07-25-2013 12:10 PM


كوني متاكدة 100% ، ان هنالك من هن في غاية اناقتهن وفي كامل زينتهن ، حول زوجك في كل مكان ( العمل ، الشارع ، النادي ، بين الاصدقاء ... الخ ) ، وتأكدي ايضاً أنهن لا يمانعن أطلاقاً في أقامة علاقة بزوجك ولو كانت عابرة ، قد تختلف الفتيات في أختيار طبيعة العلاقة وشكلها ولكنهن لايرفضن ، وتوقعي ان زوجك ايضاً لن يصمد طويلاً (( وأن صمد )) ، في الغالب يكون زوجك أحد اربعة نماذج وهم :
1/ المحب لزوجته وبيته وان محيطه كله أنتي ( هذا زوج لن يقع في الشرك بسهولة ، سبب وقوعه الوحيد ان حصل تغير في محيطه ) حافظي عليه بمعرفة طبعه وجعل البيت دائماً افضل مكان .
2/ الزوج المخلص الذي تزوج عن حب ( هذا الزواج صعب المرءاس ، ربما يقع في صداقه او شئ كهذا لكن لن يقع في الحب ) حافظي عليه وحافظي علي نفسك بان تكوني دائماً فتاته التي اختارها حتي لا يحس بالتغير ويلجاء للاخريات .
3/ الزوج الاجتماعي المحب لزوجته وللناس ( هذا تثبت عليه الخيانة وان لم توجد ، ربما يتورط في شكل او اخر لكنه يبحث عن الاجتماعيات ) كوني عند حسن ظنه بنفسه ، واياك بان تتهميه بشئ غير مؤكد فهو ان احس انه بالرغم من اخلاصه لك تشكين به لن يتورع في فعل اي شئ (وطالما كده كده مشكوك في امره ).
4/ الزوج التقليدي ( وهذا الزوج لا يلجاء الي الخيانة والتعارف الي الاخريات والموضوع بالنسبة اليه مسالة مادية وربح وخسارة وما اكتر ولن يدع لك فرصة كي تثبتي عليه شئ كي تطلبي الطلاق ويخسر للابد ما خسره فيك ) حافظي عليه بتجديد جميع ما فيك .. شعرك , لبسك , مكياجك ، الخ . وبرضو ممكن يتعرض لبعض الضغوط والاغراءات,
اما بقية النماذج فلا حصر لها ولكن هؤلا الاربعة هم النماذج الاكثر شيوعاً في المجتمع السوداني ... وبعد الكلام دا كلو وطريقة المحافظة علي الازواج دي ,, مافي حاجة بعيدة عليهم .
ويجب انك تقدري برضو انو في مراهقة اعتيادية وبرضو في مراهقة متاخرة ، ولازم برضو ما تنسي انو في نزوة ما بعد الزواج ، ولازم تختي في بالك برضو انو في هفوات من غير قصد ، وبالتاكيد في كتير من الحجج التي لو ظبتي بيها راجل و(بالثابتة) لن يتردد في زكر أحداها او كلها ، وحيجي ابوك يقول ليك يا بتي الراجل حلالو اربعة احتمال كان داير يعرسا ، وتجي امك تقول ليك يا بتي الرجال اصلهم كده أساليني انا ، وتجي مرة جيرانكم تشهد انو راجلك شاغلها يوم بكي ناس فلان ، وتجي الدلالية تحلف انها شافت زوجك في بيت ناس علانة يشرب في الجَبنة ، ويأخد الموضوع طور أخر أبعد واكبر من اللازم , ويتدخل في الموضوع الجميع بلا تحفظ او خصوصية او احترام لنوعية الحلول التي تودي تجربتها والقيام بها ، وبعد دا كلوووووووووووووو ... ترجعي بيتك مع وعد انو الموضوع دا ما حيتكرر تاني ..!
وهو الموضوع زاتو شنو ...؟ لمن تسرحي في الموضوع تلقي انو ذنب راجلك الوحيد ( انو اخوك الصغير شافو في شارع النيل وراء البرج .. في الحتة المضلمة ديك مع وحده تشبه أفراح عصام .. ) ، الطبيعي في الحالة دي انك قبل الكلام العملتيهو دا كلو تسالي راجلك دا انت ولا لا ؟؟ وتاني سؤال طوالي انو دي منو ؟ أحتمال زميلتو ,, أحتمال اخت صاحبو ,, أحتمال بت خالو بعد ما فتحت وشها ,, الاحتمالات كتيرة ، حتي بعد داك تعملي العملتيهو دا وتفضحي روحك وراجلك ، اما السؤال الثاني فالمفروض توجهيهو لاخوك الصغير مع كف (صاموتي) .. انت الوداك هناك شنو ..؟ مش احتمال يكون أخوك كان بيحب هناك في الضلمة ولمن شاف راجلك حب يعمل الموضوع دا عشان يشتت التهمة عن نفسو ,,!؟
برضو لو كان بيخونك او بيفكر ، الموضوع بالنسبة ليه ما انتهي وأحتمال بعد دا يخونك بطريقة رسمية (رسمية دي مش أحلي من خيانة شرعية .. بقت مستهلكة شرعية ومشروعة ) ويتزوج عليك ، وبرضو حتمشي بيت ناس ابوك وحتبكي وامك حتحلف تطلقك منو وابوك يشيل العكاز ويقعد في خشم الباب راجيهو يجي (التقول بجي طوالي بعد عملتو دي ولا بمشي شهر عسل ولاشئ ..؟) وبعد كم يوم من قعادك عند ناس امك .. وبعد جاراتك كلهن يجربن يقرن ليك الفنجان ويورنك انو تعبان وحيطلقها ، وانو عاملا ليهو عمل وساقياهو ليه في الجّبنة الشربها عند ناس فلانة ، والحاقدة عليك تقول ليك .. ( هدا شايفاهو متهني يا يمة ونفسياتو فووووووووق وهي قاعدة جنبو صغيرونة يا يُمة وسمحة سماحه شديدة وطويلة وسمينة وبياكلو ليهو في حاجة عامله كده زي رِهاب رِهاب كده ..! وبعد شوية تقول ليك دي حلاوة قطن .. هو في قطن لمن يكون في حلاوة قطن ؟) . وبرضو يجنك الوداعيات ..
(لازم يجنك ما هن بسترزقن من المسكينات الهُبل الزيك ديل ,, ويشبكوك ختي البياض ,, ويحاولن يعرفن نفسياتك ماشة علي وين ويقولو ليك الدايرة تسمعيهو) , وبعد داك الحكاية تكتر علي ابوك وامك ويزهجو منك وراجلك يجي من شهر عسلو ويقول ليك زي ما مشيتي براك تجي برااااااااااك , وطبعاً اهلك يقنعوك ترجعي بيتك ويقولو ليك ما تدي المرة الجديدة فرصة .. اقهريها قبل تطلع ليك في راسك .. وتبداء حصة العصف الذهني النسوانية دي ... وابوك يقول ليك دا من حقو وحلاولو ، راجلك لو قصر في حقك انا بطلقو منك ... (ابو الرجال) ، وامك تقول ليك اصبري عليهو (دا اساليني منو ضايقاهو في ابوك كان داير يعرس فيني لو ما صبرت ), وفي النهاية ترجعي بيتك مخممة حاجاتك ,
طيب سؤال ليك يأاختي الزوجة السودانية : دا كلو ليه ؟؟ وعشان شنو ؟؟
لو راجعتي نفسك حتعرفي السبب . اولاً امشي شوفي ليك مراية شوفي وشك فيها ، ثانياً ما تتاثري بالمسلسلات وتفتكري نفسك منة شلبي وكده ، ثالثاً ودا الاهم ( الله يسالك انتي قبل العرس كنتي كده ,, الوحده عشان تعرس داك يا شعر وداك يا اهتمام وديك يا حنة ورسمة وديك يا لطافة وزوق وبرستيج ، والكلام كلو بالشين والجيم . اتزكري الايام ديك وارجعي اعمليها تاني , ما تقولي عرستي خلاص ضمنتي واسترحتي من مجهود زمان وسماحة زمان , الحياة ذاتها ما فيها ضمانات خلي الراجل ,
نصيحة أخيرة .. الراجل دا كان جاع وما أكلتي !-حيمشي ياكل بره
لو زهج وما ضحكتي !-حيمشي يضحك بره
كان داير يتونس وما ونستي ! حيمشي يتونس بره
وكل شئ ما يلقاهو ؟؟ حيمشي يلقاهو بره .. ومتوفر وبكثرة .
وفري كل شئ من أجل زوجك ,, وانت ياخي أصبر شوية علي المرة دي كمان .. أنت ما عارف انك اتزوجت مرة سوادانية .
المهند رجب

[email protected]

تعليقات 4 | إهداء 1 | زيارات 1909

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#730885 [Joei]
5.00/5 (1 صوت)

07-27-2013 12:56 PM
مع احترامنا للرأي المخالف ... لكن والله يا الكاتب بالغت !!!!

يعني بتبرر للرجل نزواته وبتلوم الزوجة ؟ أول شي من المعروف إن الولاده تغير المرأه يعني الشكل والصحة بصورة عامة تتغير بعد الولاده ....

وبعدين كلامك ده معناه إنو المرأة مطالبه بأنها تكون مهتمه بنفسها وبنفس القدر المجتمع لا يسامحها إذا قصرت في حق الولاد والبيت , يعني تهتم بالبيت والولاد والزوج وبعد ده تكون في ابهي و اجمل صورة ؟ والله حرام عليك المرأة دي ما مخلوق خرافي أو كاين فضائيي !!! المرأه بني ادم يتعب ويحس !!!

وبعدين في الوضع الإقتصادي العلينا ده , المراه كيف تهتم بنفسها من غير توفر المال ؟

هل خلاص كل زوج موفر لزوجته مساعده مدفوعة أو حتى غير مدفوعة في اعمال البيت حتى تتفرغ لنفسها قليلا ؟

هل كل زوج قادر ماديا علي توفير ثمن الحناء والنقش وكل معينات التجميل النسائية من مستحضرات أو ملابس؟

وبعد ده نسيت الجانب الاهم .... هل الرجل غير مقصر عاطفيا في حق زوجته ؟ يعني خلاص الرجل السوداني مقطع الرومانسية .... وهل يهتم بشكلوا أو فقدان بعد الوزن ؟ شوف الرجال ذاتهم الوحيد بعد الزواج بيتحول منظره كيف

ياخي المرأة السودانية مفروض يدوها وسام انها صابره علي الرجل السوداني !!!


#730092 [خالد يس]
1.00/5 (1 صوت)

07-26-2013 01:02 AM
موضوع رائع جيدا يستحق ان تتم قراءته بتمعن وتحديدا من كل شاب وشابة متزوجين او مقبلين على الزواج، واتمني المواصلة على ذات المنوال فمازال في الموضوع بقية، فنحتاج الى اساس للبيت الزوجي الذي اصبح ينهار مع اول رشة مطرة، وهنالك سؤال حقيقي لماذا تتحول المراة الى صورة نمطية في ذهن الرجل ولو كان متزوج من اجمل النساء، ففي بعض المرات تجد ان الجميع يتحدث عن امراة ما بصورة مدهشة عن جمالها وغيره ولكنك تجد زوجها هو الوحيد الذي لا يرى كل ذلك. فالسؤال اذا ماذا نبحث في النساء عن جمال عن وعي عن ماذا. وشكرا مرة اخرى على الموضوع الرائع


#729886 [الجقر]
4.00/5 (3 صوت)

07-25-2013 04:17 PM
نسوان بوبارات خمجانات غير مهتمات عذبننا عذاب


#729764 [بت دارفور]
5.00/5 (1 صوت)

07-25-2013 01:40 PM
يا مهند ما عذبتنا


ردود على بت دارفور
United States [؟؟؟؟؟؟؟؟؟؟؟] 07-27-2013 12:18 AM
هههههههههاأحلى تعليق يا بت دارفور..


والله فعلا مقال جميل وسرد وتحليل رائع كلامك دا زيي الوصيةوكلام بتاع ناس كبار لمراجعة الحسابات.. ولو أن أقسى ما في الموضوع الخيانة وبما أنني رجل اسأل الرجل لماذا تخون وانت متزوج وهذا ليس تبرير بأن الخيانة والأمور الفارغة تكون للعزابي.. ولكن هل إذا خانتك زوجتك فهل سوف ترضاها.. اكيد لا والف لا.. فيا أخي الزوج مهما تكون الأسباب وما هما تكن المغيريات فلا تعلم نفسك على شغل المراهقين ولا تبحث عن الخيانة.. بأمور بسيطة جدا يمكنك أن تجعل من زوجتك اجمل النساء واحلاهن قدرا وقيمة فلا تكن ناقدا في كل صغيرة وكبيرة شجعها اعطها الثقة في نفسها.. كما تتطالب زوجتك بمظهرها فاهتم انت بمظهرك وبنفسك.. شاركها في امور وشاركها في امورها كن له [زوج واب واخ وزميل وصديق في مرتبة الاخ] وصدقني حا تشوف العجب..راجع نفسك واهتم ببيتك وباسرتك وزوجتك فالحلال مازيي شيء والله.
المراة السودانية وفية ومخلصةومحترمة تقدس الحياة الزوجية ومثقفة وواعية ومتعلمة وراقية وحافظة لنفسها ولدينها وتخاف ربها.. الله يسعد كل متزوج ومتزوجة ويسهل امر كل عزابي أن يتزوج ويرزقه الله ببنت الحلال التي يحبها الله ويرضاها.. امييييييييييييييييييييييييين


مهند رجب الدابي
مساحة اعلانية
تقييم
7.75/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة