في



المقالات
الشعر
أسماء الجنيد
البلد نشفت من خيرها..وغرقت بدم الغلابة!!!
البلد نشفت من خيرها..وغرقت بدم الغلابة!!!
05-01-2013 08:26 PM

الحصل والبحصل كل يوم في اراضي البلد من سرقة وإغتصاب عينك يا مواطن اصبح شيء مألوف وطبيعي !والسبب المباشر هو الصمت والهوان !
والحصل في أم دوم يثبت بما لا يدع مجال للشك إنه العصابة المتمرسة في السرقة والقلع بقوة عين ،والبدأت سرقتها من العاصمة تحديدا( الخرطوم وامدرمان وبحري)
أثبتت تماما إنها نشفت العاصمة تــــــب وعدمتها السارحة والمتراوحة !!
كل الخيرالفي البلد من أموال في البنوك و اراضي وممتلكات للدولة والمواطنين!إتقسموها كلها وحولوا الفيها لمصالحهم الخاصة في أرصدتهم في البنوك الخارجية!.

أخدوا راحتهم وبالحيل إتمددوا وإنفروا فيها بي عوائلهم ونسابتهم وجيرانهم وكل التابعين لهم !!
الشعب ده طالما ما ساكت وكاضم ونائم نومة أهل الكهف، قالوا احسن نتشرا زيادة برة العاصمة ونبدأ بي المناطق الحوالينا
طبعا من يوم ما بدوا حفرهم في العاصمة، جندوا مناديبهم في مدن السودان المختلفة في كل مكان.
لا خلوا مشاريع زراعية ولا مصالح حكومية. كل المدن طالتها الأيادي القذرة وبترت نضارها اليانع وقصت نوارها ونشفت جذوره!

وفكروا في أقرب المناطق للعاصمة،طمعوا في أم دوم !و خذلتهم شهامة أهلها الحقانيين لا برضوا الحقارة، ولابخبروا الكسل و النوم!!
عفيت منهم وقفوا سد منيع في وجوه الغشامة البيأكلوا حق اليتامى!
ناس أم دوم كانوا وما زالوا قدوة للرجال اولاد القبيلة ، الما بقبلوا بالظلم والحقارة ، وعينهم حمراء وشرارة ! ولا بسكتوا على الغش الباين.
حزنا حد النواح لفقد الشاب اليانع الذي قتل غدرا وظلما! لكن عزانا نحتسبه عند الله شهيدا روى ارض جدوده بدمائه الطاهرة دفاعا عن الأرض والعرض .
رغم صغر سنه أثبت للقوم النائم إنه الرجالة ما دايرالها عمر معين! وإنه أم دوم لسه فيها تيراب جدودنا الأحرار الماتوا في كرري ...
يا أهلنا في ام دوم الحق حق و القصاص من عصابة المجرمين واجب ونحن عارفنكم صامدين,, العين بالعين والسن بالسن والبادي أظلم.
نثق تماما دم الشهيد محمد عبد الباقي لن يروح هدر طالما ارض جدوده أنجبت ابطالا كالآوتاد والجبال في اراضيهم الصلبة
لن تزحزحهم اسلحة كلاب الأمن الغاشمة ولا جيوشهم المدفوع أجرها من دم الشهداء!
نتمنى من أهلنا في ام دوم الصامدة الحرة الأبية مواصلة صمودهم الذي شرح صدورنا رغم الوجع البارك
التعازي موصولة لأسرة الشهيد ولكل أهل ام دوم ، النصرحليفكم ، ولكم العزة والصمود دوما إن شاء الله .

نتمنى من اهلنا في كل بقاع الوطن أن يقتدوا بمواطني ام دوم البواسل،أطفالهم بالحجارة زعزعوا مكر وبطش اصحاب النفوس الدنيئة!
لو من البداية أي تجاوزات حصلت في البلد من نهب وتعدي على حقوق المواطن و سرقة قوت الغلابة! إتصدت لها الناس بصلابة وقوة وعزيمة، ما كان البلد خرب!
وما كان البلد إتشلعت من مجاميعو !!اصبح السودان من أفقر دول العالم في كل شيء, لا تعليم لا صحة و لا إقتصاد ولا تنمية ، ولا أمن ولا قانون !!
حتى الموجود إنتهى نهاية مؤسفة امام رؤس الأشهاد! والمصيبة اصبحت تجاوزاتهم تدعمها شريحة بما يسمونهم رجال الدين !!
اي رجل دين هذا الذي يهين المرأة التي كرمها الإسلام ؟ واي رجل دين هذا الذي يبيح الظلم نهارا ، بسجن وإغتصاب الحرائر ! ويبارك ويؤيد فك اسر المجرمين؟
اي قانون هذا الذي يبيح للحكام سجن وتعذيب وقتل الأبرياء في عقر دارهم ؟ ويفك اسر من تطاول على الحكام انفسهم ! لكنها حيلهم التي لا تنطلي على طفل رضيع!

كل هذا سببه السكات والخنوع ، جعلهم يتمادون ويتطاولون على حقوق الشعب الصامت لهم دوما!!
المواطن مظلوم نعم، لكن الساكت عن الحق وعن الظلم شيطان أخرس! ليه نسمح بالظلم من البداية ؟ وليه نجعلهم يستلذون بطعم قهرنا وظلمنا عنوة ؟
ماذااحل بالسوداني الأصيل إبن البلد ؟ سلالة جدود لم ينحنوا يوما !! ولم يهابوا ولم يخشوا إلا الله سبحانه وتعالى ! قهروا المستعمر ورفعوا راية الحرية عالية خفاقة ؟
أين نحن منهم ؟ هل نبكي على زمننا السمح؟ ام نبكي على جيلنا الذي ضاع امام اعيننا ؟ ام نبكي على الظلم البائن من الحكام وصمت وخنوع الشعب لهم!؟؟

متاوقة
لو جدودنا رفعوا رأسهم وشافوا احفادهم صامتين خانعين لتجار الدين ! كان بكوا دموع الدم وماتوا تاني حسرة وهم !!!
صحي البطن بطرانة
يمهل ولا يهمل

أسماء الجنيد
[email protected]





تعليقات 8 | إهداء 1 | زيارات 2264

خدمات المحتوى


التعليقات
#654848 [abdelmonem]
0.00/5 (0 صوت)

05-03-2013 03:13 PM
عافي منك وراضي عنك أختي أسماء،والله بت رجال ونسوان وحواء السودان لم ولن تعقم ودمتي عزة للسودان


#654335 [شطة خضراء]
0.00/5 (0 صوت)

05-03-2013 01:34 AM
شطة خضراء جدا
هل كان أصلا في رجال أو رجالة في السودان، أن المستعمر الإنجليزي قعد آمن و مطمئن في بلاد السودان لمن حكمت ليهو براهو و لظروف تتعلق بالأوضاع الدولية العامة فقرر أن يترك السودان و حتى ذلك الوقت كان السودانيين نايمين و راضين بحالهم ما عدا بعض المثقفاتية الذين كانوا يتحينو خروج المستعمر ليرثوه و كانوا ناس قريعتي راحت سااااااي و شغالين معارضة لينة و ناعمة ذي البيمارسوها أحفادهم اليوم، أما الثورات الجدية و الحقيقية هي التي إندلعت في نفس المناطق التي تخوض ثورة الكرامة اليوم ضد ورثت المستعمر فما تقدونا ساااااااي

ملحوظة: يا أستاذة كلامك كان سمح إلا إنك طبزتيهو عندما ذكرتي حكاية أولاد قبيلة دي و الوهمات الكذابة ديك و يبدو أن الطبع غالب و ياها حركاتكم معروفة للجميع


#654316 [الجوفي]
0.00/5 (0 صوت)

05-03-2013 12:38 AM
ودالفاضل كلامك 100%


#653941 [rambo]
1.00/5 (1 صوت)

05-02-2013 03:38 PM
يا حجه ما تشوفي عيالك ربيهم أحسن
الواحد فيكم قاعد مرتاح في بلد الغربه وقاعد ينظر بس
شفتي شنو من شقي إنت ولا بس خلقنا لنعترض


ردود على rambo
European Union [عبدالرحيم العمده] 05-03-2013 01:35 PM
بدل تفعيل سلاح الكتيبة الالكترونية هنا وتشتيت الموضوع فالاحرى ان تنضم لمتحرك ام روابه لرد زحف قوات الحركة الثورية والتي سنقف معها بكل ما نملك ، لانها الوحيدة التي حملت همومنا على اسنة الرماح وستنفذ امنياتنا بمحاسبة كل من اجحف في حق هذا الوطن الجريح ونؤمن تماما" بأن القوادم من الايام ستكشف التفاف كل مكونات الشعب حولها باستثناء المخذلين والنفعيين والجبناء وان غد لناظره قريب وكما نردد دائما" فان الصمت ليس رضا مطلق. بنت الجنيد تحيات خاصة.

United Kingdom [ود الفاضل] 05-02-2013 07:01 PM
والله يا سيد رامبو المنجعص في الصين،البتخاطبها بالحجة دي، إنت ما تسوى ضفر رجلها الصغير.
لأنها بتعبر بحرية وشجاعة وكلام مرتب ومنطقي ، بتعبر عن الآلاف من الغبش المهمشين.
بصراحة كده أرجل منك ومن مليون زيك ، لأنك زول ساي ، نكرة يعني ، والنكرة لازم يعرف قدر نفسه عشان ما يتطاول على القامات الزي استاذة أسماء الجنيد المحبوبة ببساطتها ولغتها السهل الممتنع ،وفهمها الكبير.
أستاذة أسماء تربي أجيال مش اولادها بس؟هي إبنة المربي الجليل الذي ترك بصمة واضحة في التعليم، رحمه الله.
بعدين شايفك بتناقض نفسك! فعلا إنت خلقت لتعترض.. ولا شفت شنو عشان تتكلم مع الأستاذه باللغة الركيكة دي والبتعبرك عن خواء عقلك فقط.

همسة أخيرة
اتصل بالجالية السودانية في بريطانيا واسألهم عن قدر ومكانة الأستاذة واسرتها
عشان تعرف رغم همها بأهلها وبلدها، لكن أنجزت الما قدروا ينجزوا مئات البشر الإغتربوا قبلها.
درست، نجحت ، إشتغلت ، طورت نفسها وما زال قلمها سنين من أجل الوطن..
لها ولأسرتها التحية والتقدير، والدعوات ربنا يحفظهم ويرد غربتهم
والكيد لأعداء النجاح ..........

[lado] 05-02-2013 05:25 PM
تعرف تقول ميييييييييييييييييييع بالصيني؟؟؟


#653917 [عبد الله]
0.00/5 (0 صوت)

05-02-2013 03:09 PM
للاسف يا بت الجنيد فحواء السودانية عقمت منذ الاستقلال ، كل الحكام الوطنين بعد الاستعمار دمرو السودان وكأنهم مغبونين منه ( عبود اغرق اهلنا فى حلفا من اجل مصر!! ونميرى اشتر وكل سياساته غلط افقر الناس ، الصادق المهدى والختمية حينما فازو تركو الشعب وقعدو يتقاتلو على كيكة السلطة الهزيلة ، ثم جاءت الانقاذ بكل موبقاتها المعروفة )
من وين نجيب ناس نضاف ؟؟؟


ردود على عبد الله
[lado] 05-02-2013 05:28 PM
وانته قاعد بركة ؟؟؟ ناس اسماعيل الازهري ومحمداحمد محجوب والرعيل الاول من الوطنيين ديل كانوا من كوستاريكا؟؟؟عالم غير تصدير الاحباط والاكتئاب للاخريين ماعندهم حاجة


#653300 [ركابي]
4.99/5 (16 صوت)

05-01-2013 10:48 PM
الكيزان لعبوا في الداتا بتاعت الانسان السوداني خلوهو سلبي وجبان ...نستثني ناس الجبهة الثورية طبعاً


#653250 [الدخرى عزالدين]
0.00/5 (0 صوت)

05-01-2013 09:21 PM
لله درك يابنت الجنيد
زمان قال مارتن لوثر كنق

لن يستطيع أحد أن يركب على طهر إلا إذا كنت منحنى !!!!


ردود على الدخرى عزالدين
Russian Federation [الدخرى عزالدين] 05-02-2013 12:21 AM
آسف الكلمه (لايستطيع أحد أن يركب على ظهرك إلا كنت منحنى)


#653229 [m almhasy]
0.00/5 (0 صوت)

05-01-2013 08:43 PM
اسئلتك مشروعه ياستاده لكن الكل ماشى جنب الحىط انا ماعارف الشعب ده مستنى شنو معقول الكيزان ارجل مننا


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة