى تدخل جراحي عاجل .. تم اتخاذ هذا القرار بعد الكشف عليه .. ولكن لأخصائي التخدير رأي مفاده أن امكانيات مستشفى البان جديد المتواضعة لا تسمح باجراء هذه العملية وذلك لعدم وجود قسم للعناية المكثفة . و الحل الوحيد هو ارسال المريض الى احدى المستشفيات الحكومية المجهزة بغرف العناية المكثفة وبعد كتابة تقرير التحويل واخطار ادارة المستشفى بذلك والتى قامت باتصالات مكثفة لكل المستشفيات الحكومية ورغم اخطار وزارة الصحة الولائية ولكن تم رفض قبول امر تحويل المريض بحجة ان من حق الاختصاصي رفض او قبول المريض على حسب البروتكول على حد زعمهم .. ولم يراعي هذا البرتكول حق المواطن في العلاج .. والآن حالة المريض تزداد سوءا .. وترك المريض بهذه الحالة يعني الموت المحقق والا يجب النظر في مناهج الطب .. من المستفيد من كل ما يحدث .. للأسف المريض لا يملك ما يعينه للعلاج بالمستشفيات الخاصة كالزيتونة وغيرها .. أنقذوا المريض ياسر
د. صبري فخري
اختصاصي جراحة
م . البان جديد


#647625 [lwlawa]
0.00/5 (0 صوت)

04-26-2013 09:17 AM
الأنقاذيون هؤلاء ضيقوها على الخلائقK فضاقت عليهم الارض بما رحبت..؟؟.. بلد حدادي مدادي مليون ميل مربع، جعلوها اضيق من خرم الابرة.؟؟!.. الصين التي يقدر سكانها بالمليارات، ليس بها ضائقة سكنية او معيشية كما لدينا في السودان..؟؟
الإنقاذ بحروبها العبثية، في كل مكان، والتركيز المغرض لكل الخدمات في رقعة واحدة،جعل الناس يهرعون من كل فجاج السودان، الى العاصمة، فترى الناس هائمون على وجوههم كانهم في يوم الحشر او كأنهم يطوفون حول البيت العتيق.؟؟


#647223 [كسروا يهوالمدرسة في لراسو وراس البريطانين زاتم!!]
0.00/5 (0 صوت)

04-25-2013 03:09 PM
اسه الميدان ده لو في امبده وله الصحافة كان كسرو ليهو المدرسة في رويسو المتل الزعافة ده!!!!منو اسه حفيد القرده والخنازير!!(انظرالسورة)


#647058 [التويجري]
5.00/5 (1 صوت)

04-25-2013 11:51 AM
احلى حاجه ماهي لله وكده.واله يا استاذ القضيه أكبر من الليمونه,دى قصة طويله بس جهابزه الانقاذ إستغلو طيبه وعفوية الشعب السودانى ولقو الحكاية ماشه مافي زول بسأل او بوقف,والشيطان لو غلبو إجيك بى باب المعاصي بجيك بي باب الطاعات وده اخطر.جماعتنا قايلين إنو ده كلو في الله وإستلذو بالفكرة.بس ربنا بنجضن ليك في الدنيا قبل الاخرة.شوف حال اولادهم وبناتهم وازواجهم المال الحراممابنتج منو ذريه صالحه,ده غير الأمراض البسلطه عليهم ربنا.الله ياخذهم اخذ عزيز مقتدروبعدين اى كوزإشيل شيلتو الحكاي قربت


#647021 [تاجرالبندقية وواليها]
5.00/5 (1 صوت)

04-25-2013 11:20 AM
فعلا بلد مافيها والي!!! يعني بدل الاراضي البقسمه للمجمعات السكنية عشان كلو واحد يديهو فلة وشقة !ماتحل المشكلة وتعوض صاحبك بفدان في اي حته وبرضو ود عمر ما حينساك حيقري ليك الخدامات بتوعك عندو!! لانوالوليدات بقرو هناك في السمين!!! وتكون كسبت عصفورين وله المواطنين قنعت من خيرم وعارف ماحتحصلوا الانتخابات تاني!!


#647014 [حسان]
5.00/5 (1 صوت)

04-25-2013 11:12 AM
ياجبره مسعول من الخير!! الناس ديل مابحسو!! اسه الكلام بقي عديل والدلوكه وصلت اخر الحله!!! ولاكانك بتتكلم!!! جلدم تخن من اكل الحرام!!!


#646999 [wtan galee]
5.00/5 (1 صوت)

04-25-2013 11:06 AM
لك التحية أستاذ جبرا اصلا الكيزان كلهم من طينة واحدة ومن خلا عادتو قلت سعادتو نحن في انتظار اليوم البتتحرق فيه جميع كروتهم والبلد تنظف من ذوي العاهات وكل ذي عاهة جبار


#646830 [شقى ومجنون]
5.00/5 (1 صوت)

04-25-2013 07:52 AM
والله يا استاذ بالجد زمان الباصات أيام كرة الشراب والدافورى كانت بالسنتى والمللى..هسع الباصات بقت زى باصات الوالى..


#646677 [دبوس]
5.00/5 (1 صوت)

04-24-2013 09:19 PM
الاستثمار هو اسم الدلع بتاع التغول السريع علي المبادين والساحات يعني (فاست فود) سندوشات تاكلها وانت ماشي والسندوشات ده طبعا ما لاي زول زي الرشوة بسموها تسهيلات ونحن في عهد السرعة ياجبره


#646643 [ود الحاجة]
5.00/5 (1 صوت)

04-24-2013 07:53 PM
المفترض ان يقوم اهل الحي بالتناوب على حراسة هذه الساحة و منع اي تعدي عليها
وان تكون حطبة الجمعة في ذلك المسجد عن من يسطو على اراضي الغير و من يتجرأ على بيوت الله


الفاتح جبرا
الفاتح جبرا

مساحة اعلانية
تقييم
9.50/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة