اذا إستمر
12-15-2010 09:22 PM

ساخر سبيل

اذا إستمر

الفاتح جبرا


* إذا إستمر تقليص حجم العيش بهذه المتوالية الهندسية فسوف يأتى يوم لا تستطيع فيه فرز (الرغيفة) من (البنادول) !
* إذا إستمر تحويل الشوارع الرئيسية إلى إتجاه واحد فسوف يصبح بعد الذهاب إلى العمل الرجوع إلى البيت مشكلة !
* إذا أستمر الغناء فى الهبوط بهذه الطريقه فسوف يأتى يوم نتحسر فيه على أيام سيدة الغناء السودانى (عوضية بلاغات)
* إذا إستمرت ظاهرة البناطلين الناصلة التى يرتديها بعض الشاب هذه الأيام فى (النصول) فسوف لا يحتاج (الشباب ديل) مستقبلاً إلى أرتداء شرابات لأنو البنطلون ح يكون بنطلون وشراب فى نفس الوكت !
* إذا إستمرت حكاية صناديق الدعم فى الإزدياد بهذه الصورة سيأتى يوم يكون فيه صندوق لدعم كل صندوق دعم
* إذا إستمرت حكايت ربط فاتورة الكهرباء بفواتير خدمات أخرى فسيأتى يوم لن يستطيع فيه المواطن شراء الكهرباء لأنو ما (مرخص عربيتو)
* إذا إستمر إزدياد أعداد الخريجين دون تعيين فسوف يأتى يوم تجد على بطاقة أحدهم (الوظيفة : سائق ركشة وزميل كلية الجراحين) !
* إذا إستمرت حكاية الإنفصالات دى فسوف يأتى زمن نكون فيه أول شعب يسكن فى (أوضة وبرنده) !
* إذا إستمر تصاعد سعر الدولار فسيأتى يوم يحتاج فيه المواطن (إنو يزيد على الماهية شوية) عشان يشترى ليهو (فرشة أسنان) !
* إذا إستمرت ظاهرة التفكك الأسرى سيأتى يوم يقول فيه والد الفتاة للعريس الذى تقدم لها (يا إبنى نحنا أسرة محافظة البت عندنا ما بتبيت بره البيت أكتر من يومين فى الاسبوع) !
* إذا إستمرت ظاهرة تزايد أعداد من يمنحون الدرجات العلمية العليا بهذا الشكل الغريب فسيأتى يوم نسمع فيه عن (دكتور مصطفى الحلاق) ودكتورة (عوضية الحنانة) !
* إذا إستمر تزايد سعر اللحوم بهذا المنوال سيأتى يوم يكون فيه الدعاء الرسمى للشعب الفضل هو (لحمتك يا رب)
* إذا إستمرت ظاهرة إرتداء الفتيات للملابس الشفافة فسوف تحتاج شرطة النظام العام لإنشاء إدارة بإسم (إدارة التظليل) !
* إذا إستمرت معدلات نهب المال العام فى الإزدياد بهذه الصورة التى نطالعها سنويا عبر تقارير المراجع العام ح يجى يوم ما ح يكون فى مال ولا يحزنون !
* إذا إستمر (قدو قدو) فى ممارسة الجلد بتلك الطريقة التى شاهدناها (يوم بيكتل ليهو زول) !
* إذا إستمر الحال بالمدينة الرياضية بنفس المنوال حتى أصبحت (خرابه) ده يكون (لعب ساااكت) !
* إذا إستمرت زحمة الشوارع دى في الإزدياد (تانى عربات المسئولين تمشى بى وين؟)
* إذا إستمر تزايد أعداد (الكبارى) و(نقصان) أعداد الشوارع من جراء الحفر والمطبات فلن تجد تلك الكبارى (عربات) تمر عبرها !
* إذا إستمر تزايد أعداد عربات (الليموزين) ذات اللوحات (إستثمار) نقترح على المسئولين تغيير اسم الوزارة إلى وزارة (التاكسى والإستثمار) !
* إذا إستمرت إدارات الأندية لدينا فى الإعتماد على (الفقراء) من أجل الفوز بنتائج المباريات بدلاً عن الإعتماد على التدريب واللياقة والمهارات فلا شك أننا سنحرز يوماً كأس العالم .... فى الدجل والشعوذة
* إذا إستمرت حكايت (مفاوضات الدوحة) الما عاوزه تخلص دى بقترح على الحكومة تشترى ليها بيت هناك وبعدين التبيعو لمن تنتهى المفاوضات وتوفر (حق الفنادق) دى !
* إذا إستمرت كليات الطب (الخاصة) فى قبول الطلاب الحاصلين على نسب متدنية فنحن موعودون بأطباء (الدمار الشامل) فى القريب !

كسرة :

إذا إستمرت الملاريا دى معاى ح أضطر أمشى الدكتور واليحصل يحصل

تعليقات 30 | إهداء 10 | زيارات 4651

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#60234 [مجرد انسان]
0.00/5 (0 صوت)

12-17-2010 04:57 PM
دوام الحال من المحال,,,,,لكن الناس ديييل لقوا علاج للمثل دا
كسرة:
عقبال ما يلقوا علاج للملاريا بتاعتك يا استاذ


#60232 [مجرد انسان]
0.00/5 (0 صوت)

12-17-2010 04:55 PM
دوام الحال من المحال,,,,,,,,لكن واللة الجماعة دييييل حيرونا عدييييييل كدا شكلهم لقوا علاج للمثل دا
كسرة:
عقبال ما يلقو ليك علاج للملاريا دي يا استاذ


#60076 [طارق]
0.00/5 (0 صوت)

12-17-2010 10:00 AM
أضحك اله سنك أستاذنا مستشار التنفيس
إذا استمر الرئيس في مغامرات السفر دي يوم الأفارقة بيبعوا ضميرهم ويسلموه وهم اصلا ما عندهم ضمير
إذا استمر المدرب المصري في المريخ حيهبط المريخ لدوري الشمس الحارة


#60065 [بكري عبدالله الطاهر]
0.00/5 (0 صوت)

12-17-2010 09:30 AM
اذا استمر الفاتح جبرا يكتب كدا انا اااا اكيد بقرا ليو


#59892 [ابو الهول]
0.00/5 (0 صوت)

12-16-2010 08:11 PM
لكن يا استاذ .. الشرابات دي بالغت فيها عدييل كده

الله يديك العافية ويسلمك من اي بلاء بس نصيحتي ليك ابعد من الدكاتره ديل


#59886 [gada gado]
0.00/5 (0 صوت)

12-16-2010 07:56 PM
اذا استمرت تسلخ فى الانسان السودانى والكفاءات المعروفين داخل وخارج السودان حا يفقد كل المغتربين أرزاقهم , يا خى اطعن فى الفيل اكتب عن التماسيح ابحث عنهم ومزق اعراضهم , سيبك من الحركات بتاعت ومحاولة كسب الاستعطاف
كسرة:-
انته حولتههه من جريدة السودانى المعرفة بمعارضة الحكومة الى الراى العام معروفة الولاء ليييييييييييييية؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#59821 [محمد الاسعد]
0.00/5 (0 صوت)

12-16-2010 05:50 PM
اذا استمرت الانقاذ فى حكم السودان لن تجد ياالفاتح وطن تنتمى الية


#59816 [mystro]
0.00/5 (0 صوت)

12-16-2010 05:33 PM
تبرا وتستبرا ياجبرا ;(


#59706 [وجع الزمان ]
0.00/5 (0 صوت)

12-16-2010 01:28 PM
تبراء وتستبراء يااستاذ جبرا
كسرة؛إذا إستمرت معدلات نهب المال العام فى الإزدياد بهذه الصورة دي ح يجى يوم ما ح يكون فى ابره.


#59694 [هاشم عبد الماجد خالد]
0.00/5 (0 صوت)

12-16-2010 01:08 PM
صدقونى ود جبرا دا بتاع كواميت


#59690 [بت ام الحسن]
0.00/5 (0 صوت)

12-16-2010 01:06 PM
مكسرة فى كتاباتك.


#59686 [نهلة]
0.00/5 (0 صوت)

12-16-2010 01:01 PM
اذا استمريت تكتب بالطريقة دى ح تقطع مصارينا بالضحك


#59670 [الجعلى]
0.00/5 (0 صوت)

12-16-2010 12:28 PM
انت ياااخوى يا جبرا مالو اسم نساءك (حريمك ) كلو عوضية مرة فنانة ومرة حنانة ومرة جنانة وهنانة 000وهلمجرا !!! الظاهر الإسم عاجبك شدييييد 00 وقبل دة كلووووووو شكرا ليك لهذا المقال الرصين وعاااااااااجل الشفاء لك يا أبو الناجى


#59621 [قرفان]
0.00/5 (0 صوت)

12-16-2010 11:21 AM
اذا استمريت انت تكتب فى مقال (اذا أستمر..........) فى حال الشعب السودانى الفضل ااكد ليك انك حا تكتب مقالات يومية لمدة 20 سنة قادمة


#59613 [ام محمد]
0.00/5 (0 صوت)

12-16-2010 11:12 AM
سلامتك سلااااااااااااامتك ..سلامتك من حسد او شر ويسلم قلمك الاندر


#59600 [NewSudan]
0.00/5 (0 صوت)

12-16-2010 10:44 AM
الاعلام السوداني (معظمهم و جلهم) عبارة عن بوق و حبرتجية للنظام الفاشي (فساد و فشل) غير مسبوق منذ سيدنا ادم عليه السلام
من اين اتى هؤلاء و عن اي وطن يتحدثون و عن اي دين يحتكمون قاتلهم الله انا يؤفكون
مبروك لاخوتنا الكرام في جنوب السودان الحبيب الاستقلال و عقبال اهلنا في شرق السودان الحبيب و الغرب العزيز من زبانية السلطة و الحبرتجية
و مرحبا بالسيد الاصيل الرجل الشهم / باقان اموم في الشرق و الغرب ضيفا عزيزا و ابن بلد و تحيا وحدة الشرق و الجنوب و الغرب في السودان الجديد
و لا نامت اعين الجبناء


#59580 [يحي احمد محمد]
0.00/5 (0 صوت)

12-16-2010 09:46 AM
اذا استمر الحال علي ماهو عليه سيتم تعين الفاتح جبرا مديرا لادارة التظليل واعمل حسابك من قدوقدو


#59545 [قدو قدو]
0.00/5 (0 صوت)

12-16-2010 08:31 AM
علاجك عندي .. سوطين من قدو قدو وتقوم زي الحصان


#59523 [بنانكو]
0.00/5 (0 صوت)

12-16-2010 07:24 AM
وزائرتي ليست تزور الا في الظلام .......كنت اتمنى ان تفارقك الملاريا ولكن الظاهرشبح قدوقدو مازال جاثما امام ناظريك ....بالله الفرق شنو بين زائرتك وقدوقدو ؟اتمنى ان تفارقك الملاريا وشبح قدوقدو وتعود لنا كما كنت


#59488 [جدو]
0.00/5 (0 صوت)

12-16-2010 02:11 AM
ابداع حقيقي يا استاذ جبرا . من أجمل وأروع ما قرأت........الله يديك العافية ويوقف استمرار الملاريا وكل ما ذكرت.

(يوم بيكتل ليهو زول)...هههههههههههههههه


#59485 [مفاوض سابق]
0.00/5 (0 صوت)

12-16-2010 01:15 AM

اقتراحك بتاع (الدوحة) ، سمح خلاس ، لكين في واحد اوفر منو ، بما اننا بعد ذهاب البترول ، اصبحنا في (مثلث عمنا حمدي ) فقراء كما تنبأ صاحب المثلث نفسو ، بقترح يا عمك ، نقعّد ناس هناك عديل كدا ، ونعمل ليهم (تكّية) ، نسميها (الممطوطة) ، حتى يتسّنى للجماعة (التوهّط) بي غادي عشان يشتغلوا بي راحتم وبي مزاج وما يستعجلوا ، و برضو منها يشوفوا كاس العالم سنة


#59482 [saif]
0.00/5 (0 صوت)

12-16-2010 12:59 AM
يا استاذ الملاريا بتروح اكل قرض بس اليوميين ديل متوفر الحكومة وفرتو والعجب النيم علاج مجاني ومتوفر اخير ليك من الدكاترة البدخلوها فيك ما بتمرق ده اذا مرقت انت منهم ذكرتني واحد اشتري دفايه وقال اذا اشتد البرد بقرب منها ولو اشتد زياده بقرب اكثر ولو صار قره بشقلها .


#59471 [ابو الها]
0.00/5 (0 صوت)

12-16-2010 12:25 AM
اذا استمر الكماسرة في قلة ادبهم دي حا يطلعوا الركاب خريجي كلية الكماسرة لقلة الادب


#59470 [joda]
0.00/5 (0 صوت)

12-16-2010 12:23 AM
اذا استمر االبشير في زياراتة الخارجية (
المخجوجة )يقابل رئيس وزراء الصومال فالسودان سيصبح دولة عظمى لا محال.

اذا استمر ا بناء القصر الجديد فهو لا محالة سوف يكون لحكام جمهورية الحلفاية وعد بابكر.

اذا استمر ت مفاوضات الدوحة فلن تجد الفرق العالمية المشاركة في كأس العالم 1022مكان للاقامة.
اذا استمرت موجة الانفصالات في السودان فسوف يتم القبض على الرئيس البشير في جمورية السعودية الديمقراطية العظمى.


#59442 [المسافر]
0.00/5 (0 صوت)

12-15-2010 10:33 PM
اذا استمرت الانقاذ في الحكم اكيد حيموت الشعب الفضل;( ;( ;( ;( ;( ;( ;( ;(


#59439 [سوداني مخلص]
0.00/5 (0 صوت)

12-15-2010 10:20 PM
عجييب والله لكن انت ليي هسه ما مشيت الدكتور ماهو كان استمر مرضى الملاريا مابمشو الدكتور البلد حيقعد فيها منو
كسره :
ربنا يشفيك ويدوم عليك العافيه انشالله


#59425 [mimi]
0.00/5 (0 صوت)

12-15-2010 09:54 PM
هههههههههههههههههها (لحمتك يا رب ),بجد حلوة يا استاذ واقول ليك حاجة,احسن ليك القرض من الدكتور ولو ما مصدقني اسأل اي دكتور يكون اتخرج بعد 2000 وبالشفاء


ردود على mimi
Saudi Arabia [عمار] 12-16-2010 02:09 PM
و اشمعنى بعد 2000 تحديدا ؟؟؟!! في 2001 كليات الطب عملوها اكشاك جرايد؟؟ والا يكون عندك قريبك خريج السنة المذكورة!!


#59420 [سودانية]
0.00/5 (0 صوت)

12-15-2010 09:41 PM
اذا استمر الطعن في الاطباء وطلاب الدراسات العليا فلن تكون هنالك السمعة الطيبة للكوادر الطبية والعلمية السودانية المعهودة علي مر السنين والتي نال بها الكثير مراكز مرموقة عن جدار واستحقاق
اذا استمر دفن الرأس في الرمل وعدم مواجهة الواقع المتمثل في تقسيم الوطن دون الدعوة الي لم الشمل وتوحيد الصف الداخلي فلن يكون هنالك شيء اسمه السودان علي الخريطة
اذا استرت الاصابة بالملاريا في فصل الشتاء فدا اكيد مرض قدوقدو الخل الناس اهلوسوا


الفاتح جبرا
الفاتح جبرا

مساحة اعلانية
تقييم
1.05/10 (105 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة