08-10-2013 02:12 AM

نص كيلو صبر وربع كيلو ايمان

السخانة الغلاء انقطاع الكهرباء الامطار كلها عوامل تكالبت على الشعب السوداني وحاج بله احد المكتوين بنيران هذه الاشياء فاصبحت هذه الكوارث ككل الحوداث التي تحدث في العالم حول السودان فهي كما يحدث في سوريا تقل عنها بعدم وجود قتلة بالسلاح ولكن هنالك قتلة من المرض وهنالك قتلة من الجوع وهنالك قتلة من المطر وهنالك قتلة من القهر وهذا القهر هو الذي يخيف حاج بله ودائما يتذكر نكتة الرجل الذي يخاف من الموت ودائما يسال عن سبب وفاة المرحوم وحين يخبرونه بالسبب ينتقد المرحوم في طريقة موته ويحمله سبب وفاته وفي احدي اسئلته اخبروه بان المرحوم جوا يصحوه لقوه ميت فما كان منه انه الا ان قال: اهو ده ذاته الخائفين منو يعني ما ننوم ؟!!!
على غيرعادته جلس حاج بله امام منزله بوجه مكفهر عبوس هذا العبوس حالة نفسية اصابته مما يراه حوله وعلى التلفز .
لاحظت حاج السرة حالة حاج بله اليوم فهو لم ينطق بكلمة من الصباح وهذه ليس من عاداته علي الاقل معها فهي لا تسلم من لسانه السليط اللاذع وخاصة معها فعياره زائد دائما.
فاصبحت تحدث نفسها (الليلة مالوه صايبوه سد الحنك !!! وقائم مكفراً كده ؟ ما فتح خشمه كعادته معاي وسل لسانه الطويل !!! والله الراجل ده انا خائفة عليه من الجزيرة البقي مصاقرها الليل والنهار دي )
ابتعدت حاجة السرة من حاج بله و ذهبت لكي تحضر قهوته وحتي لا ينفجر فيها فهو اليوم حالته صعبة .
حضر عمران ووجد حاج بله جالس امام البيت وهو يطالع احدي الصحف السياسية و لاحظ عبوس حاج بله حتى انه حين سلم عليه رد من تحت انفه ولم يزيد كما كان يفعل سابقاً بنعته باحدي وكالة الانباء .
استغرب عمران حالة حاج بله ودمه التقيل اليوم وقرر اخراجه من حالة الصمت والعبوس التي هو فيها .
عمران : شنو يا زول الليلة مركب لينا وش الحاصل شنو ؟
حاج بله : وشك بالقطع !!!
عمران : اي يا خي تعرف نحن لو ما سمعنا عباراتك دي الواحد بتكون ناقصهو حاجة .
حاج بله : بالحايل اصلو انت وباك الحكومة الجوه ده جلدكم تخين .
عمران : والله المره دي حا تدخل الجنة بسبب طول لسانك .
حاج بله : يا زول انت ما نصيح انت ما عارف النسوان اغلب سكان النار اسع سمعت ليك يوم بمره ولي .
عمران : كدي خلينا من الكلام ده تقوم تهيج فينا المنظمات النسوية ورينا الليلية مالك مكفراً كده وكمان ماسك ليك جريدة سياسية ؟
حاج بله : ما سمعت الوالي قال شنو ؟
عمران : الوالي منو ؟
حاج بله : والي الكستبانة يعني ح يكون جمال محمد عبدالله الوالي ؟
عمران : اها مالوه ؟ و قال شنو ؟
حاج بله : انت يازول أُمي ؟ ولا ما قاعد تشوف تلفزيون ؟
عمران : يعني قدر ما الواحد يبعدك من كلام السياسة انت مُصّر عليه اها والي الخرطوم قال شنو ؟
حاج بله : نحن القهر والجوع والمطر وارتفاع الاسعار وكل مصائب الدنيا في راسنا وهو سيادته قاعد في برجه العالي وبستهزاء بينا !!!
عمران : كيفين يعني قال شنو ؟
حاج بله : يازول ديل شبعوا لدرجة بقوا يستهزوا بالشعب السوداني كله !!!
عمران : يازول ما حرقت روحنا الزول قال شنو خلاك تهضرب كده ؟!!!
حاج بله : ان شاء الله الهضربة الما تفارقك يا مسنحوح اصلو ديل كان ما ودوه الشعب السوداني كله مستشفي الامراض العصيبة ما برتاحوا ؟
عمران : يا ساتر الشعب السوداني كله ؟
حاج بله : آي الشعب السوداني الفضل ؟
عمران : ههههههه الفضل كيف يعني ؟
حاج بله : يازول بعد ناس زغردي (ام العوير) والناس الماتوا من الجوع والناس الماتوا من الامراض والناس اللي ماتوا من القهر والناس الطفشت من البلد وخلتها ما ياهو الشعب السوداني الفضل ؟!!!
عمران : ههههههه الليلية باين عليك جايبها لينا ضقلها يكركب كدي خلينا في الوالي قال شنو ؟
حاج بله : عليكم بالصبر والايمان .!!! يعني نصبر علي الغلاء والمصائب العملوها دي .
عمران : هههههه المناسبة شنو للكلام ده ؟
حاج بله : كدي خلينا من المناسبة يا زول ده طلعنا نحن لا مؤمنين ولا عندنا صبر.
عمران : وسببه شنو وهو الهبشوا منو عشان يقول كده ؟
حاج بله : ان شاء الله الهبشة تمسكهم من كبيرهم لي صغيرهم .
عمران : يا زول ما تستهدى بالله انت اليوم حالتك صعبة خالص .
حاج بله : هم ديل خلوا فينا حالة !! قال الصبر و الايمان هو انتوا فضلتوا فيها صبر يعني الصبر ده الشعب الفضل ده لو عايز يطبخ ليه حلة يقطع ليها فيها نص كيلو صبر وربع كيلو ايمان وبالعافية عليهم .
عمران : هههه حلوة نص كيلو صبر وربع كيلو ايمان دي ... لكن زولك ده ما بالغ .
حاج بله : بالغ شنو !!! ديل ناس بقوا في برج عالي ما حاسين بحسس الناس قهرت وحالتها تصعب على الكافر ويقول ليهم صبر وايمان !!!
عمران : طيب ما يشوفوا ليهم 30 يونيو ...
حاج بله : يازول انت جنيت 30 يونيو شنو البنفع معانا نحن اليوم ده زاتوه دايرين نمسحو من النتيجة تقول 30 يونيو ، ما شفته المصريين خشمهم ملح ملح .
عمران : تمسحوا عديل ؟
حاج بله : يا زول نحن كنا وين وبقينا وين ، ديل لما جؤا قالوا هم جوا عشان يوقفوا التدهور الحاصل في البلد ، التدهور معاهم ركب صاروخ عابر قارات ما عنده لا فرامل لا بوري .
عمران : ههههههه والله عندك جنس تشبيهات قلت لي لا فرامل لا بوري ؟
حاج بله : انت ما نصيح ده انطلق من 89 باقصى سرعة ياخي ديل لما جوا قال الدولار ده لو ما نحن جينا كان وصل عشرين جنيه اسع الدولار وصل 7000 واكثر ده مش ما عنده فرامل ولا البوري ده بسرعة الضو زاتو.
وصاحبك يقول لينا الصبر والايمان نحن بس نصبر على شنو ولا علي شنو علي الجوع والعوزة ولاعلى الامطار والسيول ؟!!!
عمران : ودي كمان الحكومة دخلها بيها شنو كمان ده ما امر الله ما عندهم فيه يد !!!
حاج بله : ان شاء الله يدك بالقطع ، انت مطرطش ولا شنو ؟
عمران : يا عمك مالك انفعلته ؟!!!
حاج بله : ماياهو جنس كلامك ده المخلي الجماعة ركبو ودلدلوا رجاليهم ، الامطار دي ما قاعدة تجئ كل سنة ليه ما استعدوا ليها بحرف الخيران لتصريف المياه ولا عايزين يكملوا الشعب الفضل كمان ؟
عمران : يكملوا بشنو؟
حاج بله : يازول بكره المياه ده كلها ح تتحول لمستنقعات يتولد فيها البعوض والذباب وهاك يا ملاريا وهاك يا اسهالات وطبعا مافي علاج الا بالقروش والمساكين ديل بيتهم وقعت وهو زاتهم وقعوا من الامراض وكده هم يكونوا خلاصوا من الشعب الفضل .
عمران : والله غايتو خيالك واسع .
حاج بله : صاحبي عطيه رسل لي قصيدة على الوتس اب قصيدة جميلة جداً.
عمران : والله عجيب انت كمان بقت تستعمل الوتسب .
حاج بله : ليه قايلني متخلف ولا شنو ؟
عمران : العفو يا حاج بس اول مرة اعرف عندك وتس اب اها قصيدة عطيه بتقول شنو ؟
حاج بله :
رئيس البلد وينو
لا بان لا طلة
لا زارنا في الحلة
لا شاف وقع كم بيت
لا جاب طحين و لا زيت
لا كفن الميتين
الماتو جوا السيل
لا جابلو طوريا
ساعدنا شد الحيل
واصحبنا نص الليل
ما جانا منك زول
و طلة منك زول
فاطر في كافوري
وشعبك فطوره انين
نايم و تتقلب
وشفع كتار صاحين
متوسد الموكيت
وشعبك راقد في الطين
لاك البفرج الهم
ولاك العلينا امين
ولاك البجير المظلوم
ساعة تدوربو سنين
لا بتنجد المسكين
لاك العلينا حنين
اسع كان تصويت
او حتى انتخابات
كان جيتنا تترقص
تقدل مع الخايبات
خاميها مليارات
وراكبها عريبات
وعاديها سفريات
عصابة شلليات
ونحن لينا الله
عادنها بس بكيات
لا علاج و لا تعليم
لا سكنه زي الناس
احلامنا زي ركشات
وساكانا دوم كشات
لا قروش ولا كاشات
شعبك مرق بلبوص
لا خلقة لا اخلاق
لا عمه لا مركوب
لا لحمه لا طايوق
شعبك مرق ماينص
وحشاهو دوم محروق
صابر وعايش الويل
ما نصو في الغربة
والباقي شالو السيل
اها مش قلت ليك الشعب السوداني الفضل ؟!!!
عمران : لا حول ولا قوة الا بالله انت الليلة عايز تودينا في داهية مش قلت ليك اليوم دمك تقيل ودعتك الله
حاج بله : عالم جبانة بشكل !!!
عمران : يازول الخوف ربه عياله .
حاج بله : هههه مع السلامة يا رجافه . لكن ما بالغته يا عطيه

طارق حامد
[email protected]





تعليقات 0 | إهداء 0 | زيارات 1217

خدمات المحتوى


طارق حامد
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة