المقالات
السياسة
امن شمال كردفان(2)
امن شمال كردفان(2)
05-17-2013 10:54 PM


عدت للتو من رحلة عزاء سريعه للابيض ورايت ان انقل اليكم بعض الملاحظات , الصورة النمطية عن الاهمال بعد كوستي في اتجاه الغرب تبدو بينه وهي بلا اي جهد حد فاصل بين مناطق هنالك اراده لتنميتها واخري لا توجد اراده لتنميتها, وبمجرد الخروج من كوستي التي يبدو انها امطرت قبل يومونحن في منتصف مايو , ظهر رشاش كردفان , فدرجة الحرارة كانت عاليه والسحاب طقع علي اطراف السماء وبدا واضحا ان صيانة الطريق معدومه بعد كوستي اذ ان بص الاستثمار الفخيم الذي قاربت تذكرته 100 الف بدا يترنح ويتمايل عن طبيعة سيره الممهد قبل كوستي , رايت بعد كوستي ان كل المناحل ومواقع تجميع مياه الخريف قد جفت وهذا الشئ قاتل لنفسي ومجمل تفكيري ينصب في كيفية تحويل هذه المناحل والرهود الي مصادر ثابته للمياه , شاهدت مباشرة ان بقرة النيل الابيض الغبيشاء موجوده بكثره وانها تبدو عجفاء لجفاف العشب , رغم وفرته هذا العام لكن مواقع مواقع المياه بعيده, تمنيت ان اشاهد محاولة لوجود مزرعة خضار او اعلاف او اقفاص دواجن لكن الحال لم يتغير في هذا الاتجاه, الطريق مزدحم بالسير , كل اصناف العربات حتي الجرارات الضخمة , واتمني لو نظر في امر صيانته قبل الخريف القادم ان امكن , قرى كردفان بطبيعتها الحبيبة الي نفوسنا بدات تلوح بمبانيها النمطية ورب بوادر للتحديث ربما لحالة تغيير الظروف التي انتابت بعض الدهابه وهو مصطلح عمل جديد بفضل التعدين حيث بدات ظواهر البناء الثابت تظهر في القري, علي مقربة من ام روابة شاهدت ان احدهم وبالقرب من الطريق بدا تسوير مزعه مع وابور ماء ومحاولة للاستزراع ابهجت نفسي , واتمني ان تكون مموله من البنك وان تكون توجها قادم مع عمل دورات علميه للاهالي في هذه المجالات مع اضافة الاعلاف والدواجن , في ام روابة والتي اجتهدت ان اري اثرا لدخول المتمردين فيها , فلم اري شيئا غير ان الجزء المحترق من محطة الكهرباء يبدو من بعيد وهي تقع يمين الشارع ولبعدها يبدو واضح انها استهدفت, مع عدم وجود اراده لتدمير المحطه كلية, بعد الرهد ظهرت بوادر تواجد الناس الذين نزحوامن ابي كرشوله ملابسهم المشرورة في المدارس وبعض المسطحات البيضاء ذكر لي احدهم انها خيام , وابقار السيسة التي تميل الي الحمرة ,قابلت احدهم وقال لي انها بليه وقعت علينا من رب العالمين قال هو عندو مخزنين من البضاعة والاسمنت لا يعلم عنها شئ بعد ما غادرو المدينه وانه فقد اثنين من اهله وان علي الحكومة انلا تمانع فيما بعد ان تمنحنا سلاح ندافع بيه عن انفسنا
فقلت له الا تري ان تسليحكم يذهب بكردفان علي نفس طريق دار فور وتصبحو نازحين.؟ قال نحن الان اصبحنا نازحين والناس ديل عندما دخلوا ابكرشوله عارفين الامطار بتنزل متين وقد نزلت الان , وكان السحاب بدا محمرا وداكنا وهي حالة الامطار التي ندركها في كردفان. قلت له ماذا تعني الامطار هناك ؟ قال لي تعني البره برا والجوه جوه. هل اتصلت بكم الدوله لمساعدتكم ؟ ايوه الدوله فتحت لينا مدارسها وكلمونا المسؤلين كلام سمح وجانا العون من كل مكان --من دنقلا --هذه كلماته لكن ما كفايه نحن الليله اصبحنا مشردين --قال لي انت منو --قلت ليه والله انا زول من كردفان وما عاجبني الحاصل عليكم دا وكنت قد استاذنت من سواق البص لمدة 15دقيقه فبدا يصفر وفشكرت الرجل الذي احسست ان عنده شئ يود ان يقوله لي , ولولا ارتباطات العمل لمكثت معهم يوم او يومين واتيتكم بالكثير منهم طبعا عشان نكون عادلين يصعب مقابلة او الوصول للطرف الاخ
خرجنا من الرهد وقد تناثرت المخازن الضخمة لصادر المحصول بدون ادني مجهود ملاحظ لاستصلاع المزارع او الحفاظ علي الغطاء النباتي هذا الشكل الكالح رافقنا حتي مداخل مدينة الابيض لاري ان المطار يبدو كأن تطويرا كبيرا قد طاله وعندما انعطف بنا البص يمينا بطريق مسفلت لم يكن موجودا بدا العمران كانك في احد احياء الخرطوم شرق عبيد ختم , لكن العطش بدا واضحا في حال الاشجار التي يحاول اصحاب المنازل استزراعها , وفد حاولت ان اشاهد منزلي السابق والذي كان قد شيد في التسعينات في حي المطار, لكني لم اري له اثر وقد احتوته المباني الفخيمةلقد سرني المشهد لكنه لم يفرحني خاصة عندما توغلت في المدينه ورايت التوسع العمراني الضخم الذي حدث وايقنت ان الذي نراه خطأ في الخرطوم قد حدث في الابيض وان سياسة بنك السودان هي توجيه البنوك للاستثمار في العقار لضمانته نفسه ولا يوجد من يفكر في امر تنميه او مشاريع , اشكال الماء يبدو واضحا وقابلت احد من اعرفهم , وتحدثت معه بشأن المويه فى الابيض , فسالته عن المشكله ؟ فقال لي المشكله معتصم ما قادر يعطي الشركة الماسكه خط الامداد الجنوبي دفعياتها والان كل المواسير للخط مرميه ومنتظره الحفر والامداد ونحن في ود البقه عندنا مويه تكفي الابيض لشهر عشرة والخطوط القديمه ضاقت مجاريها بالترسبات يعني لو كان بضخ الف متر مكعب في الساعه بقي يضخ 500 يعني شغال بنص كفاءته, يا اخي انتو جبتو ليكم زول والي وما قادرين تدعمو؟ قلت له كيف الكلام دا ؟ ايوه صاح ما انتو الكيزان ليه مرمطوا زولكم دا , كان وقفتو ليكم مهرجان واحد من البتسو فيه دا كان دبرتو موية الابيض دي ثم تانيا طريق ام درمان جبرا حسع لو الزول دا دخل الابيض واصلو ماسك طريق الابيض كوستي دا نحن حسع نمرق بي وين؟ قلت ليه انت كنت خايف ولا شنو ؟ شنو الما بخوفني هو الجيش مشا وين مافي زول عارفو ؟ الجيش مشي ونفذ خططو وحمي المدينه بحزام امني في منطقة جبل الداير ودى اجابه سماعيه مني انا , ما تاخد بيها لكني اظن سمعتها من الوالي
قلت ليه سيبك من الجيش مشكلتكم شنو -- قال لي مشكلتنا والينا ؟ قلت ليه مالو فاسد ؟ قال لي فاسد --دا يااخي زول فكي ساكت . (دا كلام كويس عنو) --والله الناس بقولو شيكو حق العلاج الا طلعوا ليه احمد هارون من التماسيح بتاعينكم ديل.(قلت ليه تقصد منو ؟) قال لي ماانت عارفهم--انتو ما تجيبو لينا احمد هارون والله اغلب مشاكل ناس الابيض الاصليين قاعد يحلها احمد هارون وكل ناس السوق ديل بحبوه وزولهم دعموه في انخابات كادقلي.(قلت ليه يازول كلامك دا رايك ولا راي الناس كلهم) -- واحد من هناك قال لي راي الناس كلهم ,( قلت ليه طيب فيصل ؟) قال لي شوف يا زول واحد مسك وما حلا مشكلة موية الابيض دي تاني ما دايرنو-- (لكن كان الحكومه دارتو ؟ )--يازول هوي حكومتك دي ما عارفه عن الابيض حاجه ووصلونا مرحلة اننا متحيرين نايدهم ولا نايد الحلو ؟( يازول ؟ )والله زي ما اقول لك --(لكن دا بقطع وبكوم )-- انشا الله مايخلي الا بعمرا طويل -- كدي خلينا من موضوع الحلو دا دواس بين الحكومه وبينو ونحن البتزوج امك كلو ابوك --(يعني اتو مؤيدين الحلو ؟) لا كان بقا زول عنصري زي ما بقولو ما دايرنو.( لكن انتو ما قاعدين تقولوا ناس الحكومه عنصريين وجلابه نمو مناطق اهلهم.) دا كلام صاح --حسع والينا دا زاتو عنصري زيهم . (ماقلت زول فكي --هو زاتو قال مريض واعتذر) -- يا اخي الله يعدل علينا وعليه--جيبو لينا الفريق والله مشا البلد دي صاح زمن سفر الوالي وعارف شغلو تمام وبتابع . (لكن بعضكم بقول جامعي عنصري ما داير طريق ام درمان بارا )-- القال ليك منو ؟ (البدعمو ليكم منو في المركز ؟ )الشئ كردفانكم مقطوعة الطاري دي ما عندها والي في الخرطوم مره واحده؟ (سمعنا قالو نفسو حار وناس نافع مكجننوا الكلام واغلب مشاكل الولايه للخلاف بينو وبين الوالي الكلام دا صاح ؟ )والله انا ما عارف لكن كان بخدم ليهم اغراضهم كان جابو ليكم-- كان وقت الصلاة وقدموني للصلاة ورفع فراش عمتي فسالت الله ان يدبر اهل الابيض انهم لا يحسنون التدبير وان يلطف بهم اذا جرت المقادير
اذا الحكومه عايزه تأمن كردفان عليها ان تضع لها برامج لتنميتهاوهي ليست تنميه كثيره كما ذكرنا سابقا


[email protected]

تعليقات 5 | إهداء 0 | زيارات 1211

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#671690 [الحاج]
0.00/5 (0 صوت)

05-21-2013 10:46 AM
ياأخى أنا كمواطن من كردفان (إنت حيرتنى )معتصم زاكى الدين هذا زمنه إنتهى والان هو يعانى المرض (شفاه الله)رغم إنه الرجل لم يحقق مايطمح إليه إنسان الولايه ، لكن نقول ربنا يجعل خيرهافى غيره،إنت بتسوُق لأيهم،أحمد هرون أم سعادة الفريق .


#669057 [ودالمبارك]
0.00/5 (0 صوت)

05-19-2013 06:47 AM
لاخير فى هذا ولازاك الابيض مستهدفةمن زمن بعيد مواطن الابيض الان بقى غريب بقت زى قضية اسرائيل وفلسطين انسان الابيض اصبح مستضعف شوف السوق اقرب مثال تقول تنمية اديها سنةلو الحال ماتصلح الحكومة تقنع من خير فيها لانو كلامم من عرفناهم نفاق فى نفاق


#668644 [مع العدالة]
0.00/5 (0 صوت)

05-18-2013 04:05 PM
والله كلامك ده نجر ساكت تكون مشيت اجتماع (الفريق ) ببعض الكوادر الاعلامية الكردفانية عشان تسوقوا ليهو اللعبة كخليفة لمعتصم وقبضك التلاتة مليون وبديت تكتب الان ...نحنا ما عايزين اى عسكرى يحكم تانى لا الفريق ولا المشير ولا العميد ما يحكموا ولا كورة قدم خلى ولاية ديل قتلة الشعب السودانى منذ الاستقلال والى الان


#668419 [osama dai elnaiem]
0.00/5 (0 صوت)

05-18-2013 12:47 PM
وازيدك من الشعر بيت--- والي شمال كردفان قال صدقوا له بالف وخمسمائة مجاهد ولو كان ذات المبلغ طلبه من قبل لعمل مشروعات تنموية بولايته لامكن تجفيف العطالة واستيعابهم في مشروعات وحينها لا تجد الحركات المسلحة من يقاتل معاركها-- والان كل واحد ( مستهبل) عاوز يستمر في موقعه لبس عسكري وبدا ينادي في الشباب لتامين نزواته لمزيد من العبث بمقدرات الشعب ولتحرق (امروابة ) وقبلها ( ابو كرشولا)ويلحق بهاشباب السودان بدعوي الجهاد!


#667960 [الكوشى]
0.00/5 (0 صوت)

05-18-2013 12:13 AM
شخط!!!


جبريل الفضيل محمد
مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة