في



المقالات
السياسة
مؤتمر قمة باعوضة!!
مؤتمر قمة باعوضة!!
06-23-2013 07:41 AM


على "هامش" قمة العشرين المنعقدة في "باعوضة"
وباعوضة دي ضاحية تبعد عدة كيلومترات من العاصمة
طبعاً لازم نقول عليـها ضاحية فالتطور شمل كل الكائنات
فالفول المسحون بقى "دكوة" والمجاعة أصبحت "فجوة"
حتى لطش ولغف المال العام بقى "تجنيب"
المابخلي "باعوضة" تبقى "ضاحية" شنو ؟؟
تأنقت "باعوضة" ولبست أجمل ما عندها من هِدِوم
غسلت وشيـها بموية البحر الروحو محرقاهو ويتف في الطين من خشمو
ومسحت كرعينا "المشققات" بوسخ الزيت المتمر
إستعدت "باعوضة" لقمة العشرين وبدأت تقالد في تباشير الحضور
ومن الفرحة اليوم داك حوش ناس "فضيلة" ضاق بما رحب
فاللجان "المنبثقة" أكملت "عدتـها" وعتادها للـ"القمة"
تيبار فطين جابو بي ركشة أصلو كان "دردقو" بتفرطق
ودحلوب السارة أب خشيماً "مشروم" جابو وهداك "قاعد"
صباح يوم القمة العجين فائر زي ناس ميدان تقسيم "أرضوجان"
وحسب جدول الأعمال والنشرة التمهيدية للقمة فالبداية ضحى
تم تركيب "الصاجات" علي "ضانقيل" مخصص للقمم دي
"التكنيشنز" قامو بعمل التجهيزات اللازمة للويقود
بقايا "نُجار" وشوية "قُشقُشات" ودقاشيم "مساكة"
وحطيبات نيم مسولبات زي ساقين كونتاليزا رايس
ويلاحظ بأنه ليس من بين مصادر الويقود "خشب نباتي تقول عليهو"
وإتخذت كل من القياديات "العليا" موقعـها إيذاناً بـ"جرة" البداية
في حين إنشغلت "طواقم" المساعدة بـ"الونسة والقرقراب"
و"على هامش القمة" إنكشحت بعض الأخبار والحكايات
الشوام الرقدو كريمات فتح البشرة هبطرش
والقنقر البعالج السكري والدغت والفشل الكلوي
وقشقشات علاج "الفشل الجنسي" كان عند الراجل ولا المرأة
والمدارس النموذجية أمفصلاً فيهو تمنتاشر شافع
وحكاية المعتمد المشى الحج شهر أربعة ولي أسي ما جا
وحكت إحداهن عن حكاية المرفعين "السكا" عرفة الجاية من "الفزع"
وقبل أن تكتمل الرواية تتداخل إحداهن وتلعن أبو المرفعين
وتداعت الحكايات "شماراً رويا" طعمت القمة ولم تستبق شيئا
حكاية "سيد الرغيف" اللقوهو "الدُغُش" ميت جنب الفرن
وسيد الركشة الفاز بمليون الـ"البسي"
وتناول الحكي قرارات السلطات السعودية الأخيرة بشأن "الأجانب"
وإعتزال "ست الشاي" بعد زواجها من لاعب الكورة "المشهور"
وطلاق فلاديمير بوتين من زوجته "ليودميلا" وتسمع "سمعنا وسلمنا"
والشمارات المنتشرة عن علاقته بلاعبة الجمباز "ألينا كاباييفا"
و"غُصة" تصريح وزير البيئة والتنمية العمرانية والغابات
"الكشف عن قيام الدول الافريقية بإنشاء بنك الكربون الافريقي..
القال حا يضخو فيهو بلايين الدولارات..
يعني يشيلوها من الدول الصناعات الكبري "الفاكاها في روحا"..
وبتهدد في أمن البيئة العالمي تخيل !! ..
وهو في غيرها مقطوعة الطاري الصين ونديدتا امريكا..
وغصباً عنهم يدفعوا تعويضات للدول الافريقية..
الدول البتقحقح من فرط إستنشاق "الكربون"..
والقروش "وحدها" يعيدوا ليـها الغطاء النباتي..
مش كدا وبس كمان يعيدوا ليـها الأحزمة الشجرية والغابات .."
يا ما أنت كريم يارب
بس أحسن حاجة في الغُصة دي "حُسن" الإختيار
إختيار عاصمتنا مقرا للبنك الذي يضم في عضويته 66 دولة
وعلقت واحدة سامعة بالتجنيب والتحصيل في اورنيق 8
"ياضبعة جاك عشاك في خشم بيتك"
المهم القمة سارت زي الصلاة علي النبي
والدخاخين نار شرق والشمارات ريحتا طغت علي ريحة "الحلومر"
والصيجان "سايرات" بفضل الطايوق ووسخ الزيت
والهيلمانة ما تديك درباً "تسير تسير تسير " عليهو
والنسوان زي ناس "اليوناميد" ماليات الفجة
بالمناسبة على هامش القمة أثيرت مسألة في غاية الاستعجال
وتعلقت بـ"نُفاس" محاسن الجابوها عند أهلا للولادة "مشروع ولادة"
وحاسبين ليـها تلد في رمضان مستبعدين تماماً شهري رجب و قصير
أصلـها داكي الليلة ولدت في سائق الكرامات
تشب واحدة فوق "الأربعين السير بوبا" الولادتا ما دحين
"ياربي تستجيب ــ لشيخ حسب الرسول نلد إن شاء الله همبول"
وواحدة تانية متكية ليـها في عنقريب مو بعيد
" غايتو لكلام الزول دا إلا الشافع يودو الجبهة يوم السماية"
وأضافت " والعجب البتجبلـها بت إياهو الحاسبنـها ليـها فاقد عسكري"
تشب واحدة "إنتو ما قالو الدفاع بالنظر مالو بقى بـالنُفاس والإستسقا" ؟؟
النـهار "سخن" والكهرباء "مخرفة" وأحرجت منظمي القمة
فزول زي ملكة "بريطانيا" جات من هناك وما متعودة على "الحر" دا
لكن عملن حسابا وجات لـ"عواسة القمة بي فستانا "الشوال" القصير داك
وبمجرد ما عاست ليـها جردل طوالي قامت إنبطحت تحت الشجرة
صلت الضهر وقامت قالت تاخد ليـها غمدة صغيرة قبال غدا القمة
اها ضربت صفارة انذار "النحنحة"
ود طيفور "سيد الحوش" جا داخل على حين قرقراب
طبعا على إستحياء وكان مستعجل قال "نسى رقم الجمرة"
وهو عارف ما مسموح في مثل هذه القمم دخول "الرجال"
المهم الملكة صحصحت وقامت صنقرت علي حيلا
وجرت ليـها توب قديم من جنب كراب العنقريب
وبطريقة سريعة سحبت التوب وختت جزء منو في راسا
وباقي التوب شرتو في "ركبيـها" وقليل من الساقين
أها ود طيفور سلم عليـها
حق الله بق الله والجماعة إن شاء الله كويسين وهلمجرا هلمجرا
وطايبتو وقالت ليهو "طيبين الحمد لله تسأل منك العافية"
وقعد حِداها في طرف العنقريب قال يجاملا شوية
قام سألـها " إن شاء الله ناس وليم وكيت بقو تلاتة ؟؟ "
"و الله يا عشاي تراها بتتوحم"
وبي خجل أخدت ليـها ضحكة خفيفة "أهي أهي أهي ....
"يوم بتيخة من الجروف ويوم سمك من ترعة كنانة والرهد ويوم ويكاب "
وواصلت
"والله ما بتنفات لي لكن قلت النجر لي طرقة طرقتين مع ناس القمة ديل"
رد عليـها "لكن العواسة ما حارة عليكي مع ريحة دخان النيم دا ؟؟"
قالت ليهو "عمنول جيت عست مع ناس كلتوم بالبعر والله راسي ماربطو"
ود طيفور لاحظ رقراق الشمش غطى نص العنقريب
قال ليـها "كدي ياحاجة اليزابيث شوية بالله....
قومي النحول ليك العنقريب علي ضل الصالة ديك "
قامت يا الله ويامين وبصعوبة لبست "الرطب الأبيض"
والتوب نصو في راسا ونصو في الأرض جاراهو
وود طيفور لمن شاف "الشعر قطنة" قال في سرو
"بالله أسي كان ختت ليـها طرحا في راسا المكودس دا مالا ؟؟"
مسك ترتر ليـها العنقريب في الضل وقال ليـها
"النجيب ليك لحاف"
بسرعة ردت عليهو
"بري وحات أبوك إنت دا لحاف ماني دايرا ...
جابو لي واحد قبيل لقيتو لين أخير لي الحبل ساي"
وقبال ما يفوت ناغمتو
"يا ود طيفور" دحين كيلة البصل بقت عندكم بي كم ؟"
طنطن في سرو "أسي عليكي النبي البصل بدوري بيهو شنو؟"
وقبال ما يرد عليـها أضافت
"وصتني مادونا لنص كيلة ويكة وكيلة بصل قالو عندكن ليهو دومات"
وأضافت "السنة الفاتت باقي شلت البصل والويكة لنعومي كامبل"
ود طيفور قال ليـها
"عليكي النبي ويكتنا دي شرموط الخنازير دا بتلايقو ولا ساي؟؟"
ردت عليهو بسخرية البريطانيين اللاسعة
"الويكة لايقت شرموط الكلاب يا يابا خلي لحم الخنزير ...
خاف قالو ليك نحن معتمدين علي قنواتكم الفضائية دي ؟؟"






تعليقات 0 | إهداء 0 | زيارات 713

خدمات المحتوى


المحبوب احمد الجراد
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة