سلاح الوالي
08-03-2013 10:16 PM


العبدلله قام بكتابة (سيناريو) قبل سنوات إسمه (كوكب المسؤولين) وهو كوكب يبعد عن الكوكب الذي يعيش فيه المواطنين بآلاف السنوات الضوئية (في ذلك الوقت الذي تم فيه كتابة المقال) أما الآن فبسبب إزدياد (ترطيب) المسؤولين وشدة (المسغبة) التي يعيش فيها الموطنين فقد إتسعت الهوة والمسافة بين (الكوكبين) حتي صارت ملايين السنوات الضوئية .
من فترة لأخري تاتينا عبر هذا الفضاء العريض البعيد الذي يفصلنا عن (كوكبهم) بعض التصريحات التي توجع القلب وتفقع المرارة ولعل آخر هذه التصريحات ما أفاد به السيد (والي) الخرطوم الدكتور عبدالرحمن الخضر موجهاً حديثة لسكان (كوكب المواطنين) حاثاً إياهم بإستخدام سلاح الصبر والإيمان لمواجهة الغلاء !
(شفتو كيف؟) .. يعني عاوز تأكل أطفالك تقوم على طول تقشر ليك كيلو (صبر) مع خمسة حبات (إيمان)
تختهم في (الحلة) وتضيف ليهم (كباية) عزيمة و(فنجان) زهد وإنتا وتدينك عاوز بعد كده تضيف للحلة (حبة ورع) مش بطال علشان الحلة تطلع مسبكة والأولاد ياكلو لحدت ما يلحسوا صوابعهم وبالهناء والشفاء عزيزي المواطن وزى ما شايف أكلة غير مكلفة وموجودة في أي مكان ومش محتاجة (غاز) وللا هباب كلها كم دقيقة على (كانون) الغيب وكلو يكون تمام التمام !
العبدلله بقدر ما (نجر مخو) وإستعان بكل الفهامات (الموبايل) و(العائلي) الياباني والتايواني وحتي الصينية إلا أنه لم يدرك ما رمي إليه (والينا) من تصريحه وإفادته هذه ؟ هل يا ترى أراد الرجل أن ينبهنا إلى أن تقوية الإيمان تحتوي على كل الفايتمينات والمواد التي يحتاجها الجسم حتي إذا ما أصيب المواطن بالتخمة نتيجة لهذه الوجبات الإيمانية (القوية) قام بإذابة ملعقة كبيرة من (الصبر) لتساعدة على الهضم !
أم هل أراد سيادته أن يقول لنا (أكلو ناركم والموضوع بتاع الغلاء ده ما عندنا ليكم ليهو حل؟) وفي هذه الحالة يكون السؤال المنطقي : طيب إنتو قاعدين ليه ما تقوموا تروحو وتتركوها لمن يستطيع فعل شئ على أرض الواقع وليس على فضاء الغيب !
(سلاح الصبر والإيمان) .. العبدلله لا يدري إن كان (والينا) قد قام بتسجيل هذا الإختراع وتسلم براءته أم لا فلا أعتقد مطلقا (وأبصم بأصابعي العشرة) بأنه لا يوجد مسؤول في العالم لا في الأمم الغابرة أو الحاضرة أو حتي (المستحضرة) قد إكتشف مثل هذا السلاح ليحارب به الغلاء ويوقف به إرتفاع الأسعار ، إنه إختراع يقع في مصلحة كثير من (الحكومات) التي يعاني إقتصادها من الفشل والتدهور والتردي فبدلاً من أن يسهر مسؤوليها يعكفون على وضع الخطط والدراسات من أجل الخروج بالإقتصاد من أزمته ووضع آلية من أجل استيعاب البطالة وتوفير فرص العمل الكافية للخريجين ويعلنون الحرب على (الهبر والفساد) ويضعون برنامجاً جاداً لإستعادة الأموال المنهوبة كما يدعون إلى التقشف الحكومي (الفعلي) عن طريق تقليل أعداد (الخبراء ولمستشارين) وإلغاء (العقودات الشخصية المليارية) .. بدلاً عن كل هذا عليهم أن يقوموا بإستخدام (سلاح الوالي) والمتمثل في جرعات من (الصبر والإيمان) ! حبة (صبر) 500 ملج كل 8 ساعات مع (دهان أيمان) تؤخذ منه 5 سيسي تمسح به (البطن) عند اللزوم (الجوع طبعن) !!

كسرة :
عزيزنا الوالي : بالمرة شوف لينا سلاح لى قصة (مواقف المواصلات) دي !! بس ما تقول لينا (قيام الليل) !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)؟

تعليقات 32 | إهداء 2 | زيارات 8197

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#737837 [الكتاحة]
2.50/5 (4 صوت)

08-05-2013 02:08 PM
مما يؤسف له أعتقاد البعض في وجود الدولة والمؤسسات .هل من مؤسسة أو مصلحة تقوم ب 1% من مهامها وبأي مستوى.هده المنظومة لاهدف لها سوى توظيف موارد وامكانات الجميع لخدمة الشرزمة الحاكمة ومن العجب كثير من الجهلاء يخدمون في هدا البرنامج المحسوب على حاضرهم ومستقبل أجيالهم ولايحس أحدهم بالمعاناة الأحينما يبعد أو بمعنى أدق يفطم من أمتصاص خيرات البلاد وعرق الكادحين.


#737821 [ودالماحى]
3.63/5 (4 صوت)

08-05-2013 01:52 PM
اليست هذه مهزله والله عيب ياسيد الوالى ان كنت تعرف الله حقا عليك تقديم استقالتك وشوف ليك حاجه تانيه تشتغل فيها او حول على مليزيا لك الله ياوطنا صار فيه والى في الخرطوم وسنار وبقية الولايات نسال الله الفرج


#737453 [ابو قمبور]
2.88/5 (5 صوت)

08-05-2013 05:10 AM
معقوله بس يا استاذ جبرا ما عرفت اسم الأكله ؟
الأكله إسمها "لوكوا الصبر" (بضم الباء) ولو ما عاجبك جرب (بفتح الباء).

بعدين يا عمنا جبرا حكاية (قيام الليل) بعد شويه حيعملوا ليها تصديق من النظام العام.
أعمل حسابك و نوم بدرى بعد ما تشرب ليك حبه "بركه" و ياحبذا لو معاها "كِسره ثابته" (بكسر الكاف) مع ملاح "ملوص" !

هاهاهاهاهاهاهاهاهاهاها !


#737325 [حاتم]
3.50/5 (4 صوت)

08-05-2013 12:31 AM
لله درك يا جبره لقد ابكيتنا وادميتنا لهذا التسطيح الذي تنشره الحكومة بلسان الوالي وغيره من مسئولين دون حياء او خوف وهو تمتما ما يماثل تصريحاته بتاعة الكسره ولبس المركوب والتموت تخلي الله رفقا بنا وبصغارنا وشيوخنا ونساءنا


#737155 [الكريف احمد الكريف]
3.00/5 (3 صوت)

08-04-2013 10:06 PM
الا رحم الله امير المؤمنين عمر بن الخطاب فيما فعل وقال في عام الرماده


#737144 [man2]
2.25/5 (4 صوت)

08-04-2013 09:58 PM
هؤلاء القوم الله اكبر عليهم جلودم تخينة زى امخاخم

شوف وجة الشبه بين الوالى والبشير وغندور واللمبى والخبير الوطنى وبكرى المسطول والقائمة تطول

تجد وجه الشبه هوالخناتةو السماجة وتخانة الراس والجلد وممكن تخت معاهم مرسى والشاطر


#737013 [هاجر حمد]
2.25/5 (5 صوت)

08-04-2013 05:54 PM
والله ما سبقه علي ذلك الا نساج فرعون اللي لبسو من غير هدوم ! يس داك غش زول واحد هو الملك ديل بغشوا الملايين ! الله غالب


#736798 [الباشا]
4.07/5 (5 صوت)

08-04-2013 02:28 PM
انت رهيب يا استاذ الفاتح جبرا ....اخي سالني زميل خليجي قائلا لماذا انتم بهذا الفهم والسماحة والطيبة وبلادكم من كترثة الى كارثة (ويش بلاكم ياسودانيين)؟ ... بلد المليون مفكر يحكمها ابلد خلق الله وهنا تكمن العلة والمرض ...
اخي جبرا متعك الله بالصحة حتى تضمد جراح هذا الشعب الجريح .


#736773 [Adam Ibrahim]
3.75/5 (4 صوت)

08-04-2013 02:11 PM
طيب ما دام هم صحابة العهد الحديث البدريين المتمسكين بشرع الله، لازم يكونوا قدوة للمجتمع اللى هم حاكمينه ويتسلحوا بسلاح الايمان زى الشعب الفقير ده.. يعنى يجوعوا ويدافسوا فى المواصلات ويخوضوا الطين وموية المطرة بدل اكل ما لذ وطاب وامتطاء الفارهات والتمتع بمباهج الحياة ويطالبوا الشعب بالصبر والاستغفار وتقوية الايمان لمجابهة الغلاء والفقر..


#736764 [اسير الشوق]
2.50/5 (4 صوت)

08-04-2013 01:56 PM
بالمرة شوف لينا سلاح لى قصة (مواقف المواصلات) !! بس ما تقول لينا (قيام الليل) انت عارف يا جبره الحته دي بالمقال كلو ربنا اديك الصحه والعافيه اضحكتنا بعد ليل طويل من المعاناه


#736654 [المتفائلة جدا]
3.25/5 (6 صوت)

08-04-2013 11:46 AM
يا أستاذ الإيدو فى الموية مازى الإيدو فى النار وقالوا فى المثل يا ليل طول على الصاحيك..ديل يا أستاذ جبرا جلدهم أصلا تخين وزاد تخانة من أكلهم لقوت الشعب السودانى فكيف عايزهم يحسوا بمعاناته ؟؟ وياهو يمارسوا حبة الدجل بتاعهم ده ويدخلوا ليهم شوية كلمات محتواها دينى لتأكيد مشروعهم الوهم ده و فى النهاية هذه هى بضاعتهم وتجارتهم بالدين..وإستعمال الكلمات الرنانة دى ظنا منهم إنهم يستطيعوا أن يخدروا الناس بيها ..لكن بضاعتهم هذه ما فى أحد بيشتريها حتى زادت كسادا ككسادهم..وأنا مازلت متفائلة بأن الليل مهما طال بعده نهار ... كل عام وأنتم بخير وندعو الله ببركة هذا الشهر الفضيل أن يأتى علينا رمضان ونحن بدون كيزان آمين ..


#736618 [خالد]
2.57/5 (5 صوت)

08-04-2013 11:00 AM
قصدك شنو بـ 5 سيسي هووووووووووي يا جبرة هووووووووي ههههههههههههههه، والله ناس الخضر ديل كارو ما يديروه خلي ولاية ده مش بتاع مكنة اللحام، عالم جاهلة يااااااااااااااااخ.


#736585 [محمد]
2.63/5 (4 صوت)

08-04-2013 10:22 AM
ههههههههههههههههههههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههههههههههههههههههههههه
هههههههههههههههههههههههههههههههههههههههههههههههههههههههههههههههههه..


#736561 [ابو ابراهيم]
2.75/5 (4 صوت)

08-04-2013 09:47 AM
كل مره اقول لك يا استاذ جبرا انت وامثالك قاعدين تنفخوا في قربه مقددوده ولكن لله دركم


#736511 [Jugma]
4.00/5 (5 صوت)

08-04-2013 07:49 AM
المسعولين ديل يساهروا قصاد المواطن ولا قصاد الاربعة زوجات وكواسة الفياغرا اليوم كلو


#736504 [sadamhusain]
2.69/5 (5 صوت)

08-04-2013 07:03 AM
ما تظلموا الجماعه ديل ساكت ... فهم - زينا - بقروا مفالاتك دى فيضحكوا و ينبسطوا و يدردموا سفه مدنكلة و ما بعيد يكونو - زينا - يتصل بصاحبو و هو متفرجخ : الليلة عمك جبرا بالغ عديل كدة .. ( منو الفيكم ما قاعد يتفرجخ ؟؟ ما تظلموهم ......


#736496 [ابو كريم]
4.38/5 (4 صوت)

08-04-2013 06:19 AM
ديل 25سنة حاكمين الناس بالـــ ..الدجل .. الشعوذة ..والهرطقة !!


#736476 [ابو لكيلك]
3.50/5 (6 صوت)

08-04-2013 04:12 AM
يا استاذ جبرا ما تحرق روحك مع الناس ديل ...الكلام ده هو قمة الاستهتار وقلة الادب على الشعب السودانى ..والمسؤولين ما كان ممكن يقول الكلام ده لو هو ما متاكد اننا شعب ( كرور ) ...
وحقيقة أثبتنا اننا شعب كرور وبهائم ساكت لصبرنا على الحكومة دى طول المدة دى ....
أملنا الوحيد هو فى المعارضة المسلحة ...حتى لو نموت ...ما مشكلة أصلنا ميتين معنويا من زماااان ...واتحرقت كل امالنا فى حياة كريمة بسبب هؤلاء ...فقط تبقى لنا جهة تدعمنا بالسلاح عشان ...نخلى الوالى ده ومعاه بقية المسؤولين يبلعوا كلامهم ده ...حا نقول ليهم استعينوا بالصبر عندما ( .........)


#736461 [حجوج]
3.79/5 (6 صوت)

08-04-2013 03:03 AM
ي جبرا متعك الله بالصحه والعافيه وياكا ذادنا في الغربه م عندك حبه ورع نزيد بيها حلتنا دي


#736458 [المقهورة]
2.07/5 (5 صوت)

08-04-2013 02:57 AM
لقد أضحكتنا أخ الفانح بعد أن وصلنا إلى أبعد حالة من اليأس والإحباط


#736445 [وحيد]
3.57/5 (5 صوت)

08-04-2013 02:05 AM
بالمرة بالله خليهو يشوف لينا السيول دى نظامها كيف ..............هى لله هى لله ...........؟


#736425 [الزهجاااااااااااااااان]
4.38/5 (5 صوت)

08-04-2013 01:31 AM
الخضر قبل كده قال المشاكل العايشينها دي بسبب البحبحة الكنا عايشينها قبل فترة بسيطة ده واحد حرامي سافل الله يورينا فيكم يوم


#736404 [انا إفريقي انا سوداني]
3.00/5 (5 صوت)

08-04-2013 12:58 AM
يااستاذالفاتح قطعت مصاريني من الضحك
ومويةالمطرة دي والينا ما عندو ليها علاج


#736402 [fato]
3.79/5 (6 صوت)

08-04-2013 12:56 AM
الشعب يا جبرة يستاهل الضرب بالجزم ﻷنه سمح للأفاكين مثل الوالي واارئيس قائد مسيرة ااسرقة والنصب المقنن بأن يجلسوا طيلة هذه السنين يخدعوا الناس بكلمات دينية وهم بعيدين ملايين السنوات الضوئية عن هذا الدين فلذا سوف نسمع الكثير حتي نفني من الجوع والحوجة.


#736389 [ود الباشا]
3.75/5 (5 صوت)

08-04-2013 12:19 AM
يااستاذ جبرا سلاح الوالى دا السودانيين ادمنوه من بعد الزعيم الازهرى حتى اكتسب مناعه يعنى كوريات الدم البيضاء بقت ما بتهاجموا خلاص ما منو فايدة وهم ذاااااتم لمن اتحكروا فى السلطة استخدموه السنوات الاولى وقالوا اصبروا وشدوا البطون الى الان الناس شادين البطون لمن ضمرت ..يا استاذنا دا اسلوب العاجزين الجماعه ديل كملوا كل حيلهم فينا وبدوا تااااانى من الاول


#736387 [أيمن الرشيد]
3.00/5 (10 صوت)

08-04-2013 12:12 AM
غربة نفسية
حقيقةً ، انا ومنذ زمن طويل يراودني احساس غريب جداً ، بان الشعب السوداني (الفضل ) اصبح ينقسم الى شعبين او جنسيتين كون انك تكون سوداني هذا شي ، وكون انك تكون سوداني مؤتمر وطني هذا شي آخر . اختلاف تام في التعامل من قبل الدولة تجاه هاتين الجنسيتين (سوداني /سوداني
مؤتمر وطني ) جنسية سوداني كأنما هي تابعيه فقط ، صاحب هذه الجنسية ليس لديه اي حقوق في هذه البلاد .مثلاً :
اذا كنت تسعى لاتمام اي إجراء رسمي او استخراج اي تصديق لانشاء مشروع معين ويجب عليك ان تتوجه الى احدى دواوين الحكومة لاتمام هذه المعاملة التي هي من صميم عمل الدولة ، يجب عليك اولاً ان تبحث في معارفك من هو من اصحاب جنسية سوداني مؤتمر وطني حتي يتكرم عليك بمساعدته في إتمام هذه المعملات ، اما ان طاوعتك نفسك ان تحاول اتمام المعاملة دون مساعدة احدهم وذهبت وانت تحمل التابعية او الجنسية درجه تانيه إذا شئت سميها ، فسوف تعامل معامله درجه تانيه وسوف تواجه مالاقبل لك به من تسويف ومماطلة و(تعال بكرة ) حتى تفقد امل الحياة دعك من ان تحلم بان تقضي معاملتك ، اما اذا كنت محظوظاً ووجدت كفيل من اصحاب الجنسية السودانيه درجة اولى اي احد اعضاء المؤتمر ال(وطني ) بكل بساطة ممكن تتم معاملتك ، ولازم طبعاً تعطي سيدك صاحب الجنسية درجة أولى ثمن الكفالة (قمته) او ( زباله ) — يخسي عليهم هم فعلاً شبه الزبالات — ويجب ان يكون المبلغ مشبع حتى تتمتع بكفاله مستمره وحتى لا يغضب عليك سيدك (ويقطس حجرك) ما انت أصلاً ما عندك حقوق في البلد دي ، ما انت درجة تانيه . لهذه الاسباب وغيرها الكثير المثير من ما يصدر من رجال المرور وجامعي الاتاوات التي ندفعها للاسياد من نفايات لي عوائد وغيرها من الاتاوات التي تدفع ولا تعود بأي نفع على المواطن الدرجة ثانية ، فكر الجميع بسبل المخارجة طالما ان الأمر يقوم على نظام الكفالة أذن من الافضل ان نهرب الى نظام كفالة افضل من هذا النظام المتبع في السودان ويبحث الجميع الان عن بلد آخر ونظام كفالة افضل من كفالة الجماعه إياهم ، اما اذا كان المواطن درجة ثانية من عداد المحظوظين ووجد فرصة للهجرة الى احدى الدول الأوربية او امريكا او كندا او اي من الدول التي يتساوى فيها الجميع في الحقوق والوجبات لا فرق فيها بين (عربي او عجمي ) فهذا هو ( عز الطلب ).


#736382 [ود نفاش]
2.19/5 (10 صوت)

08-04-2013 12:03 AM
فى عام الرماده تغير لون سيدنا عمر من كثرة اكل البصل بالزيت ليشارك المسلمين المسغبة
كان الصحابة يربطون حجرا علي بطنه والمصطفى يربط حجرين
هسع المواطن رابط درداقه من الحجارة والوالي رابط بطيخه ب 50 جنيه
يا جبره الرئيس معتكف يدعو لنا


ردود على ود نفاش
United States [fadeil] 08-04-2013 11:52 AM
يا ود نفاش ، الرئيس ده شوفو ليهو فكي كارب ليعالجه من هذه المحن وبالعدم يحجزوا ليه سرسر عند التجاني الماحي ، قال معتكف قال ، معتكف علي ايه يا البهلول ، هي بقت للآعتكاف .


#736377 [انا]
2.10/5 (7 صوت)

08-03-2013 11:59 PM
ههههههههههههههههههههههههههههههههههههاي


عسل بس والله


لكن لا حياة لمن تنادي


#736375 [shersh]
4.07/5 (7 صوت)

08-03-2013 11:57 PM
الوالى ده بطرى,,,,عشان كدة خطابو ده موجة ليس للبشر.......عفوا للبياطرة


#736371 [RADONA]
2.67/5 (8 صوت)

08-03-2013 11:49 PM
سبق وان صرح وزير بانه ليس هنالك غلاء او ندرة في السلع الميشية
وسبق ان شكر احدهم على صبرة على المعاناة
وسبق ان هدد بناع الموية برفع الدعم عن الماء لان الماء عكران
وسبق لاحدهم ان قال ان الدواليب مليانه قمصان
وسبق ان صرح اخر بان رفع الدعم عن المحروقات لمصلحة الفقراء
واخيرا وصلنا لموضوع الايمان والحمدلله


#736355 [سن ألفيل]
3.75/5 (6 صوت)

08-03-2013 11:24 PM
والله انت تعبان ساي مع اباليس الحكومة والله كلامك ده موحه لكوكب المواطنين فهم في رجاء رحمة رب العالمين اما اذا كان موجه لكلاب الانقاذ تاكد ستصل تلك الرسالة بعد ألف سنة ضوئية


#736354 [yasir abdelwahab]
4.00/5 (11 صوت)

08-03-2013 11:23 PM
ما هو با استاذ انحنا لو قمنا الليل كله حنام النهار كله وبالتالي ما حنحتاج مواصلات..وبي كده المشكلة اتحلت...الريس معتكف وحيطلع بفتوي اهمية صيام الدهر..وبكده بلاش اكل..ادي مشكله تانيه اتحلت...
الجماعه ما مقصرين معاكم بس انتو ما بحمدو ربنا..


ردود على yasir abdelwahab
[ابو كريم] 08-04-2013 06:15 AM
هههههه.... والله انت رهيب يا ياسر
يا استاذ جبرة التعليق براهو بكمل ليك باقي مقالك الجميل .... روعة والله !


الفاتح جبرا
الفاتح جبرا

مساحة اعلانية
تقييم
4.00/10 (15 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة