06-18-2013 03:21 PM

ـ لويس أرثوا! لويس أرثوا!! لويس أرثوا ده كمان يطلع منو من المبعوثين الدوليين الرايحين جايين؟!!

ـ والله كلام! هي حصلت!! حصلت نجيب واحد من دول الاستكبار وزير لماليتنا؟!!

ومع قولة دول الاستكبار ما كان مني غير مسارعتي موضحة وقائلة:ـ يا جماعة حيلكم حيلكم إنتو لو عرفت وان (لويس أرثوا) ما هو إلا عامل من عمال المناجم بدولة تشيلي لما حسبتموه واحد من دول الاستكبار!

فـ(لويس أرثوا) هو قائد مجموعة الـ(33) من عمال المناجم التشيليين اولئك الذين إتحبسوا في جوف الأرض لاكثر من69 يوما في قاع منجم في تشيلي إثر انهيار أرضي احتجزهم على عمق يزيد على 600 متر تحت سطح الارض.

والذي حال معرفتي بكيفية تنظيمه ـ أي التشيلي (لويس أرثوا) البالغ الـ(54) من العمر والأب لطفلين ـ لحياة فريقه (المزرور) في جوف الارض على عمق 600 متر من تقنين لما لديهم من غذاء وذلك بإعطاء كل من عماله ملعقتين من التونة المعلبة ونصف كوب من الحليب كل يومين إلى أن تمكن مسبار صغير من انتشال رسالة كتبت على قطعة ورق تحمل هذه العبارة التي أصبحت ذات شهرة عالمية (نحن الـ(33) بخير داخل الملجأ). آهه وعلى ضوء تعرفي على شخصيته التنظيمية هذه ـــ أي لويس أورثوا ـــ ومن ثم قراءتي لتوقعات صحيفة (الاهرام اليوم) الغراء المؤكدة عن مصادر بمغادرة علي محمود وزير المالية لمنصبه ما كان مني سوى المسارعة والتقدم لمن بيدهم القرار بالآقتراح العاجل الآتي بقولي لهم: يا اخوانا إنتو ما تجيبو (لويس أورثوا) وزير مالية! ليقوم بتنظيم اقتصادنا وحياتنا لحين خروجنا من دي الدُحديرة، فمع البترول المافي ح يقدر يتصرف ويمشي حال البلد بالموارد عنده، فمن تساوى مع عماله في مقدار ما يتناولونه لمدة 69 يوما بالتأكيد لن يتركنا لنعالج بالداخل في مستشفيات مامون حميدة! ويمشي يعالج ولده في دول الاستكبار.. باكثر من 30 ألف دولار! كمان ومع زرة أزمة إيقاف ضخ النفط وترشيدا للميزانية بالـتأكيد سيلزم زملائه من أعضاء حكومته بترك قيادة سيارة بات مان الوزير البيصرفوا ليه قصادها 100 جالون وقود يوميا!! ويكتفوا بقيادة الدراجات.

كما أن (لويس أورثوا) ده يا بنات امي على الاقل ما ممكن فيما هو سمين وأمين ومتبتب ح يقول لينا في يوم من الايام.. أكلوا (كسرة) بـ(موية)! ويا اخواني أنا في قولة اكلوا (كسرة) بـ(موية) دي وعلى ضوء حقيقة معاناة مواطني الخرطوم الولاية من انقطاع الموية من سنين ودنين من زمن المتعافي كان والي للولاية في سؤال محيّرني ومحرّق روحي وبدور أسأله للسيد وزير المالية علي محمود قبيل مغادرته لمنصبه قائلة:ـ علي محمود آهه!! قول لقينا الكسرة.. طيب من وييين نجيب الموية!! .. ومن جنس دي الحالة.. يا اخوانا إنتو ما تجيبو (لويس أرثوا) وزير مالية!


رندا عطية
[email protected]

تعليقات 1 | إهداء 0 | زيارات 1429

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#700383 [المجاور خور مقاديــــم]
0.00/5 (0 صوت)

06-18-2013 04:17 PM
تحية وسلام أستاذة رندا، أنا خايف المدعو لويس اورثواده لو عينوه وزير مالية للسودان برضو يحتار مع الخزينة الفاضية والموارد المعدومة والبترول اللى أصبح بين زى مواسير المياه فى بعض الحارات بامدرمان الليلة فى موية بكرة مافى


ردود على المجاور خور مقاديــــم
United States [شوك كتاد] 06-18-2013 06:29 PM
ابدا ما حيحتار و قطعا دى ادارة ندرة اهم ما فيها حسب تقديرى - انا ما اقتصادى -
1- وقف الصرف البذخى للعربات والمحروقات والسفر للخارج
2- مساواة الناس فى المدرسة والمستشفى و الله ما يخلى لا مدرسة خاصة ولا مستشفى خاصة ولا جامعة خاصة
3- ستة ولايات كفاية ومافى داعى للمحليات - فقط والى يساعده تكنوقراط
4- عدم الصرف على الحزب من الخزينة العامة
وعلى هذا قس


والاهم والاهم ايقاف الحروب العبثية


رندا عطية
رندا عطية

مساحة اعلانية
تقييم
10.00/10 (1 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة