06-09-2013 03:18 AM



في زمن الرأسمالية الطفيلية ، تنهمر السلع المضروبة للأسواق من كل حدب وصوب

توجد اللمبة التايوانية عمر يوم واحد ، والوصلة الكهربائية التي تطرشق متي ما لامست المكوة

كما توجد اسبيرات العربات المصنوعة من الصفيح ، ولساتك البصات المعاد تصنيعها مثل شباشب ( تموت تخلي )

وفي أي دكان ، هنالك صنفين من كل حاجة ، وبالطبع سعرين

السعر الأعلي للسلعة التي تسمي أصلية ، والأدني للسلعة التجارية

وبين الصنفين يجري غش الداقسين ومن لا يعلمون خفايا السوق ، حيث يصبح الأصلي تجاري وتضيع الأموال في الفاصل المداري

وبين هذا وذاك يطلع ناس في السماء السابع ، وينزل ناس لي حفرة النحاس

والسلع المغشوشة والتي لقبها تجارية تدخل علي عينك يا تاجر تحت بصر الجمارك والمواصفات طالما كان المستوردون من التنابلة بتوع الرشوات

وطالما ان الاقتصاد لا ينفصل عن السياسة فتوجد حكومات أصلية وحكومات تجارية

الأصلية تأتي بالانتخابات النزيهة الما مضروبة ، حيث التداول السلمي للسلطة . والحريات العامة . تعمل مظاهرة مافي زول يسألك ، وتنتقد الحكومة في الجرائد تقول ليك شكراً . وتلبسي بنطلون مافي زول يجلدك

وتدخل مكتب أي مسؤول دون حواجز ، وتتعالج في أي مستشفي حكومي ( ملح) ، وتتعلم بالمجان وتتوظف كمان فهذا حقك الطبيعي .

والحكومات التجارية تأتي عن طريق الانقلاب العسكري ، ولابد أن يكون البيان الاول علي الطريقة المعهودة ( حقناً للدماء ووقفاً للعبث والفوضي قرر المجلس العسكري الانتقالي كذا وكذا ) .

أما المجلس الذي يريد أن يحقن الدماء فتأكد من أنه سيغرق البلاد أنهاراً من الدم

وحكاية العبث والفوضي تبتدئ من حظر الصحف والحريات وتنتهي بنهب الأموال العامة

وبين هذا وذاك انتخابات واستفتاءات مضروبة بنسبة 99 في المية للحزب الحاكم ، وحكومات شمولية عليها حبة بهارات باسم الحكومة القومية .

وكلما زنقت الحكاية قال التنابلة للشعب انتظر طلوع البترول ، فلما طلع شطفوه وقالوا انتظروا الدهب ، فلما طلع حديد ، قالوا انتظروا النهضة الزراعية فلما طلعت فشوش قالوا انتظروا الخطة الخمسية فلما ماتت في مهدها قالوا دا كلو من المعارضة .

ولأن الغراب لا يشبه الطاؤوس ، فالحكومات التجارية لابد أن (تعوس) ،

من العواسة ما قتل ، ولو زاد البترول يركب الناس الكارو ، ولو ارتفع سعر الدقيق ما ياكلو كسرة

وبينما تهيم الحكومات التجارية في شطحاتها ، ترص الشعوب (الأصلية) صفوفها لكنس السدنة وناس زوبة اللهلوبة مش كدة يا ( شلوبة )

الميدان

تعليقات 3 | إهداء 0 | زيارات 1134

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#692043 [ABU SHAWARIB]
3.00/5 (2 صوت)

06-09-2013 04:03 PM
كمال كرار انت شفتونى
والناس ديل
أقول شنو ؟ الله يغتس حجارهم وحجر الشيخ اللو... الجابهم لينا وختاهم فوق راسنا يبعروا ويظرطوا


#691939 [المتشعلق بن المنبرش]
5.00/5 (2 صوت)

06-09-2013 01:53 PM
الله يجازي محنك ياكرار


#691844 [اخوي]
5.00/5 (1 صوت)

06-09-2013 12:17 PM
بقي في اصلي وتجاري وكوري
الاصلي كوري في المنتجلت الكورية
والتجاري صيني مصنوع حسب الطلب اسبير عمر يوم يومين وبالكتير يلحقك نهاية الاسبوع
والكوري دا بقي هو اهم صنف وسعره يتوسط الاصلي والتجاري
ونصيحتي لك الوسطية مهمة الا في الاسبير
خذ الاصلي
او التجاري
ولكن لا تبدد قروشك في الكوري
الاصلي ياخذ فلوسك ويريحك
والتجاري عمر يوم قروشه رزق اليوم باليوم
لكن الكوري يعلقك في نص الشهر
وبالمناسبة حتي الطب بقي فيه كدا تعلق مرضك لحدي ما يوصلك نص الشهر اذا وقعت في دكتور كوري


كمال كرار
كمال كرار

مساحة اعلانية
تقييم
10.00/10 (1 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة