12-05-2010 07:59 AM

حاطب ليل

عبد اللطيف البوني
[email protected]

ويكيلكس في اللعوتة

كالعادة وضعت جوالي على الصامت واويت الي فراشي عند منتصف الليل ورغم ان هناك الكثير الذي يؤرقني الا انني تطبعت مع كل البلاوي فدخلت في سبات قد يكون مصحوبا بشخير لم يقطعه الا نغمة الهاتف (ما عشقتك لجمالك) تلك النغمة التي يتضايق منها بعض اصدقائي وانا ايضا الا انني لم اجد وقتا لتغييرها منذ اكثر من عام ولم اتبين الصوت ولكنه لم يكن غربيا على اذ ابتدر محادثته معي قائلا
--ياود با بنبن النائم ليها شنو؟
-- اهلا وسهلا معاى منو ؟
--معاك منو ؟ خلاص من هسه وبقيت تنسى ؟
--اسف والله ماعرفتك معليش اصلو الزول لمن يكون قائم من النوم ذاكرته بتكون محتاجة لانعاش
-- انعاش بتاع شنو؟ وانت اصلا النائم ليها شنو ؟ انا كونزليزارايس خلاص طلعتني من دفترك؟
---اهلين ,كوندي ام عصيبات . قلعتي من وين الليلة ؟ والطراك لينا شنو؟ ان شاء الله خير ؟
--ام عصيبات ؟ كمان انت بتقولها ؟ نسيت لمن كنت مكسر فيني ؟ نسيت ايام نديدتي ؟ نسيت لمن وسطت لى الدنيا كلها عشان تفتح معاى خط؟ نسيت الجرسة ديك كلها .
-- اي نعم انا كنت جاري وراك ووسطت ليك الدنيا كلها لكن انا كنت عاوز ارتبط بيك عشان احل مشاكل السودان معاكم لكن انتي رفعت لي القزاز وعملتي فيها عشرة بي قرش اها لمن الاضواء انحسرت منك وبقيتي نسيا منسية جاية الليلة تفتشي الماضي خلاص ولا وراح . خلينا من دا كلو ان شاء الله انتي تكوني زدتي كيلو كيلوين وضاريتي عصيباتك ديك
--- ياعربي يابتاع الجزيرة انت انا كنت وزيرة خارجية امريكا العظمى انا حا بقى في الاضواء حتى بعد موتي لكن خلينا من دا كلو وخليك من عصيباتي الكانت مبكياك في يوم من الايام انا الليلة جيتك بحاجة كبيرة اريتك تبقى قدرها وما تكب الجرسة
-- اها ام عصيبات جايبة لى شنو ؟ الله يكفيني شرك
-- ما سمعت بموقع ويكيليكس الكشف الوثائق الامريكية الخطيرة؟
-- بحليل سمعت بيهو وعارف انه من حركاتكم البتبتذو العالم اصلكم فلستو ودايرين قروش
-- اها النزيدك علم الموقع عنده اتنين مليون وثيقة يادوبك طلع ربعها . ماشفت الرؤساء والملوك اتراجفوا وكبو الجرسة كيف اها انت ابقى راجل وشيل شيلتك
-- انا مالي ومال ويكيليكس ؟ انا رئيس ولاملك ؟ انا حي الله زول منسي في بقعة منسية حتى قوقل ايرز ما بقدر يطلعها من الخريطة
--نسيت ياعربي الجزيرة الكلام الدار بينا في منزل السفير الامريكي في الخرطوم في المرة الوحيدة الاتقابلنا فيها لمن زرت الخرطوم بعد توقيع اتفاقية نيفاشا الزيارة القابلت فيها البشير لانه الوقت داك ما كانت في جنائية وقابلت جون قرنق نسيت الكلام دا كلو؟
-- بتذكر الحاجات دي كلها وبتذكر لمن قبلت جون قرنق قبلة لحقته امات طه وقلت لي القبلة دي كية ليك وكية لعرب السودان لكن الرسالة مالها وفيها شنو
--فيها شنو ؟ نسيت انك كتبت لي وقلت لي ما ترفعوا العقوبات عن الخرطوم؟ انا جيت عشان امهد لرفع اسم السودان من قائمة الدول الداعمة للارهاب ومن العقوبات الاقتصادية لانه الرئيس بوش وعد البشير بالحاجات دي اذا وقع نيفاشا نسيت انك كتبت رسالة طويلة قلت ما تعملوا كدا وانه الضغوط لازم تستمر وان النظام دا غير الضغوط ما ممكن يطبق الاتفاقية ؟ الرسالة دي موجودة وبتوقيعك وحاتطلع في ويكيلكس قريب جدا اها شيل شيلتك وشوف ليك طريقة تمرقك من الجماعة ديل
-- الله لاكسبك ايو متذكرها اها دايرة شنو مني عشان الرسالة دي ما تطلع
--(جايي تسالني الدبارة ) غنتها مقلدة ابوعركي . ايوا( خليك في الواقع ) غنتها مقلدة سيف الجامعة واستطردت عندك خيارين انا حارسل ليك قائمة مطالب متعلقة بالامن القومي الامريكي او تعتذر عن حكاية ام عصيبات دي وتصحح موقفك مني وتفكر في ارجاع مشاعرك القديمة
--يابت الناس انا كبرت وكركبت وانتي اصلك مكركبة لكن قبل دا كلو خليني النسالك التفلون دا انا عملتو صامت ونمت انتي شغلتي كيف؟
-- سؤال غبي لي زولة كانت وزيرة خارجية امريكا والله لو طلعت الشريحة كان هاتفك رن انت مسكين ولاشنو ؟ انت ما بتعرف امريكا انها ممكن تخش بين البطين والاذين
-- لاحول ولاقوة اها قائمة المطالب شنو ؟

تعليقات 15 | إهداء 5 | زيارات 4072

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#56037 [ابو محمد]
0.00/5 (0 صوت)

12-09-2010 11:06 PM
ياسامي .... دكتور عربي جزيره ده ما بتاع خضرا ..... ده بيكون شارب روب وحلم الحلم المزعج ده


#55783 [Halima Yagoub]
0.00/5 (0 صوت)

12-09-2010 03:08 PM
انا يادوبى قريت مقالك الرهيب والارهب صاحبتك ام عصيبات دحين يا عربى الجزيره كما يحلو لها منداتك ، ما تحل ليها مشكلتها وتفك ليها بورتها يمكن ربنا يرحمنا ويفكنا من الجماعة {الميطى} ديل ) كدى اسألها ما عايزه ليها ضره بعد ما تحقق احلامها فيك { وليس معاك}.
وتسلم يا وطن


#54749 [ابو مزن]
0.00/5 (0 صوت)

12-07-2010 08:43 PM
يا استاذ البونى كدى اسال لينا ام عصيبات دى عن اخر اخبار تعويضات ملاك الاراضى بمشروع الجزيرة


#53938 [a]
0.00/5 (0 صوت)

12-06-2010 08:58 AM
شكرا بروف فانت نسمه وريحانه الصحافه السودانيه تجمل الواقع المر بعبارات اقل ما توصف به انها دافئه فشكرا


#53865 [أمير تل ابيب]
0.00/5 (0 صوت)

12-06-2010 01:38 AM
برف البوني : جماعتك ديل عارف موقع ويكيلكس ما نشر ليهم غسيل ليه؟؟؟؟؟؟؟
لانهم ببساطة هم ماشين مسط الناس (ميطي) !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!


#53846 [يحي]
0.00/5 (0 صوت)

12-05-2010 11:33 PM
بسيطة قول ليها انا ربطت مع منويه (انتي مابتشوفي B.N TV) ولا شنو يا ام عصيبات
الفرصة بتجي للواحدة مرة واحدة


#53704 [الفاتح تاج الدين ]
0.00/5 (0 صوت)

12-05-2010 04:11 PM
والله يادكتور الجماعة ديل بنشرو في الغسيل ده وبدون حبل 000راقدين ليهم فوق راي 00دحين اعمل حسابك من البنية دي 00وهي اكبر منك 000والظاهر حاجيبو لينا البيركس الامريكي وعاوزين ابدو بيك انتا 0000واذكر انو الجماعة ديل عاوزين اخوفوا الجماعه وقاصدين شخصك الغالي00وبراك جبت المواضيع ده ليك خاصة بعد ماشافوك في التلفزيون مالي الشاشة 00وقالوا احسن استفيدوا منك000شن الراي يا دكتور


#53689 [عبد الرحمن ابراهيم مسعود]
0.00/5 (0 صوت)

12-05-2010 03:37 PM
البوني قطع شك لافيها بأربعة كروت وهو وارد بحر العرب
ويكليكس شغلانة امريكية لاستفزاز الرؤساء العرب ووالعالمين ومدير الموقع مطلوب للانتربول وهو في لندن نحن ما عندنا قنابير لورغبوا في قبضه تلفون مع الشرطة البيريطانية عشان كدا امريكا تسرف من الرؤساء الفنله الداخلية وهم لابسين القميص!!!!!!!!!!!!!!!!!!!!!!!!!!!!!!!


#53677 [الاصم]
0.00/5 (0 صوت)

12-05-2010 03:11 PM
يا خوى ام عصيبات دى غيرانة من بت ابوزيد ساكت....شخط ليها


#53584 [سامي الزيبق]
0.00/5 (0 صوت)

12-05-2010 12:15 PM
بونبون الظاهر عليه كان ضارب سيجاره خضرا قبال ينوم والا بايته معاهو


#53567 [ha]
0.00/5 (0 صوت)

12-05-2010 11:33 AM
hahahahahahahahahahahahahahahahahahahahahahahahahahahahahaha


Allah Egazy me7nak ya Elbouny


#53553 [shazlest Aljazeera]
0.00/5 (0 صوت)

12-05-2010 11:14 AM
الله عليك يا دكتور .......

فأنت تقدم المعني في شكل لقمة ثايقة ...


هي اميريكا تطوع كل شئ لمصالحها ...




#53526 [هاشم عبد الماجد خالد]
0.00/5 (0 صوت)

12-05-2010 10:23 AM
د البونى دا يا ربى بركب فيل
ركوب الفيل هنا معناة(السجارة الخضراء)


#53511 [محمدعبدالمجيد-الرياض]
0.00/5 (0 صوت)

12-05-2010 09:44 AM
فعلا... هذه تسريبات أمريكية والقصد منها ابتزاز الرؤساء والملوك...
وأي شخص يقول لا لأمريكا ....أو :
يحتمل أن أولاده في المستقبل يقولو لا لأمريكا..!!


#53494 [حامدابوعبدالمجيد]
0.00/5 (0 صوت)

12-05-2010 09:30 AM
صباح الخير والسعاده
ضحكتنى لمن البطين داير يفرتق من الاذين الله يازاك المسخوط عريبى الجزيره هسع ماكان اخير نكتة المارد قلت لى الكوبري دايرو من وين لى وين
الجماعه ديل مادايرين ايها ويكليكس براهم موكلسين بس يوتروهم شويه او يقرصوهم خفيف فى طرف اضانهم هسع تلقا ابو الكلس ابونضارات داك ركب طيارتهم وجرى على امريكا تعرف العصفورة بتقول الناس ديل بدونا فوق مانطلب ذاتو بس المشكلة تحت تحت
البونى خايف بكره تطلع شماراتك بتاعت ام عصيبات دى خصوصا وانها عزبا وتبقى فى كتاب زي بتاع صديقى الملك والليالى العصيباتيه اقصد العصيبه
.................تصبحوا على وطن


عبد اللطيف البوني
عبد اللطيف البوني

مساحة اعلانية
تقييم
4.63/10 (82 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة