في



حبر مافي
04-29-2013 12:10 PM

من أشكال أكل أموال المواطنين بالباطل والتي إنتهجتها كثير من المؤسسات الخدمية الحكومية أن يقوم المواطن بدفع رسوم ما فيفاجأ بأن المكتوب في الإيصال يقل عما قام بدفعة .. وبالطبع لو أن المواطن عاوز يعمل فيها (تفتيحة) فإن معاملته لن تمر !
سبق أن نبهت أخواننا في قيادات الشرطة عبر مقال عن مثل هذا التجاوز بأحد مكاتب السجل المدني بمدينة سنار .. وطلبو منا بعض المعلومات وقاموا بإستجواب الشخص الذي قام بالتبليغ .. وبعد أشهر من الواقعة علمت من نفس المواطن إنو (الشغلانية مدورة لسه) فقمت على الفور بكتابة مقال أنبه فيه إلى ذلك واطلب فيه من أخواننا في الشرطة الرد لكن للاسف (صهينوا) !
لم يمض على ذلك وقت (قليل) حتي أخبرني مواطن بانه قد تعرض (للشئ ذاتو) في مكتب إستخراج البطاقة الشخصية بمدينة بحري إذ وجد أن المبلغ المسجل بالإيصال يقل عما دفعه حقيقة .. فكتبت منبها الإخوة في الشرطة بان هنالك مبلغا من المال لا يظهر في (الإيصال) .. وبرضو لم يرد علينا إخواننا في قيادة الشرطة حتى هذه اللحظة ... والعبد لله لن يندهش لو ان (الشغلانه) لسه مدورة فالتعامل مع (حال سنار) السابق يغنينا عن (سؤال بحري) اللاحق !
وكما أن هنالك فساد مالي فهنالك فساد (إداري) وهو الإهمال وعدم القيام بالمسئولية كما يجب والذي يتضح في هذه القصة والتي تكون قد واجهت الكثيرين مثلي ..
في بداية شهر يناير الماضي قمت بترخيص عربتي بمجمع الترخيص بالمنطقة الصناعية بحري .. وبعد دفع الرسوم (المتلتلة) والملف (الإجباري) أبو عشرة الف والذي لا يساوي ثمنه (ألف جنيه) (البدون إيصال) والما معروف قروشو بتمشي وين ؟ إنتهيت من كل مراحل الترخيص وتم تسليمي (اللوحة) :
- ممكن تدوني شهادة الملكية الممغنطة ؟
- والله يا استاذ (حبر مافي) ممكن تجيها بعد كم يوم !
بعد كم يوم إستقطعت من وقتي و(بنزيني) وقطعت المسافة من منزلي (أم درمان) إلى مجمع الترخيص المزدحم (بحري) وبعد مدافرة ونحنا ناس (عيانين وكده) وصلت إلى الشرطي :
- يا إبني أنا ... (وحكيت ليهو الحكاية)
- والله يا حاج (الحبر لسه ما وصل) تعال لينا بعد كم يوم
عندما تكررت المسألة حوالى أربع مرات أقسمت بألا اذهب مرة أخرى إذ ليس من المنظق ولا العدل ان أهدر وقتي ومالي وصحتي من أجل خطأ يرتكبه غيري .

عن طريق الصدفة وفي تلك الأيام (يناير) إكتشفت أن (رخصة قيادتي) تحتاج إلى تجديد فحملتها وذهبت إلى (البينية) بالملازمين حيث وجدت ضابطاً برتية (رائد)
- عاوز أجدد رخصتي لو ممكن الإجراءآت شنو؟
- والله يا استاذ (حبر مافي) !!
بالطبع لم أذهب مرة أخري .. إنتظرت متوقعاً أن يصدر الإخوة في الشرطة تنويها للمواطنين عبر وسائل الإعلام تخطرهم بوصول (الحبر) عشان يجو يستلموا شهادات عرباتهم أو يجددوا رخصهم لكن ذلك لم يحدث إذ يبدو أن (الشرطة) عايزه المواطن كل يوم يومين يمشي هو يسال !
أخي مدير عام الشرطة :
لو قلتا ليك إنو (العبدلله) كل يوم والتاني ح يقوم يبطل شغلو ويقطع (المسافات دي) عشان يمشي يسأل ناس الترخيص (جبتو الحبر) .. أو ناس رخص القيادة (الحبر جاكم) ويقولو ليهو (لسه ) يكون بيكضب عليك .. أنا الآن اقود عربتي دون (شهادة بحث ممغنطة) وبرخصة قيادة (غير مجددة) وأجد نفسي غير مخالفاً للقانون ولو تصرفي ده (غلت) قولو ليا فالعبد لله ليس مسئولاً عن أخطاء من بيده مقاليد (الحبر) !!
كسرة :
نرجو من الأخ مدير عام الشرطة التعليق على هذا المقال .. وهل (الحبر جا) وللا (لسه) وبالمرة الرد على حكاية (سنار) و(بحري) دي والحصل فيهم شنو عشان نطمئن وكده؟
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟


[email protected]





تعليقات 43 | إهداء 0 | زيارات 7683

خدمات المحتوى


التعليقات
#652484 [الصابر]
1.00/5 (1 صوت)

05-01-2013 08:56 AM
قوات نظامية غير منظمة


#652324 [ام ايمن]
0.00/5 (0 صوت)

05-01-2013 06:30 AM
الناس ديل انت مابتعرفهم ....كلامك ده يقومو يعتبرو ليك عصيان مدنى واستهتار بالقانون والنظام وممكن يتعكلتو فيك اكتر من كده ويقولو ليك انت بتعيب فى الذات الرئاسية وممكن يطلع ليك العضو المثير للجدل ويتهمك بتهمة عدم اطاعة اولياء الامور ...خلى بالك !!!!!!!


#651973 [ود الجد]
0.00/5 (0 صوت)

04-30-2013 04:43 PM
يا ود جبرة بتاعين النفايات دفعوا ليك كم عشان تسكت
كمان عايز بتاعين الترخيص والمرور ابهلوا ليك الشغلة ولا شنو
في القنصلية السودانية بجدة يتم تحصيل واحد ريا ل لزوم مغلف الاوراق وكده وبدون هذا المغلف لن تتم معاملتك وطبعا وين بتمشي قروشوالله اعلم


#651925 [نبيل أبو نادن]
0.00/5 (0 صوت)

04-30-2013 03:27 PM
أخي جبرة .. كل ما تكتبه من نوعية هذه المشاكل عادي .. و لا جديد في الأمر .. الفساد المالي و الإداري و الأخلاقي والمهني و جميع أنواع الفساد .. التي تعرفها و تلك التي لا تعرفها .. وأكيد أنها أكثر وأكبر من التي تعرفها .. ستزداد و تتواصل و لن تتوقف أبدا .. أتحداك ان تجد وزارة أو مؤسسة أو منظمة أو هيئة حكومية أو حتى غير حكومية .. حاليا بالسودان لا يوجد بها فساد .. أيا كان نوع الفساد .. هل تنتظر من مسئول ما .. في جهة ما .. مهما كانت وظيفته أو دوره أو حجمه أو وزنه .. أن يرد علي إستفساراتك و إتهاماتك له أو لأحد تابعيه أو للجهة التي يعمل بها أو لها ..؟ أنت تحلم .. وأرجو أن تواصل أحلامك ولا تستيقظ .. لأنك لو إستيقظت ستسطدم بواقع مرير .. و مرير جدا .. أتمنى لك أحلاما سعيدة .. أم الكوابيس فدعها للشعب السوداني الفضل.


#651685 [تائب]
0.00/5 (0 صوت)

04-30-2013 11:39 AM
أقتراح:
ليه اي واحد ماشي البتاعات دي يشيل حبره معاه؟؟؟
لمعرفة نوع الحبر ومكان شرائه قررت اني اعمل كشك جمب البتاعات دي وداير لي شركاء في الموضوع دا
بشرط يفهموا في الاحبا ر.


ردود على تائب
Russian Federation [احمد ابونصر الشمالي] 04-30-2013 05:23 PM
ارشح ليك مدير عام الشرطة شريكاً


#651545 [wedhamid]
0.00/5 (0 صوت)

04-30-2013 09:44 AM
يا جبره أخوى ....بلاش تتعب نفسك مع هؤلاء الناس(ناس الشرطه )فهم لهم حصانه أى والله حصانة شخصيه من الرئيس ذاتو فى العيس فسادا و لا من يساءل !!!بالعكس كل واحد يعينو الرئيس هناك فى الشرطه و يعمل ليهو مصيبه طوّالى ينتظر فى(إستراحة محارب ) كم يوم و ثم تجيهو الترقيه و النقليه لموقع أرفع و الما عاجبو يمشى يشرب من البحر !!!!و الأمثله كتيره ...بداية ببتاع إنهيار بناية الشرطه و كان المتلاعب فيها أبو رياله .. ودا ترقى و ترفع لوزير دفاع بكل عبطه و منذ ذاك لازمت قواتنا المسلحة الهزائم المتلاحقه من هجليج لبورسودان لليرموك و اليوم أم روابه ... وهو و لا هنا... بس مشغول بإستيراد الدبابات و الأسلحه المضروبه و السمسره فى البناء و العقارات ( و بلسانه قال فى مقابله متلفزه إنو كوزير مسئوليتو البناء و التجهيزات للضباط) و تجنيب الميزانيه و لا إحم و لا دستور و لامراجع عام ... وكمان مرتكبى جرائم قتل المواطنين بدم بارد ...من مجزرة بورسودان و كجبار و نيالا و عوضيه فى الديم.... و أخيرا مجزرة أم دوم ...وين المسئولين و على إيه إنتهت التحقيقات و القتلة ترقوا و ترفعوا فى الدرجات ....يا أخى دا مخصوص عينو واحد من المقربين جدا (من أهلو) مديرا للشرطه لثحصين الفساد و الجرائم ...


#651518 [A.Zumam]
0.00/5 (0 صوت)

04-30-2013 09:23 AM
الشرطة السودانية من أسوأ أجهزة الشرطة في العالم من حيث معاملتها للمواطنين ، و كأنها خلقت لتعذيب و إضطهاد المواطنين و ليس لخدمتهم ، شرطة مليئة بالعناصر الفاسدة و المتغطرسة و المريضة نفسياً ، و قد إزداد الأمر سوءاً في هذا العهد الفاسد فتحولت الشرطة إلى جهاز من المرتشين و الفاسدين و كان الله في عون الشعب السوداني ،،،، من يريد أن يجرب فليذهب لعمل أي إجراءات في بنفسه في المرور ، الجوازات أو أي قسم من أقسام الشرطة و سيرى العجب ،،،


#651397 [مهاجر]
0.00/5 (0 صوت)

04-30-2013 07:41 AM
يابهية وفساد الزمن جنية وحبر مااافي .ألحنها ليك ما قلنا ليك حبر مافي إنت ما بتفهم .


#651336 [ست اللنديايه سابقاً]
5.00/5 (1 صوت)

04-30-2013 06:03 AM
يا ودجبرة هو براهو الحبرمافي ؟ انت والله مرتاح ماشاء الله .نحنا هنا مويه مافي،نور مافي، كِسرة مافي، رغيف مافي ،بصل مافي، زيت مافي ، غاز مافي، فحم، حطب مافي، بلح مافي،شعيرمافي، كريستال مافي ،ونحن اظنو في حسابات الجماعه مافي !!!!!!!!!!!!!!!


ردود على ست اللنديايه سابقاً
Russian Federation [ود كودى] 04-30-2013 09:37 PM
بغو فى

Russian Federation [nagatabuzaid] 04-30-2013 08:51 PM
حقيقة نحن كلنا مافى


#651321 [عزمي الطيب الشيخ]
0.00/5 (0 صوت)

04-30-2013 05:21 AM
ههههههههه والله يا استاذ لا حياه لمن تنادي


#651239 [A.nasir]
5.00/5 (1 صوت)

04-29-2013 11:45 PM
يا جبرة الحكومة دي بقت (جنازة بحر ) لا تتخما ولا تتلما محل ما تهبشا تلقاها فاسدة ومتحللة . ودي نتيجة تطهير الخدمة المدنية والعسكرية والتمكين . فاصبح اللصوص ضباطا بالشرطة والفساق قضاة وواعظين والجبناء قادة للقوات المسلحة والجهلاء مدراء للجامعات والحكام خليط من كل ذلك.
لذلك نرجو يا استاذ جبرا ان لا تلوك المواجع وتجيب لينا الأرتكاريا ، وتمحق علينا الواوات ساكت.
فلو داير اجابات ننصحك بجمع كل الاسئلة في عريضة والصعود في اعلى برج الفاتح وقولهم لو ما جاوبتوني حا اقع من فوق(طبعا الجماعة حا يقولوا اخيرا جانا الفرج)
الخيار التاني يا جبرة : الشكية لي اب ايدا قوية.


#651162 [north kodofan]
0.00/5 (0 صوت)

04-29-2013 09:25 PM
ود الحبر البيمدح داك؟؟.. ولّلا واحد، اقصد شيتاَ تانى؟؟..


#651127 [عباس بن عباس]
5.00/5 (1 صوت)

04-29-2013 08:15 PM
ها ها ده كلو كوم...ولمن يقولوا ليك الشبكة طاشه..


#651078 [A,M]
0.00/5 (0 صوت)

04-29-2013 06:26 PM
قدمو عطاء لاستيراد الحبر والعطاء وقع للحبر رايك شنو ؟


ردود على A,M
Russian Federation [ست اللنديايه سابقاً] 04-30-2013 05:36 AM
يا ودجبرة هو براهو الحبرمافي ؟ انت والله مرتاح ماشاء الله .نحنا هنا مويه مافي،نور مافي، كِسرة مافي، رغيف مافي ،بصل مافي، زيت مافي ، غاز مافي، فحم، حطب مافي، بلح مافي،شعيرمافي، كريستال مافي ،ونحن اظنو في حسابات الجماعه مافي !!!!!!!!!!!!!!!


#651048 [سوداني وبس]
0.00/5 (0 صوت)

04-29-2013 05:41 PM
ياود جبره انتا ما بتفهم داير مدير الشرطه (بدون ميم طبعا) يرد عليك كيف ما قالوا ليك حبر مااااااااااافي


#651040 [بت ام الحسن]
4.50/5 (4 صوت)

04-29-2013 05:26 PM
اتذكرت واحدة كانت جارتنا وكانت مره الغفير الحارس البيت الببنو فيهو قصادنا 000جاتنا يوم تضحك وتتريق قلنا ليها مالك ياحوا !!!قالت ركبت المواصلات ونبذت الحكومة دى جنس نبذ وشتمتها وما خليت ليها صفحة ترقد عليها قلت يسمعنى واحد من ناس الامن يقوم يقبض على

احنا فى استغراب :

وعملتى كده ليييه

حوا:

قلت ادخل السجن ارتاح من كواريك شفعى الجعانيين ديل شويه وآكل لى قراصة يوم يوميين 00لكن مافى ذول هببو لى

الحصل لحوا دا ياهو الحاصل معاك حسى


#651029 [ام الحسن]
4.50/5 (3 صوت)

04-29-2013 05:12 PM
والله كان رخصك الما مجدده لميتها كلها وشلتهاوسقت عربيتك الماعندها شهادة بحث دى ومشيت لمدير عام الشرطة وختيتهم قدامو فى مكتبو وقلت ليهو اتخذ الاجراءات القانونية 000مايعمل ليك اى حاجة وح يترجاك تروق المنقا لانك ذول عكليته وكبسور ولايوق بكرة تقوم تختهم فى كسرة جديدة000مش تكتبها فى مقال وتنشرو فى جريدة مامعروف مدير الشرطة بقراها وللا لا واذا قراها ح يصهين وللا لا

كسرة ثابته

اخبار محكمة النفايات وارنيك 15 شنوووو


#651020 [Hino]
5.00/5 (4 صوت)

04-29-2013 05:04 PM
اقسم بالله العظيم انا حصل لي بالضبط ما حصل لحاحبنا ببحري ومستعد للشهادة امام اي محكمة.
في مجمع العلاقات البينية بالخرطوم يوجد مكتب جوازات خاص بضباط القوات المسلحة(المعاشيين) غرب جامعة المستقبل. وفي يوم من ايام رمضان المعظم ذهبت لاستخراج جواز سفر لزوجتي وطفلي وبعد كل المعاناة التي واجهتني في الحصول علي الارنيك والذي ينتظر من يسلمك اليه ان تسلمه شئ فقد بدأت الاجراءت وقمت بدفع الرسوم وهي 360 جنية لجواز الزوجة 160 للطفل وقد قامو بارفاق الايصال في الملف وقد كانت دهشتي عندما طلبوا مني مراجعة البيانات فقد وجدت ان الايصال مكتوب به مبلغ 315 جنيةلجواز الزوجة و130 لجواز الطفل. وعندما اعترضت علي هذا الخطأ تم تأخيري الي نهاية اليوم تقريبا الساعة 4 عصرا وقالو لي ان هذه الزيادة للخدمات ودعم لمعاشي القوات (المصلحة) وان احضر بعد عشرة ايام لاستلام الجوازات .


ردود على Hino
Russian Federation [ابن السودان] 04-30-2013 12:55 AM
نفس الحكاية ، بس أنا ما إستلمتا حتي الآن. .....

الكلام ده ليهو اربعة شهور ؟؟؟!!!!


#651005 [الحكيم]
5.00/5 (1 صوت)

04-29-2013 04:45 PM
لازم الشعب السودانى تكون عند ثقافة انواع الاحبار وانا اعتبره قصور ولذا عليه لا بد من عمل دورات للاحبار وانواعها فى دوائر الشرطة المرور والجوازات وغيره حتى تتوفر عند بتاع ملئ الارانيك ويسألك الراجل ويقول ليك انت واقف هسع فى اى مكتب وطبعا بالرقام وتكون فى فاتوحة بتاعة ماكلة جديدة
الله فى عون الشعب السودانى


#650999 [ود فارس]
5.00/5 (3 صوت)

04-29-2013 04:39 PM
نفس المسلسل حصل معاي لمن رحت ارخص قالو لي جيب شهادة البحث السابقة قلته ليهم ما اديتونا ليها السنه الفاتت و قالو مافي وادونا استيكر فقط قالو لي مافي كلام زي ده امشي طلع شهادة فقدان مشيت طلعته شهادة فقدان بالرغم من انه انا ما فاقد حاجة وبعد ماجبت شهادة الفقدان قالو ده مابتنفع لانها طالعة من مركز شرطه طيب يااخوانا انتو عايزنها من مركز شباب بحري بتاع الفنانين ولا شنو قالو لا يجن ان تكون من وكيل النيابه مشيت لوكيل النيابة يوم الخميس الساعة واحد ظهرا قالو لي الزمن فات و اضريت جيت يوم الاحد لاستخراج الشهادة شوفتو البشتنه ده كيف ضياع زمن وضياع عمر وضياع قروش


#650992 [محمد احمد]
5.00/5 (1 صوت)

04-29-2013 04:28 PM
يا ودجبرة يا اخوي انت تذكر الحادث الحصل ليك في شارع الحرية لمن كنت بتشتري الايس كريم لاولادك وشكيت الافراد ورقم السيارة وكدة
بسعلك الحصل شنو في الموضوع داااااك
اذا عرفنا الحصل شنو هناك ننتظر الرد بتاع الفريق اول هاشم عثمان الحسين
وللا اقول لك اخطى الجماعة ديل وخليك مع البنية بتعت الرسوم


#650974 [الكومندان]
5.00/5 (1 صوت)

04-29-2013 04:13 PM
والله ياأستاذ لا حياة لمن تنادي ،،الناس ديل مابستحوا ولا بيحسوا ( تخانة جلد ) ،،بس زي ماقتا الواحد بس يقيف فوقهم ويذكرهم كل مرة كدا بفضائحهم العجيبة والغريبة دي يمكن يختشوا أو مايعملوها واضحة كدا لو مادايرين يهتدوا


#650963 [قرفان من ريحة الفساد]
5.00/5 (1 صوت)

04-29-2013 03:55 PM
والله لو بأيدى كنت عينتك النائب العام ..واخرتا شنو ...؟ مع الذمة الواسعة دى.


#650949 [البشير على نافع الجاز الفللى]
4.50/5 (3 صوت)

04-29-2013 03:40 PM
المبلغ اللى فى الايصال اقل من المبلغ المدفوع؟
بسيطة والله
طيب انا دفعت الرسوم كلتها بس بدون ايصال لانو الموظف بتاع ولاية نهر (-) وضع المبلغ كلو فى جيب الساعة اى والله كوول المبلغ وانا استلمت ورقى والحمد لله يا دار ما دخلك شر


#650947 [قاعد برة زيك]
0.00/5 (0 صوت)

04-29-2013 03:40 PM
انت يا زول ما عندك موضوع ولا شنو؟ الناس في ام دوم و ام روابة وانت في شنو؟


#650940 [يحيي العدل]
5.00/5 (1 صوت)

04-29-2013 03:30 PM
أنت يا أستاذ تجد طريقة للتعبير غير متاحة لغيرك .
وربما يقرأ المسؤولون شكواك أو عوتك أو صرختك !
لكن كم واحد يواجه مثل ما تواجه ؟؟؟؟
كم من قضايا لم تجد الأعلام ؟؟
ناس الضو البلل و الفلم الهندي وسيف البطيخ وياسر الدكتور وراشد الغنوشي شغالين تمام .


#650932 [سودانى منفرج الأسارير]
4.50/5 (2 صوت)

04-29-2013 03:24 PM
والله والله ما سمعت تعليق ابهج من تعليقك ايها ألأخ يا واحد تانى .. يا اخوانتّا خففوا حملكم من على ظهر ألأنقاذ شويه.. فقد جعلتكم تحملون اقدارا وفيره من خفة الدم وسرعة البديهه والظرافه .. موهيك!!


#650922 [بدر السما]
0.00/5 (0 صوت)

04-29-2013 03:15 PM
يا استاذ جبر ا إنت قاصد ياتو حبر فيهم ؟؟؟


#650897 [mutasim]
4.38/5 (6 صوت)

04-29-2013 02:56 PM
الغريبة حبر الايصالات ما بقطع


#650893 [كرباج]
0.00/5 (0 صوت)

04-29-2013 02:55 PM
حقو ارد ليك المادح الشيخ الحبر ويقول ليك ( الحبر مافى إنت وين وتانى وتانى مافى تمشى وين ؟


#650892 [اكشن]
5.00/5 (1 صوت)

04-29-2013 02:53 PM
الشرطة اصبحت بؤرة للفساد وهذا ليس اتهام بلا دليل اذهب وافتح بلاغ سرقة لحاجة قيمة مثل سيارة او دهب او اى شى له قيمة يتم تحويلك للمباحث ماذا يحدث الجميع يعلم ومافى داعى للتفاصيل وانا لى تجربة مريرة الشرطة فى راى الشخصى عايذة هيكلة ونظام جديد للادارة


#650876 [أبو الكجص]
0.00/5 (0 صوت)

04-29-2013 02:36 PM
الخوف المسألة ما تبقى على حبر وبس .. على المراجع لمعاملته أن لا يتفاجأ المرة الجاية عندما يذهب للسؤال عن الحبر مايلقاش حد يرد عليه.


#650853 [abutariq]
0.00/5 (0 صوت)

04-29-2013 02:22 PM
الحبر جا ولا لسه


#650835 [saif]
0.00/5 (0 صوت)

04-29-2013 02:05 PM
معليش واللة امبارح نسيت اسالك الفاتورة الكتبها الصيدلى باسم الدواء الصاح ولا الغلت


#650823 [كسلا]
4.50/5 (2 صوت)

04-29-2013 01:59 PM
سوق ساي يازول البشير سائق البلد دع ربع قرن دون رخصة وكان علي الشرطة لهم يوم حنصفيها ونرجعها الي عهدها السابق ويبقي المنتمي لها اشرف مثل شرف الزعيم الأزهري وعبود بس كبر الفاتحة وساعدنا بالصبر الحلة جقجقة خلاص واتسبكة


ردود على كسلا
Russian Federation [البعير] 04-29-2013 06:14 PM
الاخ كسلا والله ده اجمل تعليق (سوق ساي يازول البشير سائق البلد دع ربع قرن دون رخصة وكان علي الشرطة لهم يوم حنصفيها ونرجعها الي عهدها السابق ويبقي المنتمي لها اشرف مثل شرف الزعيم الأزهري وعبود بس كبر الفاتحة وساعدنا بالصبر الحلة جقجقة خلاص واتسبكة)فعلا ربع قرن بدون رخصة واللمبي يعرض وكل يوم محتلين مدينة


#650819 [مهاجر]
5.00/5 (2 صوت)

04-29-2013 01:55 PM
والله ذكرتني غمدت لبدت التي كنا نلعبها أطفالا حيث يقوم فريق بالإختباء ويقوم الفريق الثاني بالسؤال خلاص ؟ وتأتيه الإجابة لسه و يتكرر السؤال والجواب خلاس ؟ لسه وبعد أن يكمل الفريق ألأول عملية الإختباء يرد على سؤال خلاص ؟ بأيوه. لكن في حالتك دى حيكون الأمر كالآتى :
جبرة : الحبر جا ؟
الشرطة لسه
جبرة : الحبر جا ؟
الشرطة لسه
جبرة : الحبر جا ؟
الشرطة: لسه
جبرة : الحبر جا ؟
الشرطة: لسه
جبرة : الحبر جا ؟
الشرطة: لسه
جبرة : الحبر جا ؟
الشرطة: لسه(عارف ليه ؟ لأن في أولويات أهم من الحبر . أم دوم وكده)
وهكذا إلى أن تقوم قيامة الإنقاذ وعسى ربى أن يجعلها قريبا ومتعك الله بالصحة والعافية يا أستاذالفاتح . آمين آمين


#650798 [Abu Areej]
5.00/5 (1 صوت)

04-29-2013 01:34 PM
(نرجو من الأخ مدير عام الشرطة التعليق على هذا المقال .. وهل (الحبر جا) وللا (لسه) وبالمرة الرد على حكاية (سنار) و(بحري) دي والحصل فيهم شنو عشان نطمئن وكده؟)

انت كترتها كدة يا استاذ.. سؤال واحد ممكن..

اقتراح: الكسرة الثابتة دي اتجه فيها الى زيادة الاس مثلاً (تربيع، مكعب،...)


#650791 [شليل]
5.00/5 (1 صوت)

04-29-2013 01:29 PM
نظرا لعدم توفر الحبر وانعدامه نرجو من الجهات ذات الاختصاص السماح لحامل هذه الافادة بالقياده والسماح لعربته بالسير فى شوارع العاصمة الى أن يتوفر الحبر
وهذا منى والاعتماد
رائد قاعد ساى


#650787 [مهاجر]
4.75/5 (3 صوت)

04-29-2013 01:20 PM
تحياتى للأستاذ جبرة، هاك دي :أنا ذات مرة وأنا مريض ذهبت لأحد مراكز العلاج بالتأمين الصحى فهالني أن قال لي الموظف المختص والله أرانيك مافي لكن هاك الأورنيك ده أمشي صوره و وجيب لينا الأصل وأشار لي إلي محل تصوير تجاري مقابل للمركز مباشرة وطبعا رضخت للأمر لأني مريض وقدكانت قيمة الصورة ألف جنيه - واحد جنيه إنقاذى - طيب لو ما كان عندي جنيه التصوير يعنى ما أتعالج وأنا دافع أقساط التأمين مقدما . وبرضو تقول لي الخبير الوطني قال ؟ هااااااك الحبر ده

كسرة ما ثابته : شكرا يا جبرة علي مجانية شهادة الميلاد ال مكتوب عليها مجانا من ما ولدونا

كسرة أخيرة :أخبار لواء الردع شنو إتحرك لأم روابة وأبو كرشولا ولا لسع ؟


#650776 [قاسم الجنيد]
2.00/5 (1 صوت)

04-29-2013 01:09 PM
اديك العافية اخونا الفاتح جبرة او قول العم الفاتح جبرة ،، نحن فى الرياض استخرجت جواز و جنسية لى ولدي من السفارة السودانيةبالرياض ،، استلمت الجواز و الحق يقال فى ساعتين و الجنسية قالوا بلاستيك تغليف مافى ،، تعال بعد اسبوع ،، مشيت بعد اسبوعين برضو بلاستيك التغليف ما فى ،، الحمد لله استلمتها يوم 23/4/2013 و قدمت ليها و للجواز يوم 18/2/2013 م ،،


#650744 [بكر]
5.00/5 (1 صوت)

04-29-2013 12:38 PM
حقو تعمل ليك كسرة ثابتة تكتب فيها الحبر جاء ولا شنوووووو


ردود على بكر
Russian Federation [المتغرب الأبـدي] 04-29-2013 02:07 PM
الله يديك العافية ..
أضحكتنا في هذا الزمن الكعب


#650737 [ابو ابراهيم]
3.94/5 (5 صوت)

04-29-2013 12:34 PM
يا استاذ المره الجايه شيل محبرتك معاك


ردود على ابو ابراهيم
Russian Federation [عمدة] 04-29-2013 03:55 PM
هههههههههههههههههههههههههههه


#650736 [واحد تانى]
4.74/5 (17 صوت)

04-29-2013 12:30 PM
انا خائف يرد عليك الحبر نور الدائم ويقول ليك يجب اطاعة ولاة الامر ...!!


ردود على واحد تانى
Russian Federation [الحاوي النقرابي] 04-29-2013 03:22 PM
باخ الشاي ادفق واتشرقت والضحط شرطنا وشر البلية ما يضحك . ويا جبرا لو شفت ناس الخدمة العسكرية داخل مبنى شئون العاملين بالخارج تدي ربك العجب ياخ ديل عادي بلحسو باقي القروش وما تتوقع منهم اي اعتذار ( فكة مافي وكدة ) لا يعاين ليك بكل بروود ويرد قائلا منتظر شنو يلا البعدو
وهكذا دواليك من اللحس وأكل أموال الناس بالباطل

Russian Federation [واحد مغترب زهجان] 04-29-2013 02:46 PM
والله تعليق كارب قربت تحصل جبرا زاتو هههههههههههههه

Russian Federation [ود كسلا] 04-29-2013 01:54 PM
شكرا يااستاذ علي طرح كل مايهم الناس.تعرف اسي الجماعة من يقروا موضوعك دا يقوم واحد من ناس هي لله يسجل شركة بي اسم اختوا و ياخد عطاء توريد الحبر و بعد فترة الناس تكتشف الموضوع و الجرايد تكتب و نحن تنفقع مرارتنا.


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة