في



يخسي عليكم
06-23-2013 10:43 AM


وقف العبدلله متأملاً تلك العبارة التي أطلقتها النائبة البرلمانية في وجه نواب البرلمان وهم قد أجازوا عقداً ربوياً قائلة وهي تلملم أوراقها متجه إلى خارج القاعة (يخسي عليكم) ! ومصدر تأملي لهذه العبارة كونها جديدة على الإستخدام (البرلماني) وتفتح باباً لهذا النوع من (الأدب) فما بالكم لو أن رهط البرلمانيين المخاطبين في القاعة قد ردوا عليهل ردة رجل واااحد : يخسي عليكي إنتي
يبدو أن النائبة المحترمة قد سقط (إخوان الطريق) من عينها وهي تراهم قد أشتروا بِعَهْدِ ٱللَّهِ وَأَيْمَانِهِمْ ثَمَناً قَلِيلاً وهم يجيزون ما حرم الله فقالت عبارتها تلك والتي تنم عن (خيبة أمل) فيمن حسبت انهم لا لدنيا قد عملو !
والعبدلله يحسب أن (خيبة الأمل) هذه قد جاءت متأخرة كثيراً فلا أظن أن هذه هي المرة الأولي التي تري فيها النائبة المحترمة ما يخالف الدين ويجانب السيرة العطرة وما ملفات الفساد المفتوحة و(المقفولة) و المفتولة (لا معروف مفتوحة وللا مقفولة) إلا شاهداً على خيبة أملنا (نحنا) الكنا قايلين القبه تحتها فكي قبل خيبة أملها (هي) !
يخسي عليكم .. كان ما المفترض أن تعقبها النائبة المحترمة بـ(يا ما عندكم دم) فأي ضرورات يراها هؤلاء النواب تبيح (الربا) حتي يصيبنا غضب الله وسخطه (ده لو لحدت هسه ما اصابنا) والمسؤول عن لجنة فساد شركة الأقطان (مولانا بابكر قشي) يصرح بأن ما تم إسترداده وهو جزء بسيط من الأموال المنهوبة هو 23 مليون (يورو) و 987 ألف وما قيمته 30 مليار جنيه سوداني يعني (لو حولناها دولارات) تكون حوالي (34) مليون دولار بينما هذا القرض الربوي بقيمة (85) مليون دولار يعني إذا ده جزء بسيط فالأموال المنهوبة بلا شك تتجاوز قيمة هذا القرض الربوي فتأملوا يا جماعة الخير وأفتونا يا علماء (الســــودان) .. شركة (واااحده بس) تنهب أكثر من 85 مليون دولار وتجي الحكومة تقترض 85 مليون دولار (بالربا) .. بربكم هل هي الضرورات أم فساد الذمم؟
يبدو أن النائبة المحترمة حانقة على (نوام الشعب) لذا فلن نستغرش (نستغرب ونندهش) إذا ما وجدتهم في الكافتيريا وهم يأكلون فقالت لهم وهي تشير لهم رافعة سبابة يدها اليمني : تجيزوا في الربا وكمان تاكلوا .. تاكلو إن شاء الله الحمت رمت.
اما إذا وجدتهم بعد الأكل يشربون (كمان تشربوا؟ تشربوا الشربتو حميرا) وحميرا هذه ما معروف شربت شنو لكن الشربتو الظاهر لحقا أمات طه .
أما إذا ما سمعتهم وهو يجيبون عند التصويت بـ (نعم) وهم يجيزون زيادة الضريبة عل سلعة ضرورية لملمت أوراقها وهي تنسحب من الجلسة قائلة : بس تعرفو لي نعم؟ النعامة التزوزي بيكم وتعرفو لى زيادة الضرائب يضربكم الضريب شقاق العناقريب لكن قبل أن تغادر القاعة تشاهد النواب وهم يصفقون عند إجازة الزيادة فترفع رأسها تخاطبهم : وكمان تصفقوا. إن شاء الله تصفقو بلا إيدين .
أما عند دعوة السيد وزير المالية بإقامة صلاة إستسقاء عشان الأمطار ( تجي ) فسوف نشاهد النائبة المحترمة وهي تخاطب زملائها النواب قائلة : تجيزو ليا في الربا وعايزين المطرة تجي؟ تجيكم الطاوية حبالها !!

كسرة:
طيب أقلعوا لينا قروش خط هيثرو من الجماعة وأعملو بيها كهرباء الشرق دي .. وبلاش القرض بتاع الربا ده .. قال ضرورات قال
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)؟





تعليقات 17 | إهداء 0 | زيارات 9072

خدمات المحتوى


التعليقات
#704852 [osama dai elnaiem]
1.00/5 (1 صوت)

06-24-2013 07:16 AM
( يخسي عليكم ) تتماشي مع قاموس نافع ( لحس الكوع) وقاموس البشير( بلوها واشربوا مويتها)و( اقفل الانبوب يا عوض) هو قاموس ظاهره الدين وباطنه ( سفه القول) و( سقط الحديث) وكما الشعر والغناء في السودان كان ( ذكوريا) وبفضل البشير والترابي والانقاذ صار ( انثويا ) ايضا وربما تطور في الولاية القادمة ليصير ( مثليا) والعياذ بالله---- لم نعد نملك الا الدعاء علي هذه الفئة ونتضرع الي العلي القدير ان ياخذهم اخذ عزيز مقتدر لطفا بهذا الشعب الطيب.


#704734 [عصمتووف]
0.00/5 (0 صوت)

06-23-2013 10:46 PM
يخسي عليكم .. كان ما المفترض أن تعقبها النائبة المحترمة بـ(يا ما عندكم دم) و تبصق عليهم يرد عليها الكورس بصفقتو بقيادة دفع الله حسب الله فرج ويقولوا سافه سافه سافه سافه طقق طققق


#704628 [التويجري]
0.00/5 (0 صوت)

06-23-2013 07:52 PM
يخس عليكم ما أديتونا معاكم فرصة وشردتونا من بلدناالشره الليقوم ليكم في ....الباقي تمو خيال
وتاني ياشلة يخسى اشاء يخسوكم في سوق النخاسة(جمع يخسي يخسوكم كما في المعجم القهري)
وتاني يخسي علي التعب والرئيس الكعب وابو العفين وباقي الركب المشاترين المنافقين الضيعونا بأسم الدين.الهي يرسل عليه إعصار تسونامي يرفعهم للسماء السابعة ويجو واقعين علي جبل يكونا بكسرو فيها قزاز علي مر العصور فيها براكين تثور عشان مانلقي ليهم في هذه البسيطة قبور
ويخسي تتطوول وتطول بس في حاجات مابتنقال لان القاري الكريم أرفع من ذلك بس سامحونا لو خرمنا حبة عشان دي شوية تنفيسة ولاهو نحن طرشقنا ذاتو


#704601 [سودانىاطلاقا ماحتنفرج اساريرو]
0.00/5 (0 صوت)

06-23-2013 07:05 PM
مرة اخرى اخى الفاتح جبرا لك التحيه .. على الدوام حضورك واسع المرتكزات كل حين عند القراء .متعك الله بالصحة والعافيه .. "حقيقة" موش استغرشت وبس بل ذبلت (موش ذهلت) .. والفعلان بعد استبدال الهاء بالباء او العكس ) مبنيان للمجهول مجازا رغم معرفة الفاعل الحقيقي ..) 1لك عندما سمعنا عبارة تانيب النائبه سعاد الفاتح لزملائها "النوّام" ..على موافقتهم على القرض الربوى
صحيح بعدد الحساب والسنين النائبه هى اكبرهم جميعا سنا واكيد فى سن امهات بعض صغار السن من اعضاء وعضوات المجلس ممن هم اوهنّ موعودو اوموعودات الخمسين .. ولكن كبار القوم (رجالا ونساء) لا يبادرون ب "حوشى" اللفظ (ايه رأيك يا شيخ الحبر فى كلمة "حوشى")او بما لا يليق !! مهما بلغ بها الحنق والأنفعال منتهاه.. والله اكاد لا اصدق ..أمثل هذه الكلمات تقال فى البرلمان .. ما سمعنا بذلك فى ألأولين !! اليس لكل مقام مقال!!
اذا رجعنا بالذاكره الى كووول البرلمانات السابقه والجمعيات التاسيسيه والمجلس المركزى ومعاها الجمعيه التشريعيه اللى قبل ألأستقلال هل يوم واحد ناس السودان سمعوا اى عضو قال عباره تأنيب للأعضاء بتلك الكلمات!!! المسأله ما دفاعا عن النواب ..(جابوه لرقبتم براهم) لكن مهما كانت ألأسباب المكان له حرمتو ومقامو !!! ماذا نتوقع سماعو بعد كدا فى مختلف المواقع ألأخرى .
انتو يا ناس متاكدين ان النائبه قالت الكلمتين ديل!!! يكونوش ناس المعارضه واصحاب ألأجندات الخارجيه قوّلوها الكلام او التسجيل ما كان كويس او ما انسمع صاح ..احمد ابراهيم الطاهر وين وعمل شنو وقال شنو.. يا ناس اليس بينكم رجل رشيد ! يقولو عليكم ناس البرلمانات فى الخارج .. بيختارو المناسب من الكلام وان كان عنيفا للتعبير عن سخطهم وغضبهم..


#704498 [mutasim]
5.00/5 (2 صوت)

06-23-2013 04:01 PM
و دفع الله و ين في الربا ده ولا بره التخصص


#704486 [عادل احمد]
0.00/5 (0 صوت)

06-23-2013 03:42 PM
هؤلاء الفاسدين اصبحوا كالسرطان في الجسد من مكرهم وخبثهم فأن الشعب المغلوب علي أمره يصعب عليه أن يطيح بهم ولكن الله العلي القدير الذي بيده مقاليد كل شئ ليس بغافل عما يعملون فهو سبحانه وتعالي كفيل بهم قال الله تعالي في محكم تنزيله :( يوم يبعثهم الله جميعاً فينبئهم بما عملوا احصاه الله ونسوه والله علي كل شئ شهيد ) .


#704473 [حسكنيت]
0.00/5 (0 صوت)

06-23-2013 03:13 PM
دفع الله حسب الرسول معاهم ؟


#704402 [Amin]
5.00/5 (1 صوت)

06-23-2013 01:53 PM
(كسرة:
طيب أقلعوا لينا قروش خط هيثرو من الجماعة وأعملو بيها كهرباء الشرق دي )

يقلع ركابينكم إن شاء الله


#704393 [زوزينا]
0.00/5 (0 صوت)

06-23-2013 01:48 PM
بلا لخمة


#704391 [المتجهجه بسبب الانفصال]
5.00/5 (3 صوت)

06-23-2013 01:47 PM
بالنسبة للبرلمانيين موقف سعاد جانبه الصواب وكان حا يقطع منهم ما لذ وطاب خصوصا الكباب،،،،


#704371 [Mohamed]
3.00/5 (3 صوت)

06-23-2013 01:17 PM
وأنا أقول لهولاء النوام المنافقين الحراميه اولاد الكلب

تاكلو إن شاء الله الحمت رمت.
تشربوا الشربتو حميرا
النعامة التزوزي بيكم
يضربكم الضريب شقاق العناقريب
إن شاء الله تصفقو بلا إيدين .
تجيزو ليا في الربا وعايزين المطرة تجي؟ تجيكم الطاوية
وكمان زياده
البله اللخمكم
الحمه التوديكم المقابر
اجبكم الجا لشارون
العود عود القذافى
تسهلوا مويه لمن تغرقكم فى قاعتكم دى
وكمان زياده
اريتكم بالطاعون والضغط و السكرى و السل و الجدرى و الجزام و السرطان و الإيدز كمان و كمان


ردود على Mohamed
United States [مدحت عروة] 06-24-2013 09:44 AM
انت قايل ديل نواب بالجد؟؟؟
الحكومة ذاتها تلقاها ما بتحترمهم ولا تحترم المجلس بتاعهم لانها عارفاهم صورة ساكت وياخدوا فى المرتبات والامتيازات!!!الحكومات المحترمة مجالسها بتخوف الحكومة والانقاذ ما من الحكومات المحترمة!!!!!!
انت مافى دعاء اشد من الكتبته ده لانى شايف دعائك هذا ما قوى كفاية عليهم!!!!!!


#704341 [كاسترو عـبدالحـميد]
5.00/5 (1 صوت)

06-23-2013 12:42 PM
ولما سمعها احـد النواب بتدعى عـليهم قال الولية دى والله وعـلى بالطلاق لو ما بطلـت كلامها المسيخ ده الا اقوم اضربها بى نعـلاتى ديل واوريها العجـب والصيام فى رجـب . اها لما سمعتو النائبة قالت ليه سـجم خـشمك ويضربك الضريب شقاق العناقريب . شوف الراجل وقلة عـقله .


ردود على كاسترو عـبدالحـميد
United States [ابوالهول] 06-23-2013 02:40 PM
ووقفت حاجة سعاد في باب البرلمان قبال تطلع ورفعت يده اليمين وحركتا على يدها الشمال وقالت :هي يا ااا نواب التاباني ...يا البتنوموا يومين وتصحو دقيقة عشان تصفقوا وتاني تنوموا..هي يااا ..انا ما جاية راجعة تجيكم الوردة ام كبكابة تخلي سنونكم تتحتحت ..هي يااا شارع ال 40 ..ابو 9 ماشين و9 جايين...اهههي بلد السجم الرئيسا رقاص ونوابا نُعاس ...اههههي يا ريحتكم وفسادكم يجيب الطاش ....
وما زالت ترددها ..حتى قلنا ليتها صمتت !!!


#704333 [فهيمه]
5.00/5 (1 صوت)

06-23-2013 12:28 PM
والله فعلا ويخسي عليهم الف مرة نيام البرلمان ديل وبعد ده يقولوا لينا هي لله تاكلوا الحمت رمت كان اكلتونا الربا الله لا يربي فيكم فضيله


#704321 [ABDU]
3.00/5 (2 صوت)

06-23-2013 12:14 PM
ابدااااااااااااع يا استاذ دعيت عليهم باللفه مبروك ما بيفهموهاما فى ابلد منهم فشيتناغايتو
ملحوظه
حميرا شربت الصبغه بتاعت مره ولده قايلاها قهوه لكن ما ماتت لحقوها ديل ان شاء الله ما يتلحقو


#704293 [rania-rajab]
3.00/5 (2 صوت)

06-23-2013 11:45 AM
ويخسي علينا نحن الشعب السوداني!!! الكل يوم ياكلوا في حقنا عينك ياتاجر ونحن ساكتين...الله يسكت حسهم


#704268 [عبد الله]
5.00/5 (1 صوت)

06-23-2013 11:25 AM
هى لله هى لله لا للسلطة ولا للجاه !!!
وبشة عايز يحكم تانى 5 سنين !!!
هى لله هى لله


#704247 [هميم]
5.00/5 (1 صوت)

06-23-2013 11:08 AM
السؤال هو متى يتوقف المؤتمرجية عن النفاق ويتصرفون على حقيقتهم؟ الناس قد عرفت حقيقتهم فلماذا يتظاهرون حتى الآن بالتوجه الإسلامي وينافقون؟ كل الناس تعرف الآن أن المؤتمر الوطني حزب عميل يريد تنفيذ سياسات الصهاينة في السودان بتقسيمه إلى 5 دويلات ضعيفة وإفساد العباد بالغلاء والضرائب ومحاباة منسوبي الحزب الحاكم الفاسد على منسوبي الأحزاب الأخرى والقيام بكل ذلك بغطاء من الدين حتى يكره الناس الحكم الإسلامي كما يكرهون المؤتمرجية أو أشد، فمتى ... متى يفتح المؤتمرجية بيوت الدعارة المرخصة والبارات ويغضوا الطرف عن باعة المخدرات ومن يتعاطونها لأن ذلك أقل ضرراً علينا من أن يغضوا الطرف عن الفساد الذي يتمرغون فيه وعن النفاق الذي يحكمون به ولأن ذلك أشبه بهم (ولأن الشرِّيبة والسطلجية ومرتادي بيوت الدعارة ومديريها سيدعون لهم ليل نهار وسيعطون أصواتهم في الانتخابات لحزب علي طه ونافع والبشير)


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة