08-18-2013 12:17 PM



إنه ليسعدني إعادة نشر هذه الخواطر لنقارن فيما بين أبالسة الإنقاذ...تجار الدين...وموقفهم المخذى والمشين من مأساة السيول والأمطار الأخيرة وتكالبهم على الدنيا، وإستغلالهم للدين كأسوأ ما يكون الإستغلال فى سبيل مكاسب دنيوية زائلة، وبين رجال الدين الحق كالأستاذ الشهيد محمود محمد طه، رحمه الله رحمة واسعة وجعل قبره روضة من رياض الجنة.وكنت قد كتبت هذه الخواطر بمناسبة مرور ربع قرن على تعليق الفكر على أعواد المشانق، لأول مرة فى تاريخ السودان الحديث، وبمناسبة إستشهاد الفارس الأستاذ محمود محمد طه فى 18 يناير 1985، وأهديها الى روحه الطاهرة فى عليائها.




يوم اتهانت الأوطان
واتذلينا لى المابسوى
و المحتل جا... لى... السودان
داك أمريكى...
داك بريطاني...
داك ألمانى...
داك بنغالى...
و أيضا شادى...
و كمان بى غادى
جو الطليان
...
يوم أحتلت الأوطان
يوما أسودا بلحيل
يوم إتسيدو الطالبان
جابونا الهوان و الذل
يوم أصبحنا مكروهين
محل ما نمشى...
وين ما كان...
....
ذل وهوان...
ما شفناهو طول تاريخنا
إلا تحت نظام طالبان
يومت كنا مطامنين
و عايشين فى أمن و أمان
رافعين راسنا...
ما هامينا إيش ما كان
وكان فد زول جانا دخيل
بيتبهدل جنس بهديل
بيلقى أسود...
رجال من أشجع الشجعان
....

عمركم شفتو يا إخوان
يوم إختلت الأوزان
و الحاكم صبح محكوم
غصبا عنو مو رضيان
وكان فد زول ...
"فتح لى خشمو"
ديك زنزانة...
و بيوت أشباح...
جنبها "دروه"...
و الموت ديمه بالنيران
...
بعد ما كنا محروسين
بى فقرانا بالقرآن
خلاويهم تسارى الليل
ديمه تضوى للضهبان
....
صبحنا الليلى محروسين
بى ناسن كتار.. و.. أغراب
من وين جونا مو دارين
بلدانا بعيدى خلاس
فيها إيران...
و كازخستان...
و باكستان...
و شوية أفغان...
الكل جايي بإسم الدين
يدافع عن نظام طالبان
....
قالونا بنقيم الدين
و نعلن دولة الإيمان
تاريهن أقاموا الويل
و أعلنوأ دولة السلطان!!
....
عمركم شفتو يا إخوان
بلدا قام وقف لاحيلو
يوم إتسيدو الطالبان ؟؟!!
...
عمركم شفتو يا إخوان
بلدا ماشى لى قدام
و كان محكوم من الطالبان ؟؟!!
...
عمركم شفتو يا إخوان
بلدا علم أولادو
و كان ماسكنو ناس طالبان ؟؟!!
...
عمركم شفتو يا إخوان
ناس طالبان.. وناس *****
يومت كنا محروسين
بى ناسا يقيمو الليل
أخلاقن من القرآن
ناس محمود محمد طه
رجال من أشجع الفرسان
...
يومت جوهو ناس أغراب
عن الأوطان...
يومت جوهو ناس أغراب
عن السودان...
يوم قالولو...
إرتديت عن الأديان!!؟؟
كان يوم عرسو...
فوق إيمانو زاد إيمان
...
هن قايلين...
يوم قالولو...
إرتديت عن الدين
قايلين عاد قناتو تلين
مو قايلين...
يومت أعدموهو خلاس
عاد يوم داكا دخل الدين!!
دخل لى جنة الفردوس
لقا أبوابا مفتوحات
وكل حبانو يجرو يمين
...
ديل فرسانا يا إخوان
ديلا بيحرسو السودان
زهادا يقيمو الليل
يقرو يرتلو القرآن
...
مو ناس دنيا متهافاين
و لا ليهن تجارة دين
تلقاهم دوام صادقين
بيلحقو ديمه للملهوف
و للمغبون دوام لاحقين
ناسن ديمه مهمومين
بى هم الناس... وهم الدين
...
ناسن كيف عزاز شجعان
ناس بيشرفو السودان
يمين بالله كان مو ديل
و فارسنا الدوام "محمود"
كان إتيتم السودان !!؟؟

ابراهيم الكرسني
5/1/2010

[email protected]

تعليقات 6 | إهداء 0 | زيارات 1763

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#747708 [الكلام ببلاش]
4.16/5 (11 صوت)

08-19-2013 06:51 PM
داك أمريكى...
داك بريطاني...
داك ألمانى...
داك بنغالى...
و أيضا شادى...
و كمان بى غادى
جو الطليان
----------------

ماذا يكون رايك لو قلنا لك ان مدعي العروبة بالسودان ليس لهم جذور بالسودان؟
هل يا ترى تستطيع اضافة (ناس سقط لقط) الى القائمة الشعرية؟

فما معنى سجعك واقحامك لتشاد؟

انت اقدم ولا التشاديين في السودان؟؟

وبغادي دي شنو؟

كلامك اعدلا او ترجا تسمعا؟؟


#747028 [الفنجري]
4.14/5 (13 صوت)

08-19-2013 12:51 AM
الكرسني كلامو فيهو جفا شوية خصوصاًالتشاديين ماغريبين علينا وكتير مننا حبوباتن تشاديات لكين مافينا واحد حبوبتو بنغالية ... عاد يمكن الكرسني قال (وأيضاً شادي) لضرورة شعرية، لكين برضو ما ليهو حق ..التشاديين بشبهونا في لونن وسحنتن وكلامون وأصلا تشاد والسودان بلد واحد لوما الإستعمار قسما.


#746993 [هدهد]
4.13/5 (11 صوت)

08-18-2013 11:02 PM
الفقدناه كثير يا دكتور الكرسنى فى عهد الكيزان . فقدت ارواح عظيمة ونفوس بريئة دماء سالت بدون ذنب وشباب احرقوا فى حرب انتهت بتقسيم الوطن واتفاقيته الاستسلامية مردودة على الكيزان جميعا . أخى آمل ان تمدنى بعنوان الاخ محمد على الكرسنى والذى لم اجد له عنوانا منذ نهاية السبعينيات بالمرحلة الثانوية بمدينة ود مدنى


#746962 [الساكت]
4.19/5 (6 صوت)

08-18-2013 09:50 PM
الأستاذ الفاضل إبراهيم الكرسني .. شن جاب البنغلاديشي والأمريكي للتشادي؟ التشاديين أخوانا وأشقاءنا بحق وحقيقة (بدون دغمسة) رضينا أم أبينا وقصيدتك كان تكون كويسة لو شلت منها هذه الأفكار المزاجية القديمة دي ... عشان نعرف الفرق بينها وبين أفكار الكيزان.


#746929 [الكلس]
4.16/5 (7 صوت)

08-18-2013 08:07 PM
شكر الله لك أخ ابراهيم الكرسني .. قصيدة عصماء .. لكن الشادي مننا وفينا غير البنجلاديشي والألمناني والأمريكي فهؤلاء يعتبروا أجانب والشادي ماهو أجنبي في بلدو السودان .


#746925 [الكلس]
4.12/5 (8 صوت)

08-18-2013 07:56 PM
التحية لك أستاذنا الكرسني وخواطرك جميلة ولكن إستوقفتني عبارة (وأيضاً شادي) فإن كنت تعني بها(تشادي) فأنت مخطيء وكلامك فيه تجريح لكثير من القراء وبالتحديد أبناء دار فور لأن تشاد جزء من السودان وهي امتداد لدارفور كما أن جميع سكان دارفور (ماعدا ثلاث قبائل) هي قبائل مشتركة بين تشاد والسودان .. ومن هذا المنطلق فإن كلامك ينطوي على عنصرية نتنة وكريهة وأرجو أن أكون مخطئاً.


ابراهيم الكرسني
ابراهيم الكرسني

مساحة اعلانية
تقييم
9.01/10 (14 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة