07-15-2013 01:46 PM

أكتب مستعيناً بالله تعالى فى أحد الموضوعات التالية :

1- قال الشاعر السودانى :
جدودنا زمان وصونا على الوطن
على التراب الغالى المـا لى تمن

أكتب ما يمليه عليك ضميرك وأنت تستمع إلى قول الشاعر مركزاً على عبارة (الما لى تمن) مدعماً إجابتك بأسعار الأراضى بولاية الخرطوم

2- تعمل بلادنا على دخول النادى العالمى النووى وذلك بالعمل على إنشـــاء مفاعل نووى للأغراض السلمية ، أكتب عن فائده ذلك مقارناً بين ما تنتجه هذه المفاعلات النووية من طاقة وبينما تنتجه مخلفات المواطنين النووية التى لا تخطئها الأنف وأنت تمر بأحد الأسواق المركزية .

3- كشف المراجع العام أن العقد (السمين) المبرم بين وزارة الأوقاف والأمين العام المقال للأوقاف الطيب ينص على أنه لا يحق لأي طرف أن يكشف عن بنود العقد أو أن يُطلع طرفاً ثالثاً على محتوياته إلا بموافقة الطرفين — أكتب فيما لا يقل عن مائة وخمسون (ضحكة) عن هذه المهزلة موضحاً (إن إستطعت) وجهه نظر الدين فى جنس الكلام ده .

4- أكتب فيما لا يقل عن ثمانين (علامة إستفهام) عن رفض بعض المؤسسات والجهات الحكومية للمراجعة (عديل كده) معززاً ذلك ببعض الأمثلة المشابهه التى تحدث فى بلاد الكفر والفسوق والعصيان .

5- إستلم الموظف مرتبه من الصراف فى اليوم الأول من الشهر … أكمل هذه القصة مستخدماً كل مواهبك وخيالك اللا محدود حتى تنتهى نهاية سعيدة وغير مأساوية بحيث يعود الموظف إلى منزله وقد توصل إلى صيغة مناسبة ذات نسب مئوية معقولة لتسديد ديون الشهر ترضى كل الدائنين .
تنبيه :
أنصحك بعدم إختيار هذا الموضوع لأنو الموضوع ده عاوز ليهو خيال شديد !

6- أكتب وأجرك على الله عن قول المغنى (يا عينى وين تلقى المنام) موضحاً الاسباب الممكنة التى تجعل الشاعر يبحث عن نومه المفقود مبتعداً ما أمكن عن إستخدام الأسباب التالية لأنها بقت عادية وهى :
الفلس – الغلاء – الزهج – الباعوض !

7-قصّ الله جل وعلا علينا خبر موسى مع شعيب عليهما السلام حين جاء مدين ، ووجد ابنتين لشعيب قد منعتا غنمهما من الورود بانتظار ذهاب الرعاة وفراغ المكان ، وما حدث من تطوع موسى بالسقيا لهما ، وما كان من أمر شعيب حين بلغه ما قام به موسى حيث أرسل له يطلبه ليجزيه على ذلك وذكر لنا القرآن الكريم كذلك نصيحة ابنة شعيب لأبيها باستئجاره حيث قالت { إن خير من استأجرت القوي الأمين } .. أعد صياغة قصة خبر موسى مع شعيب مستخدماً لغتك وتعابيرك الخاصة ويا حبذ لو وريتنا (آلية) نعرف بيها القوى الأمين فى أيامنا الغبرا دى !
8- تحتوى سيارة الإسعاف على جميع المتطلبات اللازمة للتعامل مع الحالات الطبية إن حدثت داخل المركبة حيث تحتوي سيارة الإسعاف على نقالة المريض وجهاز إزالة الرجفان وجهاز قياس العلامات الحيوية الأساسية وجهاز شفط السوائل وجهاز التقرير الآلي ونظام إعطاء الأكسجين و نظام اتصال وثلاجة لحفظ حقيبة تحتوي على عدة مواد للتدخل وجهاز قياس السكر والسوائل الوريدية وعدة الولادة وبطانية كهربائية للتدفئة .. أكتب فيما لا يزيد عن سطر واحد مقارناً بين (سيارة الإسعاف دى) وسيارات إسعافنا وللا أقول ليك بلاش عشان القصة ما عاوزة ليها كتابة !!
9- أكتب مستعيناً (بالمصنفات الفنية والأدبية) عن التطور الذى تشهدة الساحة الغنائية (الحربية) معطياً بعض الأمثلة (بالذخيرة الحية) كتلك الأغنية التى تقول :
لو مصدق الحدسك مصدق قول الناس
أضربني بمسدسك أملاني أنا رصاص
أو الأخرى التى تقول :
دانة واحتمال تنفجر
العيون سلاح الموت
والخشيم دا كاتم صوت
السنون زى در وبلى
والخد مسدس ستة ملى

ملحوظة :
أى موضوع يحتوى على أسلحة (بيضاء) صاحبو ح ياخد زيرو بحسبانها أسلحة متخلفة (دورا ميت ساكت) !
10- الماء سائل لا طعم ولا رائحة ولا لون له ، أكتب فيما لا يزيد عن جغمة واحدة فقط ( مستعيناً بالغباء) عن الآثار الإيجابية لتغير الخواص الفيزيائية والكيميائية لماء الشرب لدينا وتحوله إلى سائل ذو لون وطعم ورائحة و(ديدان) !

كسرة :
لا تكتب أي شئ وأجمع الورقه فاضية .. هو الحاصل ده عايز ليهو كتابه ؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)؟





تعليقات 22 | إهداء 2 | زيارات 8098

خدمات المحتوى


التعليقات
#723667 [عادل خوجلى]
0.00/5 (0 صوت)

07-17-2013 01:27 PM
سمعنا من الاخبار انو فى تشكيل وزارى مرتقب خلال الايام القادمة اقترح نجمع توقيعات مليونية نطالب فيهايكون الاستاد الفاتح جبرة وزيرا لانو السودانى الوحيد الشاعر بما يعانيه الشعب يمكن يستطيع يترجم كتاباته الى واقع يعيد البسمة لكل سودانى اصلوا انسان دو خيال واسع وحالة السودان عايزة ليها وزير بمواصفات زى الاستاد الفاتح


#723654 [عادل خوجلى]
0.00/5 (0 صوت)

07-17-2013 01:13 PM
الاستاد الفاتح امتحانك مكشوف والجماعة باعوه للطلاب واستلموا فلوسهم عشان كدة عايزين تعيد الامتحان


#723516 [العقاد ابو الحسن]
0.00/5 (0 صوت)

07-17-2013 10:41 AM
تسلم يااستاذ لكن فى امتحانات زى دى كان حصلنا باقى الدول الطلعت القمر


#723140 [sahar]
0.00/5 (0 صوت)

07-16-2013 08:48 PM
تسلم يا استاذ من كل شر انشاء الله ............ وامتحانك ده 100%


#723034 [Adam Ibrahim]
4.75/5 (3 صوت)

07-16-2013 04:47 PM
برضو يا جبرا واحد قبضوه ناس الامن بيوزع فى منشورات للمواطنين فى المواقف والمواصلات والاسواق بس اتضح انها ورق فاضى.. سألوه يا زول دا شنو دا؟ قال ليهم كمان الشئ الحاصل دا داير ليهو منشورات وبيانات؟


#722818 [السارق مالنا ودمنا]
5.00/5 (1 صوت)

07-16-2013 12:24 PM
ده أول امتحان نشوفوا في حياتنا تجمع فيه الورقة فاضية وتكون نسبة النجاح 100% يكون الورق ده مشى وين (صندوق الانتخابات أكيد) ومال القوي الأمين ده حيجي كيف اذا ما لقى ورق فاضي يفوز بيه


#722779 [ودالسامراب /محطة اللستك]
5.00/5 (1 صوت)

07-16-2013 11:40 AM
والله شكلك ح تدينا الدرجات فى نظافة الورقة بدل مانوسخة ساكت بعفن الحكومة دى


#722764 [خليل عــــزة]
5.00/5 (4 صوت)

07-16-2013 11:24 AM
اكد د. الحاج ادم نائب رئيس الجمهورية اهمية تجويد العملية الايرادية من خلال استخدام التقانة الحديثة في عملية التحصيل وضرورة الاستفادة من تجارب الدول الشبيهة .
جاء ذلك لدي ترؤسه امس بمجلس الوزراء اجتماع لجنة منع التحصيل غير القانوني بالطرق القومية والذي استمع الي تقرير حول سير عمل اللجنة خلال الفترة الماضية والانجازات التي تحققت ، قدمه مولانا بابكر احمد علي قشي رئيس اللجنة حيث اوضح ان التقرير تضمن التوجيهات التي صدرت بشأن ايقاف الرسوم غير القانونية من قبل بعض الهيئات والمؤسسات وذلك لما لها من اثر ايجابي علي حياة المواطن والتنمية.
واشاد نائب رئيس الجمهورية بعمل اللجنة ووعد بتذليل كافة العقبات حتي تستطيع ان تؤدي عملها بالصورة المثلي.
وامن الاجتماع علي ضرورة التنسيق بين اللجان الفرعية بالمركز والولايات لمساعدة اللجنة في اداء مهامها

لا تكتب شيئاً....

ركب فهامتك وفهمامة اولاد حلتك وبنات جيرانك واشرح لينا.. لو فهمت

قرار ايقاف جباية غير قانونية ...هسه ده داير ليهو لجنة ...


#722637 [غربة]
0.00/5 (0 صوت)

07-16-2013 09:33 AM
انا منتظر نمرة 10 احتمال تحن علينا وتدينا حاجة مناسبة ممكن نعلق عليها حتى ولو بكلمة ياود جبارة


#722569 [mohammad saad]
3.00/5 (2 صوت)

07-16-2013 08:07 AM
أستاذ أستاذ أستاذ استاذ استاذ !!!!!!!!!!!
دي طبعاً الحاجة الناقصة في المقال الجميل دة وهي الخلفية والمؤثرات الصوتية التي تصاحب هذاالسيناريو البارع.
بعدين امتحانك دة مكشوف الحال والنجاح فيهو من درجة واحدة فقط!
مع تمنياتنا بالتوفيق ولكل ممتحن مصيبة!!!
وسع الله صدرك في هذا الشهر المبارك


#722556 [الغاضبة]
5.00/5 (1 صوت)

07-16-2013 07:47 AM
والله يا استاذ الفاتح فعلا الحاصل ما عاوز ليهو كتابة عاوز ليهو شجعاااان وفرسااان يطلعوا على الميادين ويملأوا الشوارع ويستعيدوا كرامتهم ... عاوز ليهو شغل كبيييير ما اظننا نحن الشعب الفضل دا نقدر عليهو... اقول ليكم نستلف لينا شوية رجال وشوية نساء من جيراننا ناس التحرير ...


#722529 [سماسم طيبة]
5.00/5 (1 صوت)

07-16-2013 05:10 AM
التحية لك يا أستاذ جبره على هذا الإبداع ومال لو كنت في جو ديمقراطي كان عملت شنو الله يديك الصحة والعافية


#722519 [جاكوما]
5.00/5 (1 صوت)

07-16-2013 04:05 AM
ممكن الاستعانة بصديق كوز ؟؟


#722470 [AburishA]
5.00/5 (2 صوت)

07-16-2013 12:02 AM
أنا بموووت في أجب بلا أو نعم يا استاذ جبرا !!!!!


#722336 [قنقر]
5.00/5 (1 صوت)

07-15-2013 07:34 PM
الواحد يجمع الورقة الفاضية نكتب الاسم و لا يفتح الله .


#722307 [ابوساره]
5.00/5 (2 صوت)

07-15-2013 05:19 PM
دحين يالفاتح انت عاقل!!!!خط شنو ؟؟وهيثرو شنو؟؟دي قصة انتهت ,,,والافضل تحصلو خط الحاج يوسف مايقوم ينباع كمان


#722289 [تختخ]
5.00/5 (3 صوت)

07-15-2013 04:40 PM
الفاتح والله انت زول رائع ومبدع ياخي الله يحقق كل امانيك


#722285 [crt the belost country ,actor Omar the big ass and mouth!!r]
5.00/5 (2 صوت)

07-15-2013 04:33 PM
لا تكتب أي شئ وأجمع الورقه فاضية .. هو الحاصل ده عايز ليهو كتابه !!hee,heee,make us laugh!!this truth


#722278 [الصليحابي]
5.00/5 (1 صوت)

07-15-2013 04:28 PM
والله يا أستاذ الفاتح ، يوم ما أقرأ مقالك ومقال الأخ عووضة أكون زهجان ومدبرس


#722260 [محمد أبوالخير ـ الواعظ]
5.00/5 (3 صوت)

07-15-2013 03:58 PM
القوي الأمين في هذا الزمن الأغبر هو أن تكون كذاب ولسانك طويل وأيدك أطول في المال العام والخاص وأن تكون مزواجا ثم أخيرا أن تكثر من الصلاة والصيام في الظاهر وقلبك يملأه الحقد والغل . حسبنا الله ونعم الوكيل .


#722256 [ود الباشا]
5.00/5 (2 صوت)

07-15-2013 03:50 PM
سلمت يداك وربنا يحفظك من كلاب لهب لانك عقد تخفف علينا كتيييييير وتطبطب على الغلابة الموجوعين ربنا يتقبل


#722198 [محمدين]
5.00/5 (2 صوت)

07-15-2013 02:22 PM
يا سلام عليك ضحكتنا رغم (السخانة) بشكل عام خصوصا في شهر رمضان!


الفاتج جبرا
الفاتج جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة