المقالات
منوعات
الفاتح جبرة.. لماذا أصبحت ذا السودانية لا تـ(خط)ط حواجبيها!!
الفاتح جبرة.. لماذا أصبحت ذا السودانية لا تـ(خط)ط حواجبيها!!
05-13-2013 09:30 AM

ـ ما خوفا من سرقة الـ(خط)وط واختفائها من حواجبيها متل (خط) هيثرو الوهمي اللي لحدي الآن وحسب قولك ما معروف هو وينوووووووووووو .. أصبحت ذا السودانية لا تـ(خط)ط حواجبيها!!

اوه ا. الفاتح يا اخي ازيك وازاي المدام والوليدات معليش من الخوفة اللي داخلتني من إمكانية سرقة الـ(خط)وط اللي في حواجب ذا (السودانية) متل (خط) هيثرو حق الـ(خط)وط الجوية (السودانية) نسيت في الأول أسلم عليك!

وهي خوفة لو تعلمون عظيمة! ويا بنات أمي كيفن ما تكون عظيمة فإذا ما كان الجماعة قدرو يهمبتوا (خط) هيثرو الوهمي اللي في السما! فأنا يا أخواتي أيييش بيضمني أنهم ما يسرقوش الـ(خط)وط من حواجبي هي بسم الله أقصد أيييش بيضمن ذا السودانية أنو ما يسرقوا الـ(خط)وط من حواجبيها!!

لتتحول الخوفة مع مرور الأيام لخُلعة! فمع ضغط ناس البيت عليها بحلفانهم ستين يمين أنها ما بتمشي معاهم أي مناسبة إن لم تضع (خط)وطا على حواجبيها! ستين يمين مصحوبة بقولة بلاش بشتنة معانا!! ما كان مني اقصد ما كان منها إلا أن تضع الـ(خط)وط على حواجبيها فإذا ما كانت المناسبة مسائية لبست نظارات شمسية داكنة ليصبح لسان حالها للمعازيم قائلاً: ـ هوووي انا مطلوبة شيكات طايرة!

أما إذا ما كانت المناسبة نهارية فحينئذ تحولت الخُلعة لهجيمة حيث إن ذا السودانية مع وضعها للـ(خط)وط على حواجبيها إلا واصبحت الرمشة والتانية الرمشة والتانية بعيون مطيَّرات ترفع في بصرها فوق حواجبيها مهجومة لتتأكد من أن الـ(خط)وط لا زالت في مكانها وبالتالي لم تسرق أو تختفي متل (خط) هيثرو الوهمي اللي ملك الـ(خط)وط الجوية (السودانية) واللي لمن انتبهت ليك لحقيقة انه ا. الفاتح جبرة ليه اكتر من عام ونيف يوميا عنه متساءلا في عموده: (خط) هيثرو وينوووووو!! (خط) هيثرو وينوووووووووووووو والذي حينما وجدته تماشيا ما حصل عليه من حقائق يقوم بتحديث كسرته لتصبح ( اخبار ملف عند النائب العام شنوووووووو) لهذا وكتين لقيت ليك عقب ذلك روحي اتلفت متل مروحة التربيزة مرة مع تصريح سعادة الرئيس بتقديم المتسببين في ضياع (خط) هيثرو للمحاكمة ومرة مع تصريح الشريف ود بدر بانهم مستعدون لتحمل المسئولية كاملة باعتبار أن الـ(خط) تم فقدانه إبان إدارتهم واتلفت تانية مع تصريح ناس البرلمان بأنه التحقيق لم ينته بعد في قضية (خط) هيثرو وأخرى مع تصريح ود بدر طلاقا والذي قبيل إكمال طلاقه لمن لقيت روحي اتلفت متل مروحة التربيزة إثر ذا التصريحات ما كان من كاتبة عمود انتباهة قلم على ضوء ذلك وتجنبا لمعايشة شعور الخوفة والخُلعة والهجيمة من سرقة الـ(خط)وط واختفائها من حواجبيها متل (خط) هيثرو الوهمي هي يا يُمه كُر عليّ أنا! أقصد ما كان من ذا السودانية إلا أن تتبنى وترفع الشعار التالي:ــ البشتنة البشتنة يا السودانية البشتنة .. ولا تـ(خط)يط حواجبي ليجري لهما ما جرى لـ(خط) هيثرووووووووووووووووووووووو


رندا عطية
[email protected]

تعليقات 1 | إهداء 0 | زيارات 2802

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#663966 [الطيب احمد]
0.00/5 (0 صوت)

05-13-2013 01:08 PM
خط هيثرو بسيط يا أخت رانيا المسالة وصلت لبيع الاراضي داخل الوطن للأجانب
والله انا خائف انو تكون الحكومة باعتنا ونحن ما عارفين


رندا عطية
رندا عطية

مساحة اعلانية
تقييم
1.00/10 (1 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة